O MITILIDAY to Fangcalay Cudad a tamdaw nolatekay saliyaliyaw sanay a somowal to maanan a sowal anca tilid. Toloay kora lalangian alatek:

O pitilidan to Fangcalay Cudad a lalintadan. Itini nolitengan a Israil, ˈalomanay tamdaw awaay ko no niyah a Fangcalay Cudad. Mapolongay ko Israil tamdaw malisopsop itini i fangcalay kopang, mitengil to piˈosi no tamdaw to sarikec no Kawas, edengan a pakayraan konini to sakacipinangaw nangra to sarikec no Kawas. (Limoˈot 31:​10-​12) Mapolongay cangra tomireng mitengil to pi:na tatokian, mankora mamakalisangaˈ no maanan a demak ko falocoˈ nangra alatek. (Nihimiya 8:​2, 3, 7) Mahaenay haw i, saliyaliyawan a somowal ko kalimlaan a tilid papadama cangranan a pakaharateng to sinael, ikor sakadademaken i nokaˈorip, hanaca padama cangranan pakaharateng to cecacecay a sarikec no Kawas.​​—⁠Lifi 18:​4-​22; Limoˈot 5:⁠1.

O pakayraan a mitilid to Fangcalay Cudad. O pinapina a lalakaw no Fangcalay Cudad sano ˈolicay a tiliden, tinakoen ˈOlic, Radiw ni Solomon, Radiw no Mararomay. Nolatekay, o romaroma a tilid misaliyaliyaway a mahadak sapipaˈicelaw to lalangian, ato padama to tamdaw pakaharateng to tilid no ˈolic. Tinakoen i ˈOlic 115:​9-​11, sanay ko sinael: ‘Kamo Israil tamdaw, ka pitadiˈec ci Yihofaan. “Cingra ko papadama tamowanan, Cingra ko sapatada namo.” Lalomaˈan ni Alon, ka pitadiˈec ci Yihofaan. “Cingra ko papadama tamowanan, Cingra ko sapatada namo.” Kamo mikangodoay ci Yihofaan a tamdaw, ka pitadiˈec ci Yihofaan. “Cingra ko papadama tamowanan, Cingra ko sapatada namo.” ’ Misaliyaliyaw tonini a tilid, papadama to romadiway pakifalocoˈen ko kalimlaan a kimad.

To sapaˈicelaw a somowal to kalimlaan a demak. O mitiliday to Fangcalay Cudad a tamdaw to sapaˈicelaw somowal to kalimlaan a demak, misaliyaliyawan ko maanan a tilidan. Tinakoen, pakaynian ni Yihofa ci Mosian palimoˈot ko Israil tamdaw aka komaen to remes sa i, misaliyaliyaway pasowal to lalangian. Sapipaˈicelaw ko Kawas a somowal, o ˈorip no pinaˈorip itiniay i lalomaˈ no remes, mansa o remes mitaypiyaway to ˈorip. (Lifi 17:​11, 14) Ikor i, o tarokos i Yirusalim ato malohemay malitengay misilsilay to kapiliˈan no Kawas a demak, itiya miliyawayho a paˈicel a somowal to mamikeceng a miliyas to remes ko tamdaw.​​—⁠Dmak 15:​20, 29.

Soˈlin o romaroma lalakaw no Fangcalay Cudad misaliyaliyaway a masadak, kawra misaaliay ko Kawas kitanan pakayni i pisaliyaliyaw to malecaday a sowal a midoko Cingranan cowa ka saan. Tinakoen, sowal ni Yis: ‘Mitolon kamo i, aka pisaliyaliyaw a somowal to malecaday a sowal.’ (Matay 6:⁠7) Ikor, pasifanaˈay cingra to nisawawaan to mamitolon to maanan a demak i Kawas. (Matay 6:​9-​13) Soˈlinto cowa ko mamisaliyaliyaw kita to malecaday a sowal itini i satolon, kawra ngaˈayay kita pakayni i cecay a demakan misaliyaliyaw a micangacang.​​—⁠Matay 7:​7-​11.

Misaliyaliyaw ko Kawas papitilid to maanan a sowal i Fangcalay Cudad i, iraay ko lalangian Ningra mihaen to demak. O Tadamaanay a Singsi ko Kawas, misaliyaliyaw Cingra paˈicel a pasowal, o cecay a pakayraan Ningra a pasifanaˈ to tamdaw, toha saka ciepocaw no mita.​​—⁠Isaya 48:​17, 18.