1. O pairasolay ci Isaya misaˈicelay somowal to Israil tamdaw to maanan?

 SOWAL no pairasolay ci Isaya, o ‘ngaˈayay tadiˈecen a Kawas’ ci Yihofa. Mihongyakan to ‘ngaˈayay tadiˈecen’ sanay a sowal, ngaˈayay o ‘amen’ han mihongyak. (Isaya 65:16 ato roma pihongyak.) Tatodong no ‘amen’ i, ‘mikifalocoˈ a mihayi’ anoca ‘soˈlinay mahaen.’ Ano sakadademaken no Fangcalay Cudad ko ‘amen’ sanay a sowal, milengo ci Yihofaan aci Yisan i, mikiˈokay to soˈliˈlinay ko misowalan no sinael. Mihaenay, misaˈicelay ko sowal ni Isaya to Israil tamdaw, paliˈayawan ni Yihofa a demak ngaˈayay pakasoˈlinen. Hatiraayto, mitooran ni Yihofa ko sakiˈok midemak, caay ka pisamangah.

2. (1) Hano pakasoˈlin kita to sakiˈok ni Yihofa to hanoikoran? (2) Onini a lalakaw mamilengo to maanan?

² Wa ngaˈay kita pakasoˈlin to sakiˈok ni Yihofa i noikoran han? Maherek ko Isaya cudad mitilid maedeng 800 miheca, mitadtaday ko tarokos ci Pawlo to hano ngaˈay tadiˈecen ko sakiˈok ni Yihofa. Sanay ci Pawlo, o Kawas ‘cowa pisamangah.’ (Hipray 6:18) Matira o nemnem cowa ka sadak ko kafesaˈay nanom ato kaheciday nanom, o Pipowaran no soˈlinay kimad ci Yihofa cowa ko mamisamangah. Mihaenay, ngangaˈay kita pakasoˈlin to kihcod a sowal ni Yihofa, mahawpay ko kihcod a sakiˈok Ningra to hanoikoran. Onini a lalakaw mamilengo to ilaenoay salicay: Pakayni hanoikoran ita, mikiˈokay ci Yihofa to maanan? Samaanay  ci Yihofa mikiˈok to mamalaˈosi ko nisowalan Ningra?

3. (1) Misalimlaay ko salikaka to maanan a sakiˈok hani? (Paˈarawan 21:3, 4) (2) Matengil no romaroma tamdaw konini a sakiˈok samaanay ko harateng hani?

³ O lalengoen ita nohatini a sakiˈok, misalimlaan no salikaka i paro no kakarayan. (ˈOsien ko Paˈarawan 21:3, 4.) Mikiˈokay ci Yihofa, noikor ‘caayto ka patay, caayto ka somad, tomangic, adada.’ Ano mitosil kita i, miˈosiay toniya padihkoay to falocoˈ no tamdaw a sinael, pasowal to tao samaanay ko kaˈorip i faelohay hekal. Pakatengilay toniya sakiˈok a tamdaw samaanay ko piharateng hani? Sowal no romaroma tamdaw: “Mana ira ko hatiniay makapahay a demak hani?”

4. (1) Mafanaˈay ci Yihofa to maanan, talaˈayawayho mafanaˈ to maanan? (2) Cowa ko pikiˈok aca, midemakayho ci Yihofa to maanan?

⁴ Mikayat ci Yihofa ci Yohanian mitilid toniya sakiˈok i, mafanaˈayto, milasil kita to ngaˈayay lihaf no Hongti Kitakit anini i, papasowal to tao toniya kalimlaan a hatokel. Talaˈayawayto ci Yihofa mafanaˈ, harateng no ˈalomanay tamdaw to mikiˈokan Ningra ‘faelohay a demak’ pasangaray a pakasoˈlinen. (Isaya 42:9; 60:2; 2 Korinto 4:3, 4) Sasamaan kita padama to niyah ato tao pakasoˈlin, o masowalay i Paˈarawan 21:3, 4 a sapalemed o mamalaˈosi hani? Cowa ko pihadak aca ni Yihofa tonini a mitemeray to falocoˈ no tamdaw a sakiˈok, mihadakayho to ciˈicelay a wacay, padama kitanan ira ko lalangian pakasoˈlin tonini a sakiˈok. O maanan a lalangian hani?

5. Somowalay ko maanan a sinael, iraay ko lalangian ita pakasoˈlin o mamalaˈosi ko sakiˈok ni Yihofa? Mansanay ko sowal no sinael hani?

⁵ Itini dotoc a sinael, ngaˈay mahapinang ita ko pina lalangian pakasoˈlin to mamalaˈosi konini a sakiˈok. Sanay ko sinael: ‘Oya maroˈay i tadamaanay ˈanengan sanay ko sowal: “Nengnengen! Safaelohento Ako ko kihcod nohatini.” Sanayho ko sowal Ningra: “Tiliden iso, o soˈliˈlinay konini a sowal, ngaˈayay tiˈeren.” Sanay Cingra pasowal takowanan: “Malaˈosiayto maemin! O Alfa Kako, o Omika Kako, o Satapangan Kako, o Hererekan Kako.”’—Paˈarawan 21:5, 6a.

6. Paˈarawan 21:5, 6 a sakiˈok hano paˈicel to nika pakasoˈlin ita to sakiˈok no Kawas hani?

⁶ Onini a sinael misamaanay hano papaˈicel to pakasoˈlinay falocoˈ ita, hongaˈ pakasoˈlinen kita to papalaˈosien ni Yihofa ko sakiˈok Ningra hani? Pakayni tonini a sinael, O Satadamaanay a Mitilidan no Paˈarawan cudad sanay ko sowal: “Mihaen ko sowal ni Yihofa, mahecaday o mitiliday to ngangan itira tora sapikiˈok a cudad to madimadiay a tamdaw, mikiˈok to mamilayap cangra tonini a sapalemed noikor.” b O sakiˈok ni Yihofa matiliday i Paˈarawan 21:3, 4, kawra ora dotoc a sowal i saka 5 ato 6 sinael, hato maˈaraway ita ko mitilidan ni Yihofa a ngangan, misawacay to o soˈlinay tatiˈeren kora sakiˈok Ningra. Dotoc i, o mamisongilaˈ kita mifolfol to misowalan no sinael a sakiˈok.

7. Satapang a sowal no saka 5 sinael iraay ko maanan mikiriwiˈay a demak hani? Mitadtaday konini to maanan?

⁷ Satapang no saka 5 sinael i, ‘oya maroˈay i tadamaanay ˈanengan sanay ko sowal.’ (Paˈarawan 21:5a) Polong a mapolosi itini i Paˈarawan, kinatoloay aca ci Yihofa a pasowal, o cecay konini. Tatodong i, o somowalay tonini a sakiˈok cowa ko ciˈicelay a coyoh, cowa koya patikolayto maˈorip a Yisan, ao ci Yihofa ko pasowalay! Mitadtaday konini, dotoc a sowal no Kawas o papakasoˈlinen. Misamaanay hani? Samanen ‘cowa ko misamangahay’ ci Yihofa. (Titus 1:2) Mihaenay i, o maˈosiay ita itini i Paˈarawan 21:5, 6 sahtoay ngaˈayay a tiˈeren.

8. Samaanay ci Yihofa paˈicel a somowal to mamalaˈosi ko sakiˈok Ningra hani? (Isaya 46:10)

⁸ Dotoc i, ‘Nengnengen!’ sanay ko sowal ni Yihofa. (Paˈarawan 21:5) Itini Paˈarawan, mihongyakan a ‘nengnengen’ sanay a Krisiya tilid maceriday mahadak. Sanay ko sowal no cecay cudad: “Oniya tilid patalipaˈelalay to miˈosiay, sasinanoten ko dotoc a sowal.” Hay, dotoc o manan ko sowal ni Yihofa hani? Sanay Cingra: ‘Safaelohento Ako ko kihcod nohatini.’ Ora nisowalan ni Yihofa itini, soˈliˈlin o noikoran a demak, kawra mafanaˈay Cingra mamalaˈosi ko sakiˈok no Niyah, mankora midemakan Ningra nohatini konini a sakiˈok, saan ko sowal Ningra.—ˈOsien ko Isaya 46:10.

9. (1) ‘Safaelohento ko kihcod’ onini a sowal mitoroˈay to mamidemak ci Yihofa to maanan tosa a demak hani? (2) Pakayni to aniniay a ‘kakarayan’ ato ‘sera’ mamidemak ci Yihofa to maanan hani?

⁹ Nohatini nengnengen ita ‘safaelohento ko kihcod’ sanay a tilid itini tonini sinael. Itini saka 21 fedengan, o mitoroˈan nonini tilid i, o mamidemak ci Yihofa to tosa a demak—mamifalic ato papatikol. Salakat, mamifalic ci Yihofa to maanan hani? Paˈarawan 21:1 sanay: ‘Iˈayaway kakarayan, iˈayaway sera malahdawayto.’ ‘Iˈayaway kakarayan’ mitoroˈan i, o mafiyoray ni Satan ato tatiihay coyoh a sifo no tamdaw. (Matay 4:8, 9; 1 Yohani 5:19) Itini Fangcalay Cudad, o ‘sera’ hananay i, latekay o tamdaw ko mitoroˈan. (Satapangan 11:1; ˈOlic 96:1) Mihaenay haw i, ‘iˈayaway sera’ o aniniay tatiihay a tamdaw no hekal ko mitoroˈan. Ci Yihofa cowa aca ko mamisalof anca mitapid, ao sasongilaˈen a palaˈafo ko aniniay a ‘kakarayan’ ato ‘sera.’ Tatano ‘faelohay kakarayan faelohay sera,’ oyanan faelohay a sifo ato faelohay a likakawa no tamdaw, mamikotay to aniniay a ‘kakarayan’ ato aniniay a ‘sera.’

10. ‘Sasafaelohenho’ ni Yihofa ko maanan?

¹⁰ Sinanoten itini Paˈarawan 21:5, ‘nohatini liyawen Ako misangaˈ ko kihcod,’ cowa ka saan ci Yihofa, ao ‘safaelohento Ako ko kihcod nohatini’ sanay Cingra. Mihaenay haw i, o sasafaelohento ni Yihofa ko cikiw ato tamdamdaw, patikolto a malefot. Mahecad to sapaliˈayaw ni Isaya, polong a cikiw mamatiya to isaˈayaway a Itin a pala. Mamalefotto ko kahacecay a tamdaw, mapiˈiway, mapohaway ato madoˈengay tamdaw wa maadahto maemin, ano mapatayayto a tamdaw papatikol a maˈorip.—Isaya 25:8; 35:1-7.

11. Palimoˈotay ci Yihofa ci Yohanian midemak to maanan? Misamaanay hani?

¹¹ Somowalayho ci Yihofa to maanan paˈicel to pakasoˈlin no falocoˈ ita hani? Pasowalay Cingra ci Yohanian: ‘Tiliden iso, o soˈliˈlinay konini a sowal, ngaˈayay tiˈeren.’ (Paˈarawan 21:5) Cowa ko palimoˈot aca ni Yihofa ci Yohanian ‘ka tiliden’ sanay, mifanaˈayho cingranan to lalangian: ‘O soˈliˈlinay konini a sowal, ngaˈayay tiˈeren’ sanay. Tatodong i, o sowal no Kawas cowa ko mamararaw, cowa ko mamalahorac. Tada miakoˈiday kita mitengilan ni Yohani ko sapalimoˈot, mihaenay i, maˈosiay ita ko makapahay sakiˈok ni Yihofa, hanaca ngaˈayay micerid miharateng to noikoran kalipahakan a sapalemed.

12. Hano ngaˈay ci Yihofa pasowal to ‘malaˈosiayto maemin’ saan hani?

¹² Dotoc i, ‘malaˈosiayto maemin!’ sanay ko sowal ni Yihofa. (Paˈarawan 21:6) Tengilen konini a sowal hato malaˈosiayto maemin ko sakiˈok pakayni i Lakoing. O ngangaˈay ci Yihofa mihaen ko sowal, samanen awaay ko maanan mamiconged Cingranan palaˈosi to araaw no Niyah. Dotoc, o manan sanayho ko sowal ni Yihofa, toha ngangaˈay kita pakasoˈlinen to papalaˈosien Ningra ko sakiˈok hani?

13. Hano pasowal ci Yihofa to “o Alfa Kako, o Omika Kako,” saan hani?

¹³ Masowalay i sawni, itini i mapolosi kinatoloay maˈaraw ni Yohani pasowal ci Yihofa. (Paˈarawan 1:8; 21:5, 6; 22:13) Tonini a kinatolo, somowalay ci Yihofa: “O Alfa Kako, o Omika Kako,” sanay to malecaday a sowal. O alfa hananay o saka cecay tilid no Krisiya, o omika hananay o salikoray a tilid. ‘O Alfa, o Omika Kako’ sanay ci Yihofa to Niyahan, o mamitadtad ano miteka Cingra to cecay a demak i, o papadotocen a milahci, tangasa i kalaˈosian no demak.

14. (1) Ihacowaay ci Yihofa hato somowalay to “Alfa Kako” sanay hani? Hahacowa hato somowalay to “Omika Kako” sanay hani? Sadaken ko tinakoan. (2) Maˈoningay i Satapangan 2:1-3 ko maanan a sakiˈok?

¹⁴ Maherekto ci Yihofa misangaˈ ci Ataman aci Ifaan i, milasilay Cingra to araaw to cikiw ato tamdaw. Sanay ko sowal no Fangcalay Cudad: ‘Palemedan no Kawas cangra, pasowal cangranan: “Ka lenak, miedef i fafekang no sera, mipamatang tonini sera.”’ (Satapangan 1:28) Ta somowal ci Yihofa tonini araaw i, hato pasowalay to “Alfa” sanay. O teloteloc ni Atam aci Ifa ano miedefto to polong a hekal, onini malefotayto midofdofay to Kawas a tamdaw, palakoingen ko kihcod a cikiw i, malaˈosiayto ko araaw ni Yihofa, itiyato i, hato pasowalay ci Yihofa to “Omika” sanay. Kitinien to maˈoningay i Satapangan 2:1-3, ‘malahciayto masangaˈ ko kakarayan ato sera’ sanay, ikorto i, misadakay ci Yihofa to cecay sakiˈok. (ˈOsien.) O fangcalay romiˈad hananay Ningra ko saka pito a romiˈad, mikiˈok to kahererekan no saka pito romiˈad i, o araaw Ningra to cikiw ato tamdaw malaˈosiayto a maemin.

15. Ano nengnengen hato malaˈosiayto ci Satan miconged to Kawas palaˈosi to araaw Ningra, hano saan ko sowal hani?

¹⁵ Mitowakang to Kawas ci Atam aci Ifa ikor  malo caayto ko malefotay a tamdaw, hanaca parocokay to raraw ato patay i teloteloc. (Loma 5:12) Itiya, ano nengnengen i, hato malaˈosiayto ci Satan miconged ci Yihofaan milahci to araaw no Niyah, ho awato ko pakayraan ni Yihofa pasowal to “Omika Kako” sanay. Alatek o harateng ni Satan awaayto ko ngaˈayay hapakayraan ni Yihofa, patay hanto ci Atam aci Ifa ko ngaˈay, ikor miliyaw haca misangaˈ to malefotay a mararamoday a milahci to araaw no Niyah pakayni i tamdamdaw. Kawra ano mihaen ci Yihofa to demak i, o ngangaˈayto mipakokot ci Satan to misamangahay ci Yihofa, samanen mikitini i Satapangan 1:28, o sowal ni Yihofa ci Ataman aci Ifaan i, o teloteloc nangra mamiedef i fafekang no sera sanay.

16. Malakisawayto ko mihalakaan ni Yihofa, hano saan ko harateng ni Satan?

¹⁶ O mananho ko papiliˈen ni Yihofa hani? Alatek miharateng ci Satan, o teloteloc ni Atam aci Ifa soˈliˈlin tahadaˈoc a caay ko malefotay a tamdaw, papakihater han ni Yihofa cangra mihofoc to cowa ka lefot a teloteloc wa saan cingra. (Patnakay 7:20; Loma 3:23) Mihaen i, cowa ito ko mamaedef ko malefotay a tamdaw i fafekang no sera, malakisawayto ko mihalakaan ni Yihofa wa saan ko sowal ni Satan.

17. Pakayni to pitowakang ni Satan ato saka cecay mararamoday tamdaw, iraay ko maanan pakayraan ni Yihofa misaysay hani? Salikor aira ko maanan a makapahay minaroˈan hani? (Nengnengen ko coka.)

¹⁷ Misiˈayaw to pitowakang ni Satan ato saka cecay mararamoday tamdaw i, sapisaysay ni Yihofa a pakayraan o cowa ka haraterateng ni Satan. (ˈOlic 92:5) Co:wa ka pisamangah ci Yihofa, o soˈlinay ngaˈayay tiˈeren Cingra, pasalatan ci Atam aci Ifa mihofoc to wawa. Cowa ka malakisaw ko araaw ni Yihofa, pakaynian Ningra i cecay a ‘teloc’ milidong to polong midofdofay ci Yihofaan a teloteloc ni Atam aci Ifa, mihaen a milahci to araaw no Niyah, tangasa i kalaˈosian. (Satapangan 3:15; 22:18) Misawacayay konini, ano somowalho ci Yihofa to dadademaken i, o mamalaˈosito. Milimasmasan ni Yihofa a sapatefoc maedeng macekokay ci Satan! Hano haenen ko sowal hani? Samanen o sapatefoc mikitiniay i cowa pisateked a olah, ˈarawhan o niyah aca ko miharatengan ni Satan, awaay ko hatiniay a olah ningra. (Matay 20:28; Yohani 3:16) Pakayni i limasmas no sapatefoc, mahererek ko Pikowan ni Yis to Comaˈol Miheca i, oya patikolay malefot a midofdofay to Kawas a teloteloc ni Atam aci Ifa, aitini i fafekang no sera a lakoing a maˈorip. Mihaenay haw i, o salakatay a araaw ni Yihofa malaˈosiayto,  itiya i, hato pasowalay to “Omika” ci Yihofa.

18. Iraay ko maanan tolo a lalangian ita pakasoˈlin to sakiˈok ni Yihofa hani? (Nengnengen ko “ Tolo a Lalangian Papakasoˈlinen ko Mikiˈokan ni Yihofa.”)

¹⁸ Mikitini tonini lalakaw mananamay ita, o papalaˈosien ni Yihofa ko sakiˈok Ningra pakayni to Lakoing. Ano iraay ko sasa no tao toninian i, sasamaanen ita pasowal cangra hani? Saka cecay, onini sakiˈok o ci Yihofa ko misadakay. Sanay ko Paˈarawan: ‘Oya maroˈay i tadamaanay ˈanengan sanay ko sowal: “Nengnengen! Safaelohento Ako ko kihcod nohatini.”’ Ci Yihofa iraay ko taneng ato ˈicel, iraayho ko kalim palaˈosi tonini sakiˈok. Saka tosa, o misowalanho ni Yihofa to dadademaken i, o mamalaˈosi, itini pinengneng Ningra onini a demak hato mafekadayto. Mankora sa ko sowal Ningra: ‘O soˈliˈlinay konini a sowal, ngaˈayay tiˈeren. . . . Malaˈosiayto maemin!’ Saka tolo, ano mitekaho ci Yihofa to cecay demak i, o padadotocen Ningra milahci tangasa kalaˈosian. Mankora sa ko sowal Ningra: “O Alfa Kako, o Omika Kako.” Ano ikor sasongilaˈen ni Yihofa a misawacay, o soˈlinay misamangahay ato malakisaway i, o ci Satan.

19. Ano cisasaay ko tao to pakayniay i Lakoing a sakiˈok no Kawas i, sasamaan ko pidemak iso hani?

¹⁹ Haharatengen, itini pitosilan to kahacecay a pasowal to tamdaw to sakiˈok no Kawas i, o ngangaˈay paˈicel to pakasoˈlin no miso to sakiˈok no Kawas. Mansa, ano miˈosi kiso to kasemeran a sakiˈok no Paˈarawan 21:4 i tamdaw i, ano sanay ko sowal no tao: “Mana ira ko hatiniay makapahay a demak hani?” Sasamaan kiso pacaˈof hani? Ngaˈay kiso miˈosi ato mitadtad to saka 5 ato 6 sinael, itini mikiˈokay ci Yihofa o sakiˈok Ningra mamalaˈosi maemin, hato malecaday mitiliday Cingra to cecay sapikiˈok a cudad.—Isaya 65:16.