LALENGOEN LALAKAW 37
RADIW 118 Paˈicelen ko Pasoˈlinay Falocoˈ Niyam
Papadama Kitanan Pakasoˈlin Mihadidi Tahatolas a Tikami
‘Padadotocen ita mitawmec ko isalakatay a mipakasoˈlinan, tahira i tolas.’—HIPRAY 3:14.
KALIMLAAN NO LALAKAW
I Hipray a cudad a masakalimlaan a kimad, papadama kitanan pakasoˈlin a mihadidi, tahira i kahererekan noniya lekakawa.
1-2. (1) Mitilid ko tarokos ci Pawlo to Hipray a cudad i, itiya samaanay ko pakayraan no Yutiya? (2) Hano matatodongay itiya han koniya tikami?
IKOR no kapatay ni Yis i, oya maˈoripay i Yirusalim ato Yutiya a Krisciyang, milifetay cangra to adihayay a pasangar. Mapatireng saho ko kasakopang, oya Hipray a Krisciyang tahasiˈayaway to pakidemay a saroero. (Dmak 8:1) Maedeng ikor no 20 miheca, alatek nao mafekad ko isaˈayaway pakidemay a kedal, mansa tahasiˈayaway cangra to nikaw. (Dmak 11:27-30) Kawra, i Kongyen 61 miheca, i Yutiya a Krisciyang dipayalayho ko kaˈorip nangra. Itiya i, mikayatan ni Yihofa ci Pawlo patikami cangranan. Matatodongay koniya tikami, misamaanay hani?
2 O dipayalay kaˈorip no Yutiya a Krisciyang to cecayay aca a liyad. O lekakawa no Yutaya wa tangsol mahecad to sapairasol ni Yis masongilaˈ a mapalaˈafo, o tikami ni Pawlo a sapalimoˈot, wa padama toya Krisciyang a mihadidi to pasangar noikor. (Luka 21:20) Soˈlin, ano ci Pawlo anca Yutiya a Krisciyang, cowa ka fanaˈ to hahacowa ira koniya pades. Kawra, o Yutiya a Krisciyang ngangaˈay sakadademaken ko toki talaˈayaw a misaday, palahad to pakasoˈlinay falocoˈ ato mihadidiay a capeling.—Hipray 10:25; 12:1, 2.
3. O Hipray a cudad hano o ciepocay han to aniniay a Krisciyang?
3 Oha mamasiˈayaw ita a pasangar, wa ikaka to masiˈayaway no Hipray a Krisciyang ko nika pakidem. (Matay 24:21; Paˈarawan 16:14, 16) Oniya lalakaw wa milengo to sapalimoˈot ni Yihofa to Hipray a Krisciyang, sinanoten ita koniya sapalimoˈot wa macada ko taˈangayay haepoc.
‘MACAKAT MACAKAT MALO SAKATENESAW’
4. O Yutaya Krisciyang misiˈayaway to masamaanay a sapalifet hani? (Nengnengen ko coka.)
4 O Yutaya Krisciyang misiˈayaway to pakidemay a sapalifet, hano haenen ko sowal hani? I saˈayaw, o Yutaya tamdaw o nipiliˈan ni Yihofa a finawlan, mitaypiyawan ni Yihofa a hongti itiniay i Yirusalim a mikowan, o fangcalay sefi i Yirusalim o matatodongay pidokoan a kitiraan. Roma i, polong madimadiay a Yutaya tamdaw wa midofdof to Rikec ni Mosi ato sarikec no ˈaˈideman no pihakelongan, oniya sarikec mahawpay ko kahacecacecay nokaˈorip, mahawpay ko kakaenen, mikerit, ato sasamaan macacawmaˈ to ˈalafang a tamdaw. Kawra, mapatayto ci Yis ikor, palahdawayto ko Rikec ni Mosi, midokoay ci Yihofaan a tamdaw cowato ka patoˈaya to Kawas. Pakayni to midofdofay to Rikec ni Mosi a teloc no Yutaya Krisciyang, micada toniya kafalic cowa ko madoloay. (Hipray 10:1, 4, 10) Ano o matenesay a Krisciyang, pasangaran nanay a misalof, tinakoen o tarokos ci Pitiro. (Dmak 10:9-14; Kalatiya 2:11-14) Roma i, pakayni i faelohay a pihakelongan no Yutaya Krisciyang, maceriday maˈodis no ˈaˈideman no Yutaya a pihakelongan.
Tanekteken a midofdof ko soˈlinay kimad no Krisciyang, mikeceng to mararaway kimad no ˈaˈideman no Yutaya (Nengnengen ko saka 4-5 fatac)
5. Hano padadotoc talipaˈelal ko Yutaya Krisciyang hani?
5 O Yutaya Krisciyang tosaay ko macadaay nangra a sacoli. O saˈayaway i, mitowakangay cangra hananay no ˈaˈideman no Yutaya. Saka tosa i, o roma Krisciyang alatek matalaway to saroero, kamayan ko Krisciyang midofdof to Rikec ni Mosi sanay. (Kalatiya 6:12) Mihaenay, o manan ko papadama to madimadiay Krisciyang midofdof to soˈlinay kimad hani?
6. Pakalalokay ci Pawlo to salikaka misamaan ko demak hani? (Hipray 5:14–6:1)
6 O sowal ni Pawlo i Hipray pakalalokay to salikaka a mikadkad to Kimad no Kawas. (ˈOsien ko Hipray 5:14–6:1.) Misakadademakan ni Pawlo ko sinael no Hipray Sowal Fangcalay Cudad, padama cangranan mihapinang to ikakaay ko Kristokiyo to Yutaya a pihakelongan. a Mafanaˈay ci Pawlo, ano tangongol ko kacipinang no salikaka to soˈlinay kimad, wa mafanaˈto pafafidaˈ to mararaway kimad a miliyas, eca ka makayhid no tamdaw mararaw ko rakat.
7. Anini o manan ko masiˈayaway ita a sapalifet?
7 Malecad to Yutaya Krisciyang, i katihi ita ˈalomanay ko miˈowingay to mararaway pinengneng ato harateng a tamdaw. O misafelitay maceriday miˈodis kitanan a misalalangi to palinian no Fangcalay Cudad, cowa ka siniˈada sidaˈit a maolah to tamdaw sanay. Roma i, o waywayan ato harateng no hekal a tamdaw, mangalefay ko piliyas to malefotay a palinian ni Yihofa. (Taneng 17:15) Mihaenay, pacakaten ita ko pafafidaˈay a ˈicel ngaˈ, mihapinang halo piliyas to mararaway a kimad, eca ka fiyor no misafelitay tamdaw ko pakasoˈlinay falocoˈ ita, a mararaw ko rakat.—Hipray 13:9.
8. Misamaan kita macakat macakat malo sakatenesaw hani?
8 Pakalalokan ni Pawlo ko Hipray a Krisciyang, misaˈicel a pasayra i sakatenesaw. I falocoˈen ita konini a sapalimoˈot, tatodong i, padadotocen ita ko kafanaˈ to kimad, cipinang to harateng ni Yihofa. Ikor no mipaputisem, kamayan a padadotoc mihaen to demak. Ano hakowaayto ko kahalafin i kimad kita, padadotocen a mikingkiw ko Kimad no Kawas. (ˈOlic 1:2) O ngaˈayay pinangan a pikingkiw patanoktokay to pakasoˈlinay falocoˈ ita, o sapakalalok ni Pawlo to Hipray a Krisciyang palahad toniya makapahay capeling.—Hipray 11:1, 6.
‘IRA KO PAKASOˈLINAY FALOCOˈ A MADIPOT KO ˈORIP’
9. Misamaanay hano pairaen no Hipray Krisciyang ko tanoktokay pakasoˈlinay falocoˈ hani?
9 I Yutiyaay a Hipray Krisciyang tanoktok ko pakasoˈlinay falocoˈ ngaˈ, pakataˈlif to mamalifet a padiing. (Hipray 10:37-39) Pakatalipaˈelalan ni Yis ko nisawawaan, maˈaraw ko sofitay pakopang i taliyok no Yirusalim, wa milaliw tayra i lotok, ano i macito i niyaroˈayto, wa mihaen maemin. (Luka 21:20-24) Oniya sapalimoˈot hato cowa ka tatodong, samanen o itiyaay a tamdaw ano maˈaraw ko mamiˈodis a sofitay, wa tayra i cilowilay mahecad to Yirusalim ira ko sadipot a niyaroˈ. Mansa, itiyaay a Krisciyang ira ko pakasoˈlinay falocoˈ ngaˈ, mitengil to sapalimoˈot ni Yis, miliyas tayra i lotok.
10. O Hipray Krisciyang ano ira ko tanoktokay pakasoˈlinay falocoˈ i, wa misamaan ko demak hani? (Hipray 13:17)
10 O Hipray Krisciyang misaaliay to pakasoˈlinay falocoˈ, pakayni to minilnilan ni Yis a mikeriday a faˈinayan salikaka. Malaˈosi ko sapairasol ni Yis i, oniya faˈinayan salikaka wa milasil to sakayat i kasakopang, mifanaˈ to hacowa a tatokian, ato sasamaan tayra i lotok. (ˈOsien ko Hipray 13:17.) I Hipray 13:17, ‘midofdof’ sanay a sowal no Krisiya tatodong i, mahawpay mikifalocoˈ a midofdof. Ano mahaen ko waywayan no tamdaw, cowa ko paciecian a midofdof, ao pakasoˈlinay to mikayatay a tamdaw. ˈAyaw no padiing ano ira ko mahaenay pakasoˈlinay falocoˈ no Hipray Krisciyang, oha mamafanaˈ midofdof to sakayat no mikeriday a faˈinayan salikaka, i dipayalay a tatokian oha mamakahi a midofdof cangranan.
11. O anini a Krisciyang hano paira to tanoktokay pakasoˈlinay falocoˈ hani?
11 Wa pahecad kita to Hipray Krisciyang ira ko tanoktokay pakasoˈlinay falocoˈ. Soˈlin paliˈayaw ko Fangcalay Cudad a palimoˈot wa mahererekto koniya hekal, kawra cowa pakasoˈlin ko ˈalomanay tamdaw, milikafayho kitanan. (2 Pitiro 3:3, 4) Roma i, soˈlin masowal no Fangcalay Cudad ko milingatay to taˈangayay padiing a demak, kawra adihayayho ko cowa ko kafanaˈan ita a demak. Mansa, tanoktok ko pakasoˈlinay falocoˈ ita ngaˈ, pakasoˈlinto i misaˈosian ni Yihofa a tatokian mahererek koniya hekal, itiya wa madipot ni Yihofa kita.—Hapakuk 2:3.
12. Samaanen ita ko demak ngaˈ, pakataˈlif to taˈangayay padiing?
12 Paˈicelen ita ko pakasoˈlinay falocoˈ, pakasoˈlin to minilnilan ni Yihofa ko ‘madimadiay citanengay a koli’ a mikayat kita. (Matay 24:45) Haratengen hena, maalikot no sofitay no Loma ko Yirusalim i, o Hipray Krisciyang alatek macadaay nangra ko sapilaliw a sakayat. Mahecaday toni, mifekad ko taˈangayay padiing ikor, wa macada ita ko sakayat alatek, ho madipot ko ˈorip. Nohatiniho, maminanam kita pakasoˈlinen ko mikayatay i kasakopang a salikaka, midofdof to sakayat nangra. Ano cowa ka pakasoˈlin a midofdof cangranan i, mifekad ko padiing i, wa pasangarto a midofdof cangranan.
13. Misamaanay i Hipray 13:5 a sapatalipaˈelal hano masakalimlaan hani?
13 ˈAyaw no pilasil to sapilaliw a lihaf i, kantangen ko kaˈorip no Hipray Krisciyang ngaˈ, ho eca ka ‘maˈanof to hafay.’ (ˈOsien ko Hipray 13:5.) O roma tamdaw tahalifaay to kedal ato nikaw, a makahi pakayni i ngaˈayay lihaf mihadidi to nikaw a maˈorip. (Hipray 10:32-34) Kawra sanay ko harateng no roma tamdaw, awa ko payci cowa ka madipot ko ˈorip. Kawra, mapalaˈafo ko Yirusalim i, adihayay a payci cowa ka dipot ko ˈorip nangra. (Yakop 5:3) Soˈlinay i, maˈanofayho to hafay a tamdaw pasangaray madipot ko ˈorip, samanen mafoˈotay no hafay cangra.
14. Pakayni i hafay, ano ira ko tanoktokay pakasoˈlinay falocoˈ ita, wa misamaan ko pisaˈosi hani?
14 Ano pakasoˈlin kita to papalaˈafoen ni Yihofa koniya tatiihay a hekal i, cowato ko mamisakareteng a minengneng to hafay. Noikor ‘wa mafalah no tamdaw ko linkim i lalan,’ samanen wa mafanaˈ cangra i ‘kangolawan ni Yihofa a romiˈad, cowa ko mamadipot no linkim ko ˈorip nangra.’ (Icikil 7:19) Soˈlin mahaen, hamaan ciharateng kita mihoped to hafay, kacitaneng ko pisaˈosi, ho maˈorip ko niyah, adihayen ko toki matayal saki ci Yihofaan. Tatodong i, coˈayen ita ko sakacihafayaw, pakidem ko picakay, ho eca ka ciˈinorong to adihayay a kiyam ato maemin ko toki misolimet to dafong. Ka pisinanot kita, hamaan a misakareteng minengneng to iraay a dafong no niyah. (Matay 6:19, 24) Maraodto ko hererekan noniya lekakawa, wa misaˈosi kita, mitiˈer ci Yihofaan, anoca o hafay.
‘KA PIHADIDI KAMO’
15. Misamaanay hano tada mihadidi ko Hipray a Krisciyang hani?
15 Mangalef noka tatiih ko pakayraan no Yutiya, o Hipray a Krisciyang mitawmec to mihadidiay ngaˈ, ngaˈay padadotoc midoko ci Yihofaan. (Hipray 10:36) Itiya o roma tamdaw tahalifaay to pakidemay a saroero, kawra ˈalomanay tamdaw itiniay i dipayalay a lalintadan malo Krisciyangay. Sowal ni Pawlo, soˈlin oniya Krisciyang tahalifaay to sapalifet, kawra cowaho ka pakidem ko saroero nangra, cowa ka mahecadto ni Yis sakamadimadiaw a kinafalah to niyah. (Hipray 12:4) Kawra, macowat macowat ko Kristokiyo, misafelitay to Kristokiyo a Yutaya tamdaw mangalef ko nika ngolaw. Mahaenay ko milifetan ni Pawlo. ˈAyaw no mitilid cingra to Hipray a cudad to pina a miheca, tahalifaay to piˈodis no mariˈangay tamdaw i Yirusalim, itiya 40 ko Yutaya tamdaw ‘sakapot sanay cangra, ano caho ka patayen ci Pawlo i, caay ko kakomaen, caay ko maminanom kita.’ (Dmak 22:22; 23:12-14) I mahaenay a pakayraan, padadotocay ko Hipray a Krisciyang mitenak to ngaˈayay lihaf, masaˈopo a midoko to Kawas, halo patanoktok to pakasoˈlinay falocoˈ. Misaaliay to pihadidiaw nangra.
16. O Hipray a cudad samaanay padama kitanan matatodong ko pinengneng to sapalifet hani? (Hipray 12:7)
16 Misamaan ko demak no Hipray a Krisciyang ngaˈ, miemem to sapalifet hani? Pairaen nangra ko matatodongay pinengneng to sapalifet wangaˈ. Sanay ci Pawlo, tahasiˈayaw cangra to sapalifet i, o sapahatatanamaw no Kawas cangranan konini a tatokian. (ˈOsien ko Hipray 12:7.) Oha ngangaˈay konini padama cangranan palahad halo pacakat to makapahay a capeling. Ano maharateng nangra ko ngaˈayay minaroˈan no sapalifet i, wa madolo cangra padadotoc a mihadidi.—Hipray 12:11.
17. Pakayni pihadidi to saroero, o manan ko mananamay ni Pawlo?
17 Pakalalokay ci Pawlo to Hipray a Krisciyang misetek to falocoˈ, itini i sapalifet a mihadidi. Pakayni toniya demak, iraay ko ngaˈayay sapaini ni Pawlo. Na miroeroay ci Pawlo to Krisciyang, mafanaˈay to pakidemay ko masiˈayaway a saroero no Krisciyang. Malo Krisciyang cingra ikor, malifetay ko masakenakenaay a sapalifet, mansa mafanaˈay cingra misamaan mihadidi to saroero. (2 Korinto 11:23-25) Mihaenay, mafanaˈay ci Pawlo to mihadidiay a pakayraan. Patalipaˈelalay cingra to Hipray a Krisciyang, ano sapihadidiaw to sapalifet i, o ci Yihofa ko tatiˈeren, cowa ko niyah. Timoloay ci Pawlo a pasowal: ‘Iraay ko sapadama ni Yihofa takowanan, cowa ko mamatalaw kako.’—Hipray 13:6.
18. Noikor mamisiˈayaw kita to manan a demak hani? Aniniho misamaan ko demak ita hani?
18 Anini, o roma salikaka mihadidiay to saroero. Ngaˈay pakaynien ita i satolon anca roma pakayraan a midama cangranan. (Hipray 10:33) Haratengen ita, ihkalay ko sowal no Fangcalay Cudad, ‘polong mikotoday ci Kristo Yisan midofdof to palinian no Kawas maˈorip a tamdaw i, wa tahacada to saroero.’ (2 Timoti 3:12) Mihaenay, kita maemin a tamdaw wa pakayni hanoikor a sapalifet a misaday. Nanay padadotoc kita misarocod a mitiˈer ci Yihofaan, pakasoˈlin itini sapalifet i, wa midipot Cingra kitaanan. Salikorto i, wa parihaday Cingra to emin madimadiay midokoay Cingranan a tamdaw!—2 Tisalonika 1:7, 8.
19. Misamaan kita talaˈayaw a misaday to haaira a taˈangayay padiing hani? (Nengnengen ko coka.)
19 O sapatikami ni Pawlo to Hipray a Krisciyang, papadama cangranan misiˈayaw misaday to haaira a padiing. Pakalalokan ni Pawlo cangra a micalep mikingkiw to Fangcalay Cudad, matongal ko kacipinang to soˈlinay kimad, ngaˈ mahapinang nangra halo mifalah to milingatay to pakasoˈlinay falocoˈ a mararaway kimad. Pakalalokayho ci Pawlo to salikaka, padadotoc patongal to pakasoˈlinay falocoˈ, mihaen ngaˈ midofdof to sakayat ni Yis ato mikeriday a salikaka, narikay a misakadademak. O roma i, sapipadamaaw cangranan minanam to pihadidi, patalipaˈelalayho ci Pawlo cangranan ira ko matatodongay pinengneng to padiing, o sapahatatanam no sidaˈitay a Wama konini han ko pinengneng. Misaˈicel kita misakadademak to sapalimoˈot no Fangcalay Cudad, wa matomes ko pakasoˈlinay falocoˈ a mihadidi tahatolas!—Hipray 3:14.
Ira ko pakasoˈlinay falocoˈ a Hipray Krisciyang padadotocay a mihadidi, milifokay to sapalemed no Kawas. Milaliw cangra to Yutiya ikor, padadotocay a masaˈopo midoko to Kawas. Mikitini i cangranan o manan ko mananamay ita hani? (Nengnengen ko saka 19 fatac)
RADIW 126 Kapalal ko Falocoˈ a Tanektek
a Sapisawacayaw to ikakaay ko Kristokiyo to Yutayakiyo, itini Hipray saka 1 fedengan, sakadademakan ni Pawlo ko pitoay Hipray Sowal Fangcalay Cudad a sinael.—Hipray 1:5-13.
