1. O romaroma salikaka pakayni mitosilay tayal iraay ko masamaanay a harateng? (Nengnengen ko coka.)

 MALO finawlan ni Yihofa, tangongolay ko olah ita to kakarayan Wama ci Yihofaan, makalimayho padama to roma tamdaw mafanaˈ Cingranan, mansa misaˈicel kita mitosil to tao. ˈAlomanay salikaka tada lipahakay to mitosilay a tayal. Nikawrira, o romaroma salikaka sakalalengoaw to kafahalan a tamdaw to ngaˈayay lihaf pasangaran nanay. Misamaanay hani? O roma tamdaw halingodoay ko pinangan, cangoˈotay ko pakasoˈlin to niyah, o roma i, mikongkong to fawahan no kafahalan a tamdaw o kangodoan a demak sanay, o roma i, matalaway naˈayen no tamdaw, iraayho ko roma mikikaemangan mapasifanaˈay miliyas to sakaketeraw no tao. Mihaenay, soˈliˈlin maolahay cangra ci Yihofaan, kawra cowa ka lipahak a mitosil. Nikawrira, mafanaˈay cangra kalimlaan ko mitosilay tayal, oranto i, marariday mirienang to mitosilay. Maˈaraw ko pisaˈicel nangra midemak, maedeng mahemekay ci Yihofa!

2. Ano cowa ka lipahak kiso to mitosilay tayal, hano aka matoled hani?

² Latekay pasangaran nanay kiso lipahak mitosil han? Ano mahaenay i, aka matoled. Eca ka pakidem ko pakasoˈlin iso to niyah, paihkalay koni to misapoeneray ko falocoˈ a tamdaw kiso alatek, caay ka ciharateng mikidat to pisamacay no tao tisowanan, caayho ka ciharateng malacongis ato tao. Soˈlinay haw i, awaay ko maolahay a tamdaw naˈayen no tao, ano pakayniay sakangaˈay no tao ko pidemak a naˈayen, mangalefay ko katatiih no harateng. Ihkalay ko kafanaˈ no kakarayan Wama to masiˈayaway iso a pasangar, makalimay sapadamaaw tisowanan. (Isaya 41:13) Onini lalakaw mamilengo to lima sapaini, padama tisowanan miremo to masofaway a harateng, padama tisowanan matongal ko lipahak mitosil.

 MIKITINI I KIMAD NO KAWAS MILIFOK TO ˈICEL

3. O pairasolay a Yirimiya hano ira ko timolo mitosil i tamdaw hani?

³ Itini nolitengan, o madimadiay a sikawdan no Kawas mikitiniay i kimad no Kawas milifok to ˈicel, mansa ngaˈay milahci to karetengay a ˈinorong. O pairasolay a Yirimiya o ngaˈayay a tinakoan. Ocoren ni Yihofa cingra mitosil i, satapang aca cowa ka pakasoˈlin cingra to niyah, sanay ko sowal: ‘Kaemangayho kako, mafokilay caciyaw.’ (Yirimiya 1:6) Ikorto hano ira ko timolo ningra hani? Samanen mikitiniay cingra i sowal no Kawas milifok to ˈicel. Sanay ci Yirimiya: ‘O sowal Ningra malecaday o namal, itini i falocoˈ ako marengreng, mirecep i ˈokak ako, caayto pakaˈmet kako, saka pasowal sato kako.’ (Yirimiya 20:8, 9) Soˈliˈlin maliyangay ko mitosilan ni Yirimiya, kawra o papilasilan no Kawas ci Yirimiyaan a lihaf paˈicelay cingranan, hato ngaˈayay malahci ningra konini a tayal.

4. Mikingkiw ato midotim to Kimad no Kawas pairaay to maanan a sapadama kitanan hani? (Kolosay 1:9, 10)

⁴ O Krisciyang mikitiniay i Kimad no Kawas milifok to ˈicel. Itini Kolosay cudad sowal no tarokos ci Pawlo, minanam to matatodongay a sifanaˈ pakalalokay to Krisciyang ‘matatodong to nafalocoˈan ni Yihofa’ ko waywayan a dademak, ‘itini masakenakenaay ngaˈayay demak padadotoc ira ko minaroˈan.’ (ˈOsien ko Kolosay 1:9, 10.) Milasil to ngaˈayay lihaf o ngaˈayay a demak. Ano misongilaˈ kita mikingkiw ato midotim to Kimad no Kawas, mamatongal ko pitadiˈec ita ci Yihofaan, matongalho ko pisaareteng to mitosilay a tayal.

5. Sasamaan ko pikingkiw ngaˈ mikitini Kimad no Kawas milifok to sataˈangayay a epoc hani?

⁵ Sapilifokaw to sataˈangayay a epoc mikitini Kimad no Kawas i, mamipalak to toki misongilaˈ mikingkiw, misongilaˈ midotim, aka macaloh. Ano caka cipinang to sinael i, hamaan taˈlif han milawa, sakadademaken ko Pirorodan to Mitepangan Cudad no Mikecolay ato Pirorodan to Mitepangan Cudad no Misawacayay Tamdaw ni Yihofa mikilim to milingatay a lalakaw. Palaken iso ko toki misongilaˈ mikingkiw, mamatongal ko pakasoˈlin to soˈlinay a kimad ko Sowal no Kawas. (1 Tisalonika 5:21) Matongal ko pakasoˈlin iso, mamatongal ko olah paladaˈ to soˈlinay kimad i tamdaw.

SONGILAˈEN MISADAY

6. Hano mamisongilaˈ kita misaday to mitosilay a tayal hani?

⁶ Ano misarocod kiso misongilaˈ misaday, itini pipaladaˈ iso to ngaˈayay lihaf i tamdaw i, rarihadayto ko harateng. ˈAyaw no ocoren ni Yis  ko nisawawaan malingad mitosil i, salakatayho padama cangranan misongilaˈ misaday. (Luka 10:1-11) Samanen mitooran no nisawawaan ko sapasifanaˈ ni Yis a midemak, mansa malahci ko tayal ikor marenecan nanay ko falocoˈ.—Luka 10:17.

7. Sasamaan kita misongilaˈ misaday to mitosilay a tayal hani? (Nengnengen ko coka.)

⁷ Sasamaan kita misongilaˈ misaday to mitosilay a tayal hani? Ngaˈayay haratengen ita sasamaan tano niyah a sowal ihkal ko pitadtad to soˈlinay kimad, roma i, ngaˈayho kita miharateng, matengil no i kilacay a tamdaw ko sowal ita wa ira ko masamaanay a harateng, ato sasamaan kita pacaˈof. Dotoc ano masasowal to tamdaw i, sasinowayen ita ko harateng, masedi ko pising, padotoc a damsay ko sowal.

8. O Krisciyang malecaday to sera a koreng hano saan ko sowal hani?

⁸ Tarokos ci Pawlo tano sapatinako mitadtad to saaroˈan no mita itini mitosilay a tayal, sanay cingra: ‘O sera a koreng kita, kawra iraay ko tadamaanay a dafong mitelian i lalomaˈ.’ (2 Korinto 4:7) Onini a tadamaanay a dafong o maanan hani? O milasilay to ngaˈayay lihaf no Hongti Kitakit a tayal, mirienang kita tonini a tayal o milidongay to ˈorip no tao. (2 Korinto 4:1) O sera a koreng o maanan? O milasilay to ngaˈayay lihaf a sikawdan no Kawas. Itini lintad ni Pawlo, o misasingdiay a tamdaw tano kapowaan miparo ko kalimlaan a dafong a micoloˈ, tinakoen o epah, kakaenen ato payci. Malecaday, patorodan ni Yihofa ko kalimlaan ngaˈayay a lihaf i kitaanan papilasil. Oha mamidama Cingra kitaanan, paira to ˈicel ita milahci tonini a tayal.

MICANGACANG TO TIMOLO

9. Sasamaan ko pidemak ita ngaˈay miremo to kaciˈangi hani? (Nengnengen ko coka.)

⁹ Mitosil kita matalaway to pinaˈay ato pisafelit no tamdaw. Sasamaan kita pakalowid to mahaenay makokiˈay a falocoˈ hani? Ngaˈayay haratengen ita, tiya mikeceng ko ˈaˈideman no pidoyongan mitosil ko tarokos i, samaanay ko tarokos mitolon to Kawas. Cowa ka pakayni kaciˈangi a sawad sato cangra, ao micangacangay ci Yihofaan pafeli cangranan to ‘timolo,’ ho ngaˈay cangra ‘padotoc milasil to Kimad no [Kawas].’ Kalikiay pacaˈofen ni Yihofa ko satolon nangra. (Dmak 4:18, 29, 31) Itini pitosilan ano matalawen kiso, wa ngaˈay pasayra i Kawas mitolon, micangacang Cingranan paˈicel to olah iso i tamdaw, padama tisowanan timolo pakalowid to ciˈangiay.

10. Samaanay ci Yihofa padama kitanan misawacay Cingranan? (Isaya 43:10-12)

 ¹⁰ Sakadademaken ni Yihofa kita malo misawacayay tamdaw Ningra, mikiˈokay papafeli to timolo kitaanan. (ˈOsien ko Isaya 43:10-12.) Nengnengen ko sepat misaka dademakan ni Yihofa a pakayraan. Saka 1, ano milasil kita to ngaˈayay lihaf i, kalacafayay ci Yis kitaanan. (Matay 28:18-20) Saka 2, sakadademakan ni Yihofa ko coyoh padama kitaanan. (Paˈarawan 14:6) Saka 3, pafeliay ci Yihofa to fangcalay saocor kitaanan, padama kitaanan pakaharateng to mananamay a sifanaˈ. (Yohani 14:25, 26) Saka 4, pafeliay ci Yihofa to salikaka malacafay kitaanan matayal. Iraay ci Yihofa ato matomesay to olah a kasacefang no salikaka midama i kalikor, wa irato ko timolo ita milahci to mitosilay a tayal.

MAKAHI A MIFALIC, MATATODONG KO PINENGNENG

11. Itini pitosil i, sasamaan ko pidemak ngaˈayto malitemoh ko ˈalomanay a tamdaw hani? (Nengnengen ko coka.)

¹¹ Mitosil i, ano caka ˈaloman ko i lomaˈay a tamdaw, matoledan nanay kiso han? Ngaˈayay saharateratengen iso: “Toniya tatokian, i kilacay a tamdaw icowaay hani?” (Dmak 16:13) Matayalay cangra anca micakayay to dafong han? Ano mahaenay i, i maci misawacay kiso wa ˈaloman ko mahelaay tamdaw alatek. Faˈinayan salikaka ci Ciyawsoya sanay ko sowal: “Mahapinangay ako itini i pisasingdian anca pitelian to paliding a mitosil, adihayay ko toki masasowal to tamdaw.” Mahapinangayho ningra ato fafahi ci Policite, itini picereman no cidal ato kalahokan no Pilipayan ˈalomanay ko i lomaˈay a tamdaw.—Ifiso 5:15, 16.

12. Samaan kita cipinang to o maanan ko pakasoˈlinan anca kaciharatengan no tao hani?

¹² Ano cowa ka olah ko tao to milasilan ita ngaˈayay lihaf i, tanamen a cipinang o maanan ko pakasoˈlinan anca kaciharatengan nora tamdaw. Ci Ciyawsoya aci Policite ano misatapang masasowal to tao i, salakatay misaka dademak to salicay no tancang a milicay to tao. Tinakoen, misaka dademak cangra to O Masamaanay a Cudad ko Fangcalay Cudad? a tancang i, sanay: “Harateng no roma tamdaw mikitiniay i Kawas ko Fangcalay Cudad, kawra cowa ka haen ko harateng no romaroma tamdaw. Samaanay ko miso harateng hani?” Tocerid ngaˈayto cangra padadotoc masasowal to tao.

13. Ano samaanto ko pinengneng no tao to mitosilay tayal ita, sahtoay o malaˈosiayto kita, hano saan ko sowal hani? (Taneng 27:11)

 ¹³ Ano samaanto ko pinengneng no tao to milasilan ita a ngaˈayay lihaf, sahtoay o malaˈosiayto kita. Misamaanay hani? Samanen maharekayto kita mitoor to misowalan ni Yihofa aci Yis a midemak, misawacay to tamdaw. (Dmak 10:42) Soˈlin awaay ko mahelaay ita a tamdaw, anca caka kahi ko tamdaw mitengil, wa kamayan a lipahak kita. Samanen mafanaˈay to midemakay ko niyah to pakahemekay to kakarayan Wama a demak.—ˈOsien ko Taneng 27:11.

14. O romaroma salikaka ano mahela ko maolahay to soˈlinay kimad a tamdaw i, hano ngangaˈay kita lipahak hani?

¹⁴ O romaroma salikaka ano mahela ko maolahay to soˈlinay kimad a tamdaw i, wa ngaˈay kita malacafay a lipahak. Na somowalay ko Mikecolay, masadak kita mitosil, malecaday o cecay ˈopo a tamdaw mikilimay to mahidayay a wawa, ˈalomanay ko mikilimay to wawa a tamdaw, talacowacowaay cangra mikilim. Tiya mahela koya wawa i, cowa koya pakahelaay aca to wawa a tamdaw, o polong a tamdaw lipahakay maemin. Malecaday, o mitosilay pasifanaˈay a tayal malacafayay ko salikaka no kasakopang a midemak. Sapisongilaˈaw misawacay to i kilacay a tamdaw, polong a tamdaw mamirienang maemin. Mihaenay, ano ira ko maolahay to kimad a tamdaw mirienang to saˈopo i, polong a tamdaw lipahakan nanay maemin.

MISAMACAY MAOLAH CI YIHOFAAN ATO MAOLAH TO TAO

15. Misaka dademak to sowal no Matay 22:37-39, sasamaan padama kitanan matongal ko kafanekfek itini i pitosilan? (Nengnengen ko papotalay coka.)

¹⁵ Ano misamacay kita maolah ci Yihofaan ato tao, mamatongal ko kafanekfek ita itini i pitosilan. (ˈOsien ko Matay 22:37-39.) Haratengen hena, misarocod kita matayal saki Yihofaan tada papakahemek Cingraanan! Ngaˈayay haratengen, o soˈlinay kimad palipahakay to tamdaw, pairaay to makapahay a hatokel! Ano micada ko tamdaw to soˈlinay kimad, wa irato ko hatokel ningra milayap to midaˈocay a ˈorip.—Yohani 6:40; 1 Timoti 4:16.

16. Ano caka ngaˈay masadak i, sasamaan kita mikitini mitosilay a tayal mikilim to lipahak? Sadaken ko tinakoan.

¹⁶ Pakayniay kiso i maanan a lalangian eca ka sadak han? Ano mahaenay i, samacayen a midemak ko mamadangar iso a demak, misarocod patalahkal to olah ci Yihofaan ato tao. Itini  2019 a lifong a tatokian, ci Samuil aci Taniya marariday itini i lomaˈ. Itiya tora tatokian, miceriday cangra patingwa ato patikami a misawacay, pakayni i Zoom misikay to pakingkiway a demak. Roma i, ci Samuil ciadadaay to ekang, tatayra i pipaisingan mipaadah, ano malingad cingra i, misaˈicelay pasayra i malitemohay a tamdaw misawacay. Sanay cingra: “O pasangar mamilotay to tireng no niyam alatek, mangiyangi ko pakasoˈlinay falocoˈ, mihaenay misaaliay kami mikitini i midokoay a tayal mahela ko lipahak.” Itini toniya kapasangaran a tatokian, ci Taniya mapolinay wa tolo a folad i takar, ikor mamaroˈ i cikalilengay a kamaroˈan to enem a folad. Sanay cingra: “Misarocoday kako a midemak to mamadangar ako a demaken, o tayniay milisoˈ takowanan a kangkofo misawacayan ako cingra, ato masasowal to mipawsaay to dafong tayni i lomaˈ ako a tamdaw. Itiniayho kako i tingwa masasowal to paˈacaay to sapaadah to adada a lalosidan a tamdaw to Fangcalay Cudad, hanaca lipahakay ko kasasowal.” Soˈliˈlin ci Samuil aci Taniya pasangaray ko kaˈorip, kawra misarocoday a midemak, lipahakay ko falocoˈ nangra.

17. Sasamaan ko pidemak ita ngaˈay mikitini toniya lalakaw milifok to taˈangayay a epoc?

¹⁷ O mihadakan noniya lalakaw a sapaini ano komoden ita misaka dademak, wa ira ko sangaˈayay a minaroˈan. Tinakoen, ano makahirahira ko sapafangsis to dateng i, o kakaesoˈto a kaenen. Mahecaday, ano sarocoden ita misaka dademak ko sapaini noniya lalakaw, wa ngaˈayto miremo to masofaway a harateng, matongal ko lipahak mitosil.