1. Cato ka halafin, wa misamaan ko demak ni Yis?

 MAˈORIPAY kita i masakalimlaan a lintad. Cato ka halafin i, wa misawkit ci Yis to kahacecay a tamdaw. Na pairasolay ci Yis to ‘tahapinangan,’ paihkalay to ‘patikolayto cingra a tayni kitanan, o salikorayto lintad nonini a hekal.’ Ano maˈaraw ita koniya tahapinangan i, wa mafanaˈ to hamamisawkit ci Yis. (Matay 24:3) Oniya tahapinangan maˈoningay i Matay saka 24, 25 fedengan, Marko saka 13 fedengan, ato Luka saka 21 fedengan.

2. Oniya lalakaw wa milengo to manan? Minanam toniya lalakaw o manan ko epoc hani?

² Pasowalay ci Yis to tolo a sapatinako, padama kitaanan misaday misiˈayaw to haaira a sasawkit, oniya toloay a sapatinako, o lopayˈay ato lotok a siri, moetepay limocedan, ato linkim a sapatinako. Oniya sapatinako mahawpay ko mirikecay a lihaf, ho mafanaˈ kita to waywayan no tamdaw wa misamaan milingat to sasawkit no niyah. Oniya lalakaw wa milengo toniya sapatinako, halo o manan ko mamananam ita. Salakat, nengnengen ita ko lopayˈay ato lotok a siri a sapatinako.

LOPAYˈAY ATO LOTOK A SIRI A SAPATINAKO

3. Wa ihacowa ko pisawkit ni Yis?

³ Itini i lopayˈay ato lotok a siri a sapatinako, paihkalay ci Yis to pisawkit ningra a lalangian, o pakayniay i samaanay ko pinengneng no tamdaw to ngaˈayay lihaf, ato midamaay cingra to salikaka ni Kristo hokira. (Matay 25:31-46) Itini taˈangayay padiing, ˈayaw no mamifekad ko Armakiton i, wa misawkit ci  Yis. (Matay 24:21) Itiyato i, pafafidaˈan ningra ko madimadiay midama to salikaka ni Kristo a tamdaw ato cowa ka pihaen to demak a tamdaw, mahecad to pakaenay pafafidaˈ to lopayˈay ato lotok a siri.

4. Mikitini Isaya 11:3, 4, hano pakasoˈlin kita to masadafdafay ko pisawkit ni Yis hani? (Nengnengen ko a coka.)

⁴ O sapairasol no Fangcalay Cudad paihkalay, mitaypiyaw ci Yis ci Yihofaan a misawkit i, wa o masadafdafay. (ˈOsien ko Isaya 11:3, 4.) Misinanotay cingra to sasowalen, midemakan ato waywayan no kahacecay a tamdaw, mahawpay mihapinang to misamaanay cangra militemoh to salikaka no niyah. (Matay 12:36, 37; 25:40) Mafanaˈay ci Yis to cima ko midamaay to salikaka ningra ato tayal nangra. a Oniya tamdaw sahtoay misaˈicel a mitosil, midama to salikaka ni Kristo. ‘O moecelay tamdaw’ hananay cangra a misawkit, wa itini i fafekang no sera milayap to ‘tahadaˈocay a ˈorip.’ (Matay 25:46; Paˈarawan 7:16, 17) O kalikoan a sapalifon konini! Oniya tamdaw ano itini i taˈangayay padiing ato anoikor padadotoc a madimadi, wa materek ko ngangan no niyah i ‘sakaˈorip a cudad.’—Paˈarawan 20:15.

5. Mikitini to lopayˈay ato lotok a siri a sapatinako, o manan ko mananamay ita? Cima ko mamisinanot toniya sapirikec no sapatinako?

⁵ Ka madimadi tahatolas. Lopayˈay ato lotok a siri a sapatinako, milingatay to hamamidaˈoc maˈorip i fafekang no sera a tamdaw. Iraay ko pakasoˈlinay falocoˈ nangra ci Yihofaan, midamaay cangra to salikaka ni Kristo to mitosilay a tayal, halo madimadiay to minilnilan ni Kristo a madimadiay citanengay a koli, mahemek micada to sakayat noniya koli. (Matay 24:45) Oya tatayra i kakarayan a Krisciyang, oha mamidofdof cangra toniya sapirikec no sapatinako. Misamaanay hani? Samanen mamisinanot ci Yis to sasowalen, midemakan ato waywayan nangra. Ka madimadi tahatolas cangra wangaˈ. Itini Matay saka 25 fedengan, somowalay ci Yis to roma tosaay a sapatinako, o sapatalipaˈelel cangranan koni. Dotoc, wa minengneng kita to moetepay limocedan a sapatinako.

MOETEPAY LIMOCEDAN A SAPATINAKO

6. Oya lalimaay a limocedan, samaanay paihkal to citanengay ko niyah? (Matay 25:6-10)

⁶ Itini toniya sapatinako, somowalay ci Yis to moetepay a limocedan mamilitemoh to caciraramod a faˈinayan. (Matay 25:1-4) Sakalacafayaw cangra toniya caciraramod a faˈinayan mirienang to pakaetimay. Saan ci Yis, lalimaay limocedan o ‘citanengay,’ o roma lalimaay o ‘mafolaay.’ Oya citanengay a limocedan masongilaˈay ko pisaday halo padadotoc a talipaˈelal. Mihadidiay cangra a mitala to caciraramod a faˈinayan, ano hakowato ko halafin i, makahiay a mitala. Mitatoyay cangra to dawdaw ato simal, soˈlin o lafii ko kairaan no caciraramod a faˈinayan, cowa ko mamapadeng ko dawdaw nangra. (ˈOsien ko Matay 25:6-10.) Taynito ko caciraramod a faˈinayan i, oniya citanengay a limocedan malacafayay cingranan mirienang to pakaetimay. Mahecaday toni, manilnilay no fangcalay saocor a Krisciyang ano padadotoc talipaˈelal, madimadi tahatolas, tayni sato ci Yis i, wa micada cangra to sapalifon, malacafay ci Yisan itini i kakarayan mala hongti. b (Paˈarawan 7:1-3) Roma i, oya lalimaay mafolaay a limocedan wa samaanto hani?

7. Oya lalimaay mafolaay a limocedan samaanayto ko teloc nangra? Misamaanay?

⁷ Cowa ka hecad to citanengay a limocedan,  oya mafolaay a limocedan cowa ka misongilaˈ a misaday. Tahatengil cangra to airato ko caciraramod a faˈinayan, kawra wa mapadengto ko dawdaw no niyah, hanaca awaayho ko masadayay a simal, mansa malingad cangra a miˈaca to simal. Cowaho ka patatikol cangra, tahiraayto ko caciraramod a faˈinayan, ‘oya misongilaˈay misaday a limocedan malacafayay cingranan mirienang to pakaetimay, maedefayto ko saedef.’ (Matay 25:10) Ikor minokay koya mafolaay a limocedan, sapirienangaw to pakaetimay, kawra hananay no caciraramod a faˈinayan cangra: ‘Cowa ka fanaˈ kako tamowanan.’ (Matay 25:11, 12) Oniya limocedan cowa ka misongilaˈ a misaday, salikor cowa ka pakatala tahatolas. O manilnilay no fangcalay saocor a Krisciyang, o manan ko mananamay nangra hani?

8-9. Manilnilay no fangcalay saocor a Krisciyang, mikitini i moetepay limocedan a sapatinako o manan ko mananamay hani? (Nengnengen ko coka.)

⁸ Masongilaˈ ko pisaday, padadotoc a talipaˈelal. Wa ira ko tosa ˈopo a hamamanilnil no fangcalay saocor a Krisciyang, o cecay a ˈopo misongilaˈ misaday a mitala, o roma a ˈopo i, cowa ka pisaday, o tatodong noniya sapatinako cowa ka saan ci Yis. O tatodong no sowal ni Yis i, o manilnilay no fangcalay saocor a Krisciyang ano cowa ka pisongilaˈ a misaday, mihadidi tahatolas, cowa ko mamilifok to sapalifon. (Yohani 14:3, 4) Oha ngangaˈay dotimen ita konini. Ano saki kakarayanto, anca saki fafekang no sera a maˈorip i, tada o haharatengen ita ko sapirikec ni Yis. Ka padadotoc a talipaˈelal kita, misongilaˈ a misaday, makahi a mihadidi tahatolas!—Matay 24:13.

⁹ Tano moetepay a limocedan a sapatinako ci Yis a mitadtad, ka talaˈayaw a misaday ko nisawawaan, padadotoc a talipaˈelal. Ikor, pasowalayho cingra to linkim a sapatinako, mitadtad to mamalalok matayal ko nisawawaan.

LINKIM A SAPATINAKO

10. Oniya tosa a koli, samaanay paihkal to madimadiay nangra? (Matay 25:19-23)

¹⁰ I linkim a sapatinako, masowalay ni Yis  ko tawki ˈayaw no tayra i roma a kitakit, patorodan ningra ko adihayay a payci to tatoloay a koli. (Matay 25:14-18) Madimadiay ko tatosa a koli, sakadademakan nangra ko sapafeli no tawki a payci, malalokay a matayal. Samaanayto ko teloc hani? Tahalomaˈto ko tawki i, o mietanan nangra mikikakaayto ko adihay no payci. Pakahemekan no tawki cangra, maladaˈay nangra ko ‘hemek no tawki.’ (ˈOsien ko Matay 25:19-23.) Oya saka tolo a koli, samaanay hani? Misamaanay misakadademak cingra to sapafeli no tawki a payci hani?

11. Matokaay a koli samaanayto ko teloc ningra? Misamaanay?

¹¹ Saka tolo a koli malifokay ko cecay lofok a linkim, sakadademaken ningra ko payci sanay ko harateng no tawki, kawra ‘matokaay’ cingra, milafongan ningra ko payci i sera. Tahalomaˈto ko tawki i, awaay ko maetanay a payci noniya koli, mariˈangayho ko waywayan ningra. Cowaho ka miliˈay, ‘pakidemay ko saali’ no tawki sanay cingra. Telocto i, pakidemay ko pirikec no tawki toniya koli. Cowa konini aca, oya linkim ningra maalaay a patikol maemin, malaplapayho cingra.—Matay 25:24, 26-30.

12. Oya tatosa madimadiay a koli, o cima ko mitaypiyawan nangra hani?

¹² Oya tatosa madimadiay a koli, mitaypiyaway toya manilnilay no fangcalay saocor a madimadiay Krisciyang. O tawki ci Yis mitahidangay cangranan paladaˈ to ‘hemek no tawki,’ ho malifok nangra ko saki kakarayan a sapalemed, oya saka cecay a patatikolay maˈorip hananay. (Matay 25:21, 23; Paˈarawan 20:5a) O roma i, oya matokaay a koli o sapatalipaˈelal a sarikec, manilnilay no fangcalay saocor a Krisciyang wa mikitini cingranan minanam to kalimlaan a rikec. O manan hani?

13-14. Manilnilay no fangcalay saocor a Krisciyang, mikitini i linkim a sapatinako o manan ko mananamay hani? (Nengnengen ko coka.)

¹³ Ka malalok a matayal. Mahecaday toya limocedan ato linkim a sapatinako, wa matoka ko manilnilay no fangcalay saocor a Krisciyang, cowa ka saan ci Yis. Sapatalipaˈelalaw ni Yis cangranan, ano mafasaw ko tawlikay a falocoˈ  i, ‘wa malahdaw ko satahidang ato mipiliˈan a sapalemed,’ cowa ko mamicomod to i kakarayan a Kitakit.—2 Pitiro 1:10.

¹⁴ Pakayni to moetepay a limocedan ato linkim a sapatinako, ihkalay ci Yis a mitadtad, polong manilnilay no fangcalay saocor a Krisciyang, mamisongilaˈ a misaday, padadotoc a talipaˈelal, halo malalok a matayal. Pafelianho ni Yis cangra to roma a sapirikec han? Hai, itiniay i Matay 24:40, 41 maˈoning koniya sapirikec.

O CIMA KO ‘MAMAALA’?

15-16. I Matay 24:40, 41 samaanay paihkal to, o manilnilay no fangcalay saocor a Krisciyang padadotocen talipaˈelal hani?

¹⁵ ˈAyaw no somowal ci Yis toniya tolo a sapatinako, saan cingra, sapihaydaaw ni Yihofa ko manilnilay no fangcalay saocor a Krisciyang hokira, tahira to salikoray a pisawkit ngaˈ mafanaˈay. Masowalay ni Yis ko tatosa faˈinayan matayalay i omah, tatosa fafahiyan miilangay. Ano masamaanayto a pakayraan i, hato mahecaday ko midemakan nangra, kawra o sowal ni Yis, ‘mamaala’ ko cecay, ‘mamafalah’ ko cecay. (ˈOsien ko Matay 24:40, 41.) Dotoc, saan pakalalok ci Yis to nisawawaan: ‘Mihaenay i, ka padadotoc kamo a talipaˈelal, samanen cowa ka fanaˈ kamo to hacowa ko kataynian no Tapang namo.’ (Matay 24:42) Maherek ci Yis somowal to moetepay limocedan a sapatinako ikor, mahecaday mahaen ko sowal ningra. (Matay 25:13) Oniya tosa a sowal ningra, malalitingay han? Hai. O sowal ni Yis paihkalay, edengan o soˈlinay manilnil no fangcalay saocor, halo madimadi tahatolas a Krisciyang ngaˈ ‘mamaala,’ oha cacadaen ni Yis patayra i kakarayan a Kitakit.—Yohani 14:3.

¹⁶ Ka padadotoc a talipaˈelal. Manilnilay no fangcalay saocor a Krisciyang, ano eca ka padadotoc talipaˈelal, cowa ko mamacada tayra i kakarayan malacafay to romaroma ‘mipiliˈan a tamdaw.’ (Matay 24:31) Soˈlinay i, emin finawlan no Kawas, haharatengen ko sapirikec ni Yis. Ano saki kakarayanto, anca i fafekang no sera a maˈorip, ka padadotoc kita talipaˈelal madimadi tahatolas.

17. Itini toniya pina miheca, ano sakadademaken ni Yihofa ko fangcalay saocor minilnil to madimadiay a Krisciyang, hano cowa ka cisasa kita to pisaˈosi Ningra hani?

¹⁷ Tada mafanaˈayto kita ci Yihofaan, mansa pakasoˈlinay to pisaˈosi Ningra. Itini toniya pina miheca, ano misakadademakan ni Yihofa ko fangcalay saocor minilnil to madimadiay a Krisciyang, cowa ka cisasa kita to pisaˈosi Ningra. c Maharatengayho iso han? Matayalay i fadisosoˈ a omah a sapatinako, sanay ci Yis, tahirato i herek no lahok 5 ko toki, mitahidangayho ko tawki to maomahay. (Matay 20:1-16) Mihaenay, ano saˈayawto tahira, anoca maosoyayto tahira, mahecaday ko sapalifon no tawki cangranan. Mahecaday toni, ano hacowaay to manilnil no fangcalay saocor ko Krisciyang, o madimadiay sa ci Yihofa a minengneng cangranan, wa i kakarayan ko halifon nangra.

DOFDOFEN KO SAPIRIKEC

18-19. Mikitini to sowal ni Yis o manan ko mananamay ita?

¹⁸ O manan ko mananamay ita hani? Pakayni i mamidaˈoc maˈorip i fafekang no sera a tamdaw, oya lopayˈay ato lotok a siri a sapatinako paihkalay to, ano hatiniho anca i taˈangayay padiing, misaaliay cangra madimadi ci Yihofaan tahatolas. Noikor, o matatodongay ko sasawkit ni Yis to madimadiay a tamdaw, wa milifok cangra to ‘midaˈocay a ˈorip.’—Matay 25:46.

 ¹⁹ Masowalay ni Yis ko roma tosa a sapatinako, mahawpay ko sapirikec a lihaf to manilnilay no fangcalay saocor a Krisciyang. Itini moetepay limocedan a sapatinako, limaay ko citanengay. Misongilaˈay a misaday, padadotoc a talipaˈelal cangra, mihadidiay mitala to caciraramod a faˈinayan, ano hakowaay ko halafin makahiay cangra mitala. Kawra, oya limaay mafolaay a limocedan, cowa ka misongilaˈ misaday, telocto i, milalangay ko caciraramod a faˈinayan cangranan mirienang to pakaetimay. Songilaˈen ita misaday, ano hakowaayto ko halafin i, mamakahi a mitala ci Yisan, tahira i pipalaˈafo ningra toniya mariˈangay a hekal. I linkim a sapatinako i, masowalay ni Yis ko tatosaay madimadiay malalokay a koli, misaˈicelay cangra matayal saki tawki, milifok to pihayda ningra. Kawra, milaplapan no tawki koya matokaay a koli. O manan ko kalimlaan hani? Laloken ita matayal saki ci Yihofaan, tahira i hererekan noniya hekal. Salikorto i, mananamay ita, manilnilay no fangcalay saocor a Krisciyang ka padadotoc a talipaˈelal, ho ‘maala’ ni Yis cangra tayra i kakarayan a Kitakit. Hinatalaay cangra ‘masaˈopo tayra i katihi ningra.’ Ikor no Armakiton, itini i pakaetimay no tofor a siri, wa mala singniw ni Kristo cangra.—2 Tisalonika 2:1; Paˈarawan 19:7, 9.

20. O manan ko sapalifon ni Yihofa to midofdofay to sarikec a tamdaw?

²⁰ Wa kalikito ci Yis misawkit to i fafekangay no sera a tamdaw. Kawra, hamaan matalaw kita, samanen ano madimadi kita tahatolas, cisidaˈitay a Wama wa pafeli to ‘tadamaanay a ˈicel,’ ho ngangaˈay kita ‘tomireng i kaˈayaw no Wawa no tamdaw.’ (2 Korinto 4:7; Luka 21:36) Ano saki kakarayanto, anca saki fafekang no sera, ano tengilen ita ko sapirikec ni Yis, wa mahemek ci Yihofa. Papafelien Ningra kita to mikiriwiˈay a sidaˈit, ho maˈoning ko ngangan ita itini i ‘sakaˈorip a cudad.’—Taniil 12:1; Paˈarawan 3:5.