1-2. (1) Kita atoya minokayay tayra i Yirusalim a Yutaya tamdaw misiˈayaway to maanan malecaday a pasangaray? (2) Kantangen mitadtad ko masiˈayaway no Yutaya tamdaw a sapalifet. (Nengnengen ko sapatongal lalakaw “ Lintad ni Hakay, Cikariya aci Icra.”)

 LATEKAY cariraway kiso to hanoikoran han? Malahdaway ko tayal iso alatek, calemcemay cowato ka ngaˈay paririˈ ko niyah to paro no lomaˈ. Alatek itini kitiraan iso a kilac, masasifoday ko mirikecay, micadaay to sapalak ato saroero no sifo ko Misawacayay Tamdaw ni Yihofa anca makecengay ko mitosilay a tayal, hato calemcemay to rihaked no paro no lomaˈ alatek. Ano misiˈayaw kiso nohatini to masowalay i fafekang a pasangaray, minengneng to samaanay ci Yihofa padama to nolitengan a Israil tamdaw miremo to malecaday a pasangar, maedeng o tataˈangay ko sapakalalok tisowanan.

² Pakaynien i halafinayto maˈorip i Papilon a Yutaya tamdaw, tada misaaliay cangra to tanektekay a pakasoˈlin ngaˈ misawad to sinowayay a nokaˈorip, tayra i kafahalan no ˈalomanay tamdaw a pala. Minokay cangra tayra i Yirusalim caka halafin mamisiˈayaw to kacangoˈot no sakaˈorip, o kasasifod no mirikecay ato pisafelit no ˈada. Telocto, o romaroma tamdaw pasangaray misarocod ko falocoˈ mirienang to patirengay to fangcalay sefi a tayal. Mihaenay, maedeng itini ˈAyaw no Kongyen 520 mihecaan, miocoran ni Yihofa ci Hakay aci Cikariya oniya tatosaay pairasolay pakalalok cangranan, padama cangranan miliyaw fanekfek ko falocoˈ. (Hakay 1:1; Cikariya 1:1) O sapakalalok noniya tosa pairasolay iraay ko ngaˈayay a minaroˈan. Kawra mataˈlif ko 50 miheca ikor, itiniay i Yirusalim a Yutaya tamdaw miliyaway aca matoled ko falocoˈ. Itiya, oya mananamay mitatilid to Fangcalay Cudad a Icraan mikitini Papilon minokay tayra i Yirusalim, pakalalokan ningra ko finawlan no Kawas miliyaw paisalakat i nokaˈorip to matatodongay a pidoko.—Icra 7:1, 6.

3. Onini lalakaw papacaˈof to maanan a salicay? (Taneng 22:19)

 ³ Itini nolitengan, milasilan ni Hakay aci Cikariya a lihaf padamaay to finawlan no Kawas, tahasiˈayaw cangra to pisafelit padadotocay a mitiˈer ci Yihofaan. Anini, onini a lihaf papadama kitanan tahasiˈayaw to pades i, padadotoc a mitiˈer ci Yihofaan. (ˈOsien ko Taneng 22:19.) Dotoc nengnengen ita, pakaynian no Kawas ci Hakayan aci Cikariyaan a sapalihaf to Yutaya tamdaw, ato taˈarawan ni Icra. O lalakaw papacaˈof to ilaenoay salicay: O pasangar itini nokaˈorip no minokayay i nalacolan a Yutaya tamdaw iraay ko masamaanay a noka pifiyor? Ano tahasiˈayaw kita to pasangar i, misamaanay hano papadadotoc a paisalakaten ko araaw no Kawas itini nokaˈorip ita? Tahapades i, sasamaan kita paˈicel to nika pakasoˈlin ci Yihofaan hani?

4-5. O maanan a pasangaray ko mikidatay to sakaecaawto ka fanekfek ko falocoˈ no Yutaya tamdaw miliyaw patireng to fangcalay sefi?

⁴ O patikolay minokay i Yirusalim a Yutaya tamdaw adihayay ko tatayalen a demak. Kalikiay a mapatireng nangra ko pipatoˈayaan ci Yihofaan, patirengayho to taˈeneran no fangcalay sefi. (Icra 3:1-3, 10) Kawra isalakatay a faedet no falocoˈ nangra kalikiay a mafasaw. Misamaanay hani? Samanen cowa ko papatireng aca to fangcalay sefi, o papatirengho to lomaˈ no niyah, maomahho a mipaloma, paririˈ to paro no lomaˈ. (Icra 2:68, 70) Roma i, pakidemay ko pisafelit no ˈada cangranan, sapicongedaw to pipatireng to fangcalay sefi.—Icra 4:1-5.

⁵ O minokayay i nalacolan a Yutaya tamdaw mafiyoray no kacangoˈot no sakaˈorip, mafodifoday a mirikecay no kitakit. O kamaroˈan nangra a sera nohatini ono Pirsiya a Kitakit. ˈAyaw no Kongyen 530 mihecaan, Hongti no Pirsiya ci Kirus mapatayayto, ci Kanpisis ko midotocay a mala Hongti. Ikor sapiloodaw ci Kanpisis to Icip, itini pilood ningra to Icip a lalanan, o sofitay ningra alatek pasayraay to Israil tamdaw misaali to nanom, kakaenen ato pikilomaˈan. Maedeng mitongalay to ˈinorong no Yutaya tamdaw konini. O midotocay ci Kanpisisan i, ci Taliyus, itini saˈayaˈayaw noka pikowan ningra, o Pirsiya Kitakit cowa ka keton ko mitowakangay a demak, tada mafodifoday ko mikowanay a pakayraan. O mahaenay a demak maedeng adihayay ko calemcem no Yutaya tamdaw to sasamaan a paririˈ to paro no lomaˈ. Pakayni tonini masakenakenaay a pasangar, cowaho ko toki nohatini patireng to fangcalay sefi ni Yihofa, sanay a miharateng ko romaroma Yutaya tamdaw.—Hakay 1:2.

6. Misiˈayawayho ko Yutaya tamdaw to maanan a pasangaray hani? Mikiˈokan ni Cikariya cangra to maanan hani? (Cikariya 4:6, 7)

⁶ ˈOsien ko Cikariya 4:6, 7. Cowa aca ko kacangoˈot no sakaˈorip ato fodifod no mirikecay pakayraan, mamisiˈayawho ko Yutaya tamdaw to sapalak ato saroero. ˈAyaw no Kongyen 522 mihecaan, miˈowingan no ˈada ko hongti milasil to sakeceng, miconged to Yutaya tamdaw padadotoc patireng to fangcalay sefi ni Yihofa. Kawra mikiˈokan ni Cikariya ko Yutaya tamdaw, o tatano ciˈicelay fangcalay saocor ci Yihofa miwanik to sacoˈay. ˈAyaw no Kongyen 520 mihecaan, o Hongti ci Taliyus palasawadan ningra konini sakeceng, ho ngaˈayto padadotoc ko Yutaya tamdaw mipatireng to fangcalay sefi ni Yihofa. Pafelianho ni Taliyus cangra to payci, hanaca palimoˈotan ko itiraay tapatapang mipadang cangranan.—Icra 6:1, 6-10.

7. Isalakatan no Yutaya tamdaw midemak ko tayal ni Yihofa, ikor milifokay to maanan a sapalemed?

 ⁷ Pakaynian ni Yihofa ci Hakayan aci Cikariyaan mikiˈok ko Israil tamdaw, edeng ano paisalakaten nangra ko patirengay to fangcalay sefi a demak i, o dadamaen ni Yihofa cangra. (Hakay 1:8, 13, 14; Cikariya 1:3, 16) Makowaday no pairasolay ko Yutaya tamdaw, itini ˈAyaw no Kongyen 520 mihecaan, miliyaw misatapang patireng to fangcalay sefi. Caay pakaala to lima miheca, malahciayto ko patirengay to fangcalay sefi a tayal. Soˈliˈlin tahalifa ko Yutaya tamdaw to pades,  isalakatan nangra milahci ko tayal ni Yihofa, hato midimokosanto ni Yihofa ko sakaˈorip ato noˈadingoan nangra. Telocto, lipahakayto cangra midoko ci Yihofaan.—Icra 6:14-16, 22.

8. Hakay 2:4 samaanay padama kitanan paisalakat to araaw no Kawas i nokaˈorip hani? (Nengnengen ko sapatongal lalakaw.)

⁸ Mafanaˈay kita, mitenakay to ngaˈayay lihaf a tayal mikikakaay to itiyaayho ko nika caloh, samanen mangata mangataayto ko taˈangayay padiing. (Marko 13:10) Kawra ano tahalifa to kacangoˈot no sakaˈorip, anca macada ko pisafelit i, papasangaren kita misarocod to mitosilay tayal alatek. O maanan ko papadama kitanan paisalakat to Hongti Kitakit no Kawas hani? Papakasoˈlinen ko ‘kakeridan no ikakarayanay a sofitay a Tapang ci Yihofa’ b mikapotay kitanan. Ano isalakaten ita micangacang ko Hongti Kitakit Ningra eca ko sakangaˈay no niyah i, o mamidama Cingra kitanan. Cowa ko mamatalaw kita!—ˈOsien ko Hakay 2:4.

9-10. O cecay mararamoday samaanay matinako ko Matay 6:33 a sowal to soˈliˈlinay hani?

⁹ Nengnengen ko nalifetan ni Olayke aci Ilina. c Malacafayay cangra mala misakafahay, malinahay tayra i roma a kilac padama to cecay kasakopang, tona tatiih tatiihay ko pakapayciay a pakayraan no kitakit nangra, malahdaway ko katayalan, maedeng cecay miheca cowa ka adihay ko maetanay a payci. Kawra marariday a malifet nangra ko kaciharateng ni Yihofa ato pidama Ningra, nolatekay macadaay nangra ko sapadama no salikaka. Soˈlinay haw i, satapang calemcemay ci Olayke, cingra ato fafahi samaanay misiˈayaw to mahaenay a pakayraan hani? Padadotocay micerid a mitosil cangra, halo mikilim to katayalan. Sanay ko sowal ni Olayke: “ˈIfowa a matayal to mitosilay padamaay tamiyanan misamacay to masakalimlaan a demak.”

 ¹⁰ Cecay romiˈad tahalomaˈto na mitosil cangra, sowal no fiyaw iraay ko cecay widang nangra mikitini i 160 kongli ko karaay tayni mihawikiday to tosa lofoc a kakaenen ato romaroma a dafong. O sowal ni Olayke: “Tora romiˈad, miliyaw haca malifet niyam ko tangongolay a olah ni Yihofa ato salikaka tamiyanan. Pakasoˈlinay kami, o midokoay ci Yihofaan a tamdaw soˈlin hato awaayto ko sakaˈorip a nengnengen, cowa ko mamapawan ci Yihofa cangranan.”—Matay 6:33.

11. Ano misarocod kita midemak to tayal no Kawas i, mamilifok to maanan?

¹¹ Halamhamay ci Yihofa kitanan misarocod to milidongay to ˈorip a tayal, padadotoc padama to tamdaw malo nisawawaan ni Kristo. Somowalay i  saka 7 fatac, pakalalokan ni Hakay ko finawlan ni Yihofa miliyaw a patireng to fangcalay sefi. Ano mihaen to demak cangra i, mikiˈokay ci Yihofa to papalemed cangranan. (Hakay 2:18, 19) Kita i, papakasoˈlinen ano isalakaten ita midemak ko patorodan ni Yihofa kitanan a tayal, o mamilifok to sapalemed ni Yihofa.

12. Ci Icra ato romaroma Yutaya tamdaw hano mamisaali to tanektekay a pakasoˈlin no falocoˈ hani?

¹² ˈAyaw no Kongyen 468 mihecaan, ci Icra ato saka 2 kasacefang no Yutaya tamdaw mikitini i Papilon minokay i Yirusalim. Tada misaaliay cangra to pakasoˈlinay falocoˈ, samanen onini a lalan masakatalawan. Mihawikiday cangra to adihayay a ekim ato linkim sapatafang ci Yihofaan, onini mamadolo a maˈafas no tohoy cangra. (Icra 7:12-16; 8:31) Roma i, halikiay mahapinang nangra awaay ko hakangaˈayan i Yirusalim. Matakalay ko tamdaw itira, o lowil ato ˈadawang no lowil mapelalay. To sapaˈicelaw to pakasoˈlin ci Yihofaan, ngangaˈay kita mikitini ci Icraan minanam to manan hani?

13. O nika pakasoˈlin ni Icra ci Yihofaan samaanay a mapatireng hani? (Nengnengen ko sapatongal lalakaw.)

¹³ Maˈaraway ni Icra to samaanay ci Yihofa midama to finawlan no Niyah mitaˈlif to kapasangaran. ˈAyaw no Kongyen 484 mihecaan, Hongti ci Kirkis palimoˈotay to papalaˈafoen ko polong a Yutaya tamdaw i lalomaˈ no Pirsiya Kitakit, itiya ci Icra itiniay i Papilon ko aroˈ alatek. (Istir 3:7, 13-15) Ci Icra ato finawlan ningra mamisiˈayaw to tada katalawan! Itini pisiˈayaw tonini katalawan, o icowacowaay Yutaya tamdaw misaliwayay, tomangicay cangra, maedeng mitolonay ci Yihofaan micangacang to sakayat Ningra. (Istir 4:3) Kawra ikor talifahal sanay a masafafelit ko pakayraan, nohatini oyato a sapipatayaw to Yutaya tamdaw ko papatayen. Haratengen hena, itiya ci Icra ato finawlan samaanto ko piharateng nangra hani? (Istir 9:1, 2) Onini malifaay ni Icra i saˈayaw a sapalifet, maedeng papadama cingranan misongilaˈ a misaday to ikoray a sapalifet, alatek paˈicelay to pakasoˈlin no falocoˈ ningra, pakasoˈlin ci Yihofaan to iraay ko ˈicel Ningra midipot to finawlan no Niyah. d

14. O cecay fafahiyan salikaka itini kapadesan milifokayto to sapadama ni Yihofa, ikor mananamay ko maanan a kimad?

¹⁴ Itini kapasangaran ita malifok ko sapadama ni Yihofa i, o mamatongal ko pakasoˈlin Cingranan. O fafahiyan salikaka ci Anastasiya itiniay i Iwropa ko kitiraan, to sapisatenokaw to saaroˈan misawaday to katayalan. Sanay cingra: “Itiya, awaayto ko payci ako. Cowaho ka malifa ako ko mahaenay a demak. Patorodan ako ko demak i kamay ni Yihofa, matinakoay to samaanay Cingra damsay a midimokos takowanan. Noikor, ano miliyaw haca malahdaw ko katayalan ako i, cowa ko mamatalaw kako! Anini midipotan no kakarayan Wama kako, pakasoˈlinay kako anocilato i, o dadimokosen Ningra kako.”

15. Samaanay ci Icra paˈicel to nika pakasoˈlin no falocoˈ ci Yihofaan hani? (Icra 7:27, 28)

¹⁵ Mahapinangay ni Icra ko nika padama ni Yihofa.  Tikolen ni Icra miharateng to samaanay ci Yihofa padama cingranan, maedeng paˈicelay to pakasoˈlinay falocoˈ ningra konini. Sanay ko sowal ningra: ‘Ci Yihofa Kawas no mako mipadangay takowanan.’ (ˈOsien ko Icra 7:27, 28.) Itini nitilidan ni Icra a cudad, kinaenemay somowal to malecaday a sowal.—Icra 7:6, 9 ato roma pihongyak; 8:18, 22, 31 ato roma pihongyak.

16. Itini maanan a pakayraan, wa ihkal a mahapinang ita ko pipadama ni Yihofa kitanan? (Nengnengen ko coka.)

¹⁶ Misiˈayaw kita to pasangaray ngangaˈay ci Yihofa mipadama kitanan. Tinakoen, pakayni to sapirienangaw to taykay, latek pasowalen ko tawki to papahanhan to pina romiˈad kita. Anoca, sapirienangaw to polong a saˈopo, latek saalien ko tawki mifalic to katayalan a toki ita. Itiya i, mamaˈaraw ita ko nika pipadang ni Yihofa kitanan. Alatek fahkaˈen a mahemek kita to minaroˈan nora demak, mihaen i, mamatongal ko pakasoˈlin no falocoˈ ita ci Yihofaan.

17. Taˈangay ko saroero ni Icra i, samaanay patalahkal cingra to misapoeneray a falocoˈ? (Nengnengen ko papotalay coka.)

¹⁷ Misapoeneray ko falocoˈ ni Icra micangacang to sapadama ni Yihofa. Ano taˈangay ko saroero ni Icra to nika ˈareteng no ˈinorong i, misapoenerayto cingra mitolon ci Yihofaan. (Icra 8:21-23; 9:3-5) Maˈaraw no romaroma tamdaw ko nika pitiˈer ni Icra ci Yihofaan i, masemeran nanay ko falocoˈ, sapidamaawto cingranan a mitodong to pakasoˈlinay falocoˈ ningra. (Icra 10:1-4) Ano calemcemay kita pakayni to sakaˈorip ato sakarihaday no paro no lomaˈ a taˈangay ko saroero, itiya i, pairaen ko pakasoˈlinay falocoˈ mitolon ci Yihofaan.

18. Sasamaan ko pidemak ita ngaˈ papaˈicel to pakasoˈlin no falocoˈ ci Yihofaan?

¹⁸ Ano misapoener ko falocoˈ ita micangacang ci Yihofaan i, halo micada to sadama no salikaka, o nika pakasoˈlin ita ci Yihofaan mamatongalto. Ci Aylika tatoloay ko wawa a wina, soˈlin tahalifaay to karetengay a pasangaray, kawra kamayanay a tanoktok ko pakasoˈlin ci Yihofaan. Itini ˈapotoay a tatokian, tatootoor sanay ko pasangaray a demak, makatiihay ko itiyaday a wawa ato mapatay ko faˈinay. Tikolen a miharateng koya kapasangaran a romiˈad i, sanay ko sowal ningra: “Cowa ka fanaˈ kiso to sasamaan padama ci Yihofa tisowanan. Cowa ka harateng iso ko pakayraan Ningra padama tisowanan. Mahapinangay ako, pakaynian ni Yihofa i widang, o sowal nangra ato nidemakan nangra a pacaˈof to adihayay satolon ako. Ano fowahen ako ko falocoˈ i widang i, mamadoloto cangra padama takowanan.”

19-20. Mikitini toya cowa ka ngaˈay minokay i Yirusalim a Yutaya tamdaw mananamay ita ko maanan hani?

¹⁹ Ngaˈayay minanam kita toya cowa pinokay i  Yirusalim a Yutaya tamdaw. Latekay pakayniay i matoˈasayto ko mihecaan, pakidemay ko adada, anoca o pakayraan no paro no lomaˈ cowa ka ngaˈay minokay, kawra makahiay cangra mipakiyaho mipadang toya minokayay a tamdaw. (Icra 1:5, 6) Maedeng ikor no 19 mihecaan, ya materekayho i Papilon a Yutaya tamdaw, kamayan mahecad i saˈayaway makahi pakiyaho to saki fangcalay sefi.—Cikariya 6:10.

²⁰ Cowa ka hakowa ko midemakan ako saki Yihofaan ano saan a miharateng kita i, aka calemcem kita, ano misarocoday ko falocoˈ ita pakahemek ci Yihofaan, cowa ko mamapawan Cingra. Hano mafanaˈ kita hani? Mikitini to sapalimoˈot ni Yihofa ci Cikariyaan mahapinangay ita konini. Itiya i, pasowalan ni Yihofa ci Cikariya tano sapafeli no Papilon to Yutaya tamdaw a ekim linkim misangaˈ to cecay a tamohong. (Cikariya 6:11) Onini ‘makapahay a tamohong’ o ‘sapiharateng’ to nika hinapaladaˈ nangra a pakiyaho. (Cikariya 6:14 ato roma pihongyak.) Mankora, ngaˈayay pakasoˈlinen ita, itini kapadesan misarocod kita to falocoˈ a matayal saki Yihofaan i, cowa ko mamapawan ci Yihofa.—Hipray 6:10.

21. Sasamaan ko pidemak ita ngaˈ ira ko pakasoˈlinay falocoˈ misiˈayaw to noikoran hani?

²¹ Itini salikoray a lintad, mamisiˈayaw kita to masakenakenaay a pasangaray, alatek pakidem ko katatiih no pakayraan noikor. (2 Timoti 3:1, 13) Kawra, hamaan a pakidem a cariraw. Haratengen koya pakaynian ni Yihofa ci Hakayan a sowal to finawlan Ningra, sanay Cingra: ‘Mamikapot Kako tamowanan . . . Aka ka talaw kamo.’ (Hakay 2:4, 5) Mihaenay i, ano misaˈicel kita midemak to tayal ni Yihofa, papasoˈlinen ita to mamikapot ci Yihofa kitanan. Mikitini milasilan ni Hakay aci Cikariya a lihaf ato ngaˈayay taˈarawan ni Icra, mananamay ita ko kalimlaan a kimad. Saˈicelen ita misaka dademak, mihaen i, ano o mananto ko mamasiˈayaw a sapalifet noikor, wa ngaˈay kita padadotoc tanektek ko pakasoˈlinay falocoˈ ci Yihofaan.