1. Tano tinakoen a mitadtad, hano mamihakelong kita to sakayat ni Yihofa hani?

 HARATENGEN hena, ano mitaˈlif kiso romakat to katalawan a colicolingan, caay ka sadafdaf masahefohefongay ko lalan, mahafikod ko ciwarakay a semot, iraay ko mikalatay a fao mariˈangay a ˈaˈadopen. Itiya i, ano iraay ko cecay mafanaˈay a itiraay tamdaw makahi a mikerid tisowanan a romakat, padama tisowanan miliyas to maamaan a katalawan, maedeng miakoˈid kiso cingranan. Onini a hekal mahecaday tonini a colicolingan, matomesay ko masakenakenaay a katalawan, ano caka pinaˈon i, mamipalak to kalalaˈed ita aci Yihofaan. Nikawrira iraay ko malefotay ko pikayat kitanan, ci Yihofa Cingra. Mamikayat Cingra kitanan miliyas to katalawan, tangasa i faelohay hekal, milifok to midaˈocay a ˈorip.

2. Samaanay ci Yihofa mikayat kitanan hani?

² Samaanay ci Yihofa mikayat kitanan hani? Sakakaay i, pakaynian i Kimad Ningra, o Fangcalay Cudad. Roma i, sakadademakan Ningra ko pinapina tamdaw mikayat kitanan. Tinakoen, sakadademakan Ningra ko ‘madimadiay citanengay koli’ pafeli to sapahaled to pakasoˈlinay falocoˈ a kakaenen, padama kitanan mataneng ko pisaˈosi. (Matay 24:45) Misaka dademakanho Ningra ko kasakilac kantok, ciˈinorongay a malohemay malitengay i kasakopang, mikayat kitanan pakalalok kitanan, padama kitanan misiˈayaw to pasangar no kaˈorip. Itini tonini pasangaray siˈayawen a salikoray lintad, ngaˈay yaca pafeliay ci Yihofa to tatiˈeren a sakayat kitanan, hato ngaˈayay padadotoc kita tanektek ko kalawidang Cingranan, materek i sakatayraaw i midaˈocay ˈorip a lalan. Tada miakoˈiday kita ci Yihofaan!

3. Onini a lalakaw mamilengo to maanan?

³ Nikawrira, nolatekay mihakelong to sakayat ni Yihofa cowa ko madoloay. Ano o cowa ko malefotay a tamdaw ko pafeliay tonini a sakayat i, latek pasangaran nanay a micada, samanen cowa ka olah kita toya sakayat, anoca cowa ka tatodong kora sakayat, maedeng cowa ko naitiniay ci Yihofaan wa saan kita. Itiya i,  o papalahad kita to tanektekay noka pakasoˈlin, pasoˈlinen ci Yihofa to mikayatay to finawlan Ningra, pakasoˈlin mihakelong to sakayat Ningra i, o mamalifok ita ko epoc. Mihaenay haw i, onini a lalakaw mamilengo: (1) Nolitenganho, samaanay ci Yihofa mikerid to finawlan Ningra? (2) Anini samaanay ci Yihofa mikerid kitanan hani? (3) Ano mihakelong kita to sakayat Ningra mamilifok to maanan a epoc?

MIKERIDAN NI YIHOFA KO ISRAIL TAMDAW

4-5. Samaanay ci Yihofa mifanaˈ to Israil tamdaw, misaka dademakan Ningra ci Mosi mikerid cangranan? (Nengnengen ko papotalay coka.)

⁴ Itini nolitengan, misaka dademakan ni Yihofa ci Mosi mikerid to Israil tamdaw miliyas to Icip. Pafelian ni Yihofa cangra to ihkalay a wacay, pakasoˈlin to misaka dademakan Ningra ci Mosi, tinakoen, to romiˈad ci Yihofa tano malamiciroˈay a toˈem, to dadaya tano malamiciroˈay a namal mikerid a romakat. (Kasadakan 13:21) Mikeridan ni Mosi ko Israil tamdaw mitoor to malamiciroˈay a toˈem ato namal, tangasa i lawac no Kahngangay a Riyar. Kawra kalikiay, iraayto ko sofitay no Icip a milepel, awaayto ko hapakayraan no Israil tamdaw a talaˈayaw, lalikor iraay ko sofitay. Mansa tada marawraway cangra, hato mirorohayto ci Mosian mikerid cangranan tayni i lawac no Kahngangay a Riyar, tada o mararaway a saˈosi saan cangra. Kawra cowa ko mararaway a saˈosi konini, padetengan ni Yihofa a pakayni ci Mosian mikerid ko Israil tamdaw a tayni. (Kasadakan 14:⁠2) Ikorto, tano taˈangayay a ˈicel ci Yihofa, ato kafahkaˈan a pakayraan milidong cangranan.​​—⁠Kasadakan 14:​26-​28.

⁵ Dotoc a 40 mihecaan, padotocay ci Mosi mitoor to malamiciroˈay a toˈem, mikerid to finawlan no Kawas mitaˈlif to kohkohan. a Na patomerepan ni Yihofa ko malamiciroˈay a toˈem i fafekang no pakopangan ni Mosi, hato maˈaraway no polong a Israil tamdaw. (Kasadakan 33:​7, 9, 10) Itiniay i malamiciroˈay a toˈem ci Yihofa masasowal ci Mosian, ikor pasowalan ni Mosi ko sakayat ni Yihofa to Israil tamdaw. (ˈOlic 99:⁠7) Ihkalay mahapinang nangra misaka dademakan ni Yihofa ci Mosi a mikerid cangranan.

6. Pakayni sakayat ni Yihofa samaanay ko piharateng no Israil tamdaw hani? (Saˈosi 14:​2, 10, 11)

⁶ Kaadayayan i, soˈlin ihkalay mahapinang ko wacay, o ˈalomanay Israil tamdaw kamayan caay pihakelong to pakaynian ni Yihofa ci Mosian a sakayat cangranan. (ˈOsien ko Saˈosi 14:​2, 10, 11.) Misaliyaliyaway cangra miliyang to pikerid ni Mosi, telocto oya lintaday a Israil tamdaw cowa ka ngaˈay micomod i Mikiˈokan no Kawas to sapafeli cangranan a Sera.​​—⁠Saˈosi 14:⁠30.

7. O cimacima tamdaw ko mihakelongay to sakayat ni Yihofa? (Saˈosi 14:24) (Nengnengen ko coka.)

⁷ Kawrira, o romaroma Israil tamdaw mihakelongay to sakayat ni Yihofa, ci Kalip o masalalomaˈay a cecay. Sowal ni Yihofa: ‘Ci Kalip . . . mieminay to falocoˈ mieminay to harateng a mikotod takowanan.’ (ˈOsien ko Saˈosi 14:24.) Mipalifonan ni Yihofa ci Kalip, pafelianho ci Kalip to kaolahan ningra a pala i Kanan. (Yosuwa 14:​12-​14) O faelohay a kasarayray no Israil tamdaw mihakelongay to sakayat ni Yihofa. Mikotayay ci Yosuwa ci Mosian a mikerid cangranan, ikor padadotocay cangra mikangodo ci Yosuwaan. (Yosuwa 4:​14) Telocto palemedan ni Yihofa cangra, pafeli cangranan to mikiˈokan i lalitengan nangra a pala.​​—⁠Yosuwa 21:​43, 44.

8. Ira ko hongti no Israil tamdaw i, samaanay ci Yihofa mikayat to finawlan Ningra? (Nengnengen ko coka.)

⁸ Ikor, sakadademakan ni Yihofa ko kakitaan mikerid to finawlan Ningra. Irato ko hongti no Israil i, minilnilanho ni Yihofa ko mipairasolay mikayat to Israil tamdaw. O madimadiay midoko ci Yihofaan a hongti tada misakaretengay tonini a sakayat. Tinakoen, Hongti ci Tafiti misapoeneray a micada to sasalof no mipairasolay ci Natan. (2 Samuil 12:​7, 13; 1 Rayray 17:​3, 4) Hongti ci Yihosafat mihakelongay to  sakayat no mipairasolay ci Yahaciil, halo pakalalok to Yutaya tamdaw ‘pakasoˈlin to mipairasolay no [Kawas] a tamdaw.’ (2 Rayray 20:​14, 15, 20) Tahasiˈayaw ko Hongti ci Hicikiya to katalawan i, pasayraay toya mipairasolay ci Isayaan mikilim to sapadama. (Isaya 37:​1-6) Ano mihakelong ko hongti to sakayat ni Yihofa i, malifokay nangra ko sapalemed, madipotay ko polong no kitakit. (2 Rayray 20:​29, 30; 32:22) Itiya i, ihkalay a cipinang ko tamdaw maemin, misaka dademakan ni Yihofa ko mipairasolay mikayat to finawlan Ningra. Kawra kaadayayan i, o ˈalomanay a hongti ato finawlan cowa ka pihakelong to sakayat no mipairasolay tamdaw.​​—⁠Yirimiya 35:​12-​15.

MIKERIDAN NI YIHOFA KO SAKA 1 HAHEKALAN A KRISCIYANG

9. Misaka dademakan ni Yihofa ko cima mikayat to saka 1 hahekalan a Krisciyang? (Nengnengen ko coka.)

⁹ Itini saka 1 hahekalan, tomirengto ko kasakopang no Krisciyang i, samaanayto ci Yihofa mikerid to finawlan Ningra hani? Minilnilan Ningra ci Yis malo ˈaˈideman no kasakopang. (Ifiso 5:​23) Nikawrira, cowa ko ci Yis sanay ko mihacecayay mikayat to Krisciyang, ao pakaynian i tarokos ato malohemay malitengay i Yirusalim mikerid cangranan. (Dmak 15:​1, 2) Cowa konini aca, itini kasakopang iraayho ko manilnilay a malohemay malitengay mikeriday to salikaka.​​—⁠1 Tisalonika 5:​12; Titus 1:⁠5.

10. (1) Saka 1 hahekalan a Krisciyang samaanay cangra minengneng to macadaay a sakayat hani? (Dmak 15:​30, 31) (2) O romaroma tamdaw hano cowa ka pihakelong to minilnilan ni Yihofa a tamdaw hani? (Nengnengen ko sapatongal lalakaw “ O Romaroma Tamdaw Hano Talimaan sa to Maˈaraway a Wacay.”)

¹⁰ Saka 1 hahekalan a Krisciyang samaanay minengneng to macadaay nangra a sakayat hani? ˈAlomanay nangra makahiay micada hanaca mitoor a midemak. Sanay ko Fangcalay Cudad, maasip nangra ko sakayat ikor ‘tada lipahakay.’ (ˈOsien ko Dmak 15:​30, 31.) Mihaenay, nohatini samaanay ci Yihofa mikerid to finawlan Ningra hani?

MIKERIDAY CI YIHOFA KITANAN

11. Sasamaan kita mihapinang, anini misaka dademakay ci Yihofa to madimadiay a faˈinayan salikaka mikayat to finawlan Ningra hani?

¹¹ Anini, padotocay ci Yihofa mikayat to finawlan Ningra. Padotocay pakayni i Kimad Ningra o Fangcalay Cudad ato ˈaˈideman no kasakopang ci Yis mihaen to demak. Mihaenay, padadotocayho Cingra misaka dademak to tamdaw a mikayat han? Hayi, nengnengen ko pinapina wacay. Kalikorto no saka 19 hahekalan, ci Cares Tayce Loso ato cafacafay ningra micalepay a mikingkiw to  sapairasol no Fangcalay Cudad, mahapinangay nangra i 1914 miheca tada o masakalimlaan a mihecaan, samanen itini tonini a mihecaan misatapangayto mikowan ko Hongti Kitakit no Kawas. (Taniil 4:​25, 26) Itini i pikingkiw nangra to Fangcalay Cudad, ihkalay mahapinang mikayatan ni Yihofa cangra. Itini 1914 mihecaan, mafekaday a demak toniya hekal misawacayay to tomirengayto ko Hongti Kitakit no Kawas. Salakat mafekaday ko Saka Cecay Lalood no Hekal, dotoc iraayho ko taˈangayay a lifong, ˈatoray ato kedal. (Luka 21:​10, 11) Misawacayay konini, soˈlinay sakadademaken ni Yihofa koniya madimadiay faˈinayan a salikaka mikayat to finawlan Ningra.

12-13. Itini Saka Tosa Lalood no Hekal a tatokian, mikeriday a faˈinayan salikaka milimasmasay to maanan, micowat to mitosilay pasifanaˈay to tamdaw a tayal hani?

¹² Nengnengen ko roma tinakoan. Itini Saka Tosa Lalood no Hekal a tatokian, mikeriday faˈinayan salikaka itini i Congpo misongilaˈay a mikingkiw to Paˈarawan 17:​8, ikor i, mahapinangay kora Saka Tosa Lalood no Hekal cowa ko mamikidat to Armakiton, ao aira ko cecay liyad a kadipayalan ikor no malahci ko lalood. Pairaay to ngaˈayay a toki ita micowat to mitosilay a demak. Oranto i, midemakay cangra to hato cowa ko matatodongay a demak, patireng to Kiliyat Picudadan, pahatatanam to mikiriwiˈay manilnil a mitosilay tayra icowacowa no hekal mitosil pasifanaˈ to tamdaw. Caho ka lahci ko lalood i, ˈalomanayto ko micodiyapay a mitosilay mapacorcor. Roma i, madimadiay citanengay a koli itiniay i kasakopang patireng to Pahatatanamay to Mitosilay a Saˈopo, b pahatatanam to polong a salikaka ciepoc ko noka pitosil. Onini pahatatanamay a saˈopo padamaay to finawlan no Kawas misongilaˈ a misaday to iˈaˈayaway a mitosilay tayal.

¹³ Mahererek ko taˈangayay lalood ikor, adihayay pala iraay ko dipayal, ngaˈayto pasalat ko finawlan no Kawas a mitosil pasifanaˈ to tamdaw. Anini, o mitosilay tayal macowatayto icowacowa pala no hekal, padama to ˈalomanay tamdaw mafanaˈ ci Yihofaan. Ano tikolen minengneng ko likisi, ihkalay mahapinang ita, ci Yihofa itini Saka Tosa Lalood no Hekal a tatokian soˈlinayto mikayatay to finawlan Ningra.

14. Hano ngaˈay kita mitadiˈec to mihadakan a sakayat no Malohemay Malitengay i Congpo ato romaroma ciˈinorongay a faˈinayan salikaka? (Paˈarawan 2:⁠1) (Nengnengen ko coka.)

 ¹⁴ Anini, padadotocay mihakelong ko Malohemay Malitengay i Congpo to sakayat ni Kristo, mihadak to matatodongay to araaw no Kawas a sakayat ato harateng ni Kristo, hanaca misaka dademakay to kasakilac kantok ato malohemay malitengay pasayra i kasakopakopang mihadak to sakayat. c Manaokaniw, oniya faˈinayan salikaka sahtoay o cowa ko malefotay, latekay mararaway ko demak, malecad ci Mosian, Yosuwa ato tarokos. (Saˈosi 20:12; Yosuwa 9:​14, 15; Loma 3:​23) Kawra sowal no Fangcalay Cudad, manilnilay no fangcalay saocor a malohemay malitengay itiniay i “kawanan a kamay” ni Kristo, mitoroˈan tonini i, polong a malohemay malitengay no kasakopang sahtoay itiniay sakayat ni Kristo. (ˈOsien ko Paˈarawan 2:⁠1.) Mihaenay hato cipinangay kita, padotocay ci Kristo misinanot mikerid to madimadiay citanengay a koli ato polong a malohemay malitengay, papadadotoc mihaen to demak, ‘tahira kahererekan nonini a lekakawa.’ (Matay 28:20) Adihayay ko lalangian ita mitadiˈec to pakaynian ni Yis i mikeriday faˈinayan salikaka mihadakan a sakayat.

PADADOTOC MIHAKELONG TO PIKERID NI YIHOFA, AIRA KO MAANAN A EPOCAN?

15-16. ˈAlomanay salikaka mihakelongay to sakayat ni Yihofa, mikitini nalifetan nangra mananamay iso ko maanan?

¹⁵ Mihakelong to sakayat ni Yihofa i, nohatiniho mamalifok ko adihayay a sapalemed. Nengnengen ko tinakoan ni Anti aci Rupi. Midoedoan nangra ko sapaini a sowal no madimadiay citanengay a koli, misakantang to nokaˈorip no niyah, telocto i, ngaˈayayto patafang to niyah, mirienang to mipatirengay tayal no likakawa. (Nengnengen ko satadtad no Sapicekiw a Fangcalay Cudad: Matay 6:​22.) Sanay ko sowal ni Rupi: “Latekay itiniay i mimingay a kitiraan maroˈ kami, awaay ko cawka. Paliwalan ako ko adihayay a kaolahan no mako sapisasing a lalosidan. Tada maolahay kako misasing, paliwal tora lalosidan tomangicay kako. Kawra maharateng ako ko fafahi ni Apraham ci Sara, misetekay kako to falocoˈ pasiˈayaw a minengneng, caayto ka tangoˈolen tora misawadan a dafong.” (Hipray 11:15) O manan ko malifokay nonini mararamoday a sapalemed hani? Sanay ci Rupi: “Tada tangongolay ko renec no falocoˈ niyam, samanen mafanaˈay kami to patafangan niyam ci Yihofa to kihcod. Matayal saki likakawa a nalifetan padamaay tamiyanan miharateng to samaanay ko kaˈorip itini faelohay hekal.” Mihayiay ci Anti, sanay cingra: “Misarocod kami kiemel a matayal saki Hongti Kitakit no Kawas, tada soˈlinay a marenec ko falocoˈ.”

¹⁶ Mihakelong kita to sakayat ni Yihofa mamilifokho to maanan a sapalemed hani? Nengnengen  ko tinakoan no fafahiyan salikaka ci Masiya. Micodiyap to kawcong ikor, midoedoan ningra ko sapaini no madimadiay citanengay a koli, misaˈicel micangacang to mieminay to toki matayal saki Kawas a patosokan. (Matay 6:​33; Loma 12:11) Sanay cingra: “Malifokay ako ko sapakalalok a payci no picudadan, cowato papayci to sepat miheca i taykak. Kawra ciharatengay kako adihay ko tayal saki Yihofaan, mansa sawad hananay kora sapakalalok a payci no picudadan, mipiliˈ tayra i mihatatanamay to katayalan a picudadan, minanam to inaneng, mihaen ngaˈayto paririˈ to niyah, halo misakafahay. Tada mahemekay kako tonini a saˈosi no niyah. Nohatini, rihakeday kako to misakafahay a kaˈorip. Roma i, o katayalan a toki o niyah sanay a harateng matayal, mihaenay ngaˈayto kako tayra i Pitil mipadang, ngaˈayho mirienang to romaroma a tayal no likakawa.”

17. Mihakelong kita to sakayat ni Yihofa mamilifokho to maanan a sapalemed hani? (Isaya 48:​17, 18)

¹⁷ Latekay macadaay ita ko pina sapatalipaˈelal, tinakoen aka misakareteng to pakadafongay, ato miliyas to pina katalawan, ho eca ka pisafelit to sarikec no Kawas. Hakelongen ita ko hatiniay a sakayat mamilifok to adihayay a sapalemed. Wa ira ko tingalaway makapahay falocoˈ ita, ngaˈayho miliyas to adihayay a pasangaray. (1 Timoti 6:​9, 10) Mihaen ko demak, ngangaˈayto kita misarocod midoko ci Yihofaan, taˈangay ko lipahak, rihaday ato karenec no falocoˈ.​​—⁠ˈOsien ko Isaya 48:​17, 18.

18. Hano misetek kiso to falocoˈ padadotoc mihakelong to pikerid ni Yihofa hani?

¹⁸ Itini i taˈangayay a padiing ato Kacomaˈolan Miheca Noka Pikowan ni Kristo i, maedeng papadadotoc ci Yihofa misaka dademak to pinapina tamdaw mihadak to sakayat. (ˈOlic 45:16) Ano cowa ka olah kita tonini a sakayat i, mamihakelongho kita han? Ano mitengil kita to sakayat ni Yihofa nohatiniho i, noikor mamadoloto mihaen to demak. Rariden ita mihakelong ko sakayat ni Yihofa, mahawpay ko pihakelong to sakayat no ciˈinorongay faˈinayan salikaka, haratengen onini a salikaka o misaka dademakan ni Yihofa to mamisimaw kitaanan. (Isaya 32:​1, 2; Hipray 13:17) Nanay kita maemin sarocoden ko falocoˈ mitadiˈec ci Yihofaan, o kakeriden Ningra kita miliyas to masakenakenaay a katalawan, salikor tangasa i faelohay hekal, milayap to midaˈocay a ˈorip.