1948 mihecaan, itiniay kako katimolan kaemingay a niyaroˈ no Naiciliya a hofocen. Itiya, o Faki ako ci Mostafa ato kaka ci Wahapi micadaay to paputisem malo Misawacayay Tamdaw ni Yihofa. 9 ko mihecaan ako i, mapatayay ko wama, tada masomaday kako. Kawra pasowalay ko kaka takowanan papatikol maˈorip ko mapatayay tamdaw noikor sanay, wa miliyaw kami pakaˈaraw to wama, tada mihinomay konini takowanan. Oranto i, misatapangay kako minanam to Fangcalay Cudad. 1963 mihecaan, micadaay kako to paputisem. Ikor, o roma tatoloay salikaka ako micadaay to paputisem.

1965 mihecaan, malinahay kako tayra i Lakes malacafay to kaka ci Wiesonan. Itiniay cingra i Kasakopang no Yipopi, maolahay kako macacawmaˈ to misakafahay nonini a kasakopang. Maˈaraw cangra tada lipahakay, fanekfekay ko falocoˈ, mitemeray takowanan, oranto i, itini 1968 miheca saka 1 folad misatapangay kako malo misakafahay.

Salikaka ci Aipote Awlokepypi itiniay i Pitil matayal. Malacafayay cingra to kaemangay misikay to cecay saˈopo, pasowalan ningra cangra itini kaˈamis no Naiciliya misaaliay to mikiriwiˈay misakafahay. Itiya fanekfekay ko harateng ningra pakalalok tamiyanan, maharatengayho ako ko sowal ningra: “Kaemangayho kamo, sakadademaken ko toki ato ˈicel no niyah matayal saki Yihofaan. Tataˈangay ko sapadama  namo to itiraay!” Makalimay kako mitodong to pairasolay a Isayaan patafang to niyah, micada to sacorcor ni Yihofa, oranto pasadakay kako to sapisingsi a cudad.—Isaya 6:8.

1968 mihecaan saka 5 folad, manilnilay kako tayra i kaˈamis no Naiciliya i Kano a niyaroˈ malo mikiriwiˈay misakafahay, itiya o Kalaloodan a Tatokian i Piyafa (1967-1970). ˈAyaw no malinah koniya lalood tayra i kakawalian i, taˈangayay ko pipalak to kaˈamisay no Naiciliya. Cecay faˈinayan salikaka calemcemay takowanan, palimoˈotay takowanan aka tayra. Kawra pasowalan ako cingra: “Koˈiday ko kaciharateng iso takowanan. Kawra, ano o harateng ni Yihofa pakalingad takowanan itira matayal Cingranan, pakasoˈlinay kako o kakalacafayen Ningra kako.”

O pakayraan no Kano a niyaroˈ tada kaadayayanto, pakayni lalood mapalakayto konini a niyaroˈ. Ano mitosil i, latekay maˈaraway ko mipatayan a tamdaw i kalalood. Itini i Kano na iraay ko pina kasakopang isaˈayaw, kawra milaliwayto ko ˈalomanay salikaka, edeng 15 ko materekay a mitosilay. Tada ciˈangiay cangra, matoledayho ko falocoˈ. Tiya maˈaraw nangra ko 6 mikiriwiˈay misakafahay tahira i, tada mahemekay cangra. Micada cangra to sapakalalok niyam ikor, miliyaway a fanekfek ko falocoˈ. Padamaan niyam cangra miliyaw a masaˈopo ato mitosil, miliyawayto cangra mihokok to toki mitosil ato miyoyak to cudad i fenpo.

Kako ato romaroma mikiriwiˈay misakafahay misatapangay minanam tono Hawsa a sowal. Matengil no itiraay tamdaw tano sowal no wina nangra milasil kami to ngaˈayay lihaf no Hongti Kitakit, makahiay mitengil to sowal niyam. Kawra o tamdaw no pihakelongan tora pala cowa ka olah mitosil kami, mihaenay oha maminaˈon kami. Kinacecayay, kako ato cafay milepelan no mitatiway to poˈot a faˈinayan, kao ngaˈayay ikakaay ko kaliki niyam comikay cingranan, hato maliyasay ko katalawan. Soˈliˈlin adihayay ko malifaay niyam a katalawan, nikawrira padamaay ci Yihofa tamiyanan ‘rihaday ko kamaroˈ,’ maˈarawayho niyam ko nika tongal no mitosilay. (ˈOlic 4:8) Anini, itini Kano 11 ko kasakopang, mataˈlifay ko 500 a mitosilay.

Pinaay aca folad kako itini Kano, itini 1968 miheca saka 8 folad kako ato roma tatosaay mikiriwiˈay misakafahay manilnilay tayra i niyaroˈ no Niyami no  Niler. Kahnayay mahapinang niyam tada faedetayto itini Niler, awaay ko pakaliniay a pala. Cowa ko faedet aca ko sasasiˈayawen, maminanamho kami to sowal no itiraay no Frans a sowal. Soˈliˈlin misiˈayaw to hatiniay pasangaray, kamayan kami misarocod mitadiˈec ci Yihofaan, hanaca misatapang malacafay to papina mitosilay itira a mitosil. Caka halafin, o kahacecay mafanaˈay to tilid i Niyami a tamdaw iraayto ko Mikayat to Saka Tahadaˈoc no ˈOrip a Soˈlinay Kimad a cudad, o romaroma tamdaw o niyah sanay ko mikilimay tamiyanan misaali tonini a cudad!

Kahnayay mahapinang niyam cowa ka olah to Misawacayay Tamdaw ni Yihofa ko sifo. 1969 miheca saka 7 folad, misikayay kami to saka cecay kasakilac a taykay i Niler, maedeng 20 ko mirienangay tamdaw. Halamhamay kami pakaˈaraw to tatosaay faelohay mitosilay micada to paputisem. Kawra saka cecay romiˈad no taykay, iraay ko dimeng, paterepay to kamok niyam, miˈorongayho to mikiriwiˈay misakafahay ato kasakilac kantok tayra i padimengan. Maharek cangra milicay, palimoˈotay tamiyanan saka tosa romiˈad tayra aca cangranan. Calemcemay kami to mamiliyaw miafad ko mirikecay tamiyanan, oranto i, mifalican ko pikimad to paputisemay itini lomaˈ no salikaka, dotoc caay ka fanaˈ ko ˈalomanay itiniay i ˈalo kami mipaputisem toya tatosaay mitosilay.

Ikor no pina lipay, o sifo milaplapay takowanan ato lalima mikiriwiˈay misakafahay pahadak i kitakit. Ilalomaˈ no 48 tatokian, o kami saan ko caciharateng a miliyas to Niler. Kalikiay kami mihaen to demak, ikor sontaday kami tayra i fenpo no Naiciliya, itira macadaay niyam ko faelohay katayalan.

Manilnilay kako tayra i Orisonpare a niyaroˈ no Naiciliya. Tada maolahay kako malacafay to itiraay a salikaka mitosil, ngaˈayay ko minaroˈan no tayal niyam. Kawra ikor no 6 folad, mitahidangay ko fenpo takowanan patikol tayra i Niler. Satapang aca macekiday kako, matalawayho, kawra ikorto misatapangay kako halamham sapiliyawaw masasoˈaraw to salikaka i Niler!

Patikolayto kako tayra i Niyami. Mahicera to saka tosa romiˈad, mikitiniay Naiciliya a misasingdiay pakahapinangay takowanan o Misawacayay Tamdaw ni Yihofa, hanaca milicayay takowanan to adihayay pakayniay Fangcalay Cudad a salicay, oranto i, satapangay kako pasifanaˈ cingranan minanam to Fangcalay Cudad. Ikor, masawadto ningra ko mitamakoay ato haliepahay a tatiihay nanaman, micadaayto to paputisem. Mahemekay kako itini cowa ka lecad a kilac no Niler malacafay to salikaka mitosil, halo pakaˈaraw to nika tongal no micadaay to soˈlinay kimad a tamdaw. Tiya tahira aca kako i, lalomaˈ no kitakit 31 ko Misawacayay Tamdaw ni Yihofa, miliyasto kako i, 69 ko kaˈaloman.

1977 miheca saka 12 folad, patikolay kako tayra i Naiciliya micada to tolo a lipay a sapahatatanam. Mahererek ko pihatatanam i, misatenokay no Iing no Fenpo salikaka ci Maekemo Wike papinengnengay takowanan to tikami no itiniay i Sairariang a fenpo. Itiraay a salikaka mikilimay to cowaho ka ciramod faˈinayan a misakafahay tayra i Ciniya  malo kasakilac kantok, onini a salikaka o tanoktokay ko tireng, hanaca mafanaˈ somowal tono Padaka ato no Frans a sowal. Sanay ko salikaka ci Wike, micada kako to sapahatatanam onini ko araaw. Mitadtaday cingra cowa ko madoloay koniya tayal. Sanay cingra: “Songilaˈenho iso miharateng, ngaˈ misaˈosi to mamicada hokira.” Kawra tangsolan ako pasowal cingra: “Ano ci Yihofa ko miocoray takowanan, o mamalingad kako.”

Mikalicay kako to hikoki tayra i Sairariang, masasoˈaraw to i fenpoay a salikaka. Cecay Iing no Fenpo sanay pasowal takowanan: “Pakayni i tayal no Hongti Kitakit i Ciniya, cowa ka adihay ko kafanaˈ niyam.” Soˈliˈlin o fenpo no Sairariang citodongay mikayat to mitosilay tayal no Ciniya, kawra marawraway ko pakayraan no mirikecay no Ciniya, awaay ko pakayraan no i fenpoay a salikaka mararinnak to itiraay a mitosilay. Soˈliˈlin kinapinapinaay mitanam, kamayan awaay ko pakayraan miocor to salikaka tayra i Ciniya, masasoˈaraw to itiraay salikaka. Mihaenay miocoray cangra takowanan tayra i Kenakeli a niyaroˈ no Ciniya, mitanam to ngangaˈay misingsi to sakaterek a minkiw hokira.

Tahirato kako i Kenakeli ikor, tayraay i kitiraan no mitaypiyaway to sifo no Naiciliya a tamdaw. Pasowalan ako cingra, makalimay kako itini Ciniya mitosil. Palimoˈotay takowanan cingra aka materek itini, samanen o mamalepet kako alatek, anca tahalifa to katalawan a demak. Sanay cingra: “Ka patikol tayra i Naiciliya, itira sa a mitosil,” sanay. Kawra pasowalan ako: “O mamaterek kako itini.” Oranto i, patikamian noniya Taypiyaw ko ˈAˈideman no Ciniya, papipacafay cingranan takowanan. Ikor masasoˈaraway kako toya ˈaˈideman, makahiay cingra padama.

Telocto i, iraayto ko minkiw ako materek i Ciniya! Caka halafin ikor, patikolay kako tayra i fenpo no Sairariang, pasowal to salikaka tonini ngaˈayay lihaf. Matengil nangra samaanay ci Yihofa palemed takowanan, eca ka wakawak sa kako a minokay, mawahoay cangra mahemek.

Mikitini 1978 tangasa 1989 miheca, itiniay kako i Ciniya ato Sairariang malo kasakilac kantok, itiniayho i Lipiliya malo mikotayay a kasakilac kantok. Satapang aca marariday adada kako. Latekay, itiniay i awaay ko tamdaw a pala pakidem ko adada, kawra misarocoday ko salikaka tangsol a paising takowanan.

Kinacecayay madengaay no lifong ato cifasalay ko tireng ako. Tiya patikolto tanoktok ko tireng ako ikor, fanaˈ sanayho kako to misatapangay milengo ko salikaka aicowa mitadem takowanan! Soˈliˈlin kinapinaay mangatato mapatay kako, nikawrira caay ka ciharateng kako sapisawadaw to katayalan ako. Pakasoˈlinay kako edengan ci Yihofa ko papafeli takowanan to midaˈocay a rihadayay a falocoˈ, samanen soˈlinto mapatay kako i, wa ngaˈay Cingra patikol paˈorip takowanan.

1988 mihecaan, mafanaˈay kako ci Toekasean, misapoeneray ko falocoˈ ningra, maolahay ci Yihofaan a misakafahay. Mararamod kami ikor, malacafayay cingra takowanan malo milisoˈay ko tayal. Ci Toekase caay ka talaw to roray, iraay ko kinafalahay a harateng, o ngaˈayay padamaay takowanan cingra. Latekay, malacafayay kami miˈorong to lalosidan romakat to 25 kongli milisoˈ to kasakopang. Ano  maraay ko milisoˈan a kasakopang, o maanan ko makilimay a kakalicen, oriranan ko mikalican niyam, dotoc itini masahefohefongay maronaronay a lalan sawarawara sanay tahira i kahiceraan.

Tada timoloay ci Toekase. Latekay, mamilakec kami to adihayay ko wani a ˈalo, malacafayay cingra takowanan malingad. Kinacecayay wa lima romiˈad kami romakat tayra i cecay pala, mitaˈlif to cecay ˈalo i, samanen mapalakay ko kayakay, mansa mikalicay kami to kaemingay a tamina mitaˈlif to ˈalo. Caay ka harateng lomowad ci Toekase maepod to tamina i, matefaday i nanom. Iraay ko wani i ˈalo, kami saan mafokilay midangoy, kao ngaˈayay papina kapah tayraay i nanom milidong cingranan. Ikor no cecay liyad, marariday kami tatiih ko mitiihan, kawra cowa ka pisawad kami, padadotocay to milisoˈay a tayal.

Satapang no 1992 mihecaan, cipoyapoyay ci Toekase, caay ka haraterateng niyam konini. O mieminay to toki a tayal niyam tatahini aca ko tolas hokira? Caay ka sapisawadaw kami. Nikawrira ikor no pisongilaˈ misimsim i, o piharateng niyam tonini a wawa o sapatelong ni Yihofa tamiyanan, o sasongilaˈen niyam misalimla. Mihaenay ikor no hofocen ko fafahiyan wawa, panganganan niyam cingra to ci Yicifote, tatodong i, “o sapatelong ni Yihofa.” Ikor no sepat miheca, mahofocayho kami to faˈinayan wawa ci Aylike. Oniya tatosa wawa sahtoay o kalimlaan a sapatelong ni Yihofa tamiyanan. Ci Yicifote naitiniay RTO no Kenakeli to cecay liyad matayal, Ci Aylike o dama sikawdan nohatini.

Soˈliˈlin cowato ka ngaˈay ci Toekase malo mikiriwiˈay misakafahay, nikawrira itini pihimaw ningra to wawa, kamayan malo miceriday misakafahay. Pakayni pitadiˈec to sadama ni Yihofa, padadotocay kako malo mikiriwiˈay matayalay. Lomahadto ko wawa ikor, miliyaway ci Toekase malo mikiriwiˈay misakafahay. Nohatini, malacafayay kami itini i Kenakeli malo mikiriwiˈay manilnil a mitosilay.

Tikolen minengneng ko hakelong no kaˈorip ako, ano tatalacowaen ni Yihofa miˈorong kako, o tatayra kako. Kako ato fafahi marariday matinako ko sadipot ato sapalemed ni Yihofa. ˈAlomanay tamdaw pakayni pitadiˈec to nodafongan tahalifaay to adihayay a roray, kawra kako ato fafahi pakayni pitadiˈec ci Yihofaan awaay ko hatiniay a cariraw. Kako aci Toekase mikitini nalifetan no niyah mananamay, edengan ‘o milidongay kitaanan’ a Yihofa o Pipowaran no rihadayay falocoˈ. (1 Rayray 16:35) Pakasoˈlinay kako o dadipoten ni Yihofa ko polong mitadiˈecay Cingranan a tamdaw, malecaday ‘o mihimedan i sadipot to ˈorip a lofoc.’—1 Samuil 25:29.