1. Pakamihecaay a saˈopo i 2023 miheca matengilay ita ko maanan?

 PAKAMIHECAAY a saˈopo i 2023 miheca tada pakalalokay to falocoˈ. a O likakawa no Kawas misalofay to pitadtad to pina sinael, mihadakayho to pina salasil to pakayniay mitosilay a tayal. Mananamay ita, ikor no mapalaˈafo ko Taˈangayay a Papilon, o romaroma tamdaw iraayho ko toki malo finawlan no Kawas. Matengilayho ita, mikitini 2023 miheca saka 11 folad misatapang kantangayto ko pihokok to mitosilay. Onini a kafalic paihkalay to cowa ko kalimlaan cowa ko kacalohan ko mitosilay a tayal no mita han? Cowa ka hatira.

2. O mitosilay tayal no mita to romiˈamiˈad hano matongalay ko kacaloh hani? (Marko 13:10)

² To romiˈamiˈad o mitosilay a tayal no mita matongalay ko kacaloh, misamaanay hani? Samanen cowato ka hakowa ko toki. Nengnengen, pakayni mitosilay a tayal i salikoray a romiˈad, paliˈayaway ci Yis to maanan. (ˈOsien ko Marko 13:10.) Mikitini maˈoningay i Matay cudad, sowal ni Yis, itini i ˈayaw no aira ko ‘salikoray a romiˈad’ mamatenak ko ngaˈayay lihaf i paro no kakarayan. (Matay 24:14) ‘Salikoray a romiˈad’ mitoroˈan i, o kahererekan no tatiihay a hekal. Maherekayto ci Yihofa misaˈosi to ‘romiˈad’ ato ‘toki’ pakayni i mamifekad a taˈangayay demak. (Matay 24:36; 25:13; Dmak 1:7) Mihaenay haw i, mataˈlif ko cecay romiˈad, mangalefay ko kapingata ita to salikoray a romiˈad. (Loma 13:11) ˈAyaw no aira kora romiˈad i, kakiemel kita padadotoc mitosil.

3. O maanan ko pakalalokay kitaanan mitosil hani?

 ³ Pakayni mitosilay a tayal, ngaˈay licayen ita ko niyah to cecay kalimlaan a salicay: Hano mitenak kita to ngaˈayay lihaf hani? Kantangen ko sowal, pakalalokay ko olah kitaanan mitosil. Fanekfek kita mitosil, pakayniay to maolahay to ngaˈayay lihaf, maolahay to tao, masakalimlaan i, maolahay ci Yihofaan ato fangcalay ngangan Ningra. Dotoc mamihacecay kita milengo toniya tolo a pakayraan.

MAOLAHAY KITA TO NGAˈAYAY LIHAF

4. Matengil ita ko ngaˈayay lihaf i, samaanay ko piharateng hani?

⁴ Tikolen miharateng, o nafalocoˈan iso tahatengil to ngaˈayay lihaf. Tinakoen, iraayto ko misofocan a wawa i paro no lomaˈ, anca mahelaay to cecay misaalian iso a katayalan, itiya samaanay ko piharateng iso hani? Maedeng macalohay kiso sapasowalaw to paro no lomaˈ ato widang tonini a ngaˈayay lihaf. Matengilay iso ko sangaˈayay a lihaf, oya ngaˈayay lihaf no Hongti Kitakit no Kawas i, mahaenay ko pidemak iso han?

5. Satapang matengil ko soˈlinay kimad no Fangcalay Cudad i, samaanay ko nafalocoˈan iso hani? (Nengnengen ko coka.)

⁵ Satapang kiso matengil ko soˈlinay kimad no Fangcalay Cudad i, samaanay ko nafalocoˈan hani? Mananamay iso iraay ko cecay kakarayan Wama, tada maolahay Cingra tisowanan, makalimay Cingra tisowanan ilalomaˈ no taˈangayay paro no lomaˈ Ningra. Mikiˈokay Cingra papalahdaw to kihcod a roray. Makalimayho tisowanan itini faelohay hekal malalitemoh to mapatayay a salawina. Cowa konini aca, adihayayho ko mananamay iso. (Marko 10:29, 30; Yohani 5:28, 29; Loma 8:38, 39; Paˈarawan 21:3, 4) Tada mitemeray konini soˈlinay kimad tisowanan. (Luka 24:32) Tada maolahay kiso toniya kalimlaan a soˈlinay kimad, makalimay sapaladaˈaw to tao.​—Nengnengen ko Yirimiya 20:9.

6. Mikitini nalifetan ni Ayniste aci Lois mananamay iso ko maanan?

⁶ Nengnengen ko nalifetan no faˈinayan salikaka ci Ayniste, b 10 mihecaan cingra i, mapatayayto  ko wama. Sanay ci Ayniste: “Saan kako miharateng: ‘Tayraay cingra i kakarayan han? Anca, awaayto materek cingra, tahadaˈoc malahdaw han?’ Tada masemeray kako toya iraayho ko wama a wawa.” Marariday ci Ayniste tayra i pitademan, mipitoros itini kaˈayaw no tadem no wama a mitolon: “Kawasaw, nanay pasowalen kako, icowaay ko wama ako hani?” Mapatay ko wama ni Ayniste maedeng 17 miheca ikor malitemohay ko cecay Misawacayay Tamdaw ni Yihofa, mitahidangay cingranan minanam to Fangcalay Cudad, tangsolay cingra micada. Mananamay ningra o mapatayay a tamdaw malecaday o maeholay mafotiˈ, awaay ko maamaan kafanaˈan. Mananamayho ningra o mapatayay a tamdaw iraay ko tokel patikol maˈorip. (Patnakay 9:5, 10; Dmak 24:15) O soˈlinay kimad no Fangcalay Cudad tada pakahemekay cingranan, halafinay miheca micariraway cingranan a salicay mahelaayto ko sapacaˈof. Ikor, o fafahi ningra ci Lois misatapangayto minanam to Fangcalay Cudad, hanaca tada maolahay to ngaˈayay lihaf no Hongti Kitakit. Cangra mararamod itini 1978 miheca micada to paputisem. Fanekfekay cangra paladaˈ to kalimlaan a soˈlinay kimad i paro no lomaˈ, widang ato romaroma makahiay mitengil a tamdaw, telocto mataˈlifay ko 70 a padamaan a tamdaw micada to paputisem.

7. O soˈlinay kimad cilamit i falocoˈ ita ikor, makalimay kita samaan ko pidemak? (Luka 6:45)

⁷ Mahapinangay, o soˈlinay kimad cilamit i falocoˈ ita ikor, cowato pakaˈemet kita to sapipasowalaw to polong a tamdaw. (ˈOsien ko Luka 6:45.) Malecaday ko harateng ita to saka 1 hahekalan a nisawawaan ni Yis, sanay cangra: ‘O maˈaraway niyam, matengilay, cowa ka ngaˈay eca ka pasowal.’ (Dmak 4:20) Tangongolay ko olah ita to soˈlinay kimad no Fangcalay Cudad, mansa tada makalimay paladaˈ to ˈalomanay tamdaw.

MAOLAHAY KITA TO TAO

8. O manan ko pakalalokay kitaanan pasowal i tao to ngaˈayay lihaf hani? (Nengnengen ko “ Tano Olah Padama to Tamdaw​— Malo Krisciyang.”)(Nengnengen ko coka.)

⁸ Malecaday kita ci Yihofaan aci Yisan, maolahay to tao. (Taneng 8:31; Yohani 3:16) ˈAlomanay tamdaw ‘cowa ka fanaˈ to Kawas, awaay ko hatokel,’ tada siniˈadaay kita cangranan. (Ifiso 2:12) Mikitiniay i ciolahay falocoˈ ato siniˈadaay falocoˈ, maˈaraw ita cangra maroray ko nokaˈorip, makalimay pafeli cangranan to sapilidong a sasoˈot, pasowal cangranan to ngaˈayay lihaf no Hongti Kitakit no Kawas. Onini ngaˈayay lihaf no Hongti Kitakit pairaay to hatokel nangra, padama cangranan aniniho ira ko sangaˈayay a nokaˈorip, pairaho to ‘soˈliˈlinay a ˈorip,’ itini faelohay hekal no Kawas tahadaˈoc a maˈorip.​—1 Timoti 6:19.

9. Mihadakay kita i tamdaw to maanan a sarikec hani? Misamaanay? (Icikil 33:7, 8)

⁹ O olah ita to tao pakalalokay kitaanan mihadak to sarikec, patalipaˈelal cangranan mangataayto ko salikoray romiˈad no tatiihay a hekal. (ˈOsien ko Icikil 33:7, 8.) Anini, ˈalomanay  tamdaw misamacayay to kaˈorip to romiˈamiˈad, kawra cowa ka fanaˈ to aira ko ‘taˈangayay padiing’ i kaˈayaw, ‘o mahaenay a padiing, na cowaho pifekad i salakat, anoikorto cowa ko mamiliyaw mifekad.’ (Matay 24:21) Siniˈadaay kita to mahaenay a tamdaw, mahawpay koya cowa pihakelong a paro no lomaˈ. Makalimay kita mafanaˈ cangra itini taˈangayay padiing mamifekad ko maanan a demak​—papalahdawen ko mararaway pihakelongan, dotoc polong a tatiihay hekal mamasongilaˈ mapalaˈafo itini Armakiton. (Paˈarawan 16:14, 16; 17:16, 17; 19:11, 19, 20) Mikifalocoˈ kita mitolon to Kawas, nanay ˈalomanay tamdaw aniniho mitengil to sarikec, misatapang malacafay kitanan midoko ci Yihofaan. Nikawrira o paro no lomaˈ ita ato romaroma tamdaw ano eca ka kahi mitengil to sarikec nohatini i?

10. Hano papairaen ita ko macalohay a harateng padadotoc mihadak to sarikec hani?

¹⁰ Malecad masowalay i fafekang a lalakaw, maˈaraw no romaroma tamdaw mapalaˈafo ko Taˈangayay Papilon, misatapang pakasoˈlin ci Yihofaan, lalidongen ni Yihofa ko hatiniay a tamdaw alatek. Ano mahaenay i, papairaen ita ko macalohay a harateng padadotoc mihadak to sarikec. Aka mapawan: Pasowalen ita cangra nohatini tonini a demak, ikorto wa ngaˈay maharateng nangra alatek. (Nengnengen ko Icikil 33:33.) Noikor mamaharateng nangra ko mihadakan ita a sarikec alatek, hanaca itini ˈayaw no salikoray romiˈad kiyamawho a midemak, malacafay kitaanan midoko ci Yihofaan. Haratengen hena, itiniay Filipi milaocay to kapalitan a tamdaw itiniay ikor no ‘mifekad ko taˈangayay ˈatoray,’ satapang sanayho pakasoˈlin to Kawas. Malecaday, o romaroma tamdaw pakaˈaraw to kalaˈafo no Taˈangayay Papilon onini a kafahkaˈan a demak ikor, itiya sanayho pakasoˈlin ci Yihofaan.​—Dmak 16:25-34.

MAOLAHAY KITA CI YIHOFAAN ATO FANGCALAY NGANGAN NINGRA

11. Sasamaan ko pidemak ita o panokayay ci Yihofaan to ˈdil, pikangodo ato ˈicel hani? (Paˈarawan 4:11) (Nengnengen ko coka.)

¹¹ Milasil kita to ngaˈayay lihaf, sakakaay a lalangian i, maolahay kita ci Yihofaan ato fangcalay ngangan Ningra. O pinengneng ita to mitosilay o ngaˈayay a hatoki pakahemek to Kawas. (ˈOsien ko Paˈarawan 4:11.) Mihayiay kita, ci Yihofa a Kawas citodongay micada to ˈdil, pikangodo, ato ˈicel. Tano ciˈicelay a wacay kita padama to tamdaw mihapinang, cowa ko ‘pisangaˈ aca to kihcod’ ko Kawas, pafeliayho to sakaˈorip ita, mihaen ko demak ita o panokayayto to ˈdil ato pikangodo Cingranan. Misongilaˈ kita misaka dademak to toki no niyah, ˈicel ato dafong misarocod mirienang to mitosilay a tayal, o pakayniay Cingranan ko pihadak ita to ˈicel. (Matay 6:33; Luka 13:24; Kolosay 3:23) Cowa ko pilengo aca ita to kaolahan ita a Kawas, sapasowalawho to tao to fangcalay ngangan Ningra ato  mitaypiyawan nonini a ngangan. Misamaanay hani?

12. Itini pitosilan sasamaan kita patalahkal to fangcalay ngangan ni Yihofa hani?

¹² O olah ci Yihofaan pakalalokay kitaanan patalahkal to fangcalay ngangan Ningra. (Matay 6:9) Sapihadakaw kita to ˈicel mikorac to mapakaditay a fangcalay ngangan ni Yihofa, misawacay to pipaoraf ni Satan ci Yihofaan a sowal, sahtoay o mangah. (Satapangan 3:1-5; Yopu 2:4; Yohani 8:44) Ano mitosil i, makalimay kita patado ci Yihofaan a pasowal. Ano makahi ko tamdaw mitengil, papasowalen ita cingra to kihcod pakayniay ci Yihofaan a soˈlinay kimad. Makalimay kita mafanaˈ ko kahacecay tamdaw, sakakaay capeling ni Yihofa o olah, pakayraan Ningra mikowan o moecelay ato masadafdafay, hanaca o Hongti Kitakit Ningra kakalikito palahdaw to kihcod a roray, hanaca paira to soˈlinay dipayal ato lipahak no tamdaw. (ˈOlic 37:10, 11, 29; 1 Yohani 4:8) Itini pitosilan paˈading kita to ngangan ni Yihofa, o patalahkalay to fangcalay ngangan Ningra. Roma i, malo soˈliˈlinay a Misawacayay Tamdaw ni Yihofa kita o mamarenecen ko niyah. Misamaanay hani?

13. Ngaˈay kita panganganen to Misawacayay Tamdaw ni Yihofa hano tada kalikoan hani? (Isaya 43:10-12)

¹³ Mipiliˈan ni Yihofa kita malo misawacayay tamdaw Ningra. (ˈOsien ko Isaya 43:10-12.) ˈAyaw no moetep a mihecaan, o tikami no Malohemay Malitengay i Congpo sanay ko sowal: “Ngaˈay kita panganganen to Misawacayay Tamdaw ni Yihofa, o kalikoan no kahacecay ita konini.” c Tinakoen, ano misaaliay kiso to cecay tamdaw itini hoing patado misawacay to waywayan iso, maedeng oya kafanaˈan iso ato pakasoˈlinan a tamdaw ko mipiliˈan iso. Roma i, iraay ko ngaˈayay a ngangan ningra, o mihadakan ningra a pisawacay ngangaˈay pakasoˈlinen. Malecaday, piliˈen ni Yihofa kita malo misawacayay  tamdaw Ningra, paihkalay koni to cipinangay Cingra kitanan, pakasoˈlinayho to mamisawacay kita i tamdaw to edengan a soˈlinay Kawas Cingra. Ngaˈay malo misawacayay Ningra, tada masakalikoanto ita, mihaenay mameten ita ko kihcod a toki milasil to fangcalay ngangan Ningra, hanaca pacoli to kihcod paorafay Cingranan a sowal. Mihaen, ngaˈayto kita malo soˈliˈlinay a Misawacayay Tamdaw ni Yihofa. Pakayni tonini tada malikoay kita!​—ˈOlic 83:18; Loma 10:13-15.

PADADOTOC MITOSIL, TAHIRA KAHEREREKAN

14. Noikor mamifekad ko maanan mikowaday to falocoˈ a demak hani?

¹⁴ O mamifekad a demak i kaˈayaw tada mikowaday to falocoˈ! Makalimay kita ˈaloman ko tamdaw pakayni sapadama ni Yihofa, itini ˈayaw no mifekad ko taˈangayay padiing micada to soˈlinay kimad. Roma i, soˈlin itini i taˈangayay padiing a tatokian, itini kapasangaran a tatokian no likisi no tamdaw, ngangaˈayho kita pakaˈaraw to ˈalomanay tamdaw miliyas to mamapatayto a hekal ni Satan alatek, hanaca kalacafay kitaanan pakahemek ci Yihofaan.​—Dmak 13:48.

15-16. Papadadotoc kita midemak to maanan? Tahira i hacowa a tatokian?

¹⁵ Nohatini, iraay ko tatodong ita itini paro no kakarayan milasil to ngaˈayay lihaf no Hongti Kitakit no Kawas, noikor cowato ko mamiliyaw midemak tonini kalimlaan a tayal. Roma i, o papadadotoc kita mihadak to sarikec, samanen misaaliay ko tamdaw sakafanaˈaw to mangataayto ko sakalaˈafoaw noniya tatiihay a hekal. Tahira i pisawkitan a tatokian, o mamafanaˈto ko tamdamdaw, o milasilan ita a lihaf o naitiniay i Kawas ci Yihofaan.​—Icikil 38:23.

¹⁶ Mamisetek kita to falocoˈ samaan ko pidemak hani? Samanen maolahay to ngaˈayay lihaf, maolahay to tao, kalimlaan i, maolahay to Kawas ci Yihofaan ato fangcalay ngangan Ningra, papairaen ita ko fanekfekay ato macalohay a harateng, misarocod mirienang to mitosilay a tayal, tahira i pipasowalan ni Yihofa to: ‘Malaˈosiayto ko demak!’