LALENGOEN LALAKAW 14
RADIW 56 Nai Falocoˈen Midofdof ko Soˈlinay Kimad
‘Ka Macakat a Matenes’
‘Ka macakat a matenes kita.’—HIPRAY 6:1.
KALIMLAAN NO LALAKAW
Nengnengen ko matenesay a Krisciyang samaanay mataneng ko pisaˈosi, ato sasamaan midoedo to araaw no Kawas misimsim ato midemak.
1. Halamhamay ci Yihofa kitanan to maanan hani?
MAˈARAW ko wawa no niyah tanektek a sofocen i, maedeng o lalipahak ko falocoˈ no wama wina, maolahayho to nihofocan a wawa nangra. Kawra, cowa ka ciharateng ko wama wina to ao ˈengaenga saho ko wawa. Ano aeca sa ka lomahad ko wawa i, maedeng cacalemcem ko falocoˈ nangra. Malecaday, mahemekay ci Yihofa kitanan satapang mafanaˈ Cingranan, kawra cowa ka olah Cingra ao ˈengaenga saho a wawa kita itini i pihakelongan. (1 Korinto 3:1) Halamhamay Cingra kitanan malo ‘lomahadayto a tamdaw,’ tatodong i, malo matenesay a Krisciyang.—1 Korinto 14:20.
2. Onini lalakaw mamilengo to maanan?
2 Malo matenesay a Krisciyang o manan ko tatodong hani? Sasamaan a macakat a matenes hani? Itini sakacakataw a matenes, o ˈatekakay kakaenen iraay ko maanan a epocan? Hano cowa ka ngaˈay kita pakidem a pakasoˈlin to niyah? Onini lalakaw papacaˈof tonini pina salicay.
MALO MATENESAY A KRISCIYANG O MANAN KO TATODONG HANI?
3. Malo matenesay a Krisciyang o manan ko tatodong hani?
3 Itini 1 Korinto 14:20, mihongyakan to ‘lomahadayto a tamdaw’ no Krisiya a sowal iraay ko “matenesay,” “malefotay” ato “masahciay” a tatodong. a (Ifiso 4:13 ato roma pihongyak.) Malecad to ˈengaenga padadotoc a lomahad, tangasa salikor malo taˈangayayto a tamdaw, o papadadotoc kita a macakat, paˈicel to kalalaˈed no niyah aci Yihofaan, mihaen i, o malo matenesayto a Krisciyang kita. Manaokaniw, soˈlin matenesayto kita, cowa ko tatomerep a talaˈayaw kita. (1 Timoti 4:15) Ano hakowaayto ko mihecaan, ngaˈayay malo matenesay kita. Mihaenay o matenesay a Krisciyang iraay ko maanan a tahapinangan hani?
4. O matenesay a Krisciyang iraay ko maanan a tahapinangan hani?
4 O matenesay a Krisciyang mamidofdof to polong a sapalimoˈot no Kawas, cowa ko mamipiliˈ to kaolahan aca no niyah a midemak. Samanen cowa ko malefotay, latekay mararawayho cangra, kawra to romiˈamiˈad mamisaˈicel cangra midofdof to araaw no Kawas a misimsim ato midemak. Micaˈedonganto nangra ko faelohay a capeling, hanaca padadotocay misaˈicel a palecad to pinengneng no niyah ato Kawas. (Ifiso 4:22-24) Maherekayto cangra minanam midoedo to sarikec ato safalod no Kawas misaˈosi to demak, mansa cowa ko mamisaali cangra to adihayay a sarikec hongaˈ mafanaˈ to sasamaan ko pidemak. Roma sa i, o matenesay a Krisciyang miˈimeray to niyah, ano misaˈosito cangra i, mamisaˈicel a milahci to demak.—1 Korinto 9:26, 27.
5. Cowa ka tenes a Krisciyang iraay ko maanan a pasangaray? (Ifiso 4:14, 15)
5 Itini roma pakayraan, cowa ka tenes a Krisciyang madoloay ‘masaˈfit no tamdaw,’ pakasoˈlin to ‘milipalaway a sasowalen,’ madoloayho pakasoˈlin to misamangahay ato mitowakangay to kimad a sasowalen. b (ˈOsien ko Ifiso 4:14, 15.) Madoloayho cangra malacongis to tao, marariday maˈinap to tao, madoloayho ciharateng to mapakararaway no tao ko niyah. Roma i, pasangaray cangra micoˈay to sakayhid.—1 Korinto 3:3.
6. Tano tinakoen mitadtad samaanay ko kalingad no katenes no Krisciyang. (Nengnengen ko coka.)
6 Masowalay i fafekang, patinakoan no Fangcalay Cudad ko Krisciyang itini kacakat i pihakelongan mahecaday o kalomahad no wawa. Adihayay ko kafokilan no wawa a demak, mansa misaaliay to sapasifanaˈ ato sadipot no malitengay. Tinakoen, o cecay mimingay fafahiyan wawa mamitaˈlif cingra to lalan i, wa kayaten no wina ko kamay ningra. Taˈangayto to miming koniya wawa i, pakonira hanto no wina cingra a mitaˈlif to lalan alatek, kawra papatalipaˈelalen cingra ˈayaw maminengnengho to iraay ko paliding mitaˈlif hokira. Lomahadto konini a fafahiyan wawa i, mafanaˈayto ko niyah sasamaan miliyas to katalawan. Malecaday, caho ka matenes ko Krisciyang i, misaaliay to sapadama no matenesay a salikaka ngaˈ mataneng ko pisaˈosi ato miliyas to katalawan, midipot to kalalaˈed aci Yihofaan. Kawra matenesto ikor, ano mamisaˈosi cingra i, salakatayho misimsim to safalod no Fangcalay Cudad, cipinang to pinengneng ni Yihofa to demak, dotoc patoor a midemak.
O cowa ka tenes a Krisciyang maminanam a midoedo to safalod no Fangcalay Cudad citaneng ko misaˈosian (Nengnengen ko saka 6 fatac)
7. O matenesayto a Krisciyang cowato ko mamisaali to sapadama no tao sanay han? Tadtaden.
7 Sakoniya sowal i, o matenesayto a Krisciyang cowa ko mamisaali to sadama no tao sanay han? Cowa. O matenesay a Krisciyang nolatekay pasayraay i citanengay a tamdaw misalalicayen, kawra cowa ka hatira cangra to caay ka tenes a tamdaw mitala to tao pasowal cangranan to sasamaan ko pidemak, anoca patado cangranan a misaˈosi. O cangra ko mamisaˈosi, samanen mafanaˈay cangra halamhamay ci Yihofa cangranan ‘mitamorong to ˈinorong no niyah.’—Kalatiya 6:5.
8. O matenesay a Krisciyang cowa ka sahto saan o malecaday hano saan ko sowal hani?
8 O lomahadayto a tamdaw o tatirengan cowato ka lecad, malecaday o matenesayto a Krisciyang iraay ko kasasiromaan a capeling. O roma cita:nengay, o roma timo:loay, o roma hinapaladaˈay, o roma tamdaw tada iraay ko siniˈadaay falocoˈ. Itini roma pakayraan, tatosaay matenesay a Krisciyang misiˈayaw to malecaday a pakayraan i, alatek cowa ka lecad ko pinengneng to demak. Kawra, matatodongay to safalod no Fangcalay Cudad. Itini notekedan to ngangaˈay pakaynien i makapahay falocoˈ a misaˈosi a demakan, marariday ira ko mahaenay pakayraan. Mihaenay haw i, o matenesay Krisciyang pakayni i ka eca ka lecad no harateng ato tao cowa ko mamilikaf to tao, ao mamisaˈicel padadotoc a madadipayal.—Loma 14:10; 1 Korinto 1:10.
SASAMAAN KITA MACAKAT A MATENES HANI?
9. Mataˈlifto ko toki i, o lalomahamahad aca kita malo matenesay a Krisciyang han? Tadtaden.
9 O lalomahamahad aca ko wawa, kawra o kacakat ita i pihakelongan cowa ka hecad, misaaliay to sapadadotocaw mihadak to ˈicel. Tinakoen itini saka 1 hahekalan, o Korintoay kasakopang a salikaka micadaay to ngaˈayay lihaf, micadaay to paputisem, micadaayho to fangcalay saocor, mikitiniayho i sapasifanaˈ no tarokos ci Pawlo adihayay ko mananamay. (Dmak 18:8-11) Nikawrira micada to paputisem pi:na miheca ikor, kamayanho eca ka tenes ko ˈalomanay tamdaw. (1 Korinto 3:2) Sasamaan kita miliyas to mahaenay a pakayraan hani?
10. Ano sakacakataw a matenes i, sasamaan ko pidemak hani? (Yuta 20)
10 Ano sakacakataw kita matenes i, salakat ira ko mahaenay a kalim no falocoˈ wangaˈ. O romaroma tamdaw ‘maolahay a cangoˈot ko nalifetan,’ padadotocay malo ˈengaenga a wawa itini i pihakelongan, o mahaenay a tamdaw cowa ko mamacakat. (Taneng 1:22) Itini nokaˈorip, romaroma lomahadayto a tamdaw caay ka ciharateng mitamorong to ˈinorong no niyah, maamaan a demak o wama wina ko patadoay cangranan misaˈosi. Itini midokoay a demakan, caay ka ciharateng kita malecad cangranan, ciharatengay kita mitamorong to ˈinorong no niyah, itini pihakelongan misaˈicel a lomahad. (ˈOsien ko Yuta 20.) Kiso ano misaˈicelay macakat a matenes i, tolonen ci Yihofa, padama tisowanan ‘ira ko kalim no falocoˈ halo ira ko ˈicel a midemak.’—Filipi 2:13.
11. Sapipadamaaw kitanan macakat a matenes, pafeliay ci Yihofa kitanan to maanan? (Ifiso 4:11-13)
11 Cowa ka halamham ci Yihofa kitanan mitiˈer to niyah macakat a matenes. Itini i kasakopang pafeliay Cingra to pakaenay tamdaw ato singsi, padama kitanan itini pihakelongan ‘malo lomahadayto a tamdaw,’ ‘malecad ci Kristoan masahci ko katenes.’ (ˈOsien ko Ifiso 4:11-13.) Pafeliayho ci Yihofa to fangcalay saocor, padama kitanan palahad to ‘ni Kristo a harateng.’ (1 Korinto 2:14-16) Roma i, mikayatan no Kawas ko tamdaw mitilid to Sepat Ratoh a Cudad, padama kitanan cipinang ya mitosil ci Yis i, samaanay misimsim, somowal ato dademak. Itini toniya pakayraan todongen ita ci Yis, wa ngaˈayto a malaˈosi ko patosokan malo matenesay a Krisciyang.
O EPOC NO ˈATEKAKAY KAKAENEN
12. O ‘taˈeneran a sapasifanaˈ pakayni ci Kristoan’ mahawpay ko maanan hani?
12 Ciharateng ko tamdaw malo nisawawaan ni Kristo, o papakasoˈlin to ‘taˈeneran a sapasifanaˈ pakayni ci Kristoan,’ tinakoen o pasasiyoray, pakasoˈlin to Kawas, mipaputisem ato patikolay maˈorip a kimad. (Hipray 6:1, 2) Onini a kimad o taˈeneran no pihakelongan no Kristokiyo. Mihaenay haw i, itini Kocinsic mitosil ko tarokos ci Pitiro to ˈalomanay a tamdaw i, malengoay konini a lalakaw. (Dmak 2:32-35, 38) Na somowalay ci Pawlo o cima cowa pakasoˈlin to patikolay maˈorip, malecaday o cowa pihayi to pihakelongan. (1 Korinto 15:12-14) Nikawrira, sakacakataw a matenes, cowa ko mamarenecen kita to kacipinang aca to taˈeneran a kimad.
13. Sasamaan ko pidemak ita ngaˈay mikitini ˈatekakay a kakaenen milifok to haepoc hani? (Hipray 5:14) (Nengnengen ko coka.)
13 Cowa ka lecad to taˈeneran a sapasifanaˈ, o ˈatekakay a kakaenen mahawpay ko patirengan ni Yihofa a sarikec, mahawpayho ko safalod no Fangcalay Cudad. Oniya safalod ngaˈayay padama kitanan cipinang to pinengneng ni Yihofa. Ano sapilifokaw kita to epoc itini ˈatekakay kakaenen, oha mamisongilaˈ mikingkiw, micalep a misimsim, hanaca misarocod a misaka dademak. Mihaen, o misaˈosian ita o papakahemekto ci Yihofaan. c—ˈOsien ko Hipray 5:14.
Misongilaˈ kita komaen to ˈatekakay a kakaenen, o mamafanaˈto midemak to kahemekan ni Yihofa a pisaˈosi (Nengnengen ko saka 13 fatac) d
14. Samaanay ci Pawlo padama to Korintoay a Krisciyang macakat malo matenesay?
14 Ano tahasiˈayaw to caay pisahci ko Fangcalay Cudad mirikec a demakan i, o cowa ka tenes a Krisciyang tocerid pasangaray citaneng ko pisaˈosi. O roma tamdaw miharateng ano cowa ka pisaˈosi ko Fangcalay Cudad i, maananto a demakan ngangaˈay a midemak. O roma tamdaw mitalaay to tao pasowal cingranan sasamaan ko pidemak. Tinakoen, pakayni to ngangaˈay komaen to patafangan i samiyay a kakaenen sa i, o Korintoay a Krisciyang mitalaay ci Pawloan ihkal pasowal cangranan to ngangaˈay komaen hokira. Cowa ka patadoen ni Pawlo cangra misaˈosi, ao patalipaˈelalan cangra iraay ko ‘fadangalan a mipiliˈ’ no kahacecay tamdaw, ngaˈay tano makapahay falocoˈ no niyah misaˈosi. Misadakay ci Pawlo to pina safalod, papisimsim cangranan to sasamaan ko pidemak hongaˈ caka carirawen ko makapahay falocoˈ nangra, hanaca cowa ko papakapolin to tao. (1 Korinto 8:4, 7-9) Mihaen ko demak ni Pawlo o sapadamaaw to Korintoay a Krisciyang macakat malo matenesay, mafanaˈ misaka dademak to pafafidaˈay a inaneng, ao cowa ko mamitiˈer to tao ato sarikec a misaˈosi to demak.
15. Samaanay ci Pawlo padama to Hipray a Krisciyang padadotoc macakat i pihakelongan?
15 Mikitini i Hipray cudad wa ngaˈay mananam ita ko kalimlaan a sapasifanaˈ. O romaroma Hipray Krisciyang cowa ka padadotoc macakat i pihakelongan, ‘o hacol aca ko minanoman, caay ka ngaˈay komaen to ˈatekakay a kakaenen.’ (Hipray 5:12) Pakaynian ni Yihofa i kasakopang palidlid sa patalahkal to soˈlinay kimad, nikawrira caay pinanam ato micada cangra tonini a kimad. Tinakoen, ˈalomanay Yutaya a Krisciyang kamayanho misaˈakawang to Rikec ni Mosi, kawra itini ˈayaw no 30 miheca, o Rikec ni Mosi pakayni patafangan ni Kristo a sapatefoc palasawadanto. (Taneng 4:18; Loma 10:4; Titus 1:10) Caay ka harateng mataˈlifayto ko 30 miheca, o harateng nonini Yutaya a Krisciyang caayho ka masalof! Mansa kayaten no Kawas ci Pawlo patikami cangranan. Ilalomaˈ nonini a tikami mahawpay ko ˈatekakay a kakaenen o misaalian nangra, papaˈicel to pakasoˈlin no falocoˈ nangra, padama cangranan pakasoˈlin o pidoko no Krisciyang a limasmas ikakaay ko nika ngaˈay. O tikami ni Pawlo padamaayho cangranan caka talaw to pisafelit no Yutaya tamdaw, timolo padadotoc a mitosil.—Hipray 10:19-23.
AKA PAKIDEM PAKASOˈLIN TO NIYAH
16. Malo matenesay a Krisciyang ikor, mamisamaanho ko pidemak hani?
16 Malo matenesay a Krisciyang kita ikor, mamisaˈicel padadotoc mihaen to demak. Aka pakidem pakasoˈlin to niyah. (1 Korinto 10:12) O ‘papadotoc kita mikinsa to niyah,’ mihapinang to padadotocay macakat ko niyah hokira.—2 Korinto 13:5.
17. Mikitini Kolosay a cudad samaan mahapinang ita, mamisaˈicel ko Krisciyang padadotoc malo matenesay?
17 Itini i sapatikami to Kolosay a kasakopang, miliyaw haca ci Pawlo misaˈicel a pasowal to papadadotoc a mitawmec to matenesay a pakayraan. Soˈliˈlin o salikaka i Kolosay o matenesayto a Krisciyang, kawra patalipaˈelalanho ni Pawlo cangra minaˈon, aka malipalaw no harateng no hekal. (Kolosay 2:6-10) Masowalayho i tikami, o tada cipinangay to Kolosayay kasakopang a Ipafras, marariday patado cangranan mitolon, halamham cangranan ‘padadotoc a malo matenesay a tamdaw.’ (Kolosay 4:12) Tarokos ci Pawlo aci Ipafras mafanaˈay cangra, ano sapadotocaw malo matenesay a tamdaw, misaaliay to pisaˈicel no kahacecay tamdaw, hanaca misaaliay to sapadama no Kawas. Halamhamay cangra to i Kolosayay a Krisciyang ano tahasiˈayaw to maanan a sapalifet i, ngangaˈay tanektek ko pakasoˈlinay falocoˈ, padadotoc malo matenesay a tamdaw.
18. O matenesay a Krisciyang maminaˈon to maanan hani? (Nengnengen ko coka.)
18 Patalipaˈelalan ni Pawlo ko Hiprayay a salikaka, o matenesay a Krisciyang o tatahadaˈoc malahdaw ko pihayda ni Yihofa alatek. O cecay Krisciyang ano padeteng sa eca ka pitengil to sowal ni Yihofa, wa matongal ko kapael no falocoˈ alatek, cowa ko papasasiyor, ecato pilifok to sasodod no Kawas. Kao ngaˈayay cowa ka hatini a pakidem ko pakayraan no Hiprayay a Krisciyang. (Hipray 6:4-9) Anini, o romaroma salikaka misawaday mitosil anca mafalahay no kasakopang, kawra ikor pasasiyoray, samaanayto cangra hani? Patalahkal cangra to misapoeneray a waywayan mikifalocoˈ a pasasiyor, paihkalay konini cowa ka lecad cangra to misowalan ni Pawlo oya tatahadaˈoc malahdaw ko pihayda no Kawas a tamdaw. Kawra, patikolto cangra itatihi ni Yihofa ikor, mamicada to sapadama ni Yihofa. (Icikil 34:15, 16) Mamilimasmas ko malohemay malitengay to cecay matenesay a salikaka, padama cangranan miliyaw ngaˈay ko kalalaˈed ci Yihofaan.
Papadamaen ni Yihofa ko pasasiyoray a salikaka patikol ira ko ngaˈayay kalalaˈed Cingranan (Nengnengen ko saka 18 fatac)
19. Mamicangacang kita to maanan a patosokan hani?
19 Ano ciharatengay kiso malo matenesay a Krisciyang, mamadangar iso midemak! Ka padadotoc komaen to ˈatekakay a kakaenen, papadadotocho misalof to harateng no niyah, ho mapadama ko niyah malecad male:cadto ni Yihofa ko pinengneng to demak. Ano o matenesayto a Krisciyang kiso i, ka papadotoc misaˈicel, tahadaˈoc malo matenesay a Krisciyang.
SASAMAAN KO CAˈOF ISO?
-
Malo matenesay a Krisciyang o maanan ko tatodong hani?
-
Sasamaan kita macakat a matenes hani?
-
Hano caka ngaˈay kita a pakidem pakasoˈlin to niyahan?
RADIW 65 Ka Cakat!
a O Hipray a Fangcalay Cudad soˈliˈlin cowa pisaka dademak to “caay ka tenes” ato “matenesay” sanay a tilid somowal pakayni to tamdaw, kawrira somowalay ko Hipray a Fangcalay Cudad to mahaenay tosa a pakayraan. Tinakoen, o Taneng a cudad palalinian ko tosa ˈopo a tamdaw, cecay ˈopo i, o kaemangay, cangoˈotay ko nalifetan a tamdaw, cecay ˈopo i, o citanengay, micalepay ko kacipinang a tamdaw.—Taneng 1:4, 5.
b ˈOsien “Sasamaan Pafafidaˈ to Makaniway a Lihaf,” nengnengen ko JW Library® ato jw.org wangcan “Kaciharatengan no ˈAlomanay a Demak” onini madadoedoay a lalakaw makilim.
c Nengnengen ko “Micekiway a Limasmas” nonini a casi.
d TATODONG NO COKA: O cecay faˈinayan salikaka misaka dademakay to safalod no Fangcalay Cudad mipiliˈ to matatodongay a kamok no lawla.
