ˈAyaw no mikingkiw to lalakaw i, alatek saan kita miharateng: “O manan ko mamananam ako anini hani?” Kawra, ka pisinanot kita, hamaan tano niyah sa a harateng, teloc i, cowa ka hapinang ko sapakafanaˈ ni Yihofa. Mihaenay, itini pikingkiw ita misamaan mitawmec to matatodongay a waywayan hani?

Mitolon micangacang to taneng. Ano mikingkiw i, cangacangen ci Yihofa padama tisowanan, mahapinang to nohatini o manan ko sapakafanaˈ Ningra tisowanan. (Yakop 1:5) Hamaan o kafanaˈan aca iso a kimad ko kasaloan.—Taneng 3:5, 6.

Sakadademaken ko Kimad no Kawas i kaˈorip iso. ‘Kimad no Kawas o maˈoripay.’ (Hipray 4:12) Mihaenay, ano mikingkiw kita i, pakafanaˈay ko Fangcalay Cudad kitanan to faelohay a kimad, wa ngaˈay itini kasasiroma a pakayraan padama kitanan. Kawra, sapisakadademakaw to Kimad no Kawas i kaˈorip ita i, pairaen ko matatodongay a waywayan ita wangaˈ, makahi micada to sapakafanaˈ no Kawas.

Layapen ko sapatahka ni Yihofa a tangidaf. Pafelian ni Yihofa kita to cihaleday a kakaenen no pakasoˈlinay falocoˈ, mahecaday to patahkaay to kadofahay a ‘tangidaf.’ (Isaya 25:6) Mihaenay, hamaan maonic to kapiliˈan iso a ‘kakaenen.’ Ano caka maonic kiso to kakaenen i, wa adihay ko epoc ato lipahak.