1. O nopidokoan a lakoing o maanan hani? Mamisetek kita to maanan hani?

 ANINI, itini i fafekang no sera iraay ko matomesay ko lipahak a lakoing, pinaay soˈot ˈofad ko maroˈay a tamdaw, rihadayay ko kemod no falocoˈ nangra, madadipayal, malacafay midemak to ciepocay a demak. Misetekay to falocoˈ cangra tahadaˈoc eca ka piliyas tonini a lakoing, halamhamay ˈaloman ko tamdaw ngaˈay malacafay cangranan maˈorip tonini mikiriwiˈay a lakoing. Onini a lakoing o maanan hani? O nopidokoan a lakoing! a

2. O nopidokoan a lakoing iraay ko maanan a mikiriwiˈay?

² Itini mikowanan ni Satan a hekal masakatalawanto, matomesay ko ˈinteh ato mariˈangay a demak. (1 Yohani 5:19; Paˈarawan 12:12) Itini tonini mafodifoday a hekal, patirengay ci Yihofa to cecay rihadayay dipayalay a lakoing, o soˈlinay kafahkaˈan konini. Onini a hekal taˈangayay ko pidokaˈ to tamdaw, kawra matomesay ko olah a kakarayan Wama midipotay kitanan, ngaˈay padadotoc lipahak a midoko Cingranan. Mitadtaday ko Fangcalay Cudad onini a lakoing o rihadayay a ‘pikiˈadingan,’ ato ‘iraay ko nanom a palosayan.’ (Isaya 4:6; 58:11) O maroˈay tonini lakoing a tamdaw milifokay to sapalemed ni Yihofa, ngaˈay itini toniya pasangaray siˈayawen a salikoray a romiˈad ira ko taˈangayay sakaraheker ato rihaday.—Isaya 54:14; 2 Timoti 3:1.

3. O sapairasol no Isaya 65 fedengan samaanay itini i nolitengan a malaˈosi hani?

³ Itini Isaya 65 fedengan, paliˈayaway ci Yihofa o kaˈorip no tamdaw itini nopidokoan a lakoing wa adihay ko sakaraheker. Onini a sapairasol salakat itiniay i ˈAyaw no Kongyen 537 miheca malaˈosi. Itiya, o mikifalocoˈay pasasiyor a Yutaya tamdaw mikitini  i Papilon matedal, ikor minokay i nalacolan. Itini sapalemed ato sapadama ni Yihofa, o finawlan Ningra miliyaw a patireng to mapelalay a Yirusalim ato ilalomaˈay a fangcalay sefi, hanaca onini a fangcalay sefi miliyaw malo matatodongay pidokoan a kitiraan. —Isaya 51:11; Cikariya 8:3.

4. O sapairasol no Isaya 65 fedengan anini a lintad samaanay a malaˈosi hani?

⁴ Itini 1919 miheca, anini a lintad sikawdan ni Yihofa mikitiniay i Taˈangayay Papilon a masadak. Mikitiya, o sapairasol ni Isaya miliyaway malaˈosi, o nopidokoan a lakoing itiniay i paro no cikiw misatapangay matenak. Itini icowacowa pala, fanekfekay mitenak to Hongti Kitakit no Kawas a tamdaw mapatirengayto ko adihayay a kasakopang, mapalahaday ko ngaˈayay capeling no Krisciyang. Nao matiraay o ˈaˈadopen mariˈang a tamdaw micaˈedongay to ‘faelohay a capeling,’ onini faelohay a capeling ‘o mitooray to araaw no Kawas a sangaˈen.’ (Ifiso 4:24) Manaokaniw, o masowalay no Isaya cudad adihayay sapalemed tahira i faelohay hekal ngaˈ masahcito a malaˈosi, kawra nohatiniho rahekerayto ko kaˈorip ita. Dotoc nengnengen ita, o nopidokoan a lakoing papafeli kitanan to maanan a sapalemed, ato misamaanay hano tatahadaˈoc aka a piliyas kita tonini a lakoing.

ITINIAY TONIYA LAKOING MAˈORIP A TAMDAW TADA RAHEKERAY!

5. Mikiˈokay ko Isaya 65:13, itini nopidokoan a lakoing iraay ko maanan a sapalemed kitaanan hani?

⁵ Mafecolay caay ka soˈaw, sinowayay ko falocoˈ. O sapairasol ni Isaya mitemeray a mitadtad, itini lalomaˈ nopidokoan a lakoing ato papotalay a kaˈorip taˈangayay ko kasasiroma. (ˈOsien ko Isaya 65:13.) Paitinian ni Yihofa i nofalocoˈan no midokoay Cingranan a tamdaw milifok to hasakarenec, pafelian Ningra kita to fangcalay saocor, Fangcalay Cudad ato kadofahay sapahaled to pakasoˈlinay falocoˈ a kakaenen, ho ‘ira ko kakaenen,’ ‘nananomen’ ita, a ‘mahemeken.’ (Nengnengen ko Paˈarawan 22:17.) O i papotalay nonini a lakoing a kaˈorip cowa ka lecad, o itiraay a tamdaw ‘macahiway’ ‘masoˈaway’ ‘mapakangodoay,’ o nofalocoˈan a saali nangra pakidemay ko nika cangoˈot.—Amos 8:11.

6. Pakayni sapafeli ni Yihofa kitaanan a sapatelong, ngaˈay kita mikitini Yoil 2:21-24 mahapinang ko maanan? Sasamaan kita mikitini toniya sapatelong milifok to epoc hani?

⁶ Itini i sapairasol no pairasolay ci Yoil masowalay ko epah, panay ato olif a simal onini a cerid a kakaenen kakadofah. Mitadtaday koni wa kadofah ci Yihofa a midimokos to kihcod a saali ita, tinakoen pafeliay kitanan to sapahaled to pakasoˈlinay falocoˈ a kakaenen. (Yoil 2:21-24) Anini, pakaynian ni Yihofa i Fangcalay Cudad, mitepangan a cudad, wangcan, saˈopo ato taykay mirenec to nofalocoˈan ita a saali. Ho ngaˈay kita to romiˈamiˈad milayap to ˈaredetay a ‘kakaenen,’ mansa ngaˈay a mafecol, matongal ko sinoway no falocoˈ.

7. Hano ‘mahemek ko falocoˈ’ ita hani? (Isaya 65:14)

⁷ Lipahak a marenec. ‘Mawaho’ mahemek ko finawlan no Kawas, samanen matomesay ko piakoˈid nangra ci Yihofaan. (ˈOsien ko Isaya 65:14.) Kahemekan a kimad, mihinomay to tamdaw a sakiˈok no Fangcalay Cudad, ato pakaynian i sapatefoc ni Yis Kristo ira ko tanektekay a hatokel no mita, ‘pakahemekay to falocoˈ’ ita. Roma i, ngaˈayay masasowal to salikaka to kahemekan a demak, tada o kalipahakan no mita!—ˈOlic 34:8; 133:1-3.

8. O nopidokoan a lakoing iraay ko maanan tosa mikiriwiˈay?

⁸ O nopidokoan a lakoing iraay ko tosa mikiriwiˈay, o kaˈorip no ilalomaˈay a tamdaw masasiolahay, hanaca makedecay a malacecay. (Kolosay 3:14) Padamaay konini kitanan misaharateng to samaanay ko kaˈorip i faelohay hekal, itiya i, o finawlan ni Yihofa wa mikikaka to  aniniay ko kakedec a masasiolah. Cecay fafahiyan salikaka mitikol miharateng tiya malitemoh ningra ko Misawacayay Tamdaw ni Yihofa i, mahapinangay a demak, sanay cingra: “Isaˈayaw cowa ka fanaˈ kako to sasamaan ngaˈ lipahak, ano malacafay to paro no lomaˈ, cowa ka lipahak. Sakinacecay ako maˈaraw ko tamdaw paihkal to soˈlinay masasiolahay a falocoˈ, o itiniay i Misawacayay Tamdaw ni Yihofa.” O tamdaw ano sakalipahakaw ato marenec, mamicomod to nopidokoan a lakoing, o niyah ko mitinako to kasasiolah a malacecay, cowa ko pitengil aca to sowal no tao. Ano masamaanayto ko sowal no hekal a tamdaw kitanan, itini kita taˈangayay paro no lomaˈ ni Yihofa sahtoay o ngaˈayay ko ngangan a tamdaw, o pinengneng no hekal a tamdaw cowa ko kalimlaan.—Isaya 65:15.

9. Pakayni to masiˈayaway ita a pasangaray i kaˈorip, itini i Isaya 65:16, 17 mihadakay to maanan a sakiˈok hani?

⁹ Rihaday ato sinoway. Sowal no Isaya 65:14, o cowa ka kahi micomod to nopidokoan a lakoing a tamdaw, ‘o mamaroray kamo a misemsem ko falocoˈ a tomangic.’ Soˈlin tahalifa ko finawlan no Kawas to kasomadan ato kararoman a demak, nikawrira anoikor onini a demak ‘mamapawanto, caayto ka sadak i kaˈayaw no [Kawas].’ (ˈOsien ko Isaya 65:16, 17.) Papalasawadento ni Yihofa ko kihcod pasangaray no mita, salikorto i, o kihcod a roray mamasahcito malahdaw.

10. Macacawmaˈ to salikaka o taˈangayay sapalemed hano saan kiso miharateng hani? (Nengnengen ko coka.)

¹⁰ Anini ano mirienang kita to saˈopo no Krisciyang i, sinowayan nanay kita, caayto ka piharateng to saroero nonini a hekal. Ano sarocoden ita palahad ko minaroˈan no fangcalay saocor, patalahkal to olah, lipahak, rihaday, sidaˈit ato damsayay oniya makapahay a capeling, ngaˈayto kita misadak to ˈicel, ho matinako no tao to sinowayay ko lakoing. (Kalatiya 5:22, 23) Anini masalalomaˈ no likakawa no Kawas kita, tada soˈlinayto a raheker! Ano padadotoc kita materek to nopidokoan a lakoing i, noikor mamaˈaraw ita ko pisahci no Kawas palaˈosi to ‘faelohay kakarayan faelohay sera’ a sakiˈok.

11. Mikitini Isaya 65:18, 19, ilalomaˈ nopidokoan a lakoing iraay ko masamaanay a harateng ita?

¹¹ Matomes ko piakoˈid a mahemek. Padotocay somowal ci Isaya, itini nopidokoan a lakoing misamaanay hano ngaˈay ‘lipahak’ kita. Misangaˈan ni Yihofa koniya lakoing. (ˈOsien ko Isaya 65:18, 19.) Sakadademakan Ningra kita padama to tamdaw micomod tonini a makapahay lakoing, samanen onini a hekal malecaday to makedalay a kohkoh, cowa ko mamirenec to falocoˈan no tamdaw a saali. Soˈlinay kimad pafeliay kitanan to kadofahay a sapalemed,  hato mahemekay kita, makalimay kita paladaˈ to tao tonini kasemeran a sapalemed.—Yirimiya 31:12.

12. Itini Isaya 65:20-24 mihadakan a sakiˈok samaanay ko harateng iso? Misamaanay?

¹² Itiniay nopidokoan a lakoing maˈorip a tamdaw iraay ko makapahay a hatokel, matomesay ko piakoˈid ita a mahemek. Haratengen hena itini i faelohay hekal mamidemak kita to maanan, mamaˈaraw ko maanan! Mikiˈokay ko Fangcalay Cudad, itiya ‘caayto ko mamapatay ko ˈengaengaho a wawa, caayto ko mamapatay ko cowaho ka toˈas a tamdaw.’ ‘Patireng kita to lomaˈ, o niyah ko mamaroˈ, paloma to fadisosoˈ, komaen to heci no palosayan.’ ‘Caay ka lahorac ko narorayan,’ samanen mamilifok kita to ‘sapalemed ni Yihofa.’ Mikiˈokay Cingra kitaanan tanektek marenec ko kaˈorip, ciepoc ko kaˈorip to romiˈamiˈad. ‘Caho ka picangacang’ kita i, mafanaˈayto Cingra to saali no mita o kahacecay tamdaw. Mamirenec Cingra to ‘kalim no polong a tamdaw.’—Isaya 65:20-24; ˈOlic 145:16.

13. Sowal no Isaya 65:25, o roma tamdaw satapang midoko ci Yihofaan ikor i, iraay ko maanan a kafalic hani?

¹³ Madadipayal, ira ko rihaday. Mitiˈer to sapadama no fangcalay saocor, ˈalomanay na matiraay o ˈaˈadopen ko pinangan a tamdaw taˈangayay ko nika falic. (ˈOsien ko Isaya 65:25.) Mifalahanto nangra ko mariˈangay a capeling. (Loma 12:2; Ifiso 4:22-24) Manaokaniw, cowa ko malefotay a tamdaw kita, papadadotocho a mararaw. Kawrira, mikedecan ni Yihofa pakakelec malacecay ko ‘masakenakenaay a tamdaw’ ngaˈay masasiolah, dipayal a malacafay. (Titus 2:11) O kafahkaˈan konini, edengan o malefotay ko ˈicel a Kawas ko pakadangaray tonini!

14. O Isaya 65:25 samaanay malaˈosi i tireng no cecay faˈinayan salikaka?

¹⁴ O pinangan no tamdaw soˈlin ngaˈay mafalic han? Nengnengen ko ilaenoay a nalifetan. Iraay ko cecay kapah tamdaw, ˈayaw no 20 ko mihecaan i, mitakaway to paliding, micomod to lomaˈ mitakaw, ato roma pakidemay a raraw, marariday mapalit. Tada malafoay ko kaˈorip ningra, maolahayho to malaˈodotay, misadayayto cingra sapisetiˈaw to tamdaw. Kawra matengil ningra ko soˈlinay kimad halo mirienang to saˈopo no Misawacayay Tamdaw ni Yihofa, pakasoˈlinay cingra mahelaayto no niyah ko ciepocay a nokaˈorip, itini i nopidokoan a lakoing mihodop ci Yihofaan. Micada to paputisem ikor i, marariday cingra miharateng samaanay malaˈosi ko sowal no Isaya 65:25 i tireng no niyah. Na malecaday o layong cingra mariˈang, ikor mafalicayto a malo lopayˈay a siri, dipayalayto a malacafay to tao.

15. Hano makalim kita mitahidang to tamdaw micomod tayni i nopidokoan a lakoing hani? Sasamaan ko pidemak ita hani?

¹⁵ Sowal no satapangan no Isaya 65:13 o ‘Saˈakawangay a Tatapangan ci Yihofa sanay,’ salikor no 65:25 o ‘sowal ni Yihofa konini’ saan. O sowal ni Yihofa cowa ko mamalahorac. (Isaya 55:10, 11) Pakayni to nopidokoan a lakoing, o sowal ni Yihofa anini malaˈosiayto. Mipatirengay ci Yihofa to mikiriwiˈay paro no lomaˈ no Krisciyang, itini toniya taˈangayay paro no lomaˈ, milifokay kita to dipayal ato rihaday, soˈlin itiniay kita toniya mafodifoday a hekal, kawra iraay ko rihaday no mita. (ˈOlic 72:7) Mihaenay, makalimay kita padama to tamdaw malo nisawawaan ni Kristo, ho ˈaloman ko tamdaw mikapot kitaanan malo taˈangayay paro no lomaˈ no Krisciyang, micomod i nopidokoan a lakoing.—Matay 28:19, 20.

SASAMAAN MISOLOT TO TAMDAW MICOMOD TAYNI I NOPIDOKOAN A LAKOING

16. O maanan ko mamisolot to tamdaw micomod tayni i nopidokoan a lakoing hani?

¹⁶ Kita kahacecay tamdaw mamisaˈicel, hongaˈ masolot ko tamdaw tayni i nopidokoan a lakoing. Toha sakapihaenaw, mamisaˈicel kita mitodong ci Yihofaan. Ci Yihofa cowa ka pacieci  misolot to tamdaw micomod tayni i likakawa Ningra, tohati:niay damsayay Cingra ‘misolot’ to tamdaw tayni i tatihi Ningra. (Yohani 6:44; Yirimiya 31:3) Ano mafanaˈto ko misasoˈlinay ko falocoˈ a tamdaw to olah ni Yihofa ato romaroma makapahay capeling Ningra i, makalimayto a masolot Ningra. Mihaenay haw i, sasamaan kita pakayni i ngaˈayay a capeling ato ngaˈayay a waywayan misolot to tamdaw micomod tayni i nopidokoan a lakoing hani?

17. Sasamaan kita misolot to tamdaw micomod tayni i nopidokoan a lakoing hani?

¹⁷ Sapisolotaw to tamdaw micomod tayni i nopidokoan a lakoing, cecay pakayraan i, mitawmec to ciolahay falocoˈ micada to salikaka. Nolitengan itini i Korinto, oya cowa pihakelong a tamdaw ano mirienang to saˈopo masemeray a pasowal alatek: ‘O Kawas soˈlinay itini i lalomaˈ namo.’ Halamhamay kita o mirienangay to saˈopo anini ira ko mahaenay a harateng. (1 Korinto 14:24, 25; Cikariya 8:23) Mihaenay haw i, papadadotoc kita mitengil to sapalimoˈot no Fangcalay Cudad, ‘micowat to dipayal i kalalaˈed no mita.’—1 Tisalonika 5:13.

18. Sasamaan ko pidemak ita ngaˈ masolotto ko tamdaw micomod tayni i likakawa ita?

¹⁸ Oha mamisarocod kita tano pinengneng ni Yihofa a minengneng to salikaka, nengnengen ita ko kangaˈayan nangra, hamaan miˈaraw to dangoc nangra. Haratengen, o dangoc nangra o mamalahdawto anoikor. Roma i, ano mararid kita ‘maloka sasidaˈit,’ hanaca ‘damsay a siniˈada to tao, mikifalocoˈ a masasisodod’ i, o ngangaˈayto mitawmec to ciolahay falocoˈ misaysay to lacongis ato salikaka. (Ifiso 4:32) Mihaen i, o mamasolotto ko tamdaw micomod tayni i nopidokoan a lakoing, samanen maolahay ko tamdaw haenen a micada cangra. b

 MATEREK ITINI I NOPIDOKOAN A LAKOING

19. (1) O roma tamdaw minokayto tayni i nopidokoan a lakoing ikor iraay ko maanan a harateng? (Nengnengen ko sapatongal lalakaw “ Minokayayto Cangra.”) (2) O mamisetek kita to falocoˈ toha sasamaan ko pidemak? (Nengnengen ko coka.)

¹⁹ Tada misalimlaay kita to nopidokoan a lakoing! Onini a lakoing makapah makapa:hay, ˈaloman ˈaloma:nay ko pahemekay ci Yihofaan a tamdaw ilalomaˈ. Misangaˈan ni Yihofa konini tada mikiriwiˈay a lakoing, nanay midaˈoc kita miakoˈid Cingranan! Cima ano sakasayaraw ato sakarenecaw, sakadipayalaw, sakarihadayaw ko falocoˈ i, oha mamicomod tayni tonini a nopidokoan a lakoing, hanaca tahadaˈocto aka a piliyas! Nikawrira, misahalakaay ci Satan mikayhid kitanan miliyas tonini a lakoing. (1 Pitiro 5:8; Paˈarawan 12:9) Ka pinaˈon kita, aka a masaˈfit ningra. Nanay sarocoden ita misimaw konini makoracay dipayalay a lakoing, hongaˈ matongal ko nika kapah nonini lakoing.