Itiniay kako i 1929 miheca 12 folad 22 romiˈad hofocen i Nowil. O mimingay a niyaroˈ koninian, kawra siwaay ko nociw itira, cowa ka raay nai Pasetong no Pilis. Itiniay kako i nociw a lomahad, tada lipahakay ko kaemangay a nokaˈorip ako. Kako ato safa ci Raymon to romiˈamiˈad pasadakay to hacol i coco no kolong, mipadangayho kami mipanay. Makakedecay ko kalalaˈed no niyaroˈay a tamdaw, marariday mapadamadama a mapolong kami.

Wama ako ci Aymili ato wina ci Alis o Tingsokiyo ko pihakelongan nangra, to lipalipay tayraayto a mirienang to Misa. Isaka 1939 miheca, iraay ko misakafahay nai Ikok tayni tonini mimingay a niyaroˈ niyam. Papiciwmongan ningra ko wama to Katalipaˈelal!, tangsolay mahapinang no wama to soˈlinay a kimad kora maˈosiay ningra, hato misatapangayto miˈosi to Fangcalay Cudad. Ikor, caayto ka tayra i kiyokay cingra mirienang to Misa, itiya i, oya mangaˈayayho a sakafiyaw misatapangay a misafelit to wama. Pakidem cangra miroero to wama, miconged cingranan mifalic to pihakelongan, pakayni tonini marariday ko wama macacoli cangranan.

Maˈaraw ko wama micada to taˈangayay a saroero no tao, tada masomaday kako. Oranto i, mahaen o satapangan a sowal nonini lalakaw, mingitangitay kako mitolon to Kawas. Ikor, caayto ka pisafelit ko sakafiyaw to wama, tada mahemekay ko falocoˈ ako. Mahapinang ci Yihofa soˈlinay o ‘Mitengilay to satolon a Tatapangan.’

Isaka 1940 miheca saka 5 folad 10 romiˈad, o Naci no Towic milooday to Pilis. Teloc ˈalomanay ko tamdaw milaliw to lomaˈ, paro no lomaˈ niyam milaliway tayra i katimol no Frans. I lalan malitemohay niyam ko malalooday a sofitay no Towic ato sofitay no Frans, masaˈotay kami itira tora kalaloodan a kilac.

 Minokayto kami patikol i nociw i, maˈaraw ko adihayay a dafong maˈafasayto no sofitay, edengan o waco niyam ci Popi ko militemohay tamiyanan. Malifa ko mahaenay a demak, misatapangayto kako misaharaterateng, “Misamaanay hano ira ko lalood ato semsem?”

Itiya toya laliyadan, faˈinayan salikaka ci Imil Soranc a kinapinapinaay a tayni. Taˈangayay ko pikowad ningra tamiyanan. O madimadiay a malohemay malitengay cingra, o fanekfekay a misakafahay. Kitinian ningra i Fangcalay Cudad ihkal a mitadtad to misamaanay hano ira ko semsem, pacaˈof to pakayniay noka ˈorip no tamdaw a salicay ako. O nika lawidang ako aci Yihofa ˈangongol ˈangongolayto, matongal matongalay ko nika pakasoˈlin to olah no Kawas.

ˈAyaw no malahci ko lalood i, paro no lomaˈ niyam marariday a micawmaˈ to Misawacayay Tamdaw ni Yihofa. Isaka 1943 miheca saka 8 folad, faˈinayan salikaka ci Hosay Nikolas Minet tayniay i nociw niyam a mikimad, ikor milicayay cingra: “Cima ko ciharatengay a mipaputisem?” Pakamayay ko wama, kako i, pakamayay. Oranto itiniay i ngata no nociw a mimingay ˈalo a mipaputisem kami.

Isaka 1944 miheca saka 12 folad, sofitay no Towic itiniay i sakaetip a milood. Tona mingataay to nociw niyam kora kitiraan, mansa ceca:yay a folad kami milimek i laeno no lomaˈ. Cecay romiˈad, talapotalay kako pakaen to kolong. Talifahal sanay makowang ko nociw, mafalikowatay a maefer ko fadahong no lomaˈ. Iraay ko cecay sofitay no Padaka mingataay toya pakolongan. Celiˈ sanay cingra pasowal takowanan: “Ka pihinefa!” Ci:kay sato kako i raringid ningra mihinefa, oranto pakafong han ningra kako to kafong ningra.

Ikor no lalood, marariday kami macacawmaˈ to cecay kasakopang no Liele, onini a kasakopang i sakaˈamisay no niyaroˈ niyam to 90 kongli ko raay. Caho ka halafin, itiniayto kami i Pasetong patireng to cecay kasakapot. Misatapangay kako matayal to milisataay a tayal, minanamayho tono holic a demak, ikor matayalay i hoing. Isaka 1951 miheca, iraay ko mimingay a kasakilac taykay niyam i Pasetong, maedeng 100 ko mirienangay. Ilalomaˈ iraay ko cecay fanekfekay a misakafahay fafahiyan salikaka, ci Ayli Letay ko ngangan, pakacitingsiyaay cingra to 50 kongli tayni a mirienang to taykay. Kalikiay  kami makakaolah, mikikongayto kami. Itiya macadaay ni Ayli ko satahidang no Kiliyat a Picudadan, tona mikikongayto kami, milalangan ningra konini satahidang, patikami to Congpo mitadtad tora lalangian. O faˈinayan salikaka ci Nolo ko kakeridan i Congpo itiya, tada dihekoay ko sapacaˈof tikami ningra, alatek ano hacowato kiso ato faˈinay malacafay a mirienang to Kiliyat a Picudadan sanay. Isaka 1953 miheca saka 2 folad, mararamodayto kami.

Toya mihecaan, kako aci Ayli tayraay kami i Niwyok no Padaka, mirienang to “Faelohay a Hekal” sanay a taykay i Yanki Ontociw. Itira malitemohay niyam ko cecay faˈinayan salikaka, misiwkayay cingra to cecay ngaˈayay katayalan, pakalalok takowanan malinah tayra i Padaka. Pakayni tonini a demak mitolonay kami ci Yihofaan, ikor milalangan niyam konini satahidang, minokayto tayra i Pasetong no Pilis mipadang toya moetepay ko mitosilay a kasakapot. Tocila a miheca, ciwawaayto kami to cecay faˈinayan wawa, ci Serki hananay a pangangan cingra, ˈarawhan ikor no 7 a folad mapatayay ci Serki to nika adada. Onini tada mararomay kami, tolonen niyam ci Yihofa pasowal to rarom no falocoˈ. Pakayniay i hatokel no patikolay maˈorip a milifok kami to sasayar.

Isaka 1961 miheca saka 10 folad, mahelaay ako ko cecay tayal ngangaˈay kako mala misakafahay. Kawra toya romiˈad, macadaay ako ko tingwa no sikawdan no fenpo, milicay takowanan ngaˈay kako malo kasakilac kantok hokira. Licayen ako cingra: “Ngaˈay kako misakafahho to cecay a laliyadan, ngaˈ micada tonini ˈinorong han?” Mihayiay ko fenpo. Faloay folad kami misakafah, ikorto isaka 1962 miheca saka 9 folad misatapang to milisoˈay to kasakilac a tayal.

Malo kasakilac kantok kami to ikor no tosa miheca, matahidangay tayra i Polosaye a Pitil. Naitini saka 1964 miheca saka 10 folad misatapang, itiniay kami matayal, adihayay ko malifokay niyam a sapalemed. Isaka 1965 miheca, milisoˈay ko salikaka ci Nolo to fenpo no Pilis, cowa ka harateng ikor nora mapanilnilay kako malo sikawdan no fenpo. Ikorto i, kako aci Ayli matahidangay kami mirienang to saka 41 a liyad i Kiliyat Picudadan. ˈAyaw no 13 miheca a sowal no salikaka ci Nolo hato malaˈosiayto! Micudiyapto kami patikolay tayni i fenpo no Pilis.

Halafinay a mihecaan, mahemekay kako misaka dademak to sifanaˈ pakayni no holican, midama to finawlan no Kawas itini i Iwropa ato romaroma kakilacan ira ko pasalat midoko to Kawas. (Filipi 1:7) Mansa, misiˈayaway kako to mataˈlifay ko 55 tapang no kitakit, itini tonini a kakitakitan, makecengay ko mitosilay a tayal ita. Ano misiwkay kako to niyahan i, cowa ka pasowalen cangra to nalifetan ako tono holic, ao “sikawdan no Kawas” kako hananay ako pasowal, samanen mafanaˈay kako ‘o falocoˈ no hongti [anca o hankang] hatiraay o nanom i kamay ni Yihofa, talacowa ko rakat no nanom mitooray to harateng no Kawas.’—Taneng 21:1.

Kinacecayay masasoˈaraw kako to cecay kiing no Iwropa, oya nalifetan cowa ka matawal ako. Kinapinapinaay kako i ˈayaw misaali to sakasasoˈarawaw  cingranan, anini sa mihaiyay cingra. Sowal sa cingra: “Pafelien ako kiso to 5 ehon aca, cowa ka ngaˈay mataˈlif to 1 ehon.” Oranto i, miˈicekoyay kako a mitolon. Marawraway cingra, milicay to mimaanay kako. Caˈa sanay kako a pasowal: “Miakoˈiday kako to Kawas, samanen o sikawdan Ningra kiso.” Milicay cingra: “O manan ko tatodong nora?” Paˈaraw han ako to Loma 13:4 a sinael. O Kristokiyo cingra, onini a sinael mikidatay to harateng ningra. Telocto i? Kalitosaay a tatokian kami a masasowal, tada malaˈosiay konini noka masasoˈaraw niyam, somowal to masemeray cingra to tayal no mita.

Pina:ay a miheca, itini no pasataay demak, o fadangalan midipot to wawa, misatenokay a saaroˈan no Krisciyang ato romaroma a demakan, finawlan ni Yihofa itini i Iwropa adihayay ko malowiday no holican a demak, mahemekay kako mirienang to adihayay no holican a demak, pakaˈaraw to samaanay ci Yihofa padama kitaanan pakalowid. Kalipahakan i, itini i Hoing no Iwropa malowiday no Misawacayay Tamdaw ni Yihofa ko mataˈlifay ko 140 demak!

Itini saka 1990 a lalintadan, makecengay ko mitosilay tayal ita itini i Kiwpa. To sapadamaaw to salikaka i Kiwpa milowid to pasalat itini i midokoay a demak, kako ato naitiniay i Congpo faˈinayan salikaka ci Filipo Polemli, ato naitiniay i Itali a Waete Faeniti faˈinayan salikaka malacafay kami dademak. Tona mikecengan no Kiwpa sifo ko mitosilay demak ita, tada ciharatengay kako sapipalahdawaw to nika raraw nangra a minengneng kitaanan. Patikami hananay ako ko katayalan no Kiwpa kitakit i Pilis, ikor ngaˈayayto a masasoˈaraw to cecay a tapang. Kawra ono isaˈayaway noka sasowal awaay ko manan a epocan.

Mitolon kami to sakayat ni Yihofa ikor, misaalian ko sifo no Kiwpa mihayda tamiyanan micoloˈ to 5000 Fangcalay Cudad patayni i Kiwpa. Onini Fangcalay Cudad mapatayniayto i Kiwpa, mapalilamayto i kamay no salikaka. Mahapinangay niyam to malifokay ko sapalemed ni Yihofa to nika pisaˈicel niyam, oranto i, miliyaw haca kami misingsi to 27,500 a Fangcalay Cudad pacomod i Kiwpa. Mahaydaay konini pisingsi. Padamaay to kanonoˈan salikaka i Kiwpa ira kono niyah a Fangcalay Cudad, tada lipahakay kako.

Toha sapadamaaw to salikaka i Kiwpa milowid tono holican a fadangalan, kinapinaay kako tayra i Kiwpa. Itini tonini laliyadan, mapatirengay ako ko ngaˈayay kalalaˈed ato ˈalomanay tapang no sifo.

Isaka 1994 miheca i Rowanta mafekaday ko katalawan a kasasongtol no finacadan, mataˈlifay ko  80 ˈofad a tamdaw to mipatayan, kaadayayan o romaroma salikaka mapatayay. Tangsolay, mapanilnil ko papina salikaka, tayra milimasmas to mipadangay a tayal.

Kako ato papina faˈinayan salikaka tangasa i Kikali i, maˈaraway ko katayalan no mihongyakay ato pitelian to cudad a soko adihayay ko makowangay no timeraˈ. Matengilay niyam ko ˈalomanay a salikaka mitapaˈan a mipatay, tada masomaday kami. Nikawrira, matengilay niyam ko kasemeran a maolahay a demak no ˈalomanay a salikaka. Tinakoen, ira ko cecay ngasaw no Tosi salikaka pasowal tamiyanan, madipotay no cecay Hutu ngasaw a Misawacayay Tamdaw ni Yihofa cingra, itiniay i dihidihifan milimek to 28 romiˈad. Kinacecayay, masasoˈaraway kami to 900 a salikaka itini i Kikali, itiya i, misaˈicelay kami mikowad ato mihinom cangranan.

Itiniay i Cail (o Kangko hananay anini) itini ngata no Koma iraay ko pipanikiran to mapadesay, matengilay a sowal ˈalomanay ko Rowanta a salikaka milaliw tayra sanay, oranto i, tayraay kami i Cail. Awaay mahela niyam ko salikaka, mitolonay kami ci Yihofaan mikayat tamiyanan. Ikorto i, iraay ko cecay tamdaw pasayni tamiyanan a romakat, licay han maˈaraway ningra ko Misawacayay Tamdaw ni Yihofa hokira, pasowal cingra: “O Misawacayay Tamdaw kako” sanay. Pasowalayho cingra: “Keriden ako kamo masasoˈaraw to iing no mipadangay to mapadesay a salikaka.” Tada lipahakay kami maˈaraw kora iing no mipadangay to mapadesay a salikaka. Oranto i, masasoˈaraway kami to maedeng 1,600 milaliway tayra a salikaka, misaˈicelan niyam a pakalalok ato mihinom cangra. ˈOsian niyam ko cecay naitiniay i Malohemay Malitengay i Congpo a tikami, sanay ko sowal no tikami: “Marariday kami patado tamowanan a mitolon, pakasoˈlinay kami to co:wa ko fafalahen ni Yihofa kamo.” Matengil no salikaka konini a sowal i, tada masemeray ko falocoˈ. Soˈlinayto co:wa ka falahen ni Yihofa cangra! Anini, itini Rowanta mataˈlifayto ko 3 ˈofad a salikaka, lipahakay cangra matayal saki Yihofaan!

Mararamod maedeng 58 miheca ikor, itini 2011 miheca mapatayay ko kaolahan ako a fafahi. Mitolonay kako ci Yihofaan pasowal to roray no falocoˈ ako, milifokayto to sahinom Ningra. Roma i, padadotocay kako patenak to ngaˈayay lihaf no Hongti Kitakit i tamdaw, pafeliay konini takowanan to taˈangayay a ˈicel.

Soˈlin 90 ko mihecaan ako nohatini, to lipalipayan mirienangayho kako to mitosilay a demak. Mahemakay ko falocoˈ ako midama to Holic a Kapot i Pilis a fenpo, paladaˈ to nalifetan ako i cangranan, hanaca misimaway a milisoˈ kako to Pitil a kaemangay salikaka.

Maedeng ˈayaw no 84 mihecaan, itiyaay kako sakinacecay a mitolon ci Yihofaan. Ikor nora padadotocay kako miingid ci Yihofaan, hakelong no kaˈorip ako tada kadofahay marenecay ko falocoˈ. Itini hakelong no kaˈorip ako, ci Yihofa padadotocay a midohinga mitengil to satolon no mako, pakayni toninian tada tangongolay ko piakoˈid ako Cingranan.—ˈOlic 66:19. b