ˈOsien ko Satapangan 37:23-28; 39:17-23, nengnengen mikitini pihadidi ni Yosif to caay ka sadafdaf a demak ngaˈay mananam ko maanan.

Folfolen ko fafekangay ato ilaenoay lalakaw. Hano malifa ni Yosif ko caay ka sadafdaf a demak hani? (Satapangan 37:3-11; 39:1, 6-10) Hahakowa ko kahalafin ni Yosif mihadidi to caay ka sadafdaf a demak hani? (Satapangan 37:2; 41:46) Itira tora tatokian, patadoay ci Yihofa ci Yosifan midemak to maanan? Cowa pidemak to maanan?—Satapangan 39:2, 21; w23.01 17 fiedac 13 fatac.

Calepen mikadkad. Cowa ka somowal ko Fangcalay Cudad mipaoraf ko fafahi ni Potifar i, mipaˈadingay ci Yosif to niyahan. ˈOsien ko ilaenoay a sinael, haratengen hena: Pakayni maanan a lalangian alatek terep sanay ci Yosif? Hano aka halamham kita tiliden no Fangcalay Cudad ko kihcod a mafekaday a demak hani? (Taneng 20:2; Yohani 21:25; Dmak 21:37) O maanan a capelingan ko padamaay ci Yosifan mihadidi to caay ka sadafdaf a demak?—Mika 7:7; Luka 14:11; Yakop 1:2, 3.

Simsimen to sasamaan misaka dademak. Licayen ko niyah:

• Malo nisawawaan ni Yis, mamalifa ako ko maanan caay ka sadafdaf a picada no tao alatek? (Luka 21:12, 16, 17; Hipray 10:33, 34)

• Sasamaan kako maherekto a misaday, tahalifa to caay ka sadafdaf i, padadotoc a miemem? (ˈOlic 62:7, 8; 105:17-19; w19.07 2-7 fiedac)