LALENGOEN LALAKAW 21
RADIW 107 Taˈarawan a Olah no Kawas
Samaan Pakatama to Matatodongay a Haramod?
‘O matanengay a fafahi, cima ko papakatama hani? Ikaka no odoˈ ko nika ciepoc ningra.’—TANENG 31:10.
KALIMLAAN NO LALAKAW
Nengnengen ko pina safalod no Fangcalay Cudad, cipinang to sakaciramodaw a tamdaw samaan pakatama to matatodongay a haramod, ato sasamaan ko kasakopangay a tamdaw midama cangranan.
1-2. (1) Cowa ka ciramod a Krisciyang ano sakakaolahaw, salakat mamiharateng to maanan a demak hani? (2) “Makakacawmaˈ” o maanan ko tatodong hani? (Nengnengen ko “Sapitadtad a Sowal.”)
CIHARATENGAY kiso ciraramod han? Soˈliˈlin cowa ko caciraramod ngaˈ ira ko lipahak, nikawrira ˈalomanay cowa ka ciramod a Krisciyang, ano hakowaayto ko mihecaan, makalimay pakatama to matatodongay a haramod. Manaokaniw, ˈayaw no misatapang makakaolah, maharekayto kiso ira ko tanektekay no kalawidang aci Yihofaan, hanaca mafanaˈay to pinangan ato waywayan no niyah. Itini no paycian, ira ko ˈicel iso midama to sakaˈorip ikor no mararamod. a (1 Korinto 7:36) Toniya pina pakayraan ano maharekayto kiso misaday, mamadoloto ira ko lipahakay a nokaˈorip no raramod.
2 Nikawrira, sapakatamaaw to matatodongay a haramod cowa ko madoloay alatek. (Taneng 31:10) Soˈlin matamato iso ko ngaˈayay a tamdaw, sapitongalaw to kacipinang cingranan, misatapang makakacawmaˈ cingranan cowa ko madoloay alatek. b Onini lalakaw papadama to cowaho ka ciramod a Krisciyang, samaan pakatama to matatodongay kakacawmaˈen a tamdaw ato samaan misatapang makakacawmaˈ. Mamilengoho ko lalakaw, o kasakopangay a romaroma tamdaw sasamaan midama to sakaciramodaw a salikaka.
MIKILIM TO MATATODONGAY HARAMOD
3. Sapikilimaw to haramod a Krisciyang saharateratengen ko maanan hani?
3 Ano makalimay kiso sakaciramodaw i, ˈayawho no makakacawmaˈ kiso to tamdaw i, salakatenho miharateng, makalimay kiso ira ko masamaanay a capeling no haramod noikor. Ano hatiraay i, mamalawa iso ko matatodongay tisowanan a tamdaw alatek, anca misatapang makakaolah to cowa ka tatodong tisowanan a tamdaw. Manaokaniw, o miharatengan iso a tamdaw o maharekayto micada to paputisem a Krisciyang. (1 Korinto 7:39) Nikawrira, o micadaay to paputisem a tamdaw cowa ka sahto sa o matatodongay tisowanan. Mihaenay, ngaˈayay licayen ko niyah: “O patosokan no kaˈorip ako o manan? O harateng ako aira ko maanan a capeling no haramod? Matatodongay ko pihalamham ako han?”
4. O romaroma tamdaw mingitangitay ci Yihofaan to maanan?
4 Ano ciharatengay kiso mikilim to haramod, maedeng mitolonayto kiso ci Yihofaan pakayni tonini a demak. (Filipi 4:6) Ci Yihofa cowa pikiˈok to mamatama no kahacecay tamdaw ko haramod, kawra ciharatengay Cingra to nafalocoˈan ato saali iso, itini pikilim iso to haramod papadamaen Ningra kiso. Mihaenay haw i, padadotoc pasowal Cingranan to kalim ato nafalocoˈan iso. (ˈOlic 62:8) Saalien ci Yihofa padama tisowanan ira ko mihadidiay ato taneng. (Yakop 1:5) Itini Padaka o cecay caayho ka ciramod a faˈinayan salikaka ci Yohani, c somowalay to satolon no niyah: “Pasowalan ako ci Yihofa, halamhamay kako to aira ko masamaanay a capeling no haramod, padama takowanan pakatama to matatodongay a haramod. Roma i, misaalian ako ci Yihofa padama takowanan palahad to capeling no ngaˈayay a faˈinay.” Itini Srilanka fafahiyan salikaka ci Taniya sanay ko sowal: “Micangacangay kako ci Yihofaan padama takowanan itini pikilim to haramod i, ira ko mahemekay tawlikay no niyah, padadotoc madimadi matayal saki Cingranan.” Soˈlinto caay ka tangsol sa matama iso ko matatodongay a haramod, haratengen mikiˈokay ci Yihofa papadadotoc Cingra midimokos to notirengan nofalocoˈan a saali no miso.—ˈOlic 55:22.
5. Caayho ka ciramod a Krisciyang iraay ko maanan hatoki mafanaˈ to romaroma maolahay ci Yihofaan a tamdaw? (1 Korinto 15:58) (Nengnengen ko coka.)
5 Pakalalokay ko Fangcalay Cudad kitaanan “ka rarid a misaˈicel to tayal no Tapang.” (ˈOsien ko 1 Korinto 15:58.) ˈIfowa kiso matayal saki Yihofaan, hanaca micawmaˈ to masasiromaromaay a salikaka, o ngangaˈay masasipakalalok, ngaˈayho mafanaˈ to malecaday tisowanan misarocoday midoko ci Yihofaan caayho ka ciramod a salikaka. Roma i, misaˈicel kiso pakahemek ci Yihofaan, o mamatinako iso ko soˈliˈlinay a lipahak.
Ano ˈifowaay kiso matayal saki Yihofaan, hanaca macacawmaˈ to masasiromaromaay a salikaka i, mamalitemoh alatek ko sakaciraramodaw a tamdaw (Nengnengen ko saka 5 fatac)
6. Itini pikilim to haramod i, caayho ka ciramod a Krisciyang haharatengen ko maanan hani?
6 Ka pisinanot, aka a samacay sa ko falocoˈ itini sapikilimaw to haramod. (Filipi 1:10) Soˈlinay a hemek hananay i, caciraramod kiso ngaˈ cowa ka saan, ao pakayniay to ngaˈayay noka lalaˈed iso aci Yihofa. (Matay 5:3) Caayho ka ciramod kiso i, alatek adihayay ko pasalat matayal saki Yihofaan. (1 Korinto 7:32, 33) Mankora, sangaˈayen a misaka dademak tonini kalimlaan a tatokian. Naitiniay Padaka a fafahiyan salikaka ci Cisika mangata to 40 ko mihecaan ngaˈ ciraramoday, sanay ko sowal ningra: “Iˈayaw, soˈliˈlin sakaciraramodaw kako, kawra ˈifowaay kako to mitosilay a tayal, kadofahay marenecay ko kaˈorip ako.”
PALAKEN KO TOKI MISONGILAˈ A MIHAPINANG
7. ˈAyaw no paihkal to falocoˈ kiso misongilaˈ mihapinang cingranan, hano o citanengay a pakayraan hani? (Taneng 13:16)
7 Ano ngaˈayan kiso miharateng to cimaanan a tamdaw i, sasamaan ko pidemak hani? Tangsol sa kiso mipaihkal to falocoˈ han? Sowal no Fangcalay Cudad, citanengay a tamdaw ˈayaw no mamidemak i, isalakatayho a cipinang tora demak. (ˈOsien ko Taneng 13:16.) Mihaenay, ˈayaw no paihkal kiso to falocoˈ i, sangaˈayay hapinangenho to cecay liyad cingra. Itiniay i Helan faˈinayan salikaka ci Asowen sanay cingra: “Kalikiay a masemer ko falocoˈ, kawra kalikiay a mafasaw, mansa palaken ko toki misongilaˈ a mihapinang cingranan, hongaˈ caay ka caloh sa makakaolah.” Roma i, mahapinangto iso cingra, cowa ko hatatodong no miso alatek.
8. Caayho ka ciramod a tamdaw sasamaan mihapinang to kaolahan iso a tamdaw? (Nengnengen ko coka.)
8 Ngaˈayay kiso misamaan mihapinang cingranan hani? Itini saˈopo no kasakopang anoca itini picawmaˈan to salikaka, ngaˈayay kiso mihapinang to pinangan ato waywayan nonini tamdaw, ato samaanay ko nika lalaˈed ningra aci Yihofa. O masamaanay a tamdaw ko widang ningra hani? Ano caciyaw cingra i, o manan ko sowal ningra hani? (Luka 6:45) O patosokan ningra malecaday tono miso han? Misalalicayho to mafanaˈay cingranan a tamdaw, tinakoen malohemay malitengay no kasakopang ningra ato romaroma matenesay a Krisciyang. (Taneng 20:18) Licayen iso cangra samaanay ko pinangan nonini tamdaw, samaanay ko masowalay no tao i cingranan. (Rucu 2:11) Itini pihapinang iso i, aka a parawrawen ko falocoˈ ningra, sakangodoen cingra, ato notekedan a demak ningra.
ˈAyaw no paihkal to falocoˈ i, sarocoden mihapinang cingra to cecay liyad a tatokian (Nengnengen ko saka 7-8 fatac)
9. ˈAyawho no paihkal to falocoˈ i, mamisaˈosi kiso to maanan hani?
9 ˈAyaw no paihkal to falocoˈ i, hahakowa ko kahalafin a mihapinang cingranan hani? Ano sakaliki sa kiso paihkal to falocoˈ i, o halicalohay ko pidemak a tamdaw wa saan miharateng tisowanan alatek. (Taneng 29:20) O roma i, ano tatayo sa eca paihkal to falocoˈ kiso i, mahapinangayto ningra to maolahay kiso i cingranan, o talotatodayto a tamdaw kiso wa saan miharateng alatek. (Patnakay 11:4) Aka tahirato masaˈosi ko falocoˈ iso to sakaciraramodaw tonini tamdaw ngaˈ itiya saho a paihkal to falocoˈ, kawra soˈlin maherekayto kiso misaday to sapakaetimaw, hanaca o matatodongay a haramod saan kiso miharateng i cingranan.
10. Ano ira ko ciharatengay tisowanan, kawra cowa ka sakakacawmaˈaw kiso cingranan i, sasamaan ko pidemak iso hani?
10 Ano ira ko ciharatengay tisowanan, sasamaan ko pidemak hani? Ano cowa ka ciharateng kiso cingranan, sinanoten ko waywayan iso itini picada cingranan, ho cipinang cingra to falocoˈ iso. Ano cowa ka sakakaolahaw kiso cingranan i, kawra paoraten iso cingra to iraay ko olah iso cingranan, mihaen ko pidemak cowa ko sidaˈitay.—1 Korinto 10:24; Ifiso 4:25.
11. Itini romaroma pala, o salawina ko mipiliˈay to haramod anoca pasasoˈaraw cangranan, itini mahaenay a pakayraan i, ora milimasmasay a tamdaw mamisinanot to maanan?
11 Itini i romaroma pala, o wama wina ato matoˈasay a salawina marariday patado to caayho ka ciramod a tamdaw mipiliˈ a misaˈosi to hararamod. Itini roma a pala, o paro no lomaˈ anoca widang ko patadoay mikilim to matatodongay a tamdaw, ikor pasasiˈarawan konini tatosaay, o cangra ko mamisaˈosi to makakacawmaˈ hokira. Ano hamamipadang kiso to tamdaw mipiliˈ to hararamod, anoca pasasoˈaraw cangranan i, ka pisinanot to saali ato kahemekan nora tatosaay. Ano mahelaayto iso ko matatodongay a tamdaw i, saˈicelen a cipinang to pinangan ato capeling ningra, o sakakaay i, samaanay ko nika lalaˈed ningra aci Yihofa. Ano palalinien to payci, picudadan ato saaroˈan, o ngaˈayay kalawidang ci Yihofaan ko ikakaay ko nika masakalimlaan. Ano masamaanayto i, haratengen caciraramod hokira, oya caayho ka ciramod a salikaka koha mamisaˈosi.—Kalatiya 6:5.
SASAMAAN MISATAPANG MAKAKACAWMAˈ
12. Ano ciharatengay kiso makakacawmaˈ to cecay tamdaw i, sasamaan a paihkal to falocoˈ hani?
12 Ano ciharatengay kiso makakacawmaˈ to cecay tamdaw i, sasamaan paihkal to falocoˈ hani? d Ngaˈayay patingwaen iso, anca itini kaˈalomanan masasowal cingranan, aka a tatosa aca masasiˈaraw. Ihkalen pasowal cingra to harateng iso. (1 Korinto 14:9) Ano eca ka tangsol pacaˈof tisowanan i, pairaen ko hatoki ningra misaharaterateng. (Taneng 15:28) Ano caay ka ciharateng cingra makakacawmaˈ i, sakangodoen ko mipiliˈan ningra.
13. Ano ira ko paihkalay tisowanan to falocoˈ ningra i, sasamaan ko pidemak iso hani? (Kolosay 4:6)
13 Ano ira ko paihkalay tisowanan to falocoˈ ningra i, sasamaanto aki? Haratengen misatimoloay cingra pasowal tisowanan alatek, mankora sidaˈiten kangodoen cingra micada. (ˈOsien ko Kolosay 4:6.) Ano misaaliay kiso to toki toha sapisaharateratengaw i, pasowalen cingra, kawra kalikien a pacaˈof cingra. (Taneng 13:12) Ano cowa ka ciharateng kiso macacawmaˈ cingranan i, patodiceken pasowal cingra, kawra pairaen ko sidaˈitay a waywayan. Nengnengen ko cecay faˈinayan salikaka itini Austria ci Hans ko ngangan, samaanay cingra minaˈay to pipaihkal no cecay fafahiyan salikaka to falocoˈ ningra, sanay ko sowal ningra: “Ano pasowal kako i, misinanotay to hasowal, ciharatengay kako to falocoˈan ningra, patodicek a minaˈay cingranan. Caay ka ciharateng kako mararawen cingra a mitala, mansa kalikian ako pacaˈof cingra, ikorto i, minaˈonay kako to sasamaan misiˈayaw cingranan.” O roma sa i, ano mihayiay kiso cingranan, pasowalen to saˈosi no falocoˈ iso. Ikor, masasowalto a tatosa, sasamaan a makakacawmaˈ kamo ano ikor. Tona cowa ka lecad ko serangawan ato romaroma demakan, o harateng iso cowa ka lecad cingranan alatek, mankora songilaˈen ko kasasowal.
O ROMAROMA TAMDAW SASAMAAN MIDAMA TO CAAYHO KA CIRAMOD A KRISCIYANG?
14. Sapidamaaw kita to caayho ka ciramod a salikaka sasamaan ko hasowal hani?
14 Ano ciharatengay sakaciraramodaw ko caayho ka ciramod a salikaka i, kita kahacecay tamdaw sasamaan midama cangraanan hani? Roma i, maminaˈon kita to sasowalen no niyah. (Ifiso 4:29) Ngaˈayay licayen ita ko niyah: “Misalawlaan ako koya sakaciramodaw a tamdaw han? Maˈaraw ako ko cecay caayho ka ciramod a faˈinayan salikaka ato cecay caayho ka ciramod a fafahiyan salikaka masasowal i, makacifalocoˈay cangra tatosa wa saan kiso miharateng han?” (1 Timoti 5:13) Roma sa i, cowa ka ngaˈay kita papiharateng to caayho ka ciramod a salikaka, ano caay ka ciraramod cangra i, cangoˈotayho ko kaˈorip nangra. Ifafekangay masowalay a Hans sanay cingra: “O romaroma faˈinayan salikaka pasowalay takowanan: ‘Makakaayto ko mihecaan iso, hano aeca sa ka ciraramod hani?’ O mahaenay a sowal papiharatengay to caayho ka ciramod a salikaka to awaay ko kapo nangra, mitongal to rawraw no falocoˈ sakaciramodaw.” Ano ira ko hatoki ita i, pakahemeken ko caayho ka ciramod a salikaka, coko ngaˈayay saw?—1 Tisalonika 5:11.
15. (1) Mikitini safalod no Loma 15:2, ˈayaw no patado kita misiwkay to hacafay no tao i, mamisinanot to maanan hani? (Nengnengen ko coka.) (2) Masinanotay iso ko maanan a kalimalaan no ika hani? (Nengnengen ko ilaenoay safanaˈ.)
15 Ano matatodongay ko cima a faˈinayan salikaka ato cima a fafahiyan salikaka ano saan kita miharateng i, sasamaan ko pidemak hani? Sowal no Fangcalay Cudad haratengen ita ko nafalocoˈan no tao sanay. (ˈOsien ko Loma 15:2.) ˈAlomanay caayho ka ciramod a tamdaw, cowa ka olah siwkayen to hatatodong, oha kakangodoen no mita ko harateng nangra. (2 Tisalonika 3:11) O romaroma tamdaw maolahay to sapadamaaw no tao, kawra cowa ka ngaˈay kita misatalaˈayaw misiwkay to hacafay nangra. e (Taneng 3:27) Roma i, o romaroma caayho ka ciramod a tamdaw maolahay itini i sinowayay a kaitiraan mafanaˈ to hatatodong. Naitiniay i Towic caayho ka ciramod a fafahiyan salikaka ci Litiya, sowal ningra: “Ngaˈayay limasmasen iso konini faˈinayan ato nini fafahiyan salikaka malacafay to ˈalomanay tamdaw. Pairaen ko hatoki nonini tatosaay masasoˈaraw, ikorto nangra sato ko micowat to sakalawidangaw.”
Ngaˈayay limasmasen iso ko cecay caayho ciramod a faˈinayan salikaka ato caayho ciramod a fafahiyan salikaka malacafay to ˈalomanay tamdaw micawmaˈ, ho ira ko toki nangra masasifanaˈ (Nengnengen ko saka 15 fatac)
16. Caayho ka ciramod a Krisciyang haharatengen ko maanan hani?
16 Ano caayho ka ciramod kita anca ciraramodayto, kita maemin ngangaˈay lipahak ko kaˈorip. (ˈOlic 128:1) Ano sakaciraramodaw kiso, kawra awaayho matama ko matatodongay a tamdaw, ka padadotoc a misamacay matayal to demak ni Yihofa. Naitiniay i Awmen a fafahiyan salikaka ci Sinyi sanay ko sowal: “Ano palalinien ko toki to nika lacafay iso to tihi i lakoing i, o caayho ka ciramod a tatokian iso ˈapotoay aca, mansa salimlaen misaka dademak konini tatokian.” Ano matamaayto iso ko hatatodong, satapangayto a makakaolah kamo, sasamaan ko pidemak hani? Ilaenoay a lalakaw sasomowal to sasamaan kiso macacawmaˈ citaneng ko pisaˈosi.
RADIW 137 Madimadiay Fafahiyan Salikaka Ita
a Sakafanaˈaw kiso to masadayayto hokira, nengnengen ko jw.org wangcan “Makakacawmaˈ— Saka 1: Maharekayto Kako Misaday to Sakakaolahaw Han?”
b SAPITADTAD A SOWAL: Onini a lalakaw ato ilaenoay a lalakaw, o mitoroˈan to “makakacawmaˈ” hananay i, o faˈinayan ato fafahiyan ngangaˈay mararamod hokira, mitongal to kasasifanaˈ. Itini romaroma pala o “makakaolahay” ato “palahaday to ngaˈayay kalalaˈed” sanay. O tatosaay makapaihkal to ciharatengay tora tamdaw, sapalahadaw to kaolah i cingranan, misatapangto cangra makakacawmaˈ, tahira i pisaˈosian to mamararamod ha malasawad ha.
c Mifalican ko ngangan no tamdaw itini toni lalakaw.
d Itini romaroma serangawan, tohatiniay i, o faˈinayan salikaka ko paihkalay to falocoˈ i fafahiyan salikaka. Nikawrira, o fafahiyan salikaka ko paihkalay to falocoˈ i faˈinayan salikaka o matatodongay konini. (Rucu 3:1-13) Sakacipinangaw to adihayay, nengnenegn ko Katalipaˈelal! Saka 11 Folad 8, 2004, “Salicay no Kapah . . . Pasifanaˈen Kako Sasamaan Pasowal Cingranan?”
e Nengnengen ko jw.org wangcan a ika Malaˈosiay ko Pipaˈading to Pihakelongan a Tamdaw—Caayho Ciraramod a Krisciyang.