Ya patireng ci Yis to Lafi no Tapang i, awaay koya 70 a nisawawaan, soˈlin mahaen, cowato ka pihayda ci Yis cangranan anca miliyasay cangra cowa ka saan. Itiya, oha kalacafay aca ci Yis toya tarokos.

Ano oya 12 tarokos anca 70 nisawawaan, sahto o mihaydaan ni Yis. Nai ˈalomanay a nisawawaan mipiliˈ ci Yis to 12 faˈinayan, malo o tarokos hananay. (Luka 6:12-16) Nai Kalili ci Yis misaˈopoan ningra ko 12 tarokos, ‘ocoran ni Yis cangra patenak to ngaˈayay lihaf no Kitakit no Kawas, miadahho to adadaay.’ (Luka 9:1-6) Ikor i Yutiya, ‘mipiliˈan ni Yis ko 70 tamdaw, a miocor kahatosatosa’ a malingad mitosil. (Luka 9:51; 10:1) Mansa, ano icowato i, iraayto ko mikotoday ci Yisan a tamdaw mitenak to lihaf no Kitakit no Kawas.

Malo nisawawaan ni Yis ko Yutaya a tamdaw ikor, kamayan milisin to Pitaˈlifan a Lisin, alatek malacafayay to paro no lomaˈ cangra a misalisin. (Kasadakan 12:6-11, 17-20) ˈAyaw no patay ni Yis, mitaaway to tarokos tayra i Yirusalim. Kawra, cowa ka haop koya i Kaliliay, Yutiya atoya Piliaay a nisawawaan, malacafay misikay to mikiriwiˈay a Pitaˈlifan a Lisin. Itiniay mahapinang, toniya lafi o sakalacafayaw aca to tarokos ci Yis. Hananay ningra ko tarokos: ‘ˈAyaw no patay o harateng ako, oha kakalacafay tamowanan komaen toniya Pitaˈlifan a Lisin a lafi.’—Luka 22:15.

Mihaen ko demak ni Yis, iraay ko kalimlaan a lalangian. Wa kalikito cingra kinafalah to ˈorip, malo o ‘tofor a siri no Kawas,’ ‘mifalah to raraw no tamdamdaw.’ (Yohani 1:29) Wa i Yirusalim mifekad koniya demak, samanen marariday ko tamdaw i Yirusalim a mipatafang to sapatoˈaya i Kawas, Pitaˈlifan a Lisin a tofor a siri papiharatengay to Israil tamdaw, nai Icip a milidong ci Yihofa cangranan. Kawra o kinafalah ni Yis to ˈorip palaˈosiay to taˈangayay a araaw, wa lidongen ningra ko tamdamdaw nai raraw ato patay! (1 Korinto 5:7, 8) I pipatafang ni Yis to ˈorip, 12 tarokos mamalo taˈenengan no kasakopang no Krisciyang. (Ifiso 2:20-22) Kalimlaan i, fangcalay niyaroˈ a Yirusalim iraay ko ‘12 taˈenengan,’ matiliday ko ‘ngangan no 12 tarokos no tofor a siri.’ (Paˈarawan 21:10-14) I pipalaˈosi to araaw no Kawas, madimadiay a tarokos iraay ko masakalimlaan a ˈinorong, mansa, sapikalacafayaw ci Yis to tarokos a milisin to salikorayto a Pitaˈlifan a Lisin, ikor malacafay misikay to Lafi no Tapang, o matatodongay koni.

Oya 70 ato roma nisawawaan cowa kalacafay ci Yisan komaen to Pitaˈlifan a Lisin a lafi. Soˈlin mahaen, polong a madimadiay nisawawaan wa milifok to epoc nai mipatirengan ni Yis a Lafi no Tapang. Ano oyato manilnilay no fangcalay saocor a Krisciyang, wa malo mikiˈokay a tamdaw no Hongti Kitakit a sakiˈok cangra, oniya sakiˈok oya masowalay ni Yis toya dadaya.—Luka 22:29, 30.