Salicay no Miˈosiay Tamdaw
Itini kohkohan, o mana ato tikolac ko mikaenan no Israil, iraayho ko romaroma kakaenen nangra han?
40 mihecaan ko Israil itini i kohkohan a malafel, o mana ko kalimlaan a kakaenen nangra. (Kasadakan 16:35) Kinatosaay ci Yihofa mitefad to tikolac malo kakaenen nangra. (Kasadakan 16:12, 13; Saˈosi 11:31) Cowa koninian aca, iraayho ko romaroma malo kakaenen no Israil.
Nolatekay, patayraan ni Yihofa ko Israil tamdaw i ‘pahanhanan a kitiraan,’ ngangaˈay cangra itira mikilim to nanom ato kakaenen. (Saˈosi 10:33) O cecay katayraan nangra a pala i, o Ilim hananay, ‘itira iraay ko 12 a nemnem, 70 a tapangan no ˈafinong.’ (Kasadakan 15:27) O Pinaloma i Lalintadan no Fangcalay Cudad (no Padaka) sanay konini cudad, o ˈafinong i, “matenakay icowacowa a kilac, itini kohkohan o kalimlaan a kakaenen konini, hato iraay ko simal ato kakaenen no pinaay soˈot ˈofad a tamdaw, hanaca o pikilidongan to cidal ato ˈorad.”
O Israil tamdaw na tomerepay itini a pacafer tonini Feran hananay anini a pala. Tada kakahaday konini a pala, o maˈicangay ‘fideloan no Feran.’ a Sanay ko cecay pinengnengan a cudad, onini a fideloan 130 kongli ko kakoˈedaw, tada o makapahay a pala, o masowalay i Sinay kilac konini pala. Sanayho ko sowal nonini cudad: “Mikitini i sacomod nonini fideloan maedeng 45 kongli, tangasaay tonini 4.8 kongli ko kakayaˈ a Feran a pala. Nai dafdaf maedeng 610 kongce ko kaˈakawang nonini pala, matahepoay no kidemolay ˈafinong, o Itin palosayan no Sinai kilac. Pinaay caˈol a mihecaan tahanini, onini masacaˈolay masaˈofaday a ˈafinong misolotay to ˈalomanay tamdaw a tayra.”
Itiniay i Feran cinanomay a pala a ˈafinong.
Ta miliyas to Icip i, mihawikiday ko Israil tamdaw to alitad no emi ato pilonican a kapowa, latek mihawikiday to simal ato kakaenen, ora mihawikidan nangra a kakaenen maedeng kalikiay a maemin. Mihawikidayho to ‘adihayay kolong ato siri’ a miliyas to Icip. (Kasadakan 12:34-39) Nikawrira, o kaˈorip itini kohkohan tada tadancaay, malowan malowanayto konini a pinaˈorip. O roma i, makaenayto ko pinapina a pinaˈorip, romaroma latek malo sapatoˈaya patafang ci Yihofaan, anoca patafang to makaniway kawas. b (Dmak 7:39-43) Kawrira, maedeng adihayay ko mipahafayan no Israil a pinaˈorip. Mikitini to nano sowal ni Yihofa toya misafelitay Cingranan a Israil tamdaw a mahapinang konini, sanay Cingra: ‘O fofofofo namo aitini kohkohan mipalenak to pinaˈorip to 40 mihecaan.’ (Saˈosi 14:33) Mankora, minanomay cangra to hacol nonini pinaˈorip, ato titi namira. Kawra cowa ko mamaedeng ko 300 ˈofad a Israil tamdaw komaen to 40 mihecaan. c
Hatini ko kaˈaloman no pinaˈorip aicowa miala to nanom ato kakaenen hani? d Itiyaay a kohkohan, ikakaayho to aniniay a matefad ko ˈorad, mansa adihayay ko malengaway a pinaloma. Sapicalep Mafanaˈ to Fangcalay Cudad, Saka 1 sanay ko sowal: “ˈAyaw no 3,500 miheca o nanom itini Arapiya a kilac ikakaay ko nika adihay to aniniay. Soˈlinay haw i, nengnengen ko kaˈangongol no maˈicangay ˈalo i, maedeng adihayay ko nanom no ˈorad itiya, hato masaˈaloayto konini saowac.” Soˈliˈlin hatira, o kohkoh hananay i, kamayan o maˈicangay ato katalawan a pala. (Limoˈot 8:14-16) Ano cowa ko ci Yihofa ko midemakay to kafahkaˈan i, o Israil tamdaw ato pinaˈorip nangra maedeng mamapatay to nika soˈaw.—Kasadakan 15:22-25; 17:1-6; Saˈosi 20:2, 11.
Pasowalan ni Mosi ko Israil tamdaw, pafelien ni Yihofa cangra to mana malo kakaenen, ‘o sapasifanaˈaw [cangranan], maˈorip ko tamdaw cowa ko pitiˈer aca to kakaenen, o mamitadiˈecho to kahacecay a sowal ni Yihofa.’—Limoˈot 8:3.
a Nengnengen ko Mikecolay Saka 5 Folad 1, 1992, saka 24-25 fiedac.
b Kinatosaay somowal ko Fangcalay Cudad itiniay i kohkohan ko Israil patoˈaya ci Yihofaan. Sakinacecay i, itiniay i pipatirengan to saysi, sakinatosa i, itiniay Pitaˈlifan a Lisin. Iˈayaway no Kongyen 1512 miheca konini tosa a demak, itiyaay i saka tosa mihecaan no piliyas no Israil to Icip.—Lifi 8:14–9:24; Saˈosi 9:1-5.
c To mamaherek ko 40 mihecaan i, o maˈafasay no Israil i piloodan a pinaˈorip pinaay poloˈ a ˈofad. (Saˈosi 31:32-34) Soˈliˈlin hatira i, itini ˈayaw no mamicomod cangra to Mikiˈokan to papafelien no Kawas a Sera i cangranan, papadadotocho cangra komaen to mana.—Yosuwa 5:10-12.
d Maedeng cowa ka komaen ko pinaˈorip to mana, samanen o Israil tamdaw aca ko palimoˈotan ni Yihofa, papipodpod to hakakaenen a mana no kahacecay tamdaw.—Kasadakan 16:15, 16.
