Salicay no Miˈosiay Tamdaw
Pakayni ˈOlic 12:7, o roma pihongyak patalahkalay o midipotan ni Yihofa i, o ‘kimad ni Yihofa’ (saka 6 sinael) sanay. Nikawrira o Pihongyak no Faelohay Hekal a Fangcalay Cudad o ‘masamsamay a tamdaw’ (saka 5 sinael) ko midipotan ni Yihofa sanay, hano hatira hani?
Ano nengnengen ko ifafekangay ato ilaenoay a sinael, o tamdaw ko misowalan itini.
Itini ˈOlic 12:1-4, ‘o madimadiay a tamdaw malahdawayto itini hekal’ sanay. Ikor i, ˈOlic 12:5-7 sanay ko sowal:
‘Sowal ni Yihofa: “Mapaekelay ko masamsamay a tamdaw,
cedaˈahay ko manikaway a tamdaw,
mansa o lalidongen Ako cangra,
cowa ko papakihateren ko tamdaw a misakahmaw cangranan” sanay.
Makoracay ko kimad ni Yihofa,
matiya o piˈolac to linkim i namal, kinapitoay a miˈolac.
Yihofaaw, o sasimawen Iso cangra;
o dadipoten Iso ko kahacecay nangra, padama midaˈoc a miliyas tonini hekal a tamdaw.’
Saka 5 sinael somowalay to midemakan ni Yihofa to saki masamsamay a tamdaw, tatodong i: O lalidongen no Kawas cangra.
Saka 6 sinael ora ‘makoracay ko kimad ni Yihofa,’ matiraay o ‘miˈolacan a linkim’ sanay. Mikifalocoˈay kita mihayi tonini a sowal.—ˈOlic 18:30; 119:140.
Nohatini nengnengen ita ko ˈOlic 12:7, sanay ko sowal no sinael: ‘Yihofaaw, o sasimawen Iso cangra, o dadipoten Iso ko kahacecay nangra, padama cangranan midaˈoc a miliyas tonini hekal a tamdaw.’ ‘Sasimawen iso cangra’ sa i, o manan ko mitoroˈan hani?
Samanen saka 6 sinael somowalay isawni to ‘kimad ni Yihofa,’ mansa o roma tamdaw miharateng, saka 7 sinael mitoroˈay to sasimawen ni Yihofa ko kimad no Niyah sanay. Manaokaniw, padadotocay ko Kawas a misimaw to kimad Ningra. Soˈliˈlin ˈalomanay tamdaw misahalakaay a mikeceng to tamdaw miˈosi to Fangcalay Cudad, mitodohayho to Fangcalay Cudad, kawra co:wa ka malaˈosi cangra.—Isaya 40:8; 1 Pitiro 1:25.
Nikawrira, o sasimawen no Kawas koya misowalan i saka 5 sinael a tamdaw. Padadotocay ci Yihofa midama ato milidong to ‘masamsamay a tamdaw’ ato ‘mapaekelay’ a tamdaw, ano ikorto i, padadotoc a mihaen to demak Cingra.—Yopu 36:15; ˈOlic 6:4; 31:1, 2; 54:7; 145:20.
Ano hatiraay i, isaka 7 sinael, ora misimawan ni Yihofa o ‘kimad ni Yihofa’ anoca o ‘masamsamay a tamdaw’ han?
Ano songilaˈen ita miˈosi konini ˈolic i, mamafanaˈ o ‘masamsamay a tamdaw’ ko mitoroˈan i saka 7 sinael.
Satapangan no saka 12 fedengan no ˈOlic somowalay to ‘madimadiay tamdaw’ masaˈfitay no mariˈangay tamdaw cangra. Dotoc no sinael, o papalaˈafoen ni Yihofa koya kasimaanay misaka dademak to sema a tamdaw. Papasoˈlinen ita, o papaˈadingen a milidong ko finawlan no Mako sa ci Yihofa i, o mamatoor Ningra ko misowalan no Niyah, samanen o sowal Ningra co:wa ka pisamangah.
Mankora, saka 7 sinael somowalay to sasimawen ni Yihofa ‘cangra,’ mitoroˈan i, o sasimawen koya mapaekelay no mariˈangay a tamdaw.
Isaka 7 sinael, Hipray sowal a Masola cudad ‘cangra’ sanay itini. Mihongyakan no 70 Tamdaw kinatosaay a misaka dademak to ‘kita’ sanay, mitoroˈ tora fafekangay a ‘masamsamay’ a tamdaw ato ‘mapaekelay’ a madimadiay a tamdaw. Roma i, saka 7 sinael sanay ko sowal, o dadipoten ni Yihofa ko ‘kahacecay’ madimadiay a tamdaw, padama cangranan ‘miliyas tonini hekal a tamdaw,’ tatodong i, miliyas toya ‘micowatay to masiferangay a demak’ a tatiihay tamdaw. (ˈOlic 12:7, 8) I cecay Hipray sowal a Fangcalay Cudad sano Alami Sowal a Mihongyakan itini saka 7 sinael: ‘Tapangaw, o dadipoten Iso ko moecelay ko falocoˈ a tamdaw, misimaw cangranan, tahadaˈoc a caka madokaˈ no mariˈangay hekal a tamdaw.’ O pihongyak nonini Fangcalay Cudad misadakay to wacay, somowal to ˈOlic 12:7 cowa ko kimad no Kawas ko mitoroˈan.
Mihaenay, onini a sinael pairaay to hatokel no ‘madimadiay tamdaw,’ pakasoˈlin to papatadoen no Kawas cangra micowat to moecelay masadafdafay a demak.
