1-2. Samaanay ko piharateng no romaroma tamdaw to makakaolahay hani?

 O MAKAKAOLAHAY palipahakay to tamdaw. Ano makakaolahay kiso nohatini, maedeng makalimay kiso milayap toniya kalipahakan a tatokian. Pakaynien i ˈalomanay makakaolahay a tamdaw, toniya tatokian soˈlinay o karahekeran. Itiniay i Iciyopiya fafahiyan salikaka ci Tesiawna a sanay ko sowal: “Hakelong no kaˈorip ako o salipahakay a tatokian i, itiniay i makakacawmaˈ ato faˈinay ako. Malacafayay kami milengo to kalimlaan a demak, malacafayay masasowal matawa. Mahelaayto ako ko kaolahan ako a tamdaw, hanaca maolahay cingra takowanan, tada palipahakay to harateng ako konini.”

² Itiniay i Helan faˈinayan salikaka ci Alaysiaw sanay ko sowal: “Itini makakaolah to fafahi i, mahemekay kako micalep ko kacipinang cingranan. Kawra soˈlinen ko sowal, itini makakacawmaˈ niyam tahalifaay to pina pasangaray.” Onini lalakaw mamilengo tatahalifa ko makakaolahay a tamdaw to maanan a pasangaray, ato sasamaan cangra misaka dademak to safalod no Fangcalay Cudad miremo to pasangaray, mataneng ko pisaˈosi. Mamilengoho ko lalakaw, ilalomaˈay no kasakopang a tamdaw sasamaan midama to makakaolahay a tamdaw.

O ARAAW NO MAKAKACAWMAˈ

3. O manan ko araaw no makakacawmaˈay? (Taneng 20:25)

³ Soˈliˈlin palipahakay to tamdaw ko makakaolahay, nikawrira o makakaolahay a tamdaw mamisaareteng a minengneng tonini a demak, samanen mamararamod konini tatosaay a tamdaw noikor alatek, i kararamodan a romiˈad, o aitini i kaˈayaw ni Yihofa miketon to sowal cangra, mikiˈok i hakelong no kaˈorip maolah ato mikangodo to ramod. ˈAyaw no miketon to sowal mamisongilaˈ  kita a misimsim. Hatiraay ko miketonan a sowal no mararamoday. (ˈOsien ko Taneng 20:25.) O makakaolahay a tamdaw pakayniay i kacacawmaˈ a masasicipinang, hanaca mataneng ko pisaˈosi. O mamararamod ko saˈosi nangra alatek, anca malasawad ko kacacawmaˈ nangra alatek. Ano malasawad ko makakaolahay a tamdaw, o pasokiyawayto cangra cowa ka saan. ˈArawhan, o kacacawmaˈ nangra malaˈosiay ko araaw, padamaay cangranan mataneng ko pisaˈosi.

4. Kita maemin hano pairaen ko matatodongay a pinengneng to macacawmaˈay hani?

⁴ Matatodong ko pinengneng to makakacawmaˈay, hano masakalimlaan hani? Ano matatodong ko pinengneng i, o caayho ka ciramod a tamdaw ano awaay ko harateng to sakaciraramodaw tora tamdaw, cowato ko makakaolah tora tamdaw. Nikawrira, cowa ko caayho ka ciramod a tamdaw aca ko aira ko matatodongay a pinengneng, o mamihaen ko polong a tamdaw. Tinakoen, harateng no romaroma tamdaw misatapang makakaolah ko tatosaay a tamdaw o caciraramodto sanay. Mahaenay a pinengneng samaanay ko pifiyor to caayho ka ciramod a Krisciyang hani? Itiniay i Padaka caay ka ciramod a fafahiyan salikaka ci Milisa, sanay cingra: “O makakaolahay a salikaka taˈangayay ko macadaay a saroero. Telocoto, o romaroma makakaolahay mafanaˈayto to cowa ka tatodong tatosa, kawra matalaway malicinowas. O roma caayho ka ciramod a salikaka matalawayto makakaolah to tao. Tada taˈangayayto ko saroero nangra.”

CALEPEN KO KASASIFANAˈ

5-6. O macacawmaˈay a makakaolahay mamisaˈicel cipinang to maanan a demakan nora tamdaw hani? (1 Pitiro 3:4)

⁵ Ano makakaolahay kiso nohatini, sasamaan ngaˈ mafanaˈ to caciramod tora tamdaw hani? Calepen ko kasasifanaˈ. ˈAyaw no makakaolah i, cipinangayto kiso to miming pakayra tora cacawmaˈen a tamdaw alatek, kawra adihayay ko toki iso nohatini micalep mafanaˈ to ‘i kemoday no falocoˈ a waywayan’ nora tamdaw. (ˈOsien ko 1 Pitiro 3:4.) Tatodong nonini mamitongal kiso cipinang to capeling, harateng, ato kalalaˈed ningra aci Yihofaan. Mataˈlif ko cecay liyad ikor, ngangaˈayto kiso pacaˈof to ilaenoay a salicay: “Pakayni takowanan, o ngaˈayay haramod konini a tamdaw han?” (Taneng 31:26, 27, 30; Ifiso 5:33; 1 Timoti 5:8) “Ngangaˈay kami masasirenec to nofalocoˈan a saali han? Ngangaˈay kami masasisodod to dangoc han?” b (Loma 3:23) Itini kalingad no kasasicipinang namo i, aka mapawan: Malakangaˈay kamo tatosa, sakakaay i,  cowa ko hakowaay ko kalecadan namo, ao hakowaay ko nika kahi namo micada to kasasiromaan tatosa.

⁶ Itini kakaolahan a tatokian, o cacipinangho kiso to maanan a demakan nora tamdaw hani? ˈAyaw no sapihadakaw kiso to olah i, o mamalengoho tora tamdaw to pina kalimlaan a demak, tinakoen iraay ko maanan a patosokan nora tamdaw. Nikawrira pakayni notekedan a demak, tinakoen tanoktok no tireng, sakaˈorip a payci, anca kadokaˈan no falocoˈ isaˈayaw, sasamaanen a pasowal hani? Cowa ko aitini satapang aca makakaolah milengoto to kihcod a demak. (Nengnengen ko Yohani 16:12.) Ano caay ka ciharateng kiso tangsol a pacaˈof tono tekedan a demak, pasowalen kora tamdaw. Nikawrira, mataˈlif ko cecay liyad ikor, o fafanaˈen kora tamdaw tonini a demak, hongaˈ mataneng ko pisaˈosi. Mihaenay, tahini matatodongay a tatokian, o sasoˈlinen iso pasowal kora tamdaw tonini a demak.

7. O macacawmaˈay makakaolahay ngaˈay midemak to maanan mitongal to kasasifanaˈ hani? (Nengnengen ko sapatongal lalakaw “ Cowa ka Lecad ko Kitiraan a Makakaolahay.”) (Nengnengen ko coka.)

⁷ Sasamaan ko pidemak iso hongaˈ mafanaˈ to i kemoday no falocoˈ a waywayan nora tamdaw hani? O cecay ngaˈayay pakayraan i, mikifalocoˈ a masasowal tora tamdaw, hadaken ko salicay, songilaˈen a mitengil. (Taneng 20:5; Yakop 1:19) Ngaˈayay malacafay kamo midemak to pina ngaˈayay ko kasasowal a demakan, tinakoen malacafay komaen, romakat ato mitosil. Malacafay kamo mipalak to toki macacawmaˈ to paro no lomaˈ ato widang, mamatongal ko kasasifanaˈ namo. Roma i, ngaˈayay kamo milimasmas mirienang to pina a demak, ho ngaˈay kamo masasihapinang itini cowa ka lecad a pakayraan samaanay ko pidemak, ato samaanay ko picada to romaroma tamdaw. Nengnengen ko itiniay i Helan ci Aswen aci Aylisiya samaanay ko pidemak i makakaolah cangra, sanay ko sowal ningra: “Mikilimay kami to ngaˈayay mitongal to kasasicipinang a demak. O hatiniay a demak to cerid o kantangay, tinakoen malacafay mitangtang, malacafay midemak to no lomaˈ a tayal. Ano midemak to hatiniay a tayal i, mamaˈaraw ita o kangaˈayan ato dangoc ningra.”

8. Ano makakaolah i, malacafay mikingkiw iraay ko manan kangaˈayan hani?

⁸ Malacafay kamo mikingkiw, ngaˈay matongal ko kasasicipinang. Ano mararamod kamo noikor, mamilimasmas to toki malacafay to pakalomaˈay a pidoko, mihaen papadamaen no Kawas kamo tanektek ko raramod. (Patnakay 4:12) Ano mahaenay i, makakaolahho kamo i, ngaˈayto milimasmas malacafay mikingkiw. Manaokaniw, makakaolahay  a tamdaw cowaho ko paro no lomaˈ, o faˈinayan salikaka cowaho ko fongoh no fafahiyan salikaka. Kawra, micerid kamo malacafay mikingkiw, cacipinang to samaanay ko kalalaˈed nora tamdaw aci Yihofaan. Ci Makes aci Laysa o itiniay i Padaka mararamoday, mahapinangay nangra malacafay mikingkiw iraay ko roma kangaˈayan. Sanay ci Makes: “Misatapang kami macacawmaˈ i, malacafayayto mikingkiw to milingatay to makakaolahay, raramod ato kaˈorip no paro no lomaˈ a lalakaw. Onini a lalakaw pairaay to hatoki niyam malalengo to kalimlaan a demak, o hatiniay a sasowalen cowa ka masowal itini i kalo a romiˈad.”

SASIMSIMEN KO ROMAROMA A PASANGARAY

9. Pakayni sapasowalaw to cimaanan to makakaolahay a tatosa i, mamiharateng to maanan a demakan?

⁹ O cima ko papasowalen iso to macacawmaˈay kamo nohatini? Kamo tatosa o mamalacafay misaˈosi tonini a demak. Satapang aca makakaolah i, caay ka ciharateng kamo ˈaloman ko mafanaˈay a tamdaw. (Taneng 17:27) Mihaen, ecato ka adihay ko salicay no tao tamowanan, paira to saroero tamowanan. Kawra, ano caka pasowalen namo ko cima tamdaw, alatek matalaw mahapinang no tao takaw sato a makakaolah, ano mihaen ko demak i, tada katalawanto. Mihaenay o citanengay a pakayraan i, pasowalen ko pina ngaˈayay paini ato padama tamowanan a tamdaw. (Taneng 15:22) Tinakoen, pasowalen ko pina paro no lomaˈ, matenesay a widang anca malohemay malitengay no kasakopang.

10. O makakaolahay tamdaw sasamaan itini noka kaolah a tatokian mitafo to makoracay? (Taneng 22:3)

¹⁰ Itini noka kaolah namo a tatokian sasamaan mitafo to makoracay? Pakayni noka tongal no kakaolah namo, malingaday ko nika sasolot namo tatosa. Toniya tatokian samaan ko pidemak namo, hongaˈ mitafo to makoracay a waywayan hani? (1 Korinto 6:18) Aka misateked a malacafay, somowal to mikalonaay a sowal, ato pakidem ko miˈowakan a epah. O hatiniay a demak mamikidat to sakadadiˈiyaw, pasangarto kamo midofdof to palinian ni Yihofa. (Ifiso 5:3) Sapitafoaw to makoracay, ngaˈay kamo micerid a malalengo o maanan ko hapakayraan miliyas to hatiniay a demak. (ˈOsien ko Taneng 22:3.) Nengnengen ko mikitiniay i Iciyopiya ci Tawit aci Aemac samaanay ko pidemak, sanay ko sowal nangra: “Itiniay kami ˈalomanay ko tamdaw a kitiraan anca ira ko widang kalacafay a macacawmaˈ. Caay ka itini kami i awaay ko tamdaw a kitiraan materek i paliding anca i lomaˈ. Mihaenay, awaayto ko toki niyam marefong i sakayhid.”

11. Sapisaˈosiaw to samaan paihkal to maolahay a maolahay a waywayan i, o makakaolahay mamiharateng to maanan a demakan?

¹¹ O makakaolahay a tamdaw ngangaˈay paihkal to maolahay a maolahay a waywayan han? Tinakoen mahahangot, matatakec, makakiting. Ano macakatto ko kalalaˈed namo i, ngaˈayay paihkal to miming maolahay a maolahay a waywayan. (Radiw ni Solomon 1:2; 2:6) Kawra, ano makidat ko coos no falocoˈ namo, papasangarto citaneng ko piharateng, telocto caayto ka mataneng ko demak. Roma i, paihkalay to maolahay a maolahay a waywayan alatek o papalahdaw to miˈimeray ˈicel namo, midemakto to kapiliˈan ni Yihofa a demak. (Taneng 6:27) Mihaenay satapang aca macacawmaˈ i, tooren ko safalod no Fangcalay Cudad malacafay misaˈosi to kakecengen a demak. c (1 Tisalonika 4:3-7) Kamo tatosa ngaˈay malacafay miharateng: “I kalalaˈed niyam ano iraay ko paihkalay to maolahay a maolahay a waywayan, samaanay ko pinengneng no i tatihiay a tamdaw hani? Onini a demak mamikidat to sapisaloaw to coos niyam tatosa han?”

12. Ano tahalifa to pasangaray anca eca ka lecad ko piharateng i, macacawmaˈay makakaolahay mamisinanot to maanan a demakan hani?

¹² Ano tahalifa kamo to pasangaray, anca caay ka lecad ko piharateng i, sasamaanto hani? Ira ko mahaenay a pakayraan paihkalay koni cowa ka ngaˈay kamo malacafay han? Awaay ko pinang, polong makakaolahay ato mararamoday  iraay ko caay ka lecad a miharatengan. Sakatanektekaw no kalalaˈed no raramod, mamalacafay tatosa misaˈicel miremo to kasasiromaan. Mihaenay, samaanay ko pisaysay namo to pasangaray nohatini, o papadama tamowanan mihapinang to mamalaˈosi ko raramod noikor hokira. Ngaˈay kamo tatosa malacafay miharateng: “Ano malalengo kami to demak i, rihadayay ko falocoˈ, makakangodoay han? Makahiay kami mihayi to pina dangoc no niyah, hanaca misaˈicel a misalof han? Makahiay kami pacaˈi ato miliˈay, hanaca kaliki misodod to tihi han?” (Ifiso 4:31, 32) Roma pakayraan i, ano marariday caka lecad ko harateng namo, marariday malacongis, ciraramodto noikor cowa ko mamasalof konini a demak alatek. Ano mahapinangay namo cowa ka tatodong tatosa, misaˈosi malacinowas o sakangaˈay namo tatosa. d

13. Pakayni hahakowa ko halafin macacawmaˈ, o makakaolahay mamiharateng to maanan a demakan?

¹³ Hakowa ko kahalafin a makakacawmaˈ? Macaloh ko pisaˈosi tocerid caay ka ngaˈay ko teloc. (Taneng 21:5) Mihaenay, o kacacawmaˈan a toki mamaedeng padama tamowanan masongilaˈ ko kasasifanaˈ. Roma i, o kacacawmaˈ namo a toki aka pakidem ko halafin. Sowal no Fangcalay Cudad: ‘O halamhaman a demak manayar ko kaira, patoleday to falocoˈ.’ (Taneng 13:12) Roma i, ano halafin ko kacacawmaˈan a toki, papasangarto kamo miˈimer to coos no harateng. (1 Korinto 7:9) Mihaenay, ano haharateng han to hakowaay ko kahalafin noka cacawmaˈ namo, ka pilicay to niyah: “Pakayra tora tamdaw, sakafanaˈawho kako to maanan hongaˈ mataneng ko pisaˈosi hani?”

O ROMAROMA TAMDAW SASAMAAN A PADAMA?

14. O romaroma tamdaw sasamaan midama to macacawmaˈay a makakaolahay? (Nengnengen ko coka.)

¹⁴ O kafanaˈan ita a tamdaw ano makakaolahay nohatini, sasamaan kita padama cangranan hani? Ngaˈayay tahidangen cangra malacafay kitaanan a komaen, malacafay milawla anca malacafay to pakalomaˈay pidoko. (Loma 12:13) Ano macacawmaˈ cangra i, misaaliay to papacafayen, papakalicen, anca ira ko ngaˈayay kasasowalan a kitiraan han? Ano mahaenay i, wa ngaˈay kita talaˈayaw mihadak to sapadama han? (Kalatiya 6:10) Masowalay i fafekang ci Aylisiya miakoˈiday to sapadama no salikaka itini no makakaolah ci Aswenan, sanay cingra: “O romaroma salikaka pasowalay tamiyanan, ano misaaliay kami to kacacawmaˈan kitiraan, hanaca cowa ko kami aca tatosa, ngaˈayay tayra i lomaˈ nangra sanay. Tada pasemeray to falocoˈ niyam konini.” Ano ira ko tamdaw mitahidang tisowanan kalacafay  cangranan macacawmaˈ, o pinengneng iso tonini a demak o pipaihkalan to olah i widang a ngaˈayay toki konini. Haratengen, aka pateked han ko makakaolahay a tamdaw i awaay ko roma tamdaw a kitiraan, nikawrira papairaen ko hatoki nangra ngaˈay ko nika sasowal.—Filipi 2:4.

15. O widang wa ngaˈayho patado to macacawmaˈay tamdaw midemak to maanan? (Taneng 12:18)

¹⁵ Ano sapadamaaw to macacawmaˈay a tamdaw i, ngaˈay kita somowal to papadama cangranan a sowal. Latekay, misaaliay kita sapaihkalaw to miˈimeray, aka patelas a somowal, mihaen o midamaay cangranan a pakayraan. (ˈOsien ko Taneng 12:18.) Tinakoen, ciharatengay kita sapasowalaw to tao alatek, misatapangayto cangra makakaolah saan, kawra harateng nangra ao niyah ko pasowal to tao tonini a demak. Caka ngaˈay kita somowal to miyakayakay a sowal cangranan, cowa ka ngaˈay itini i hasasaˈosien nangra a demakan milikaf cangranan. (Taneng 20:19; Loma 14:10; 1 Tisalonika 4:11) Roma i, caay ka ciharateng cangra somowal ko tao anca misalalicay to o mamararamodto cangra. Milomal ko fafahiyan salikaka ci Aylis ato faˈinay to nalifetan nangra makakaolah, sanay: “Caayho ka lalengo kami to limasmas a mararamod, milicayayto ko tao tamiyanan tonini a demak, tada pakangodoay tamiyanan.”

16. Ano malalicinowas ko makakaolahay, o mamisinanot kita to maanan hani?

¹⁶ O makakaolahay ano misaˈosiay to mamalacinowas, o mamisinanot kita to maanan hani? Cowa ka ngaˈay kita misalalicay to hano malalicinowas cangra, anca milikaf to cecay nangra. (1 Pitiro 4:15) Cecay fafahiyan salikaka ci Laya sanay: “Matengilay ako iraay ko somowalay to hano milicinowas koya faˈinayan salikaka takowanan, tada madokaˈay ko falocoˈ ako.” Malecad masowalay i fafekang, malalicinowas o pasokiyaway cowa ka saan. Tocerid, paihkalay koni malaˈosiayto ko araaw macacawmaˈ, padama tonini a makakaolahay matatodong ko pisaˈosi. Nikawrira, malalicinowas pakasomaday cangranan alatek, matoˈolan nanay cangra alatek. Mihaenay, kilimen ita ko toki ciharateng ato padama cangranan.—Taneng 17:17.

17. O makakaolahay a tamdaw papadadotoc samaan ko pidemak?

¹⁷ Mananamayto ita, makakaolahay wa tahalifa to pina pasangar, kawra pairaay to taˈangayay a lipahak. Sanay ko sowal ni Cisika: “Soˈlinen ko sowal, makakaolah kami i, cowa ko madoloay a demak, kawra mihadakan a toki ato ˈicel tada iraay ko epoc.” Ano o makakaolahay kamo nohatini, ka padadotoc misaˈicel mitongal to kasasifanaˈ, ano mihaen o mamalaˈosi ko kacacawmaˈan namo, padama tamowanan mataneng ko misaˈosian.