1-2. (1) Itini ilalomaˈ no tolo a capeling, sakakaay ko olah, hano saan ko sowal no tarokos ci Pawlo hani? (2) Mamiharateng kita to maanan a salicay?

 TA SOMOWAL ci Pawlo to pakasoˈlinay falocoˈ, tokel ato olah i, sanay cingra mihererek to sowal, ilalomaˈ nonini tolo capeling ‘o olah ko sakakaay.’ (1 Korinto 13:13) Hano mihaen ko sowal ni Pawlo hani? Ano ikor, malaˈosito ko sakiˈok no Kawas pakayni faelohay hekal i, caayto ko papatalahkal kita to nika pakasoˈlin tonini a sakiˈok, caayto ko mamitala kita halamham to sakalaˈosiaw nonini sakiˈok. Kawra oha mamidaˈoc kita maolah ci Yihofaan ato maolah to tao, hanaca o mahaenay a olah o papadadotoc a matongal, tahadaˈoc a masafaeloh.

² Tona midaˈocay kita misaali to olah, sasinanoten ita ko tolo a salicay. Saka 1, hano mamasasiolah kita hani? Saka 2, sasamaan kita masasiolah hani? Saka 3, sasamaan kita padadotoc marengreng ko olah hani?

3. Iraay ko maanan a lalangian ita masasiolah hani?

³ O masasiolahay hano tada kalimlaan hani? Cecay lalangian i, masasiolah kita, wa misawacay to soˈliˈlinay a Krisciyang kita. Pasowalan ni Yis ko tarokos: ‘Ano masasiolah kamo, pakayni toninian mafanaˈ ko polong a tamdaw to nisawawaan ako kamo.’ (Yohani 13:35) Roma i, masasiolah papadama kitanan makedec a malacecay to salikaka. Sanay ci Pawlo: ‘O olah  misongilaˈay a palacecay to tamdaw.’ (Kolosay 3:14) Iraayho ko cecay kalimlaan a lalangian ita masasiolah to salikaka. Sanay ko tarokos ci Yohani: ‘O maolahay to Kawas i, mamaolah to salikaka.’ (1 Yohani 4:21) Masasiolah kita, paihkalay to maolahay kita to Kawas.

4-5. Patinakoen mitadtad, maolah to Kawas ato maolah to salikaka iraay ko maanan kalaliting.

⁴ Maolah to Kawas ato maolah to salikaka tada makedecay hano saan ko sowal hani? Patinakoen ko sowal, falocoˈ no tireng ato romaroma no tireng tada makedecay a malaliting. Ano mikinsa ko ising to safak ita i, papakayni cingra to tatemik no safak a cipinang to samaanay ko falocoˈ no tireng ita. Pakayni to olah hananay i, mikitini tonini sapatinako mamananam ita ko maanan hani?

⁵ O ising pakayniay i pikinsa to tatemik no safak, cacipinang to falocoˈ no tireng tanoktokay hokira. Malecaday, hapinangen hakowaay ko olah ita to salikaka, o mamafanaˈ to hakowaay ko olah ita to Kawas. Ano mahapinang ita mafasawayto ko olah ita to salikaka i, o paihkalay konini, o olah ita to Kawas maˈesalayto alatek. Kawra ano mararid kita patalahkal to olah i salikaka i, o mamahapinangto ita o olah no niyah to Kawas kamayan a tangongol.

6. Ano maˈesalay ko olah ita to salikaka i, hano maminaˈon hani? (1 Yohani 4:7-9, 11)

⁶ Ano maˈesalayto ko olah ita to salikaka i, ka pinaˈon. Misamaanay hani? Samanen paihkalay koni to miraayayto kita ci Yihofaan. Patalipaˈelalay ko tarokos ci Yohani kitaanan: ‘O cima ko cowa ka olah to maˈaraway a salikaka i, cowa ko mamaolah to cowa ka ˈaraw a Kawas.’ (1 Yohani 4:20) Mananamay ita ko maanan hani? Ano ‘masasiolah’ kita i, o mamihayda ci Yihofa kitaanan.—ˈOsien ko 1 Yohani 4:7-9, 11.

7-8. Sasamaan kita paihkal to maolahay ko niyah to salikaka hani?

⁷ Marariday maˈosi ita itini Fangcalay Cudad, palimoˈotay ko Kawas kitanan a ‘masasiolah.’ (Yohani 15:12, 17; Loma 13:8; 1 Tisalonika 4:9; 1 Pitiro 1:22; 1 Yohani 4:11) Nikawrira, o olah i, ikemoday no falocoˈ ita a capeling, cowa ka ˈaraw no tao ko kemod no falocoˈ ita. Ano hatiraay i, sasamaan kita patalahkal to olah i salikaka hani? O papakaynien i sasowalen ato waywayan ita.

⁸ Ngaˈayay pakaynien ita i masakenakenaay pakayraan paihkal to maolahay kita to salikaka. Tinakoen: ‘Masasisowal to soˈlinay sowal.’ (Cikariya 8:16) ‘Masasidipayal malacafay.’ (Marko 9:50) ‘Talaˈayaw masasingodo.’ (Loma 12:10) ‘Ka sasilitemoh a mihamham.’ (Loma 15:7) ‘Padadotoc . . . mikifalocoˈ masasisodod.’ (Kolosay 3:13) ‘Masasiˈoroˈorong kamo to karetengay a ˈinorong namo.’ (Kalatiya 6:2) ‘Ka padadotoc kamo . . . masasihinom.’ (1 Tisalonika 4:18) ‘Ka padadotoc kamo . . . masasipakalalok.’ (1 Tisalonika 5:11) ‘Masasipatado a mitolon.’—Yakop 5:16.

9. Mihinom to tao hano o kalimlaan a pakayraan patalahkal to olah hani? (Nengnengen ko coka.)

⁹ Nohatini, nengnengen ita ko cecay pakayraan paihkal to olah i salikaka. I fafekang masowalay ni Pawlo palimoˈotay kitanan ‘padadotoc masasihinom.’ Mihinom to tao hano o kalimlaan a pakayraan patalahkal to olah hani? Cecay taˈarawan to Fangcalay Cudad sanay, misaka dademakan ni Pawlo ‘mihinom’ sanay a sowal tatodong i, “ano tahalifa ko tao to pakidemay sapalifet i, tomireng i tatihi ningra pakalalok cingranan.” Mihinom kita to tahapadesay a salikaka, papadama cangranan tanektek, padadotoc romakat i saka tahadaˈoc  no ˈorip a lalan. O kahacecay no pipacafay ita ato pihinom to tahalosaˈay a salikaka i, o paihkalay kita to olah cangranan.—2 Korinto 7:6, 7, 13.

10. Mihinom to tamdaw ato siniˈadaay a falocoˈ iraay ko maanan kalaliting hani?

¹⁰ Wa isalakatho ira ko siniˈadaay a falocoˈ ita ngaˈ, malingad mihinom to tao. Iraay ko siniˈadaay a falocoˈ a tamdaw ano maˈaraw ko tao misemsem i, makalimay sapihinomaw to tao, misaˈicel a milowan to roray nangra. Misaˈicelay ci Pawlo pasowal, mihinom ci Yihofa to tamdaw ato kasiniˈada ni Yihofa to tamdaw o makedecay a malaliting. Panganganan ni Pawlo ci Yihofa to ‘siniˈadaay to tamdaw a Wama, pafeliay to sahinom a Kawas.’ (2 Korinto 1:3) O Pipowaran no siniˈadaay harateng ci Yihofa, samanen iraay ko mahaenay siniˈadaay a harateng, maˈaraw Ningra ‘tahalifa kita to masakenakenaay a sapalifet i,’ makalimay sapihinomaw kitanan. (2 Korinto 1:4) Malecad o tingalaway a nemnem pasinowayay to masoˈaway a tamdaw, ci Yihofa wa ngaˈay paira to sasayar ato sahinom i misemsemay a tamdaw. Sasamaan kita malecad ci Yihofaan, ira ko siniˈadaay falocoˈ i tamdaw, makahi mihinom to tao hani? Cecay pakayraan i, palahad to pina makapahay capeling. O maanan a capeling ko papadama kitanan matongal ko siniˈadaay harateng, makahi mihinom to tao hani?

11. Mikitini Kolosay 3:12 ato 1 Pitiro 3:8, sapipadadotocaw masasiolah, padadotoc masasihinom, papalahadho kita to maanan a capeling hani?

¹¹ Sapadadotocaw kita masasiolah, to romiˈamiˈad ‘padadotoc masasihinom,’ o papalahad to sidaˈitay ato olah no salikaka, minanam palecad to falocoˈ no tao. (ˈOsien ko Kolosay 3:12; 1 Pitiro 3:8.) O hatiniay a capeling sasamaan padama kitanan hani? O siniˈadaay a falocoˈ ato milingatay a capeling ano masalalomaˈayto no pinangan no mita, o mamakalimto kita mihinom to misemsemay a tamdaw. Malecad o nano sowal ni Yis: ‘Ano masamaanay ko falocoˈ noya tamdaw i, hatiraay ko masadakay i ngoyos ningra. O ngaˈayay a tamdaw, o ngaˈayay ko ninaˈangan ningra, o ngaˈayay ko masadakay.’ (Matay 12:34, 35) Mihinom kita to salikaka, o pasowalay cangranan tada maolahay kita cangranan.

12. (1) Hano misaaliay kita padadotoc talipaˈelal hani? (2) Dotoc mamilengo kita to maanan kalimlaan a salicay?

¹² Makalimay kita sapadadotocaw ‘masasiolah.’ (1 Yohani 4:7) Nikawrira haharatengen ita, na patalipaˈelalay ci Yis kitanan: “O mamafasaw ko olah no ˈalomanay a tamdaw” sanay. (Matay 24:12) O mamahaen ko ˈalomanay nisawawaan ni Yis cowa ka saan, nikawrira, o papadadotoc kita talipaˈelal, misaˈicel micoˈay to pifiyor nonini a hekal, aka mafasaw ko olah ita to salikaka. Mihaenay, dotoc mamilengo kita to cecay kalimlaan a salicay: Sasamaan kita mafanaˈ to fanekfekay ko niyah maolah to salikaka hokira?

13. Itini maanan a pakayraan mamafanaˈ kita to hakowaay ko katangongol no olah no niyah to salikaka hani?

¹³ Sakafanaˈaw to hakowaay ko tangongol no kaolah no niyah to salikaka, nengnengen ita samaanay ko niyah misiˈayaw to pina pakayraan. (2 Korinto 8:8) Tinakoen, tarokos ci Pitiro sanay ko sowal: ‘Ka fanekfek a masasiolah, samanen o olah mitahepoay to adihayay a raraw.’ (1 Pitiro 4:8) Mihaenay haw i, nengnengen ita samaanay ko niyah misiˈayaw to raraw ato dangoc no salikaka, o mamafanaˈto hakowaay ko tangongol no kaolah no niyah cangranan.

14. Mikitini 1 Pitiro 4:8, sasamaan kita maolah to salikaka hani? Tano tinakoan a mitadtad.

 ¹⁴ Nohatini songilaˈen ita minengneng ko 1 Pitiro 4:8. Kaˈayaway no sinael somowalay, wa ‘fanekfek a masasiolah’ kita. Tatodong no ‘fanekfek’ sanay i, ‘layaˈen pasadak.’ Kaikoray no sinael mitadtaday, o mahaenay a olah mamitahepo to raraw no salikaka, tatodong i, ira ko hatiniay a olah ita ngangaˈayto misodod to dangoc ato raraw nangra. Haratengen hena, cecay cokowi adihayay ko kadit, saˈicelen ita micelak ko cecay kiradom, wa ngaˈayto mitahepo to adihayay kadit, cowa ko fatiˈiyan aca a cikaditay. Malecaday, ano misaˈicel kita fanekfek a maolah to salikaka, cowa ko cecayay tosaay a dangoc no salikaka, ao mamisodod to ‘adihayay a raraw’ nangra.

15. Ano tangongolay ko olah ita to salikaka i, wa ngaˈayto samaan ko pidemak hani? (Kolosay 3:13)

¹⁵ Nolatekay, sapisododaw kita to salikaka cowa ko madoloay, kawra ano tangongolay ko olah ita cangranan, o mamadangarto no mita. (ˈOsien ko Kolosay 3:13.) Ano ngaˈay kita misodod to salikaka, paihkalay konini to soˈliˈlinay ko olah ita cangranan, wa ngaˈayho pakahemek ci Yihofaan. Iraayho ko maanan  papadama kitanan mitahepo to dangoc ato raraw no tao hani?

16-17. Samaan ko pidemak ita mamadoloto misodod to mimingay raraw no salikaka? Tano tinakoan a mitadtad. (Nengnengen ko coka.)

¹⁶ O kangaˈayan no salikaka ko samacayen minengneng, ao cowa ka itinien i dangoc. Haratengen ko cecay sapatinako. Malacafayay kiso to papina salikaka malisopsop, ira ko lipahakay no kacacawmaˈ. Mahererekto micawmaˈ i, pacafayan iso ko ˈalomanay misasing, dotoc kinatosaayho kiso misasing, samanen cowa ka ngaˈay koya saka cecay misasingan alatek. Nohatini toloayto ko sasing iso, kawra mahapinangay iso ko cecay sasing ˈosengetay ko cecay faˈinayan salikaka. Sasamaan ko demak iso hani? Wa mipadeng kiso tonini a sasing, samanen iraayho ko tosa ngaˈayay nengnengen a sasing. Itini toniya tosa sasing, onini a salikaka ato romaroma tamdaw matawaay ko pising.

¹⁷ Wa ngaˈay kita palalini to maharatengay no niyah to miterekan a sasing. Adihayay ko malifetay ita kahemekan macacawmaˈ to salikaka. Nikawrira kinacecayay, o cecay faˈinayan salikaka anca fafahiyan salikaka somowalay to pina sowal anca pina a demak, pakasomaday kitanan. Sasamaan ko pidemak ita hani? Ngaˈayay tanamen ita mipawan konini a demak, malecad o pipadeng to cecay cowa ka ngaˈay nengnengen a sasing. (Taneng 19:11; Ifiso 4:32) Cowa ko nanaˈengen ita i falocoˈ ko  mimingay raraw no widang, samanen iraayho ko adihayay makapahay nalifetan ita malacafay cingranan, o hatiniay nalifetan o sasalimlaen ita minaˈeng.

18. Pakayni masasiolahay, onini a lalakaw milengoayto to maanan a kalimlaan?

¹⁸ Hano makalim kita padadotoc fanekfek masasiolah hani? Malecad o milengoan nonini a lalakaw, maolah kita to salikaka paihkalay koni maolahay kita ci Yihofaan. Sasamaan kita patalahkal to olah i salikaka hani? O cecay pakayraan i, mihinom cangranan. Ano iraay ko siniˈadaay a falocoˈ ita, wa ngaˈayto ‘padadotoc masasihinom.’ Samaan ko pidemak ita ngaˈ padadotoc fanekfek masasiolah hani? Ano mararaw ko salikaka i, misarocod kita misodod cangranan.

19. Nohatini hano mikiriwiˈay misaali kita to masasiolahay hani?

¹⁹ Anini hano mikiriwiˈay kita misaali to masasiolahay hani? Pasowalay ci Pitiro kitaanan to cecay kalimlaan a lalangian, sanay cingra: ‘Mangatato ko paherekan no hekal. Mihaenay . . . ka fanekfek a masasiolah.’ (1 Pitiro 4:7, 8) Pakayni noka ngatato no paherekan no ciraraway a hekal, kita o mikotoday ci Yisan a tamdaw wa tahalifa to maanan hani? Paˈayaway ci Yis somowal: ‘Pakayni kamo i ngangan ako, o kakaˈintehen no polong a kasafinawlan.’ (Matay 24:9) Sapiememaw to mahaenay a kaˈinteh, o papadadotoc kita makedec a malacecay. Ano fanekfek kita masasiolah to salikaka, awaayto ko pakayraan ni Satan paliwasak kitaanan, ‘samanen o olah misongilaˈay a palacecay to tamdaw.’—Kolosay 3:14; Filipi 2:1, 2.