LALENGOEN LALAKAW 25
RADIW 7 Ci Yihofa O ˈIcel no Mita
Aka Mapawan o ‘Soˈlinay Materek Maˈoripay’ a Kawas ci Yihofa!
‘O soˈlinay materek maˈoripay ci Yihofa!’—ˈOLIC 18:46.
KALIMLAAN NO LALAKAW
O midokoan ita a Kawas ci Yihofa o ‘soˈlinay materek maˈoripay.’ Miharateng tonini papaira to adihayay haepoc no mita.
1. O finawlan ni Yihofa itini i pasangaray hano ngangaˈay padadotoc midoko Cingranan hani?
SOWAL no Fangcalay Cudad, o kaˈoripan ita a lintad o ‘pasangaray siˈayawen a mikiriwiˈay a lintad,’ mihaenay o maˈoripay toniya lintad a tamdaw mamisiˈayaw to adihayay pasangaray. (2 Timoti 3:1) Nikawrira o finawlan ni Yihofa cowa ko pisiˈayaw aca to kalo a pasangaray, pakayniho i pihakelongan tahalifaay to pisafelit ato mahakokayay. Itini pisiˈayaw to pasangaray, hano ngaˈayho kita padadotoc midoko ci Yihofaan hani? O cecay a lalangian i, mafanaˈayto kita ci Yihofaan, mafanaˈayho o soˈlinay materek, midaˈocay maˈoripay a Kawas Cingra.—Yirimiya 10:10; 2 Timoti 1:12.
2. Ci Yihofa o soˈlinay materek maˈoripay a Kawas hano saan ko sowal hani?
2 O soˈlinay materek maˈorip a Kawas ci Yihofa, mafanaˈay Cingra to malifaay ita a sapalifet, mararidayho padama kitanan. (2 Rayray 16:9; ˈOlic 23:4) Maharateng ita to soˈlinay a Kawas Cingra, o mamalaˈosito misiˈayaw to kihcod a sapalifet. Hongti ci Tafiti iraay ko mahaenay a nalifetan.
3. ‘Ci Yihofa o soˈlinay materek maˈoripay’ sanay ko sowal ni Tafiti, o manan ko tatodong hani?
3 Mafanaˈay ci Tafiti ci Yihofaan, mitiˈerayho Cingranan. Tiya lepelen no Hongti ci Sawlo ato romaroma ˈada ci Tafiti i, micangacangay cingra ci Yihofaan to sapadama. (ˈOlic 18:6) Pacaˈofan ni Yihofa ko satolon ningra, milidong cingranan, oranto i, pakahemekay cingra ci Yihofaan sanay: ‘O soˈlinay materek maˈoripay ci Yihofa!’ (ˈOlic 18:46 ato roma pihongyak.) Mihaen ko sowal ni Tafiti cowa ko pihayi aca to materekay ko Kawas. Sanay ko cecay taˈarawan a cudad, mihaen ko sowal ni Tafiti, o paihkalay to pakasoˈlinay cingra to tahadaˈocay maˈorip a soˈlinay Kawas ci Yihofa, tocerid talaˈayaway miˈading to finawlan no Niyah. Ci Tafiti mikitini nalifetan no niyah mahapinangay o soˈlinay materek maˈoripay ko Kawas, mapakalalokay cingra padadotoc a midoko ato pakahemek ci Yihofaan.—ˈOlic 18:28, 29, 49.
4. Haratengen ci Yihofa o soˈlinay materek maˈoripay a Kawas pairaay kitaanan to maanan a haepoc hani?
4 Malecad ci Tafitian, pakasoˈlinay kita o soˈlinay materek maˈoripay a Kawas ci Yihofa, o fafanekfekto ko falocoˈ midoko ci Yihofaan. Wa irato ko ˈicel ita miemem to sapalifet, ira ko ˈicel matayal saki ci Yihofaan, mamisetekho to falocoˈ padadotoc miingid ci Yihofaan.
O SOˈLINAY MATEREK MAˈORIPAY A KAWAS MAMIDAMA TISOWANAN
5. Hano ngaˈay kita ira ko pakasoˈlinay falocoˈ misiˈayaw to pasangar hani? (Filipi 4:13)
5 Ano haratengen ita o soˈlinay materek maˈoripay a Kawas mamicerid padama kitaanan, ngangaˈayto pakaemem to masakenakenaay a sapalifet. O malefotay ko ˈicel ni Yihofa, awaay ko maanan to mamiconged Cingranan midama kitaanan, papaˈicel kitaanan misiˈayaw to sapalifet. (ˈOsien ko Filipi 4:13.) Mihaenay, wa ngaˈay matomes ko pakasoˈlin ita misiˈayaw to pasangaray. Ano tiˈeren ita ko sapadama ni Yihofa a miremo to kaemingay a pasangaray i, pakasoˈlinen ita o papadama Cingra kitaanan milakowit to taˈangayay a pasangar.
6. Kaemangho ci Tafiti o maanan a nalifetan ko paˈicelay to pakasoˈlin ningra ci Yihofaan hani?
6 Nengnengen ko tosa a nalifetan ni Tafiti samaanay paˈicel to pakasoˈlin ningra ci Yihofaan. Kaemangho cingra patadoay to wama pakaen to siri, kinacecayay iraay ko layong, roma romiˈad iraay haca ko tomay, toniya kinatosa timoloay ci Tafiti miˈodis to ˈaˈadopen, milidong to siri a panokay. Nikawrira cowa ko niyah a ˈicel sanay cingra, mafanaˈay cingra o ci Yihofa ko padamaay cingranan. (1 Samuil 17:34-37) Co:wa ka pawan ci Tafiti toniya tosa a nalifetan. Padotocay cingra midotim, matongalayto ko pakasoˈlin o soˈlinay materek maˈoripay a Kawas, o mamidama Cingranan noikor.
7. Ci Tafiti iraay ko maanan matatodongay a pinengneng hani? Oniya demak hano padamaay cingranan milood ci Koliyatan hani?
7 Ikor, tayraay ci Tafiti i taloˈan no sofitay no Israil milisoˈ to kakakaka ningra, itiya cowaho ka 20 ko mihecaan ni Tafiti alatek. Maˈaraw ningra ko sofitay no Israil tada makokiˈay, samanen o cecay taˈangayay a Filistin a tamdaw ci Koliyat ‘milekal a miceliˈ i sofitay no Israil.’ (1 Samuil 17:10, 11 ato roma pihongyak.) Matalawan nanay ko Israil tamdaw, samanen haharateng sanay cangra to sowal ni Koliyat ato taˈangayay tatirengan ningra. (1 Samuil 17:24, 25) Nikawrira cowa ka hecad ko pinengneng ni Tafiti. Mafanaˈay cingra cowa ko mikafoday aca ci Koliyat to sofitay no Israil, ao mikafoday to ‘sofitay no soˈlinay Kawas,’ oya sofitay no midaˈocay maˈorip a Kawas. (1 Samuil 17:26 ato roma pihongyak.) Misamacayay ko harateng ni Tafiti ci Yihofaan. Pakasoˈlinay cingra, oya padamaay cingranan mipatay to tomay ato layong a Kawas, o papadama cingranan anini. Mihaenay timoloay cingra milood ci Koliyatan, salikor mipatayan konini a taˈangayay tamdaw.—1 Samuil 17:45-51.
8. Ano tahalifa to pasangaray i, mamisongilaˈ kita miharateng to maanan hani? (Nengnengen ko coka.)
8 Ano maharatengay ita mamicerid a padama koya soˈlinay materek maˈoripay a Kawas, wa malecadto kita ci Tafitian malaˈosi ko pisiˈayaw to sapalifet. (ˈOlic 118:6) Sapalahadaw to mahaenay a pakasoˈlin, ngaˈayay haratengen ita samaanay ci Yihofa padama to finawlan no Niyah. Tinakoen, ngaˈayay ˈosien iso ko maˈoningay i Fangcalay Cudad, pakayniay pilidong ni Yihofa to madimadiay sikawdan Ningra. (Isaya 37:17, 33-37) Wa ngaˈay kiso itini jw.org wangcan minengneng to pina safanaˈ, sinanoten samaanay ci Yihofa midimokos to salikaka. Ngaˈayho tikolen iso miharateng na samaanay ci Yihofa padama tisowanan. Ano awaay ko malecaday ni Tafiti mipatay to layong ato tomay a nalifetan iso, cowa ka padama ci Yihofa tisowanan, cowa ka saan. Soˈlinay haw i, itini kaˈorip iso, adihayay ko nano demak ni Yihofa i tisowanan! Tinakoen, misolotan Ningra kiso tayra i tatihi Ningra. (Yohani 6:44) Nohatini kamayan kiso materek i soˈlinay kimad, sahtoay o sapadama Ningra konini. Ngaˈayay cangacangen iso ci Yihofa padama tisowanan pakaharateng to samaanay Cingra pacaˈof to satolon iso, itini matatodongay a tatokian padama tisowanan, tahalifa kiso to pasangaray i, samaanay midama tisowanan. Midotim tonini a demak papatongal to pakasoˈlin iso, papadadotoc ci Yihofa malo tanektekay a midamaay tisowanan i lalikor.
O harateng ita ano tahasiˈayaw to sapalifet i, micapiday to taˈangayay a lacongis (Nengnengen ko saka 8-9 fatac)
9. Sasamaan ko pinengneng ita to sapalifet hani? (Taneng 27:11)
9 Miharateng to soˈlinay materek maˈoripay a Kawas ci Yihofa, papadama kitaanan ira ko matatodongay a pinengneng. Aka pakinali a miharateng to malifaay ita a sapalifet, sasamacayen itini i mikikakaay ko nika masakalimlaan a demak, o pidopo ci Yihofaan, pacaˈof to pisalalicay ni Satan. Mihaen, wa irato ko ˈicel ita mihadidi to sapalifet. Na somowalay ci Satan ano tahalifa kita to pasangaray i, o mamiliyas ci Yihofaan sanay. (Yopu 1:10, 11; ˈosien ko Taneng 27:11.) Nikawrira itini pasangaray a pakayraan ano padadotoc kita madimadi ci Yihofaan, ngangaˈayto patalahkal to olah ita ci Yihofaan, ngaˈayho misawacay to o misamangahay ci Satan. Alatek misiˈayaway kiso to pisafelit no sifo anca cangoˈotay ko sakaˈorip, latek itini pitosilan caay ka hela ko maolahay to kimad a tamdaw, anca tahalifaay kiso to roma sapalifet nohatini. Ano mahaenay i, haratengen, iraay ko toki iso nohatini paihkal to madimadiay ko niyah ci Yihofaan, ngaˈay pakahemek to falocoˈ Ningra. Haratengenho iso, ano o mananto ko malifaay iso, papadamaen Ningra kiso pakahadidi. (1 Korinto 10:13) O papafelien Ningra kiso to ˈicel, ho ngaˈay kiso padadotoc mihadidi.
O SOˈLINAY MATEREK MAˈORIPAY A KAWAS PAPALIFON TISOWANAN
10. Soˈlinay materek maˈoripay a Kawas samaanay micada to madimadiay midoko Cingranan a tamdaw?
10 Makahiay ci Yihofa palifon to madimadiay midoko Cingranan a tamdaw. (Hipray 11:6) Anini pafeliay Cingra kitaanan to rihadayay falocoˈ ato marenecay a harateng, papafeliho Cingra kitaanan to midaˈocay a ˈorip noikor. Ngaˈayay tiˈeren ita ci Yihofa, pakasoˈlin iraay ko kalim ato ˈicel Ningra palifon kitaanan. Ira ko hatiniay a pakasoˈlinay falocoˈ ita i, mamalecad to nolitengan madimadiay a sikawdan fanekfek matayal saki ci Yihofaan. Isaka 1 hahekalan a Timotian o ngaˈayay a tinakoan.—Hipray 6:10-12.
11. Hano ira ko ˈicel ni Timoti fanekfek a matayal itini kasakopang hani? (1 Timoti 4:10)
11 Pakalalokan ni Pawlo ci Timoti itini pasifanaˈay ato mikimaday a demak padadotoc macakat. Ci Timoti patirengay to ngaˈayay taˈarawan no cowa ka lecad ko mihecaan a salikaka. Roma i, macadaay ni Timoti ko karetengay a ˈinorong, tinakoen oha tanektek cingra misalof to pina pasangaray a demak, hanaca papaihkal to sidaˈitay a waywayan. (1 Timoti 4:11-16; 2 Timoti 4:1-5) Mitiˈeray ci Timoti to soˈlinay materek maˈoripay a Kawas, mansa iraayto ko ˈicel ningra midofdof to sowal ni Pawlo, fanekfek matayal saki ci Yihofaan ato taowanan. (ˈOsien ko 1 Timoti 4:10.) Ngaˈayay pakasoˈlin ci Timoti, soˈlin awaay ko cimacima pakaˈaraw to midemakan ningra, anca cowa piakoˈid to narorayan ningra, o papalifonen ni Yihofa cingra.—Loma 2:6, 7.
12. O malohemay malitengay hano ira ko ˈicel malalok a matayal saki salikaka? (Nengnengen ko coka.)
12 Anini, wa ngaˈay pakasoˈlin ko malohemay malitengay, maˈaraway ni Yihofa ko midemakan nangra, hanaca tada masemeray to narorayan nangra. Cowa ko pipakaen, pasifanaˈ ato mitosilay aca, ˈalomanay malohemay malitengay mirienangayho to patirengay a tayal ato padamaay to tahapadesay a tayal. Roma i, o roma malohemay malitengay o Milisoˈay to Adadaay a Kapot, anca itiniay i Mirinnakay to Ising a Iing matayal. O mirienangay to hatiniay a tayal a malohemay malitengay mafanaˈay, o katayalan nangra o kasakopang ni Yihofa, cowa kono tamdaw a patirengan a lekakawa. Mihaenay, misarocoday cangra midemak to ˈinorong, hanaca pakasoˈlinay to Kawas papakayni i mihadakan nangra a narorayan palifon cangranan.—Kolosay 3:23, 24.
Misarocod kiso matayal saki kasakopang, o soˈlinay materek a Kawas o papalifon tisowanan (Nengnengen ko saka 12-13 fatac)
13. Maˈaraw ni Yihofa kita to misarocoday a matayal Cingranan samaanay ko harateng Ningra hani?
13 O kahacecay a tamdaw i kasakopang soˈlin cowa ka sahto sa o malohemay malitengay, kawra ngangaˈay ko kahacecay tamdaw matayal saki ci Yihofaan. Ano misaˈicelay kita a midemak, o mamasemeren Cingra. Pakiyaho kita midama to tayal i polong no hekal, soˈlin coka hakowa ko payci, kamayan misalimla ci Yihofa. Misaˈicel kita miremo to hinangodoay a pinangan, itini saˈopo pakamay pacaˈof to salicay, o lalipahak ci Yihofa. Misodod kita to pakararaway kitaanan a tamdaw, mahemekay ci Yihofa. Soˈlin citolasay ko midemakan no niyah saan kiso miharateng, kawra ka pakasoˈlin, o mademakayho iso i, salimlaan ni Yihofa. Tada maolahay Cingra tisowanan, o papalifon tisowanan!—Luka 21:1-4.
PADADOTOC MIINGID TO SOˈLINAY MATEREK MAˈORIPAY A KAWAS
14. Ano padadotoc kita miingid ci Yihofaan, hano mamadoloto madimadi Cingranan hani? (Nengnengen ko coka.)
14 Ano pakasoˈlinay kita to soˈlinay materek maˈoripay ci Yihofa, o mamadoloto padadotoc madimadi Cingranan. O mahaenay ko demak ni Yosif. Mafanaˈay cingra to ciharatengay ci Yihofa cingranan, mansa i, caay ka sapakasomadaw ci Yihofaan, mankora tanektekay cingra eca ka pidemak to malafoay a demak. (Satapangan 39:9) Ano makalimay kita sapitodongaw to taˈarawan ni Yosif, limasmasen ko toki mitolon ci Yihofaan, hanaca mikingkiw to Kimad Ningra. Mihaen i, matongal matongalto ko piingid ita ci Yihofaan, co:wato ko mamidemak to kapiliˈan Ningra a demak.—Yakop 4:8.
Padotoc kiso miingid to soˈlinay materek a Kawas, o mamadimadito Cingranan (Nengnengen ko saka 14-15 fatac)
15. Mikitini Israil tamdaw mananamay ita ko maanan a sapasifanaˈ hani? (Hipray 3:12)
15 Ano caayto ka pitiˈer kita to soˈlinay materek maˈoripay a Kawas ci Yihofaan i, o mamiliyas Cingranan alatek. Nengnengen ko mifekaday a demak no Israil itini kohkohan. Soˈliˈlin mafanaˈay cangra to iraay materek ci Yihofa, nikawrira cisasaay cangra to mamidimokos ci Yihofa cangranan hokira. Sanayho cangra milicay: ‘Soˈlinay itiniay i lalomaˈ no mita ci Yihofa han?’ (Kasadakan 17:2, 7) Telocto, mitowakangayto cangra to Kawas. Tinakoan no Israil o sapasifanaˈ kitaanan, maedeng caay ka ciharateng kita mitodong to demak nangra.—ˈOsien ko Hipray 3:12.
16. Itini maanan a pakayraan o pakasoˈlinay falocoˈ ita mamapalifet alatek?
16 Maˈorip itini tonini a hekal, padadotoc miingid ci Yihofaan cowa ko madoloay. ˈAlomanay tamdaw cowa pihayi to iraay ko Kawas a materek, ora misakahmaway to limoˈot no Kawas a tamdaw nengnengen hato sinowa:yay ko kaˈorip. Maˈaraw ita ko mahaenay a pakayraan i, mamangiyangi ko pakasoˈlin no falocoˈ alatek. Soˈliˈlin mihayiay kita to iraay ko Kawas a materek, kawra mamisatapang a cisasa Cingranan to papadama kitaanan hokira. Mitiliday to ˈOlic saka 73 fedengan iraay ko mahaenay a sasa no falocoˈ ningra. Maˈaraw ningra ko itatihiay a misakahmaway to sarikec no Kawas a tamdaw hato ngaˈayay ko kaˈorip, misatapangayto a cisasa midoko to Kawas iraay ko epoc hokira.—ˈOlic 73:11-13.
17. Sasamaan ko pidemak ita ngaˈ madoloto padadotoc miingid ci Yihofaan hani?
17 Ikor oya mitiliday to ˈOlic a tamdaw samaanay hano ngaˈayay a mifalic to harateng hani? Misimsimay a miharateng ko falocoˈ ningra, oya mapawanay ci Yihofaan a tamdaw iraay ko masamaanay a teloc. (ˈOlic 73:18, 19, 27) Misongilaˈay cingra midotim, midoko ci Yihofaan pairaay to maanan a sapalemed i cingranan, (ˈOlic 73:24) Matiya o mitiliday to ˈOlic, ngangaˈay kita misongilaˈ a miharateng, midoko kita ci Yihofaan macadaay ko maanan a epocan. Saharateratengen ita, ano caay ka pidoko kita ci Yihofaan, sasamaan ko kaˈorip saw. Mihaen kita to demak i, mamadoloto a madimadi ci Yihofaan, mamatira o mitiliday to ˈOlic mikifalocoˈ a pasowal: ‘Kako saan i, miingid to Kawas tada ciepocay takowanan.’—ˈOlic 73:28.
18. Hano ira ko pakasoˈlinay falocoˈ ita misiˈayaw to noikoran hani?
18 Itini salikoray a ˈawaled, ano o mananto ko malifaay ita a sapalifet, ngangaˈay timolo a misiˈayaw, samanen ‘misarocoday kita dademak i midaˈocay maˈorip a Kawas.’ (1 Tisalonika 1:9) O Kawas ita o soˈliˈlinay a materek, o tanektekay a midamaay kitaanan i lalikor Cingra. Isaˈayaw midimokosan Ningra ko madimadiay sikawdan no Niyah, anini padotocay kalacafayay kitaanan. Cato ka halafin mamisiˈayaw kita to sataˈangayay a padiing, nikawrira cowa ko cecayay kita misiˈayaw. (Isaya 41:10) Nanay timolo kita a pasowal: ‘Ira ci Yihofa padama takowanan, co:wa ko mamatalaw kako.’—Hipray 13:5, 6.
RADIW 3 Tadiˈecen ko Kawas, O Nonoˈ, O ˈIcel
