1-2. Cowa ka pacaˈofen ni Yihofa ko satolon no mita, hano saan ko piharateng ita alatek?

 ‘PAKAYNI kiso ci Yihofaan a lipahaken ko falocoˈ, ta pafelien Ningra kiso to kangalayan no falocoˈ iso.’ (ˈOlic 37:4) Tada kasemeran no falocoˈ konini sakiˈok! Kawra halamhamen ita ci Yihofa tangsol a pafeli to misaalian ita a kihcod han? Hano haharatengen konini a salicay hani? Nengnengen kora ilaenoay a tinakoan. O cecay caayho ka cifaˈinay a fafahiyan salikaka mangalayay sapirienangaw to SKE, mansa pakayniay toniya demak cingra mikifalocoˈ a mitolon ci Yihofaan. Kawra mataˈlifto ko pina miheca, cowa ka matahidang cingra. O cecay kaemangay faˈinayan salikaka mingitangitay ci Yihofaan padama cingranan miadah to adada, ho ngaˈay cingra adihay ko madangaray demak i kasakopang. Kawra, cowa ka ngaˈay ko adada ningra. O cecay Krisciyang a wama wina mitolonay ci Yihofaan padama to wawa nangra padadotoc midoko ci Yihofaan, kawra ikor misawaday ko wawa midoko ci Yihofaan.

² Latek pakayniay kiso to maanan a demak mingitangit ci Yihofaan, kawra onini a demak cowaho ka laˈosi. Teloc i, pacaˈofen ni Yihofa ko satolon no tao, caka pacaˈof tono miso, wa saan kiso miharateng alatek, anoca maedeng iraay ko maanan a raraw no mako wa saan kiso miharateng hokira. Fafahiyan salikaka ci Cianis b iraay ko mahaenay a noka piharateng. Cingra ato faˈinay tada mangalayay tayra i Pitil a matayal, mansa pakayniay tonini a demak mitolon cangra ci Yihofaan. Sanay cingra: “Satapangho, tada pakasoˈlinay kako to kakaliki a tayra kami i Pitil matayal.” ˈArawhan mataˈlifto ko pina folad, mataˈlifto ko pina miheca, cowa ka matahidang cangra. Sowal ni Cianis: “Masomaday kako, maoratan nanay. Midemakay kako to maanan a demak hato cowa ka mahemek ci Yihofa sa kako miharateng. Ihkalay ko satolon  ako Cingranan, mikayat takowanan, hano eca ka pacaˈof Cingra takowanan hani?”

3. Onini a lalakaw mamilengo to maanan?

³ Nolatekay, cisasaay ko falocoˈ ita alatek to cowa pitengil ci Yihofa to satolon ita. Soˈlinay haw i, nolitengan a romaroma madimadiay midokoay ci Yihofaan a tamdaw iraay ko hatiniay a sasa no falocoˈ. (Yopu 30:20; ˈOlic 22:2; Hapakuk 1:2) Misamaanay hano papakasoˈlinen iso ci Yihofa papacaˈof to satolon iso hani? (ˈOlic 65:2) To sakafanaˈaw to caˈof, lengoenho ita: (1) Mamisamaan ko demak ni Yihofa? (2) Halamhamay ci Yihofa kitanan mamisamaan ko demak ita? (3) Misamaanay hano sasalofen ita alatek ko mingitangitan a demak hani?

4. Mikitini Yirimiya 29:12, mikiˈokay ci Yihofa mamidemak to maanan hani?

⁴ Mikiˈokay ci Yihofa o mamitengil to satolon no mita. (ˈOsien ko Yirimiya 29:12.) Maolahay ko Kawas to madimadiay midoko Cingranan a tamdaw, mansa oha tatengilen Ningra ko satolon nangra. (ˈOlic 10:17; 37:28) Kawrira, ano o maanto ko micangacangan ita, papafelien Ningra kita cowa ka saan. O micangacangan ita a pina a demak, tahirato i faelohay hekal ngaˈ malaˈosi alatek.

5. Mitengil ci Yihofa to satolon no mita i, sasinanoten Ningra ko maanan? Tadtaden.

⁵ Sasinanoten ni Yihofa ko micangacangan ita samaanay ko kalaliting to araaw Ningra. (Isaya 55:8, 9) O araaw Ningra i, micadaayho to pikowan Ningra a tamdaw aitini i cikiw a maˈorip, lipahak, makakedec cangra midoko Cingranan. Kawra, o tamdaw ko mikowan to niyah aikaka ko nika ngaˈay sanay ko sowal ni Satan. (Satapangan 3:1-5) Toha sapisawacayaw to mangah ko sowal ni Satan, pasalatan ni Yihofa ko tamdaw mikowan to cecay a liyad. Nikawrira, mahaenay noka pikowan pairaay to adihayay pasangar no tamdaw. (Patnakay 8:9) Mafanaˈay kita cowa ko papalahdawen ni Yihofa nohatini konini a pasangar. Ano mihaen Cingra i, o tamdaw ko misaysayay toniya pasangar saan ko sowal no roma tamdaw, hanaca wa ngaˈay ko pikowan no tamdaw wa saan miharateng.

6. Hano pakasoˈlin kita o pakayraan ni Yihofa a dademak o sidaˈitay, masadafdafay?

⁶ Ano pacaˈof ci Yihofa to malecaday a picangacang i, cowa ka lecad ko pakayraan alatek. Tinakoen, kinacecayay pakidemay ko adada no Hongti ci Hicikiya, micangacangay cingra ci Yihofaan patanoktok to tireng ningra, oranto i, miadahan ni Yihofa cingra. (2 Hongti 20:1-6) Tarokos ci Pawlo mihadakay to malecaday a picangacang. Mingitangit ci Yihofaan palahdaw to ‘cecay ceka’ i tireng ningra, o adada no tireng ningra ko mitoroˈan alatek, kawra cowa ka palahdawen ni Yihofa ko pasangar ningra. (2 Korinto 12:7-9) Haratengenho ko tinakoan no tarokos ci Yakop aci Pitiro. Pakayni Hongti ci Hirotian misiˈayaway cangra to katalawan. Sowal no Fangcalay Cudad o salikaka no kasakopang patadoay ci Pitiroan mitolon, patadoayho ci Yakopan mitolon alatek. Kawra, mipatayan ci Yakop, ci Pitiro saan i, milidongan no coyoh. (Dmak 12:1-11) Saan kita miharateng alatek, hano lidongen ni Yihofa ci Pitiro, eca ka pilidong ci Yakopan hani? Cowa ka somowal ko Fangcalay Cudad to lalangian. c Kawra wa ngaˈay pakasoˈlin kita ‘sahtoay masadafdafay ko demak’ ni Yihofa. (Limoˈot 32:4) Mafanaˈayho kita o mihaydaan ni Yihofa ci Pitiro aci Yakop. (Paˈarawan 21:14) O teloc no demak latekay cowa ka lecad to halamhaman no mita, nikawrira pakasoˈlinay kita sahtoay o sidaˈitay, masadafdafay ko demak ni Yihofa, mihaenay cowa ko cacisasa kita to pakayraan Ningra pacaˈof kitanan.—Yopu 33:13.

7. Aka pidemak kita to maanan? Misamaanay hani?

⁷ Aka palalinien to tao ko niyah. Tinakoen, latekay ihkalay ko picangacang ita ci Yihofaan tano cecay pakayraan padama kitanan, kawra  cowa ka laˈosi ko milongocan ita. Ikorto i, mafanaˈay kita o roma tamdaw micangacangay ci Yihofaan to malecaday a demak, ano nengnengen i, hato mipacaˈofan ni Yihofa ko satolon ningra. Salikaka ci Anna iraay ko mahaenay nalifetan. Micangacangan ningra ci Yihofa padama to faˈinay ningra ci Masiwan milowid to ekang. Toniya tatokian i, tatosaay matoˈasay fafahiyan salikaka miˈodotay to ekang. Mihaenay i, mikifalocoˈay ci Anna patado ci Masiwan ato tatosa fafahiyan salikaka a mitolon. Ikor maadahayto koniya tatosa fafahiyan salikaka, kawra mapatayay ci Masiw. Satapang aca o harateng ni Anna i, oniya tatosaay fafahiyan salikaka milifokay to sapadama ni Yihofa ngaˈ maadahay han? Ano mahaenay i, micangacangay cingra ci Yihofaan miadah to adada no faˈinay ningra, hano eca ka pihaen ko demak ni Yihofa hani? Manaokaniw, cowa ka fanaˈ kita hano maadah ko adada no tatosaay salikaka, kawra mafanaˈay kita sasongilaˈen ni Yihofa palahdaw ko kihcod a adada no mita noikor, hanaca makalimay Cingra patikol paˈorip to mapatayay madimadiay sikawdan Ningra.—Yopu 14:15.

8. (1) Mikitini Isaya 43:2, sasamaan ci Yihofa midama kitanan? (2) O satolon sasamaan padama kitanan misiˈayaw to pakidemay sapalifet? (Nengnengen ko O Satolon Wa Ngaˈay Padama Kitaanan Miremo to Sapalifet oniya kamotoˈay ika.)

⁸ O dadamaen ni Yihofa kita. O cisidaˈitay a Wama Cingra, cowa ka sapakaˈarawaw kitanan misemsem. (Isaya 63:9) Kawra caay ko papalifaen Ningra kita to pasangar cowa ka saan. Nolatekay, pakidemay ko malifaay ita a sapalifet, hato itiniay i tangongolay a nanom ato faedetay a namal. (ˈOsien ko Isaya 43:2.) Kawrira, mikiˈokay ci Yihofa to papadamaen kita milakowit tonini a sapalifet, hanaca onini a sapalifet cowa ko tatahadaˈoc midokaˈ kitanan. Roma i, papafelien ni Yihofa kita to fangcalay saocor, padama kitanan padadotoc a miemem. (Luka 11:13; Filipi 4:13) Mihaenay ngaˈayay kita a pakasoˈlin, o mamilifok kita to kihcod a misaalian, ngaˈay a padadotoc a miemem, tahatolas madimadi ci Yihofaan. d

9. Mikitini Yakop 1:6, 7, hano pakasoˈlin kita to papadama ci Yihofa kitanan hani?

⁹ Halamhamay ci Yihofa kitanan mitadiˈec Cingranan. (Hipray 11:6) Latekay, ano nengnengen hato cowa ko mamaremo ko sapalifet. Latek misatapangto cisasa ci Yihofaan to cowa papadama kitanan. Kawra mikiˈokay ko Fangcalay Cudad, mitiˈer kita to ˈicel no Kawas i, o ngangaˈay milakowit to ‘takaraway a ˈadipel.’ (ˈOlic 18:29) Aka cisasa kita, pakasoˈlin ko falocoˈ a mitolon, pasoˈlinen ci Yihofa papacaˈof Cingra padama kitanan.—ˈOsien ko Yakop 1:6, 7.

10. Tano tinakoen a mitadtad, sasamaan kita pahecad to satolon ko midemakan hani?

¹⁰ Halamhamay ci Yihofa mahecad ko demak ita to mitolonan. Tinakoen, cecay faˈinayan salikaka sapirienangaw to kasapala taykay, micangacang ci Yihofaan padama cingranan pahanhan ko tayal. Sasamaan ci Yihofa pacaˈof cingraanan hani? Papadama ci Yihofa cingranan ira ko timolo alatek. Nikawrira o tatalaˈayaw cingra midemak, o niyah ko mamikilim to tawki misaali to sapahanhan. Alatek o mamisaliyaliyaw cingra mikilim to tawki, anca papikotayen ko cafay matayal, pasowalho to tawki itini pahanhanan hamaan pafeli cingranan to lifon.

11. Pakayni to kaciharatengan no niyah a demak, hano saliyaliyaw sa mitolon kita hani?

¹¹ Halamhamay ci Yihofa kitanan pakayni kaciharatengan no niyah a demak misaliyaliyaw mitolon. (1 Tisalonika 5:17) Mikitini nisowalan ni Yis ngaˈay mahapinang ita, mataˈlif ko cecay liyad tatokian ngaˈ pacaˈof ci Yihofa to misaalian no mita alatek. (Luka 11:9) Mankora, aka a pisawad! Ka pingitangit misaliyaliyaw a mitolon.  (Luka 18:1-7) Ano padadotoc kita pakayni i cecay demak mitolon, o pasowalay ci Yihofaan to cowa kono cecayay aca a liyad a miharatengan. Mihaen to demak paihkalay to matomesay ko nika pakasoˈlin ita ci Yihofaan, pasoˈlin Cingranan to iraay ko ˈicel padama kitanan.

12. (1) Pakayni i mingitangitan a demak, ngaˈay licayen ita ko niyah to maanan a salicay? Misamaanay hani? (2) Sasamaan kita ira ko mikangodoay a waywayan mitolon ci Yihofaan hani? (Nengnengen ko sapatongal lalakaw “ O Picangacang Ako Patalahkalay to Nika Pikangodo ci Yihofaan Han?”)

¹² Ano caka tangsol sa malifok ko misaalian ita i, licayen ko niyah to tolo a salicay. Saka cecay, matatodongay kora misaalian a demak no mako han? Marariday kita miharateng to o maanan ko sangaˈayay kitanan. Kawra ano raayen minengneng i, o micangacangan a demak latek cowa ko sangaˈayay. Ano pakayni i maanan a pasangar mitolon ci Yihofaan, haratengen, alatek iraay ko romaroma sapisaysay a pakayraan mikikakaay ko kangaˈay to miharatengan no mita. Roma sa i, mingitangitan ita a pina demak cowa ka tatodong to araaw ni Yihofa. (1 Yohani 5:14) Tinakoen, nengnengen koya masowalay isalakat a wama wina. Mitolonay cangra micangacang ci Yihofaan padama to wawa nangra padadotoc midoko to Kawas, mihaen ko picangacang cowa ko mararaway. Kawrira, cowa ka pacieci ci Yihofa to tamdaw midoko Cingraanan. Halamhamay Cingra to polong a tamdaw, mahawpay ko wawa no mita, mikifalocoˈ mipiliˈ midoko Cingraanan. (Limoˈot 10:12, 13; 30:19, 20) Mankora, onini wama wina ngangaˈay mitolon ci Yihofaan padama cangranan mitemer to falocoˈ no wawa, pakalalok to wawa nai falocoˈ maolah ci Yihofaan, makahi mala widang Ningra.—Taneng 22:6; Ifiso 6:4.

13. Mikitini Hipray 4:16, aihacowa a tatokian padama ci Yihofa kitanan hani? Tadtaden.

¹³ Saka tosa salicay i, o pipacaˈofan ni Yihofa to picangacang ako a tatokian nohatini han? Halamhamay  kita tangsol pacaˈof ci Yihofa to picangacang ita alatek. Nikawrira soˈlinay i, mafanaˈay ci Yihofa ihacowa padama kitanan o sangaˈayay. (ˈOsien ko Hipray 4:16.) Ano cowa ka tangsol malifok ita ko micangacangan no niyah, “cowa ka ngaˈay” sanay ko caˈof ni Yihofa wa saan miharateng alatek. Nikawrira “cowaho ka raod ko toki” sanay ko caˈof Ningra alatek. Tinakoen, maharatengayho koya masowalay ifafekang a kapah salikaka han? Micangacang cingra ci Yihofaan miadah to adada ningra, nikawrira ano midemak ci Yihofa to kafahkaˈan a demak, wa ira ko lalangian ni Satan somowal tonini a salikaka padadotoc cingra midoko ci Yihofaan, samanen maadahayto ko adada ningra. (Yopu 1:9-11; 2:4) Roma i, maharekayto ci Yihofa misaˈosi to toki palahdaw to polong a adada. ˈAyaw nonini, cowa ko hahalamham kita midemak ci Yihofa to kafahkaˈan a demak miadah kitanan. (Isaya 33:24; Paˈarawan 21:3, 4) Mihaenay, o ngangaˈay ko salikaka micangacang ci Yihofaan pafeli cingranan to ˈicel ato rihadayay a falocoˈ, ho ngaˈay cingra miemem to adada, padadotoc madimadi matayal saki Kawasan.—ˈOlic 29:11.

14. Mikitini nalifetan ni Cianis mananamay iso ko maanan?

¹⁴ Haratengen haca ko nalifetan no fafahiyan salikaka ci Cianis. Mitolonay cingra ci Yihofaan patayra cingranan i Pitil a matayal, kawra ikor no lima miheca ngaˈ mahapinangay ningra to samaanay ci Yihofa pacaˈof cingranan. Sanay ko sowal ningra: “Sakadademakan ni Yihofa kora tatokian pasifanaˈ takowanan to adihayay masakalimlaan a demak, padama takowanan malo o sangaˈayay a Krisciyang. O tatongalen ako ko pitadiˈec Cingranan, o sasalofen ako kono tekedan no niyah a picekiw a nanaman. Roma i, o maminanamho kako ano icowato i, o lalipahak a matayal saki Yihofaan.” Ikor, ci Cianis ato faˈinay matahidangay malo milisoˈay to kasakilac a tayal. Tikolen ko isaˈayaway, o sowal ni Cianis: “Soˈlinay pacaˈofen ni Yihofa ko satolon ako, edengan o pipacaˈof Ningra a pakayraan ato mihalamhaman  ako cowa ka hecad. Koˈedaway tatokian ngaˈ mahapinangay ako, o sapafeli ni Yihofa takowanan o sangaˈayay. Pairaan Ningra ko toki ako mitinako tada maolahay Cingra takowanan, sidaˈitay takowanan. Tada miakoˈiday kako Cingranan!”

15. Nolatekay ano sakakahaden ita ko micangacangan a demak, hano o ngaˈayay konini hani? (Nengnengen ko coka.)

¹⁵ Saka tolo salicay i, o fafalicen ako kora micangacangan ci Yihofaan a demak han? Soˈliˈlin ihkalay a satolon o ngaˈayay, kawra nolatekay ano sakakahaden ita ko micangacangan a demak i, latek madoloto a mahapinang to samaanay ko araaw ni Yihofa kitanan. Ya masowalay isaˈayaw a caayho ka ciraramod a fafahiyan salikaka, sasaali sanay ci Yihofaan padama cingranan mirienang to SKE. Misamaanay hano mihaen cingra micangacang hani? Soˈlinay i, sakatayraaw cingra to misaaliay to mitosilay a kilac matayal. Mankora, cowa aca papadadotoc cingra micangacang ci Yihofaan matahidang tayra i SKE, ngangaˈayho cingra micangacang ci Yihofaan padama to niyahan iraho ko maanan a hapakayraan matayal saki ci Yihofaan. (Dmak 16:9, 10) Ikorto i, mamidemak cingra palecad to mitolonan, tinakoen licayen ko kasakilac kantok, iraay ko ingataay a kasakopang misaaliay to adihayay misakafahay hokira, anoca patikamien ko fenpo milicay to icowaay ko misaaliay to ˈalomanay a mitosilay. e

16. Papakasoˈlin kita to maanan?

¹⁶ Mikitini tonini a lalakaw mananamay ita, ngaˈayay pakasoˈlinen ita, ci Yihofa tano sidaˈitay, masadafdafay a pakayraan pacaˈof to satolon no mita. (ˈOlic 4:3; Isaya 30:18) Nolatekay, ci Yihofa cowa ka tano mihalamhaman ita a pakayraan pacaˈof kitanan alatek, kawra o tatengilen Ningra ko satolon no mita. Tangongolay ko olah Ningra kitanan, cowa ka eca ka pikihar Cingra kitanan. (ˈOlic 9:10) Mihaenay, ‘rariden mitadiˈec Cingra,’ padadotoc pasayra Cingranan mifowah to nafalocoˈan.—ˈOlic 62:8.