1-2. Sakaraheker mahemek ko finawlan no Kawas, o manan ko masakalimlaan a lalangian hani? (Yakop 1:22-25)

 CI YIHOFA ato kanonoˈan Wawa Ningra ci Yis nanay mahemek kita sanay. ˈOlic 119:2 sanay: ‘Dofdofen ko sapatalipaˈelal no Kawas, misarocod micangacang Cingranan a tamdaw tada o mapalemeday koni.’ Masowalayho ni Yis: ‘Tahatengilay a midofdofay to Kimad no Kawas a tamdaw, o mapalemeday koni!’—Luka 11:28.

² Malo finawlan ni Yihofa, adihayay ko lalangian ita a lipahak. O cecay masakalimlaan lalangian i, micerid kita miˈosi to Kimad no Kawas, halo misaˈicel misakadademak to mananamay ita.—ˈOsien ko Yakop 1:22-25.

3. Misakadademak kita to Kimad no Kawas, o manan ko mamacada a epoc hani?

³ ‘Misakadademak to Kimad no Kawas,’ wa milifok kita to kadofahay a epoc. Tinakoen, mihaen kita to demak wa pakahemek ci Yihofaan, lipahakho ko niyah. (Patnakay 12:13) Na milifetayto kita, ano sakadademaken ko sapaini no Fangcalay Cudad, wa malangaˈay ko kalalaˈed ita to paro no lomaˈ ato salikaka. Roma i, wa maliyas ko adihayay pasangar, eca ka sano cowa ka pidoko ci Yihofaan a tamdaw malifet ko roray. Masowal ni Tafiti ko rikec, limoˈot ato safalod ni Yihofa ikor, sanay cingra: ‘Midofdofayho a tamdaw wa milifok to kadofahay a sapalifon.’ (ˈOlic 19:7-11) Mikifalocoˈay kita mihayda to sowal ningra!

4. Misakadademak to Kimad no Kawas, nolatekay hano cowa ko madoloay hani?

 ⁴ Sakadademakaw to Kimad no Kawas, mamikingkiw kita to Fangcalay Cudad ngaˈ, cipinang to saali ni Yihofa kitanan. Kawra, mihaen to demak cowa ko madoloay. Samanen ˈifowaay ko kaˈorip no mita, padetengen ita milimasmas ko toki ngaˈ mikingkiw to Fangcalay Cudad. Dotoc wa milengo kita, sasamaan ko demak ngaˈ micerid miˈosi to Fangcalay Cudad. Mamilengoho, sasamaan ko demak padama kitanan a midotim to maˈosiay a lalakaw, halo misakadademak i nokaˈorip.

MILIMASMAS TO TOKI MIKINGKIW TO FANGCALAY CUDAD

5. Tada ˈifowaay ko Krisciyang, hano han ko sowal hani?

⁵ ˈAlomanay finawlan ni Yihofa ˈifowaay ko kaˈorip. Midofdof to sapalimoˈot no Fangcalay Cudad, oha mamitamorong kita to adihayay ˈinorong, mansa misaaliay to toki koni. Tinakoen, matayalay kita maemin midimokos to niyah ato paro no lomaˈ. (1 Timoti 5:8) ˈAlomanay salikaka mamidipot to adadaay anca malitengay a salawina. Midipotho kita to sakatalifakaw no tireng. Cowa konini aca, itini kasakopang iraayho ko ˈinorong ita, o masakalimlaan a ˈinorong i, fanekfeken ita i mitosilay a demak. Adihayay ko ˈinorong no miso, samaan ngaˈ ira ko toki iso sapiceridaw mikingkiw ato midotim to Fangcalay Cudad, halo misakadademak hani?

6. Samaanen iso ko demak ngaˈ mikingkiw to Fangcalay Cudad to romiˈamiˈad? (Nengnengen ko coka.)

⁶ Pakayni i Krisciyang, mikingkiw to Fangcalay Cudad ‘o masakalimlaan’ a demak, cowa ko sasakahmawen. (Filipi 1:10) Pakayni misamaan a mahemek, sanay ko ˈOlic saka 1 fedengan: ‘Maolahay cingra to sarikec ni Yihofa, to romiˈad to lafii miˈosi a midotim.’ (ˈOlic 1:1, 2) Paihkalay koni, padetengen ita milimasmas ko toki a mikingkiw to Fangcalay Cudad. Mihaenay, o manan a tatokian ko sangaˈayay hani? Cowa ka hecahecad ko sapacaˈof maemin. Masakalimlaan  i, i masaˈosiay iso a toki ko piˈosi. Salikaka ci Wiketo sanay: “O papacem ko mako a kaolahan mikingkiw to Fangcalay Cudad. Soˈlin cowa ka olah pacelem ko kalomowad no mako, kawra kanikaran i, madoloay kako a misarocod mikingkiw, samanen tingalaway ko ponoˈ itiya, awaay ko mamicariraw.” Mahaenay kiso han? Licayen ko niyah: “O manan a tatokian ko sangaˈayay ako a mikingkiw to Fangcalay Cudad hani?”

DOTIMEN KO MAˈOSIAY

7-8. Ano sakaciepocaw mikitini i piˈosi to Fangcalay Cudad i, hamaan midemak to manan? Tano tinakoen a mitadtad.

⁷ Na maˈosiay iso ko manan a lalakaw, ikor tangsolay a mawalawal han? Mahaenay kita alatek. Kaadayayan i, nolatekay miˈosi to Fangcalay Cudad mahecadayto. Adihayay ko maˈosiay ita a lalakaw, kawra cowa ka manaˈeng i falocoˈ. Alatek patirengen ita ko patosokan, romiˈamiˈad miˈosi to pina fedengan. Tada kasemeranto koni, dofdofen ko patosokan ita padadotoc a misaˈicel. (1 Korinto 9:26) Kawra o piˈosi aca cowa ka edeng, ano sapilifokaw to taˈangayay epoc i, wa mangalef ko pisaˈicel ita ngaˈ.

⁸ Haratengen koniya sapatinako: O ˈorad palahaday to pinaloma, kawra, ano yasiyas sa mataktak ko ˈorad, cowato ka molahad ko pinaloma. Misamaanay hani? Samanen micalep ko ˈorad i sera, mipahaled to pinaloma, misaaliay to toki. Ano cowa picalep i sera ko nanom, adihayto ko ˈorad awaay ko kapo. Mahecaday toni, hamaan a calohan ita miˈosi ko Fangcalay Cudad, samanen ano mahaen wa kaliki mapawan koya miˈosian a lalakaw, cowato ko hasakadademaken itini i kaˈorip.—Yakop 1:24.

9. Ano macerid kita solap han ko piˈosi to Fangcalay Cudad, samaan a misalof hani?

⁹ Nolatekay, solap hananay iso minengneng ko Fangcalay Cudad han? Samaanen iso misalof hani? Cedengen a miˈosi, saharateratengen a midotim. Midotim sa i, pasangaran nanay kiso alatek. Kawra, mihaen ko demak madoloay, miˈosi i, paterep, saharateratengen  ko maˈosiay a lalakaw o ngaˈayayto. Hanaca nayaren ko toki a miˈosi, ngaˈ ira ko toki a midotim. Roma i, ano cowa ka sapinayaraw to piˈosi a toki, ˈesalen ko aˈosien a lalakaw, ho ira ko toki a midotim. Sanay ci Wiketo: “Cowa ka adihayen ako ko miˈosian a sinael, alatek cecayay aca ko fedengan. Roma i, pacelemay kako miˈosi. Mansa misaromiˈaday kako a midotim to maˈosiay a sinael.” Ano samaanayto ko pakayraan no miso, piliˈen ko matatodongay to niyah a pakayraan, a milifok to haepoc i pikingkiw to Fangcalay Cudad.—ˈOlic 119:97; nengnengen ko sapatongal lalakaw “ Ngaˈayay Dotimen a Salicay.”

10. Patinakoen a mitadtad, misamaan misakadademak to mananamay iso hani? (1 Tisalonika 5:17, 18)

¹⁰ Ano hacowaayto ko pikingkiw iso to Fangcalay Cudad, hakowaay ko halafin, saharateratengen sasamaan a misakadademak. Ano miˈosi kiso to Fangcalay Cudad i, salalicayen ko niyah: “Nohatini anoikor sasamaanen a misakadademak ko mananamay ako?” Tinakoen, mikingkiw kiso to 1 Tisalonika 5:17, 18. (ˈOsien.) Maherek a miˈosi toniya sinael i, haratengen, hakowaay ko picerid iso mikifalocoˈ a mitolon. O roma i, ngaˈayay tikolen ko aakoˈiden iso a demak, ikor, alatek piliˈen ko tolo a demak to sapiakoˈidaw iso ci Yihofaan. Ano misamacayay kiso a midotim, soˈlin cowa ka halafin, wa ngaˈay padama tisowanan cipinang to Kimad no Kawas, halo sakadademaken i nokaˈorip. Haratengen hena, to romiˈamiˈad miˈosi kiso to Fangcalay Cudad, padadotoc a midotim, o sakaciepoc iso koni! Wa padadotoc kiso a macakat misakadademak to Kimad no Kawas. Kawra, ano mahapinangay iso to adihayay ko sasalofen no niyah i, sasamaan ko demak hani?

PATIRENG TO MATATODONGAY A PATOSOKAN

11. Nolatekay, hano matoled kiso hani? Patinakoen hena.

¹¹ Ya mikingkiw kiso to Fangcalay Cudad, halo misakadademak to safalod no Fangcalay Cudad i, alatek masomaday ko falocoˈ iso. Misamaanay hani? Haratengen hena, anini miˈosi kiso to Fangcalay Cudad, minanam to hamaan a misakakinih to tamdaw. (Yakop 2:1-8) Mahapinang iso to sasalofen ko niyah a micada to tao, ano mahaenay i, misaˈosiay kiso a mifalic to niyah. Tada ngaˈayay koni! Tocila romiˈad, maˈosiayho iso ko cecay a sinael, o Krisciyang mamisinanot to sasowalen no niyah. (Yakop 3:1-12) Mahapinang ko sowal iso cowa ko pakalalokay to tamdaw, mansa, salofen ko sasowalen a  tawlik. Saka tolo romiˈad i, maˈosiay iso, o Krisciyang aka a malawidang noniya hekal. (Yakop 4:4-12) Mahapinang iso ko niyah, mamisinanot a mipiliˈan to lawla. Saka sepat romiˈad, mahapinangay iso adihayayho ko sasalofen no niyah a matoleden!

12. Ano miˈosi kiso to Fangcalay Cudad i, mahapinang misaaliay to sasalofen ko niyah, hano hamaan a matoled hani? (Nengnengen ko ilaenoay safanaˈ.)

¹² Ano mahapinangay iso misaaliay to sasalofen ko niyah, hamaan a matoled, samanen paihkalay koni, iraay ko matatodongay a waywayan iso. O misapoeneray, soˈlinay a tamdaw miˈosi to Fangcalay Cudad i, wa mahapinang to icowaay ko sasalofen no niyah. a O roma i, haratengen micaˈedong to ‘faelohay a capeling’ i, wa padadotoc a paihkal. (Kolosay 3:10) Mihaenay, o manan ko hapapadama tisowanan, padadotoc misakadademak to Kimad no Kawas hani?

13. Samaanen iso patireng ko patosokan? (Nengnengen ko coka.)

¹³ Hamaan adihayen ko patirengan a patosokan, emin han a misakadademak ko mananamay, aka haenen ko harateng. (Taneng 11:2) Tanamen koniya pakayraan: Tiliden ko hasasalofen no miso a demak, piliˈen ko cecay tosa a talaˈayaw midemak, ˈosawto i, ikor sato a misalof. Sasamaanen iso a misatapang midemak hani?

14. O manan ko isaˈayawen cangacangen iso a patosokan hani?

¹⁴ Ya madoloay a patosokan anca o ihkalay a dangoc isaˈayawen a misalof no miso. Ikor, ngaˈayay sakadademaken iso ko mitepangan no likakawa mikilim to milingatay a lalakaw, tinakoen Pirorodan to Mitepangan Cudad no Mikecolay, anca Pirorodan to Mitepangan Cudad  no Misawacayay Tamdaw ni Yihofa. Pakayni patosokan iso a mitolon, mingitangit to sapadama ni Yihofa, ‘pairaen ko makalimay harateng ato ˈicel a midemak.’ (Filipi 2:13) Ikor, misakadademak tora mananamay iso. Ano mahapinang iso palahadayto to makapahay capeling ko niyah, anca misalof i nokaˈorip, wa ciˈicelto kiso midemak to roma a patosokan, madoloho padadotoc a misalof.

‘PAPISAKADADEMAKEN’ KO KIMAD NO KAWAS I TISOWANAN

15. O finawlan ni Yihofa ato ˈalomanay miˈosi aca to Fangcalay Cudad a tamdaw, icowaay ko kasasiroma hani? (1 Tisalonika 2:13)

¹⁵ Kinapinapinaayto miˈosi kako to Fangcalay Cudad sanay ko roma tamdaw, kawra soˈlinay pakasoˈlin cangra to Fangcalay Cudad han? Misakadademakan nangra ko safalod no Fangcalay Cudad, misalof to kaˈorip no niyah han? Kaadayayan i, cowa. Kawra o finawlan ni Yihofa cowa ka hecad cangranan. Mahecad to saka 1 hahekalan a Krisciyang, pakasoˈlinay kita to Fangcalay Cudad o ‘soˈlinay ko Kimad no Kawas.’ O roma i, misaˈicelay kita a misakadademak to Kimad no Kawas i kaˈorip no mita.—ˈOsien ko 1 Tisalonika 2:13.

16. O manan ko papadama kitanan, misakadademak to Kimad no Kawas hani?

¹⁶ Miˈosi ato misakadademak to Kimad no Kawas cowa ko madoloay. Alatek awaay ko toki ita miˈosi, anca caloh sa kita misolap a miˈosi, cowa ka misongilaˈ a midotim, anoca mahapinangay ita adihayayho ko sasalofen no niyah a matoleden. Ano samaanto ko pasangar i, hamaan a calemcem, ano tiˈeren ko sapadama ni Yihofa, wa pakaremo kiso. Nanay seteken ita ko falocoˈ, sakadademaken ko Kimad no Kawas, coko pitengil aca. Ano misaˈicel kita mihaen to demak i, wa matomes ko sapalemed, mangalef ko lipahak ita!—Yakop 1:25.