LALENGOEN LALAKAW 15
RADIW 124 Tahadaˈoc a Madimadi
Tongalen ko Nika Pitiˈer Iso to Likakawa ni Yihofa
‘Haratengen koya mikeriday tamowanan a tamdaw, oya pasowalay i tamowanan to sowal no Kawas a tamdaw.’—HIPRAY 13:7.
KALIMLAAN NO LALAKAW
Sasamaan paˈicel to nika pakasoˈlin, padadotoc mitiˈer to likakawa ni Yihofa.
1. Isaka 1 hahekalan, samaanay malikakawa ko finawlan no Kawas?
TOHATI:NIAY halamhamay ci Yihofa malikakawa ko finawlan Ningra, masierod a milahci to sapatorod Ningra a tayal. (1 Korinto 14:33) Cecay tinakoan i, milasilay to ngaˈayay lihaf no Hongti Kitakit a tayal. O araaw ni Yihofa patenaken i paro no kakarayan ko ngaˈayay lihaf no Hongti Kitakit. (Matay 24:14) Patorodan Ningra ci Yis mikayat tonini a tayal, malikakawa ni Yis ko nisawawaan, tano masieroday a pakayraan milahci tonini demak. Isaka 1 hahekalan, mapatirengto ko kasakopang icowacowa i, iraayto ko manilnilay malohemay malitengay itini kasakopang mikerid, halo pafeli to sakayat i salikaka. (Dmak 14:23) Itini i Yirusalim, iraay ko tarokos ato malohemay malitengay palaˈosi to mikayatay a kasacefang no malohemay malitengay. Maherekto misaˈosi ko kasacefang no malohemay malitengay i, midoedoanto no kahacecay kasakopang a midemak. (Dmak 15:2; 16:4) Tona midoedoay tonini a sakayat, ‘mapaˈicelay ko nika pakasoˈlin no kasakopakopang, matongal ko nika ˈaloman no tamdaw to romiˈamiˈad.’—Dmak 16:5.
2. Mikitini 1919 miheca misatapang, samaanay ci Yihofa misadak to sakayat ato sapahaled to pakasoˈlinay falocoˈ a kakaenen hani?
2 Anini, padadotocay ci Yihofa milikakawa to finawlan Ningra. Mikitini i 1919 miheca misatapang, itini i sakayat ni Yihofa, padadotocay ci Yis misaka dademak to mimingay ˈopo mapanilnilay no fangcalay saocor a faˈinayan salikaka milikakawa to mitosilay a tayal, hanaca misadak to sapahaled to pakasoˈlinay falocoˈ a kakaenen. a (Luka 12:42) Mahapinangay itini, o tayal nangra milifokay to sapalemed ni Yihofa.—Isaya 60:22; 65:13, 14.
3-4. (1) Tadtaden o maanan ko epoc no malikakawaay. (2) Onini lalakaw mamilengo to maanan hani?
3 Ano awaay ko likakawa no mita i, wa awa ko pakayraan milahci to sapatorod ni Yis a demak kitaanan. (Matay 28:19, 20) Saharateratengen, ano awaay ko mikeriday a faˈinayan salikaka milimasmas to pitosilan a kilac, saolatekay saan ko kahacecay tamdaw talacowacowa a mitosil, wa samaanto hani? Nolatekay wa ira ko masasiromaay tamdaw misaliyaliyaw mitosil to cecay a kakilacan, o romaroma kilac awaayho ko tamdaw tayraay a mitosil. Maharatengayho iso ko maanan kangaˈayan no likakawa han?
4 Anini, milikakawaan ni Yis kita, mikerid kitanan midoedo to taˈarawan ningra a dademak itiniho i fafekang no sera. Onini lalakaw mamilengo patirengay ci Yis to maanan a taˈarawan, ato sasamaan ko likakawa ita mitodong cingranan. O mamilengoho konini lalakaw, sasamaan kita patalahkal to nika pitiˈer to likakawa ni Yihofa.
O LIKAKAWA ITA MITODONGAY TO TAˈARAWAN NI YIS
5. O likakawa ita itini i maanan a pakayraan mitodongay to taˈarawan ni Yis hani? (Yohani 8:28)
5 Ano o maananto ko nisowalan, ato nidemakan ni Yis, sahtoay midoedoay to harateng no kakarayan Wama. O likakawa ita mitodongay to taˈarawan ni Yis, ano o maananto ko misadakan a sakayat, anca pasowal kitanan to ngaˈayay tatiihay a palinian, sahtoay misalalangiay to Kimad no Kawas. (ˈOsien ko Yohani 8:28; 2 Timoti 3:16, 17) O likakawa no Kawas marariday patalipaˈelal kitanan papicekiw ato misaka dademak to Kimad no Kawas. Mihaenay i, itini picekiw to Fangcalay Cudad o maanan ko sangaˈayay a pakayraan hani? Tano mahaenay a pakayraan midemak iraay ko maanan a epoc hani?
6. Ano pakaynien ita i mitepangan no likakawa no Kawas a cudad micekiw to Fangcalay Cudad i, mamalifok ko maanan a epoc?
6 Ano pakaynien ita i mitepangan no likakawa no Kawas a cudad micekiw to Fangcalay Cudad i, mamalifok ko taˈangayay a epoc. Tinakoen, nengnengen to mansanay ko sowal no Fangcalay Cudad, pahecaden a minengneng ko sakayat no likakawa no Kawas to sasamaan kita midemak, mamahapinang ko misadakan no likakawa no Kawas a sakayat misalalangiay to Fangcalay Cudad. Mihaen i, o mamapaˈicelto ko nika pakasoˈlin ita to likakawa no Kawas.—Loma 12:2.
7. Milasilay ci Yis to maanan a lihaf hani? O likakawa ita samaanay mitodong to taˈarawan ningra hani?
7 Ci Yis ‘milasilay to ngaˈayay lihaf no Hongti Kitakit.’ (Luka 4:43, 44) Miocorayho to nisawawaan milasil to Hongti Kitakit no Kawas. (Luka 9:1, 2; 10:8, 9) Anini, polong ilalomaˈay no likakawa ni Yihofa a tamdaw, ano icowaayto a kitiraan ko aroˈ anca o maananto ko ˈinorong i likakawa, sahtoay o milasilay to ngaˈayay lihaf no Hongti Kitakit no Kawas.
8. Iraay ko maanan a kalikoan no mita hani?
8 Mitenak to ngaˈayay lihaf no Hongti Kitakit no Kawas tada o kalikoan no mita, onini a tayal cowa ko polong a tamdaw ko citatodongay midemak. Tinakoen, itiniho ci Yis i fafekang no sera i, micongedan ni Yis ko kaloykoy misawacay cingranan. (Luka 4:41) Anini, o tamdaw matoor ko hatatodong wangaˈ mikihatiya to finawlan no Kawas a mitosil. Ano misalimlaay kita toniya ˈinorong a mitosil i, ano hacowato icowato mamisawacay to tamdaw. Makalimay kita mitodong ci Yisan, malalok mikosam, micefos, hongaˈ lomahad ko sapaloma no Hongti Kitakit malengaw i falocoˈ no tamdaw.—Matay 13:3, 23; 1 Korinto 3:6.
9. O likakawa no mita samaanay patalahkal a patenak to fangcalay ngangan no Kawas hani?
9 Patenakay ci Yis to fangcalay ngangan no Kawas. Na somowalay ci Yis i satolon to kakarayan Wama: ‘Maherekayto kako pasifanaˈ cangranan to ngangan no Miso.’ (Yohani 17:26) O likakawa no Kawas mitodongay to taˈarawan ni Yis, misarocod padama to tamdaw mafanaˈ to fangcalay ngangan no Kawas. Itini toniya demakan, o Faelohay Hekal Mihongyakan a Fangcalay Cudad patalahkalan ko ngangan no Kawas. Itini tonini Fangcalay Cudad patikolan a pasadak ko ngangan no Kawas. Nohatini, onini mahongyakay a cudad mataˈlifayto ko 270 a sasowalen. Pakayni sapatikolaw to ngangan no Kawas i Fangcalay Cudad, o Sapatongal Lalakaw A4 ato A5 misongilaˈay a mitadtad. O roma i, Sapatongal Lalakaw C (no Padaka) misilsilay to masahciay a wacay, misawacay to ngangan no Kawas i Krisiya Fangcalay Cudad kina 237 a masadak. b
10. Mikitini i sowal no cecay Miyanmar a fafahiyan mahapinangay iso ko maanan hani?
10 Malecad ci Yisan, ciharatengay kita to sapipadamaaw to ˈalomanay tamdaw mafanaˈ to ngangan no Kawas. Itini Miyanmar, iraay ko cecay 67 ko mihecaan a fafahiyan na mafanaˈto to ngangan no Kawas ikor i, tangic sanay a masemer. Sowal ningra: “Noˈoripan ako sakinacecay mafanaˈ to ngangan no Kawas ci Yihofa. Itini hakelong no ˈorip ako o sakakaay masakalimlaan a mananamay ako konini a demak.” Mahapinangayto no mita konini a demak, mafanaˈ to ngangan no Kawas tada taˈangayay ko noka pifiyor to moecelay ko falocoˈ a tamdaw.
PADADOTOC MITIˈER TO LIKAKAWA NO MITA
11. O malohemay malitengay sasamaan paihkal to mitiˈeray ko niyah to likakawa ni Yihofa hani? (Nengnengen ko coka.)
11 O malohemay malitengay sasamaan paihkal to mitiˈeray ko niyah to likakawa no Kawas hani? O cecay pakayraan i, macada ko sakayat i, songilaˈen a miasip, ikor sarocoden a midemak. Onini a sakayat mahawpay to sasamaan misikay to kamok no saˈopo, ato sasamaan mitaypiyaw to kasakopang a mitolon, mahawpayho to sasamaan midimokos to lopayˈay siri ni Kristo. O malohemay malitengay ano misongilaˈ midofdof to sakayat no likakawa i, papadama to salikaka mitinako to olah ato pidimokos ni Yihofa.
Malohemay malitengay padamaay kitanan matongal ko pitadiˈec to sakayat no likakawa ni Yihofa (Nengnengen ko saka 11 fatac) c
12. (1) Hano mamihakelong kita to mikeriday a faˈinayan salikaka? (Hipray 13:7, 17) (2) Hano mamisinanot kita to fangcalay capeling no mikeriday a faˈinayan salikaka hani?
12 Pakalalokay ko Fangcalay Cudad kitanan mihakelong to mikeriday faˈinayan salikaka. Mihaenay, ano macada ita ko sakayat no malohemay malitengay i, makalim ko falocoˈ a midofdof, mihaen itini pidemak to ˈinorong no niyah i, lalipahakto cangra. (ˈOsien ko Hipray 13:7, 17.) Nolatekay cowa ko madoloay midofdof to mikeriday a faˈinayan salikaka saan kita miharateng, samanen cowa ko malefotay a tamdaw cangra. Kawra, ano papasayra sa kita minengneng to dangoc nangra i, caayto pisinanot to fangcalay capeling nangra, ano mihaen kita i, padamaay to ˈada no Kawas. Hano saan ko sowal hani? Samanen mihaen to demak milonayay to nika pakasoˈlin ita to likakawa no Kawas, o mihalakaan a araaw no ˈada konini. O roma sa i, ano sapadadotocaw tanektek ko pakasoˈlin, o mamicoˈay kita to miyakayakan a mangah sowal no ˈada. Ano hatiraay i, sasamaan kita mihapinang tora mangah, ho eca ka malipalaw hani?
AKA PAKONIRA HAN KO TAO MILONAY TO PAKASOˈLIN NO MISO
13. O ˈada no Kawas samaanay mipakararaw to likakawa no mita hani?
13 O ˈada no Kawas misahalakaay a mipacacoˈis to ngaˈayay ato tatiihay, palo tatiihay to ngaˈayay a midemakan no likakawa no mita. Tinakoen, sowal no Fangcalay Cudad halamhamay ci Yihofa to midokoay Cingranan a tamdaw itini i tatirengan, waywayan ato midokoay a pakayraan padadotoc a makorac. Somowalayho ko Fangcalay Cudad, o tamdaw ano padadotoc midemak to cowa ka korac a demak, hanaca caka kahi pasasiyor i, o mamafalah nai kasakopang. (1 Korinto 5:11-13; 6:9, 10) O likakawa no mita midoedoay to sapalimoˈot no Fangcalay Cudad mihaen to demak, kawra o misafelitay kitanan a tamdaw tano mahaenay a demak miˈodis kitanan, somowal to pakinaliay ko saali to tamdaw, awaay ko olah ato mihadidiay falocoˈ saan.
14. Cima kora midokaˈay a mipakararaw to likakawa no Kawas hani?
14 Hapinangen cima kora mipakararaway. Polong pakayniay i likakawa no mita a mangah sahtoay ci Satan ko miyakayakay, o ‘wama no misamangahay’ cingra. (Yohani 8:44; Satapangan 3:1-5) Sakadademakan ni Satan koya mihakelongay cingranan a tamdaw midokaˈ to likakawa ni Yihofa. Isaka 1 hahekalan, hatiraay ko demak ningra.
15. O cowa pakasoˈlin a Yutaya tamdaw samaanay micada ci Yisan ato nisawawaan ningra hani?
15 Wawa no Kawas ci Yis o malefotay a tamdaw, midemakayho to adihayay kafahkaˈan a demak, ˈarawhan o mihakelongay ci Satanan a tamdaw tano adihayay a mangah miˈodis cingranan. Tinakoen, o ˈaˈideman no pidoyongan pasowalay to finawlan, o sapifahfah a ˈicel ni Yis to kaloykoy o naitiniay i ‘kakeridan no kaloykoy’ sanay. (Marko 3:22) Tiya masayfang ci Yis i, pakokotan no ˈaˈideman no pidoyongan cingra to mitonganganay a milokes to Kawas a raraw, miowingay to finawlan papipatay cingranan. (Matay 27:20) Ikor mitosil ko nisawawaan ni Yis i, o misafelitay cangranan a tamdaw ‘mikidatay to ˈalomanay’ a mihakokay cangranan. (Dmak 14:2, 19) Mikecolay saka 1998 miheca saka 12 folad 1 romiˈad somowal to Dmak 14:2 sanay ko sowal: “O cowa pakasoˈlin a Yutaya tamdaw caay ka kahi micada to ngaˈayay lihaf, mifekaday cangra to pakararaway a demak, mikidat to nika pisakakinih no ˈAlafang tamdaw to Krisciyang.”
16. Ano matengil ita ko tatiihay a sasowalen pakayni likakawa no Kawas i, haharatengen ita ko manan hani?
16 Anini, kamayan misamangah ci Satan, hanaca ‘miorat to paro no kakarayan a tamdaw.’ (Paˈarawan 12:9) Ano matengil iso ko tatiihay a sasowalen to pakayniay to likakawa no Kawas ato mikeriday faˈinayan salikaka i, haratengen, itini saka 1 hahekalan o ˈada no Kawas mihaenay a paoraf ci Yisan ato nisawawaan ningra. Aka mapawan, o finawlan no Kawas anini soˈlinay a mapaoraf ato mahakokay, matiya to sapaliˈayaw no Fangcalay Cudad. (Matay 5:11, 12) Ano patalipaˈelalen ita ko niyah to naitiniay i cimaanan konini a lihaf i, kalamkamen ita ko demak midipot to niyah, caayto ko mamasaˈfit no hatiniay tatiihay a sasowalen. Sasamaan kita midipot to niyah hani?
17. Sasamaan kita midipot to niyah, caay ka mafiyor no miyakayakan a sowal? (2 Timoti 1:13) (Nengnengen ko sapatongal lalakaw “ Ano Matengil ko Miyakayakan a Sowal Sasamaan ko Pidemak Hani?”)
17 Aka pitengil to miyakayakan a sowal. Tarokos ci Pawlo ihkalay somowal, ano matengil no mita ko miyakayakan a sowal pakayni i likakawa no Kawas oha mamisamaan ko demak. Pasowalan ningra ci Timoti ‘papipalimoˈot to papinapina tamdaw . . . aka pikihar to awaay ko epoc a sasowalen,’ patalipaˈelalanho ci Timoti ‘aka pitengil a pakasoˈlin to misamsamay a milokes to Kawas a awaay ko kapo a sasowalen.’ (1 Timoti 1:3, 4; 4:7) Ano o maananto ko mapodpoday no wawa i sera pacomodanto i ngoyos, o lomahadayto a tamdaw cowa ka hatira ko demak, samanen mafanaˈay cingra ano mihaen wa adada cingra. Misetekay kita aka pitengil to miyakayakan a sowal, samanen mafanaˈay kita to naicowaay kora miyakayakan a sowal. Edengan o ‘tawlikay a sowal’ no soˈlinay kimad ko tatengilen ita.—ˈOsien ko 2 Timoti 1:13.
18. Sasamaan kita patalahkal to mitiˈeray ko niyah to likakawa ni Yihofa hani?
18 O likakawa no Kawas itini i maamaan a demakan misaˈicelay mitodong ci Yisan, onini lalakaw toloay aca ko milengoan. Ano micekiw kiso to Fangcalay Cudad i, sinanoten to i masamaanay a demak mitodong to taˈarawan ni Yis ko likakawa no Kawas. Padamaen ko salikaka paˈicel to pakasoˈlin to likakawa no Kawas, kisoto i, papatalahkal to nika pakasoˈlin no falocoˈ, padadotoc madimadi mihodop ci Yihofaan, kedecen a mikotod ko palaˈosiay to araaw Ningra a likakawa. (ˈOlic 37:28) Ngaˈay kita mikalacafay to ciolahay, madimadiay a salikaka mihodop ci Yihofaan, tada o kalipahakanto! Nanay ceriden ita misalimla konini a sapalemed.
SASAMAAN KO CAˈOF ISO?
-
O likakawa no Kawas itini maanan a demakan mitodong ci Yisan hani?
-
Sasamaan kita padadotoc patalahkal to mitiˈeray ko niyah to likakawa no Kawas hani?
-
Ano matengil ko miyakayakan a sowal sasamaan ko pidemak hani?
RADIW 103 Sidaˈitay a Pakaenay O Sapafeli no Kawas
a Nengnengen ko Matatodongay Pihakelongan Miliyaway Tomireng! saka 102-103 fiedac a sapatongal lalakaw “Hano o 1919 Miheca Han ko Sowal Hani?”
b Cowa kina 237 aca masadak, o ngangan no Kawas itini Krisiya Fangcalay Cudad kinasepatay tano miˈesalan ko pitilid to ngangan no Kawas, itini no Kowaping a Faelohay Hekal Mihongyakan sahtoay tano “Yihofa” hananay mihongyak.
c TATODONG NO COKA: O kasacefang no malohemay malitengay malalengoay to pakayniay kaˈalomanan a misawacay, maherekto milimasmas i, o kantok no kasakapot pasowalay to mitosilay salikaka to sakayat no kasacefang no malohemay malitengay, pasowal cangranan itini i kaˈalomanan misawacay i, pangataen ko kolol i patih.
