Itiniay 1934 miheca a sofocen kako, o wama wina naitiniay i Reise, ikor malinahay tayra i Kanata Antali, o Timingse hananay o pisikitangan a niyaroˈ. O wina ako itiniay i 1939 miheca misatapangay miˈosi to Mikecolay, halo mirienang to saˈopo no Misawacayay Tamdaw ni Yihofa, miˈoronganho ningra kako ato aenemay a salikaka ako maemin. Cato ka halafin i, mala Misawacayayto Tamdaw ni Yihofa cingra.

Soˈlin itiya cowa ka hemek ko wama, kawra maolahay to kimad ko wina, tanoktokay ko falocoˈ. Isaka 20 hahekalan 40 miheca, mikecengay ko Kanata to demak no Misawacayay Tamdaw ni Yihofa, kawra o wina ako cowa ka sapisawadaw to pihakelongan ningra. Soˈlin mitatoˈes ko sasowalen no wama ako, kawra sidaˈitay ko wina ako cingranan, mikangodoayho cingranan. O ngaˈayay taˈarawan no wina ako tada pakalalokay tamiyanan a malikaka, hamamidoko ci Yihofaan. Ikor palidlid sanay ko wama a mafalic, ngaˈayayto to isaˈayaway.

1950 miheca a kaciherangan, mirienangay kako itini i Niwyok “Pikowan no Kawas Macowatay” a taykay. Itini pitaykayan maˈaraway ako ko ˈalomanay naitiniay i paro no kakarayan a salikaka, matengilayho ko pilicay to micodiyapay i Kiliyat a nalifetan, mihaenay, sapitongalaw ako ko matayal saki ci Yihofaan. Toniya taykay, misaˈosiayto kako, mirienang to mieminay to toki a mitosilay a tayal, oranto i, tahalomaˈ kako, tangsolay misingsi to miceriday a misakafahay. O fenpo no Kanata pakalalokay takowanan micadato to paputisem ikor hongaˈ. Mansa, i 1950 miheca 10 folad 1 romiˈad  mipaputisemayto kako, ikor no cecay folad, misatapangay to miceriday misakafahay. Saˈayaway macorcor kako a pala i, o Kapuskasing hananay a niyaroˈ, maraayay to lomaˈ ako koniya pala.

1951 miheca a kacanglahan, papisaharateratengay ko fenpo toya mafanaˈay to sowal no Frans a salikaka, malinah tayra i Kwipik, samanen oniya pala misaaliay tono mafanaˈay to sowal no Frans a salikaka. Kaemangho kako, mafanaˈay tono Padaka ato no Frans, mansa saˈosi sanay kako a malinah tayra. Macorcoray kako tayra i Loan a niyaroˈ. Awaay ko kafanaˈan ako a tamdaw itira, o ciwsiw aca ko maametay ako. Kawra ngaˈayay ko lingad noniya demak, mala ngaˈayay a widang ako ci Masayer. Itini ikor no 4 miheca i Kwipik, mala miceriday misakafahay ato mikiriwiˈay misakafahay kako, tada o kalipahakan ako toninian a tatokian.

Itiraho i Kwipik i, mahemekay kako pakacada to satahidang no Kiliyat Picudadan, tayra i Niwyok Nanlansing a pala a mihatatanam. 1956 miheca 2 folad 12 romiˈad, mikitiniay kako i Kiliyat Picudadan micodiyap, macorcoray tayra i Kaˈetipan a Afrika, o Kana hananay a pala. b Kawra, maminokayho kako tayra i Kanata, misingsi to misaalian nangra a kato a lalakaw. Itiya caka pina lipay malahcito alatek sanay kako.

ˈArawhan i, itiniay kako i Toronto pitoay folad ko pitala ako ngaˈ malahciay koniya demak. Itini toniya tatokian i, ci Keripos a mararamoday faedetay ko falocoˈ nangra a militemoh takowanan, papikilomaˈay cangra takowanan itira, telocto i, kako ato fafahiyan wawa nangra ci Sila adihayay ko toki a malacafay. Ikor, makakaolahay kami tatosa. Sakacifafahiyaw ako ci Silaan i, ˈarawhan nai saˈayaway misingsian ako malaˈosiayto itiya. Malacafayay kami a mitolon, ikor i, cadaen ako ko sanilnil a demak i takowanan, o saˈosito niyam i malo patikami sato, nanay anoikor ngaˈay mararamod kami. Mihaen to saˈosi cowa ko madoloay, kawra mahapinangto niyam i, matatodongayto koniya pisaˈosi.

Mikalicayto kako to kasoling, mikalicay to tamina, ikor mikalicayho to hikoki, mataˈlifto ko cecay  folad, tahiraayto i Kana a Akera a niyaroˈ. Manilnilayto kako mala kasapala kantok, o lalisoˈen a kilac i mahawpay ko emin a Kana, ingataay i Ketetiwa a pala ato Toke. Maceriday kako, cecay a paonting to tosiya no fenpo a milisoˈ. Tada masemeray kako toniya tatokian itiya.

To lipalipayan, mirienangay kako to kasakilac a taykay, halo mihadak to kimad. Samanen awaay ko masaˈosiay a pitaykayan, mansa salikaka maemin tano ˈaolan a patireng ko pitaykayan, tano sarengadan ko fadahong, miˈeteng to faedet no cidal. Awaay ko palietecan to kakaenen, o salikakato i, miˈedefan nangra ko pinaloma itira, kakomaento i, mitokadanto nangra, sapafeli to mirienangay to mitaykayay a tamdaw.

Maharatengayho ako, iraay ko mifekaday a katawaan a demak. Kinacecayay, mikiriwiˈay manilnilay a mitosilay ci Hepote Cannis c salikaka, mikimad cingra i, fahal sanay mahadak ko cecay a kolong, itira i pikimadan ato mitengilay a kitiraan a misacikacikay kora kolong. Paterepay ci Hepote tora kimad ningra, cowa ka fanaˈ to tatalacowa kora kolong. Iraay ko sepat ciˈicelay a salikaka malepelay kora kolong, ikor itira tora piwaho no mirienangay i, miˈedefan patayra i cawka.

Itini tenok no pilipayan, itiraay kako i ngata no pitaykayan a niyaroˈ, mihadak to Faelohay Hekal a Demak hananay a ika. Pakafitan ako ko cecay kohcalay a kiradom i tosa a ˈaol anca i kilang, ikor pahadak torira ika. Tada maolahay ko i niyaroˈay minengneng toniya ika! Pakayni ˈalomanay tamdaw, o saˈayaway manengnengay nangra a ika koni. Manengneng nangra ko micada to paputisem i, mahemekay mipakpak to kamay. Itini toniya ika mahapinangay nangra, o makakedecay malacecay i paro no kakarayan a likakawa kita.

Itini kako i Afika a matayal maedeng tosaayto miheca ikor, mahemekay ira ko toki mirienang to 1958 miheca i Niwyok a koksay taykay. Mamalalitemoh aci Sila itira, tada mahemekay kako. Itiya o mikiriwiˈay misakafahay cingra, mikitini i Kwipik tayra a mirienang to taykay. Padadotocay kami patikami, nohatini malalitemohto kami, mararamod kita hananay ako a pasowal, hai sanayto cingra. Patikamian ako ci Nolo d salikaka, milicayay cingranan, wa ngaˈay patayraen ci Sila i Kiliyat a Picudadan, ikor patayra i Afrika malacafay kami matayal han? Mihayay ci Nolo salikaka. Ikorto  i, tayraay i Kana ci Sila. 1959 miheca 10 folad 3 romiˈad, itiniay kami i Akera a mararamod. Paisalakaten niyam ci Yihofa itini nokaˈorip, tada matanamay to sapalemed Ningra.

1961 miheca, manilnilay kami tayra i Komayrong. Papipadamaay ko salikaka takowanan to patirengay to faelohay fenpo a tayal, mansa ˈifowaay kako. Saˈayawayho ako koni mala sikawdan no fenpo, adihayayho ko hatatanamen ako a demak. 1965 miheca, mapoyapoyay ci Sila. Soˈlinay i, cecayayho liyad ngaˈ, micadaay kami to mala wama winaay. Kawra, pakayni toniya faelohay ˈinorong lipahakay kami, halo misaˈosi to hamaminokay tayra i Kanata i, mifekaday ko cecay kaadayayan a demak.

Kaadayayan i, matapayay i tiyad ni Sila ko wawa, fanaˈen no ising kami o faˈinayan a wawa cingra. Soˈlin mataˈlifayto ko 50 miheca, cowa ka tawal niyam koniya demak. Soˈlin mararomayto kami, kawra kamayan padadotoc a materek i kaolahan niyam a milakowitay to riyar a tayal.

I Komayrong a salikaka maceriday pakayni misatenokay a demak a micada to saroero, oniya demak pakidemay itini i misingkiway to saˈakawangay a ˈaˈideman. 1970 miheca 5 folad 13 romiˈad, kalacalemceman niyam a demak mifekadayto: Makecengayto no sifo ko demak no Misawacayay Tamdaw ni Yihofa. Maalaay no sifo ko faelohay fenpo, ˈayaw no lima a folad, linah sanayho kami toniya makapahay a pala. Caka cecay a lipay i, kako aci Sila ato emin a mikiriwiˈay manilnil a mitosilay, sahtoay a malaplap i Komayrong. Miliyas to salikaka tada mararomay kami, samanen maolahay kami cangranan, calemcemay to samaanto ko hanoikor nangra.

Dotocto enem a folad, itiniay kami i fenpo no Frans to cecay a liyad. Itiya, misaˈicelay padadotoc kako midimokos to Komayrong a salikaka. Toya miheca 12 folad, macorcoray kami tayra i Nayciliya a fenpo, itiya misatapangay ko Nayciliya fenpo mikayat to mitosilay a tayal i Komayrong. Mahemekay ko itiraay a salikaka militemoh tamiyanan, mahemekayto kami itira a matayal to pina miheca.

I 1973 miheca, midemakay kami to cecay pasangaray a saˈosi. Halafinayto a tatokian, cowa ka ngaˈay ko tireng ni Sila. Mirienangay kami i kasapala taykay i Niwyok, fahal sa tomangic cingra, sanay takowanan: “Cowato ka tomeseng kako! Cinarorayan kako, cowa ka tanoktok ko tireng.” Kako aci Sila i Kaetipan no Afrika matayal mataˈlifay ko 14 miheca, misaˈicelay padadotoc madimadi to tayal niyam. Tada malikoay kako cingranan, kawra, nohatini mamisalof kami. Misongilaˈ kami a malalengo, mingitangit a mitolon, saˈosian niyam minokay tayra i Kanata, ho ngaˈay madipot ci Sila. Miliyas to mikiriwiˈay manilnil mitosilay a tayal, pahanhan to mieminay to toki a dademakay, tada o pasangaray kaadayayan a saˈosi no hakelong no ˈorip niyam koni.

Minokay tayra i Kanata ikor, itini i widang makilimay ako ko katayalan, i kaˈamisay no Toronto a mimingay niyaroˈ cingra pacakayay to tosiya. Miesoyay kami to cecay a lomaˈ, miˈaca to matelangay  a lalosidan, ngaˈayay ko kalinah niyam, awaay ko maamaan a kiyam. Sapirenecaw kami to kantangay a kaˈorip, samanen sapiliyawaw kami mirienang to mieminay to toki a tayal no Kawas. ˈArawhan, kahnayay malaˈosi koniya demak!

O likakawa misatapang patireng to pitaykayan i Antali a Nowal, Pieneman no lipalipay tayraay kako padama. Ikor, matahidangay kako mala kantok no pitaykayan. Tanoktokayto ko tireng ni Sila, wa ngaˈayto kami micada toniya faelohay a tayal. I 1974 miheca saka 6 folad, malinahay kami tayra i katihi no pitaykayan a lomaˈ. Ngaˈay miliyaw to mieminay to toki a tayal, tada mahemekay kami!

Ikor, tanoktok talifakayto ko tireng ni Sila. Ikor no tosa miheca, macorcoray kami mala kasakilac kantok. Milisoˈan niyam a kilac itiniay i Kanata a Manitopa a pala, tada lietecay ko kasienawan itira, kawra macadaay niyam ko dihkoay a olah no salikaka. Mananamay ita, icowa ko kadademakan cowa ko masakalimlaan, o masakalimlaan i, ano icowato a pala i, padadotoc a maladademakay ni Yihofa.

Midemak to milisoˈay a tayal ikor no pina miheca, itini 1978 miheca matahidangay kami tayra i fenpo no Kanata. Caka halafin i, malitemohay ko cowa ko kahemekan a demak, mikitini mananamay ako ko masakalimlaan a kimad. Itini i Montere mikiriwiˈay a saˈopo, macorcoray kako tano Frans a sowal mikimad to 90 ehon. Kawra cowa ka ngaˈay ko kimad, cowa ka pisamacay ko mitengilay, orato mirikecay ko kapot no mitosilay a salikaka takowanan. Soˈlin, cowa ko tadamaanay a mikimaday caho ka cipinang kako itiya. Nohatini, mafanaˈayto kako. Kasasowal niyam itiya cowa ka hemek. Tada maketeray kako, maawiday cingra, cowa ka pakalalok takowanan. Kawra, cowa ko mamahaen ko harateng ako, cowa ka ngaˈay kako misalalangian to pirikec a pakayraan, ato pinengneng ako to salikaka, a misaˈosi to hamamicada to sapirikec ningra.

Mataˈlif ko pina romiˈad, o Iing no Fenpo a salikaka milengoay takowanan. Mihayay kako cowa ka ngaˈay ko waywayan ako, miliˈayay kako. Ikor tayraay kako toya mirikecay takowanan a salikaka miliˈay, sidaˈitay cingra misodod takowanan. Pakayni misapoeneray, mikitini toniya demak mananamay ako ko masakalimlaan a kimad, cowa ko mamatawal ako. (Taneng 16:18) Ikor, kinapinaay kako mitolon ci Yihofaan toniya demak, halo misetek to falocoˈ cowa ka misakahmaw to sarikec.

Nohatini, mataˈlifayto ko 40 miheca kako itini fenpo no Kanata, mikitini 1985 miheca malikoay kako i Iing no Fenpo a matayal. 2021 miheca saka 2 folad, mapatayay ko kanonoˈan a fafahi ako ci Sila. Tada mararomay kako to nika patay ningra, roma i, misiˈayawho kako to adada no tireng. Kawra padadotocay kako ˈifowa to demak ni Yihofa, pafeliay to sakalipahak ako koni, han sanayto a mataˈlif ko kararoman ako a romiˈad. (Patnakay 5:20) I hakelong no ˈorip ako milifetay to adihayay pasangar, kawra macadaay ako a lipahak ikakaay to pasangar. Paisalakatan no kaˈorip ako ko midokoay ci Yihofaan, 70 miheca mieminay to toki matayal saki Cingranan, tada masaloay mahemekay kako. Nanay o kaemangay salikaka wa ngaˈay padadotoc paisalakaten ci Yihofa i nokaˈorip no niyah, samanen pakasoˈlinay kako, edengan midoko ci Yihofaan ngaˈ, ngaˈay mahemek marenec ko kaˈorip.