Tyˈo̱o̱tsˈom sˈaaⁿ chaˈtso ˈnaⁿ na niom nnom Tyuaa ndoˈ tsjo̱ˈluee. Jom chaˈtso xjeⁿ mˈaaⁿñê ndoˈ tijom ntycwii na mˈaaⁿñê (Salmo 90:2). Jom mañenquiaaⁿ ñˈoom na ya na tooˈ naquiiˈ Biblia (1 Timoteo 1:11). Ee na jom tquiaaⁿ na tando̱o̱ˈa, macaⁿnaˈ na nlˈaaya ˈnaⁿ na lˈue tsˈoom ndoˈ macanda̱ jom nlaˈtˈmaaⁿˈndyo̱. Catseiˈnaⁿˈ Apocalipsis 4:11.

Meiⁿcwii tsˈaⁿ tyoontyˈiaaˈ Tyˈo̱o̱tsˈom ee jom cwiluiiñê cwii espíritu, titseijomnaˈ jom chaˈxjeⁿ jaa, nnˈaⁿ seiˈtsˈo (Juan 1:18; 4:24). Sa̱a̱, nnda̱a̱ nntaˈjnaaⁿˈya naya na tseixmaaⁿ xeeⁿ na ntyˈiaayaaya ˈnaⁿ na sˈaaⁿ. Chaˈna, chaˈtso nnom ta̱ na niom oo ljaaˈ na sˈaaⁿ cwitˈmo̱o̱ⁿnaˈ cwanti wiˈ tsˈoom jaa ndoˈ na jndo̱ˈ tsˈoom. Ndoˈ na jeeⁿ tˈmaⁿ tsjo̱ˈluee na sˈaaⁿ maˈmo̱ⁿnaˈ na tˈmaⁿ najneiⁿ. Catseiˈnaⁿˈ Romanos 1:20.

Cwiicheⁿ nnom na nnda̱a̱ nntaˈjnaaⁿˈya Tyˈo̱o̱tsˈom, joˈ na nlaˈnaaⁿya Biblia. Juunaˈ matsonaˈ na machˈeeⁿ cwenta jaa, mati cwaaⁿ ˈnaⁿ na cjaweeˈ tsˈoom ndoˈ ˈnaⁿ na ticjaweeˈ tsˈoom ndoˈ chiuu waa machˈeenaˈ nntyjeeⁿ quiana nnˈaⁿ cwilˈana ˈnaⁿ na ya oo ˈnaⁿ na tiya. Catseiˈnaⁿˈ Salmo 103:7-10.

Jesús tsoom: «Tsotya̱a̱yâ na mˈaaⁿndyuˈ tsjo̱ˈluee, catseitˈmaaⁿˈñenaˈ xueˈ» (Mateo 6:9). Joˈ chii, meiⁿ na jndye nnˈaⁿ cwiluena Ta oo Tsotya̱a̱yâ oo ntˈomcheⁿ nnom, quiana cwilcwiiˈna Tyˈo̱o̱tsˈom, jom waa xueeⁿˈeⁿ. Ndoˈ chaˈxjeⁿ ñˈoom na cwilaˈneiⁿ nnˈaⁿ, maluaaˈ tjachuiiˈ na cwiluena xueeˈ Tyˈo̱o̱tsˈom. Ñequio ñomndaa joˈ Jiowa ndoˈ ñomtsco joˈ Jehová oo Yavé. Catseiˈnaⁿˈ Salmo 83:18 (82:19 ñˈeⁿ Biblia).

Naquiiˈ ntˈom Biblia jlaˈjndyoona Jiowa ndoˈ tioona Tyˈo̱o̱tsˈom oo Ta. Sa̱a̱ xjeⁿ najndyeecheⁿ, xueeˈ Tyˈo̱o̱tsˈom teiljeiinaˈ naquiiˈ Biblia ntquieeˈ meiⁿ ndiiˈ. Ndoˈ Jesús quiana  tyoˈmo̱o̱ⁿ nda̱a̱ nnˈaⁿ, ñequiiˈcheⁿ ñeteilˈueeˈñê xueeˈ Tyˈo̱o̱tsˈom. Catseiˈnaⁿˈ Juan 17:26.

Cantyˈiaˈ video ¿Aa waa xueeˈ Tyˈo̱o̱tsˈom?

Xeeⁿ na mayuuˈcheⁿ na wiˈ tsˈom Jiowa jaa, ¿chiuu tsˈiaaⁿˈ na maˈñeeⁿ na cwintyˈiaaya nawiˈ? Jndye nnˈaⁿ cwilaˈtiuuna na Tyˈo̱o̱tsˈom macoˈwiˈ jaa cha na ntyˈiaaⁿˈaⁿ aa nnaaⁿndyo̱. Sa̱a̱ meiⁿchjoo tiyuuˈ ñˈoomwaˈ. Catseiˈnaⁿˈ Job 34:10.

Jiowa mañenquiaaⁿ na jaa ntjeiiˈndyo̱ chiuu waa ñeˈtando̱o̱ˈa. Sa̱a̱ yati na ntjeiiˈndyo̱ na nlˈaa ˈnaⁿ na jom lˈue tsˈoom (Josué 24:15). Jndye nnˈaⁿ na candyaa mˈaⁿna joˈ na cwilˈana natia ndoˈ ncˈe joˈ jeeⁿ jndye nawiˈ mˈaaⁿ. Joˈ na Jiowa matseiichjooˈnaˈ tsˈoom na luaaˈ cwilˈana. Catseiˈnaⁿˈ Génesis 6:5, 6.

Jiowa wiˈ tsˈoom jaa ndoˈ lˈue tsˈoom na nncˈo̱o̱ⁿ na neiⁿnco nˈo̱o̱ⁿya, ncˈe joˈ, tajndye xuee cwitjo̱o̱ ndoˈ nquiño̱o̱ⁿ na maquiiˈnaˈ nnˈaⁿ ndoˈ nawiˈ. Naquiiˈ leisiom 8, matsonaˈ chiuu tsˈiaaⁿˈ na maˈñeeⁿ na niom nawiˈ. Catseiˈnaⁿˈ 2 Pedro 2:9 ndoˈ 3:7, 13.

Jiowa mañenquiaaⁿ na nnda̱a̱ nlaˈcandyooˈndyo̱ nacañoomˈm ñequio tyˈoo. Ee mˈaaⁿˈ tsˈoom cwii ndoˈ cwiindyo̱ jaa (Salmo 65:2; 145:18). Mati, cjee mˈaaⁿ na ntseitˈmaⁿ tsˈoom jaa ndoˈ mantyˈiaaⁿˈaⁿ na cwilˈaaya jndyaaˈ na nlˈaa ˈnaⁿ na lˈue tsˈoom, meiⁿ na nchii chaˈtso xjeⁿ macwjiˈyanaˈ. Joˈ chii, meiⁿ na nnˈaⁿ jnaⁿ jaa, nnda̱a̱ nncˈo̱o̱ⁿ na jeeⁿ ya ñˈoom jaa ñequio jom. Catseiˈnaⁿˈ Salmo 103:12-14 ndoˈ Santiago 4:8.

Tyˈo̱o̱tsˈom tquiaaⁿ na tando̱o̱ˈa, joˈ na jom nncˈo̱o̱ⁿ na wiˈti nˈo̱o̱ⁿya (Marcos 12:30). Cwitˈmo̱o̱ⁿya na wiˈ nˈo̱o̱ⁿya jom xeeⁿ na ntaˈjnaaⁿˈtya̱a̱ya cantyja ˈnaaⁿˈaⁿ ndoˈ cwilaˈcanda̱a̱ya chiuu matsa̱ˈntjoom na calˈaaya. Ndoˈ xjeⁿˈñeeⁿ, nntseindyooˈtinaˈ jaa ñequio Tyˈo̱o̱tsˈom. Catseiˈnaⁿˈ 1 Timoteo 2:4 ndoˈ 1 Juan 5:3.