LALENGOEN LALAKAW 39
RADIW 125 Rahekeray ko Siniˈadaay Tamdaw
Mikitini Hinapaladaˈay Milifok to Taˈangayay a Hemek
‘O paladaˈay ikakaay ko hemek to milayapay.’—DMAK 20:35.
KALIMLAAN NO LALAKAW
Minanam to sasamaan paladaˈ ato sasamaan mikitini hinapaladaˈay milifok to taˈangayay a hemek.
1-2. Wa malifok kita i pipaladaˈ to taˈangayay a hemek, o manan ko epoc hani?
ANO macada ko sapatelong no tao i, wa mahemek kita, mansa o micadaay pairaay to sakalipahak. Kawra, mikitini hinapaladaˈay wa milifok kita to ikakaay a sakalipahak, samanen misangaˈ ci Yihofa kitaanan i, pafelian kita to mikiriwiˈay a ˈicel. (Dmak 20:35) Mihaen ko pisangaˈ ni Yihofa kitanan, oha sakaciepoc no mita. Hano mahaen ko sowal hani?
2 Pakayni pihalaka misangaˈ to tamdaw, pairaan ni Yihofa ko hasakarenecaw a rihaked no mita. Mansa, ano macerid hinapaladaˈ wa mangalef ko hemek ita. Masemeran nanay kiso han?—ˈOlic 139:14.
3. Hano o ‘mahemekay a Kawas’ ci Yihofa han hani?
3 Paladaˈay pairaay to hemek sanay ko Fangcalay Cudad, pakacipinangay kitanan to o ‘mahemekay a Kawas’ ci Yihofa. (1 Timoti 1:11) O isalakatay a paladaˈay Cingra, o hinapaladaˈay a Kawas. Mahecad to sowal no tarokos ci Pawlo, ‘ira ko ˈorip ita, materek a maˈorip, misaaliay Cingranan.’ (Dmak 17:28) Mansa, ‘o masakenakenaay makapahay a sapatelong, malefotay a sapalemed’ mikitiniay ci Yihofaan.—Yakop 1:17.
4. Sasamaan ko demak ita ngaˈ milifok to hemek hani?
4 Mikitini hinapaladaˈay sapilifokaw kita to taˈangayay a hemek. Sakalaˈosiaw toniya patosokan, todongen ita ko ngaˈayay taˈarawan ni Yihofa. (Ifiso 5:1) Oniya lalakaw mamilengo, i pipaladaˈ patirengay ci Yihofa to manan makapahay taˈarawan. Wa mananamho ita, ano cowa piakoˈid ko tao to sapaladaˈ ita, sasamaan ko pidemak. Sakadademaken ko sapaini noniya lalakaw, wa padama kitanan padadotoc makalim a paladaˈ, milifok to taˈangayay a hemek.
MAHECAD CI YIHOFAAN A HINAPALADAˈ
5. Pafelian ni Yihofa kita to manan a sakaˈorip a dafong hani?
5 Samaanay ci Yihofa paihkal to hinapaladaˈay hani? Nengnengen ita ko pina tinakoan. Pafelian ni Yihofa kita to sakaˈorip a dafong. Alatek cowa ka cihafay ko kaˈorip ita, kawra i pidipot ni Yihofa, iraayto ko hasakaˈorip a dafong no ˈalomanay tamdaw. Tinakoen, iraay ko hacaˈedong ita, ato kakaenen, hakitiraan. (ˈOlic 4:8; Matay 6:31-33; 1 Timoti 6:6-8) Pidipot ni Yihofa to kaˈorip ita, o ˈinorong aca ni Yihofa sanay han? Cowa. Hano mihaen ko demak Ningra hani?
6. I Matay 6:25, 26 o manan ko mananamay ita?
6 Kantangen ko sowal, o pidipot ni Yihofa to kaˈorip ita nao olah Ningra kitanan. Nengnengen ita ko sowal ni Yis i Matay 6:25, 26. (ˈOsien.) Pakaynian ni Yis i masangaˈay a kihcod pakafanaˈ ko nisawawaan, sanay: ‘Cowa pikosam, cowa pilitod, cowa pihoped to kakaenen i ˈalili ko ˈayam.’ Kawra dotoc a sowal ningra: ‘Paˈoripanho no kakarayan Wama camira, kamo i, coko mikikakaay to maeferay ˈayam ko nika masakalimlaan saw?’ Mahapinangay ita ko sowal ni Yis, i pinengneng ni Yihofa, madimadiay midoko Cingranan a tamdaw mikikakaay ko kalimla to pinaˈorip. Cowa ka hecad to pinaˈorip, o paro no lomaˈ no kakarayan a Wama ci Yihofa kita, mansa mikifalocoˈay ci Yihofa a midipot kitanan.—ˈOlic 145:16; Matay 6:32.
7. I masamaanay a pakayraan mitodong kita ci Yihofaan hinapaladaˈ to tamdaw? (Nengnengen ko coka.)
7 Malecad ci Yihofaan, ngaˈay kita ciolah a paladaˈ to sakaˈorip a dafong to tao. Tinakoen, mafanaˈay kiso to cima ko cisaaliay to kakaenen ato cacaˈedongen i kasakopang han? Pakaynian ni Yihofa tisowanan a padama cingra. O finawlan ni Yihofa makalimay i kapasangaran a padama to tao. Tinakoen, i kalifongan no 2019 miheca, hinapaladaˈay ko salikaka padama to cisaaliay to kakaenen, rikoˈ ato roma sapadama a dafong. Roma i, ˈalomanay salikaka tano sapakiyaho midama to tayal i polong no hekal. O sapakiyaho nangra malaˈosiay ko padamaay to tahapadesay a tayal. Paihkalay cangra to sowal i Hipray 13:16: ‘Aka mapawan to ngaˈayay demak ato paladaˈay, samanen maolahay ko Kawas to hatiniay a sapatoˈaya.’
Kita o cecacecay tamdaw ngangaˈay todongen ko taˈarawan ni Yihofa (Nengnengen ko saka 7 fatac)
8. O pafeliay a ˈicel ni Yihofa pairaay to manan sakaciepoc no mita? (Filipi 2:13)
8 Pafelian ni Yihofa kita to ˈicel. Awaay ko tolas no ˈicel ni Yihofa, makalimay pafeli to ˈicel i madimadiay midoko Cingranan a tamdaw. (ˈOsien ko Filipi 2:13.) Na micangacangay kiso to sapafeli ni Yihofa a ˈicel, ho micoˈay to sakayhid anca mihadidi to karorayan han? Micangacangay kiso to sapadama ni Yihofa ho ciˈicel, eca ka lonay ko tireng pakaemem to cecay romiˈad han? Ano pacaˈof ci Yihofa to satolon iso i, wa malecad kiso to tarokos ci Pawloan, sanay cingra: ‘Mitadiˈecay kako toya pafeliay to ˈicel a Tatapangan, maremoay ko kihcod a demak.’—Filipi 4:13.
9. Sasamaan kita mitodong ci Yihofaan hinapaladaˈ misakadademak to ˈicel no niyah? (Nengnengen ko coka.)
9 Cowa ka hecad kita ci Yihofaan awa ko tolas no ˈicel, cowa ka ngaˈay paladaˈ to ˈicel no niyah i tao, kawra wa ngaˈay kita mitodong ci Yihofaan, hinapaladaˈ misakadademak to ˈicel padama to tao. Tinakoen, padama to malitengay anca ciadadaay a salikaka. Ano ngaˈay i, padama to miasikay ato misafaeloh to Kasaˈopoan a tayal. Mihaen kita misakadademak to ˈicel no niyah i, wa pakaciepoc to ˈalomanay midokoay ci Yihofaan a tamdaw.
Wa ngaˈay sakadademaken ko ˈicel ita padama to tamdaw (Nengnengen ko saka 9 fatac)
10. Sasamaan kita misakadademak to sasowalen a ˈicel padama to tao?
10 Roma i, aka matawal o sasowalen iso taˈangayay ko ˈicel. Iraay ko kafanaˈan iso to papakahemeken hahinomen a salikaka han? Ngaˈay talaˈayawen kilimen iso cingra han? Anca lisoˈen iso, patingwaen, patikamien, tano soci a palihaf cingra. Cowa pisaali to sasamaanen ko hasowal, o mikifalocoˈ a sasowalen alatek o saali no salikaka. Mihaen wa padama cingranan padadotoc madimadi ci Yihofaan, alatek wa tawlik ko pinengneng to pakayraan no niyah.—Taneng 12:25; Ifiso 4:29.
11. Samaanay ci Yihofa paladaˈ to taneng Ningra?
11 Pafelian ni Yihofa kita to taneng. O sowal no nisawawaan ci Yakop sanay: ‘Ano cima namo ko cangoˈotay to taneng, padadotocen a micangacang ko Kawas, wa malifok ko taneng, samanen hinapaladaˈay ko Kawas to kahacecay tamdaw, hanaca cowa pikilim to raraw.’ (Yakop 1:5 ato roma pihongyak.) Paihkalay koniya sowal, cowa pihimed to taneng ci Yihofa, hinapaladaˈay to tamdamdaw. Sinanoten hena, pafeli ci Yihofa to taneng i tamdaw i, cowa ‘pikilim to raraw’ anca ‘mirikec to tamdaw.’ Misaali kita to sakayat Ningra i, awaay ko kapo namo cowa ka saan ci Yihofa a minengneng. Pakalalokay kitanan, tawlik a micangacang Cingranan to taneng.—Taneng 2:1-6.
12. Ihacowa kita paladaˈ to mananamay a taneng no niyah i taowanan hani?
12 Wa ngaˈay todongen ita ci Yihofa paladaˈ to mananamay a taneng to tao han? (ˈOlic 32:8) Adihayay ko hapakayraan no finawlan ni Yihofa mihaen to demak. Tinakoen, padamaen ita ko faelohay a salikaka pacakat to pakafanaˈay a inaneng. Mihadidi ko malohemay malitengay padama to dama sikawdan ato roma mipaputisemay a faˈinayan salikaka, pakafanaˈ cangranan samaan a misaysay to tayal no kasakopang. Roma i, mirienang to patirengay ato misafaelohay a tayal no likakawa no Kawas i, kadofahay ko nalifetan a salikaka papadama to faelohay mirienangay to tayal a tamdaw.
13. Pahatatanam to tao i, sasamaan kita mitodong to waywayan ni Yihofa?
13 I pipahatatanam to tao i, wa todongen ita ko waywayan ni Yihofa. Maharatengayho iso han? Paladaˈ ci Yihofa to taneng i, hinapaladaˈay ko falocoˈ. Malecadayto, cowa ka ˈidi kita paladaˈ to kafanaˈan ato nalifetan. Cowa ka talaw to hamamakotay no tao eca ka pakafanaˈ to tamdaw, cowa piharateng to: “Awaay ko pakafanaˈay takowanan isalakat! Pakonira han a minanam.” O finawlan ni Yihofa cowa ka ngaˈay ira ko mahaenay a harateng. Wa makalim kita paladaˈ to kafanaˈan, a pakafanaˈ to kihcod a nalifetan no niyah. (1 Tisalonika 2:8) Nanay, anoikor ‘wa tawlik cangra pakafanaˈ to nalifetan no niyah i tao.’ (2 Timoti 2:1, 2) Mihaen, hinapaladaˈay a capeling wa padadotoc i likakawa no Kawas, o kahacecay a tamdaw wa makalim hinapaladaˈ to taneng, a milifok to hemek.
COWA PIAKOˈID KO TAO KITANAN SA KO HARATENG I
14. Hinapaladaˈ kita micada to tao, samaanay ko harateng nangra?
14 Ano hinapaladaˈ kita to tao, ano o salikakato i, ˈalomanay ko miakoˈiday. Alatek sano tikami anca roma pakayraan paihkal to miakoˈiday. (Kolosay 3:15) Macada ko mahaenay a sapacaˈof, mahemekan nanay.
15. Ano caka piakoˈid ko tao, o manan ko haharatengen ita hani?
15 Kawra, cowa ka piakoˈid ko tao kitanan nolatekay. Adihayay ko mapalakay a toki, ˈicel ato payci, ikor wa saan ko harateng, cowa pikihar cingra to sapadama ita hokira. Ano mahaenay i, sasamaan ko demak ngaˈ caka fasaw ko hemek no niyah a maketer han? Haratengen ko sinael noniya lalakaw i Dmak 20:35. Haratengen, o hemek no hinapaladaˈay cowa pilingat to harateng no tao. Ano cato ka piakoˈid ko tao i kitanan, wa kamayan kita mahemek a paladaˈ. Sasamaan ko demak hani? Nengnengen ko pina a pakayraan.
16. Ano paladaˈ i, o manan ko sasakaretengen no mita?
16 Misarocod mitodong ci Yihofaan. Ano cato piakoˈid ko tamdaw ci Yihofaan, kamayan Cingra pafeli to makapahay a dafong to tamdaw. (Matay 5:43-48) Mikiˈokay ci Yihofa, ano paladaˈ kita ‘eca ka piharateng to sapatikolaw’ no tao, wa ‘milifok to kadofahay a sapalifon.’ (Luka 6:35) ‘Eca ka piharateng to sapatikolaw’ kita, mahawpay ko piakoˈid no tao. Ano cato piakoˈid ko tao, ‘mahemek kita a paladaˈ’ i, makalim mihaen to demak, wa palifonen ni Yihofa kita.—2 Korinto 9:7; Taneng 19:17.
17. O manan ko papadama kitanan i pipaladaˈ ira ko matatodongay a waywayan? (Luka 14:12-14)
17 O sowal ni Yis i Luka 14:12-14, (ˈosien.) padamaay kitanan ira ko matatodongay a waywayan hinapaladaˈ. Manaokaniw, pasayra toya ngangaˈay pacoˈayay kitanan a tamdaw paihkal to hinapaladaˈay cowa ko mararaway. Kawra ano mahapinang ita, mitalaay to piakoˈid no tao a harateng no niyah i, wa misamaan ko demak hani? Tanamen ko sapaini ni Yis, mipiliˈ a mipaladaˈ toya awaay ko ˈicel mipatikol to miakoˈiday a tamdaw. Mihaen mahemekay kita, samanen mitodongay kita to makapahay taˈarawan ni Yihofa. Palahad kita to mahaenay a waywayan ikor, ano cowa piakoˈid ko tao kitanan i, wa kamayan kita a mahemek.
18. Cowa ka ngaˈay ira ko masamaanay a harateng? Misamaanay?
18 Awaay ko miakoˈiday a falocoˈ no tao aka ka saan. (1 Korinto 13:7) Ano cowa piakoˈid ko tao i, haratengen ita: “Soˈlinay awaay ko miakoˈiday falocoˈ ningra han? Anca mapawanayto ningra han?” Ano cowa piakoˈid ko tao kitanan i, alatek iraay ko roma a lalangian nangra. O roma tamdaw mikifalocoˈay a miakoˈid, pasangaray a paihkal alatek. O roma micada to sapadama mangodoan nanay, isaˈayaw ano maceriday cangra padama to tao i, mangalefay mangodoen. Ano masamaanto i, maolah kita to salikaka i, cowa ko mamilongoc cangranan, kamayan milifok to hemek i pipaladaˈ.—Ifiso 4:2.
19-20. Hano mamihadidi kita hani? (Nengnengen ko coka.)
19 Ka pihadidi. Citanengay a Hongti ci Solomon sanay: ‘Folesaken i fafekang no nanom ko kakaenen, ikor no pina romiˈad wa ira ko sapatikol.’ (Patnakay 11:1) Mahecad koniya sowal, o roma tamdaw ‘ikor no pina romiˈad’ patikolay to hinapaladaˈay no mita. Nengnengen ko cecay tinakoan.
20 ˈAyaw no pina miheca, o fafahi no kasakilac kantok mitiliday to tikami, pakalalok to cecay cada sanayho to mipaputisemay a fafahiyan salikaka padadotoc madimadi. Ikor no falo miheca, patikol patikami koniya salikaka: “Alatek cowa ka harateng iso, oya tikami iso tada padamaay takowanan, mansa patikamien ako kiso a pasowal. Oya tikami iso ato masowalay a sinael mitemeray to falocoˈ ako, cowa ko mamatawal.” a I tikami i, masowalay ningra ko masiˈayaway a pasangar toniya pina miheca, ikor sanay: “Nolatekay, cowato ko mamisikol, sapisawadaw sanay kako to soˈlinay kimad, misawad to polong a ˈinorong. Kawra na mahaen kako i, maceriday maharateng ako ko sinael i tikami iso, ikor iraayto ko ˈicel padadotoc mihadidi.” Sanayho cingra: “Toniya falo miheca, oniya demak tada taˈangayay ko pipadama takowanan.” Haratengen iso hena, oniya fafahi no kasakilac kantok macada koniya tikami hakowaay ko hemek ningra hani? Mikifalocoˈ kita ciharateng to tao, alatek ‘ikor no pina romiˈad’ wa tahacada to piakoˈid nangra.
O roma a tamdaw, alatek halafinto ngaˈ, miakoˈiday to na sapadama ita cingranan (Nengnengen ko saka 20 fatac) b
21. Hano misetek to falocoˈ kiso mitodong to kakarayan Wama a hinapaladaˈ?
21 Mahecad to masowalay i saka cecay fatac, masangaˈ ni Yihofa kita i, pafelian Ningra to mikiriwiˈay a ˈicel. Soˈlin maolahay kita micada to sapatelong, kawra taˈangayay ko milifokan a hemek i pipaladaˈ. Padama kita to salikaka tada mahemekay, ano miakoˈid cangra kitanan, mangalefay ko hemek. Ano cato piakoˈid cangra i, kamayan a marenecen i pidemak to makapahay. Aka mapawan, ano o mananto ko sapafeli iso to tao, wa tongalen ni Yihofa patikol kiso. (2 Rayray 25:9) O sapatikol ni Yihofa tisowanan ikakaay to na midemakan iso! Milifok to sapalifon ni Yihofa o tadamaanay a hemek. Seteken ita ko falocoˈ, mitodong to kakarayan Wama a hinapaladaˈ.
RADIW 17 Makalimay Kako
a Saka 2 Yohani 8 sinael ko sapaladaˈ no fafahiyan salikaka, sanay ko sinael: ‘Ka pisinanot kamo, aka palahdawen ko minaroˈan no tayal ita, papilifoken to matomesay a lifon.’
b TATODONG NO COKA: Patikamiay ko fafahi no kasakilac kantok, pakalalok to cecay fafahiyan salikaka. Ikor no pina miheca, macadaay ningra ko piakoˈid a tikami noniya salikaka. (Onini a coka miliyawan misasing a nalifetan)
