Cwitjo̱o̱cheⁿ na nluiiñê nnom Tyuaa, Jesús jnda̱ ñetˈoom tsjo̱ˈluee chaˈxjeⁿ espíritu, nchii chaˈxjeⁿ jaa (Juan 8:23). Jom najndyee na sˈaa Jiowa ndoˈ teijneiⁿ na tuii chaˈtso ˈnaⁿ na niom. Biblia matsonaˈ na «ñenqueⁿ» na cwiluiiñê jnda Tyˈo̱o̱tsˈom ee na manda̱ jom, na nquii Tyˈo̱o̱tsˈom sˈaa (Juan 1:14). Mati matseicajndyunaˈ jom «Ñˈoom» ee jom tyotseicwanoom ñˈoom ˈndyoo Tsotyeeⁿ nda̱a̱ nnˈaⁿ. Catseiˈnaⁿˈ Proverbios 8:22, 23, 30 ndoˈ Colosenses 1:15, 16.

Tyˈo̱o̱tsˈom jñoom Jnaaⁿ nnom Tyuaa. Seicwanoom na wandoˈ Jesús tsˈom tsiaatsjaaⁿˈ cwii yuscundyua judía na jndyu María na tyoocomˈaaⁿ ñˈeⁿ tsaⁿsˈa. Joˈ chii, nchii tsˈaⁿ seiˈtsˈo tsotyeeⁿ (Lucas 1:30-35). Ndyee ˈnaⁿ na jndyotsˈa Jesús nnom Tyuaa: 1) jndyoˈmo̱ⁿ ñˈoom na mayuuˈ cantyja ˈnaaⁿˈ Tyˈo̱o̱tsˈom, 2) tˈmo̱ⁿ na nnda̱a̱ nlaˈcanda̱a̱ˈndyo̱ ˈnaⁿ na lˈue tsˈom Tyˈo̱o̱tsˈom meiⁿ na cwiwino̱o̱ⁿya nawiˈ, ndoˈ 3) jndyocueeⁿˈeⁿ cha na «nluiˈnˈmaaⁿdye» nnˈaⁿ. Catseiˈnaⁿˈ Mateo 20:28.

Cwii tsˈaⁿ na mˈaaⁿ jnaⁿ tixocandyaañe xeeⁿ na tjaˈnaⁿ tsˈaⁿ na nntiomlˈua cwentaaⁿˈaⁿ (Éxodo 21:29, 30). Tyˈo̱o̱tsˈom tjaˈnaⁿ sˈaaⁿ nnˈaⁿ na lquieeˈndyena ndoˈ ncwjena. Nquiuya na luaaˈ ee Jiowa tsoom nnom Adán: xeⁿ na ntsaˈ jnaⁿ oo ntseiquieeˈ tsˈomˈ, nncˈioˈ. Joˈ chii, xeⁿ na jlaˈcanda̱a̱ˈna ñˈoom na tso Tyˈo̱o̱tsˈom, tîcwjeena (Génesis 2:16, 17; 5:5). Biblia matsonaˈ na jnaaⁿˈ Adán joˈ na cwiwje nnˈaⁿ. Ñequio cwiicheⁿ ñˈoom, jnaaⁿˈ Adán joˈ na tˈuii jnaⁿ jaa, ndoˈ ncˈe joˈ cwiwja̱a̱. Joˈ na  macaⁿnaˈ cwii tsˈaⁿ na nntseindyaañe jaa naquiiˈ jnaⁿ ndoˈ na cwiwja̱a̱ya. Catseiˈnaⁿˈ Romanos 5:12 ndoˈ 6:23.

Sa̱a̱, ¿ˈñeeⁿ juu nnda̱a̱ nntiomlˈua jnaaⁿya chana ndyaandyo̱ na cwiwja̱a̱ya? Meiⁿcwii tsˈaⁿ xocanda̱ nntiomlˈua jnaaⁿˈ cwiicheⁿ tsˈaⁿ ee chaˈtsondyo̱ nnˈaⁿ jnaⁿ jaa. Catseiˈnaⁿˈ Salmo 49:7-9.

Jesús meiⁿcwii jnaⁿ tîcatsˈaaⁿ ee canda̱a̱ˈya tseixmaaⁿ, nchii chaˈxjeⁿ jaa. Tueeⁿˈeⁿ chana nntiomlˈuaaⁿ jnaaⁿya. Quiana jñom Tyˈo̱o̱tsˈom Jnaaⁿ na jndyocueˈ cwentaaya, tˈmo̱o̱ⁿ na jeeⁿ ndyaˈ tˈmaⁿ wiˈ tsˈoom nnˈaⁿ. Ndoˈ mati Jesús tˈmo̱o̱ⁿ na wiˈ tsˈoom jaa quiana sˈaaⁿ ˈnaⁿ na tso tsotyeeⁿ ndoˈ tueeⁿˈeⁿ cha na ndyaandyo̱ naquiiˈ jnaⁿ ndoˈ na cwiwja̱a̱ya. Catseiˈnaⁿˈ Juan 3:16 ndoˈ Romanos 5:18, 19.

Cantyˈiaˈ video ¿Ljoˈ tsˈiaaⁿˈ na tueˈ Jesús?

Quiana ñetˈom Jesús nnom Tyuaa, seinˈmaaⁿ nnˈaⁿwii, seicwandoˈxcoom lˈoo ndoˈ teijneiⁿ nnˈaⁿ na cwintyˈia nawiˈ, luaaˈ tˈmo̱o̱ⁿ ˈnaⁿ na nntsˈaaⁿ cwentaa nnˈaⁿ na tyeⁿ cwilaˈyuˈ ñequio Tyˈo̱o̱tsˈom xuee na quiandyo (Mateo 15:30, 31; Juan 5:28). Quiana tueˈ Jesús, Tyˈo̱o̱tsˈom seicwandoˈxco jom chaˈxjeⁿ espíritu (1 Pedro 3:18). Jnda̱nquia tyomeinoomˈm ntyjaaˈ tsˈo̱ Tyˈo̱o̱tsˈom ntyjaya xjeⁿ xuee na toˈñom na nntsa̱ˈntjoom nnom Tyuaa (Hebreos 10:12, 13). Najeˈ, Jesús matsa̱ˈntjoom xjeⁿ cañoomˈluee ndoˈ nnˈaⁿ na cwilaˈjomndye ñˈeⁿñe cwilaˈneiⁿna ñˈoom xco na ya waa chaˈwaa tsjoomnancue. Catseiˈnaⁿˈ Daniel 7:13, 14 ndoˈ Mateo 24:14.

Jeˈ na jnda̱ toˈñom nˈiaaⁿ, tajndye xuee ndoˈ ntseicatsoom nnˈaⁿ na wiˈndye ndoˈ chaˈtso nawiˈ. Chaˈtso nnˈaⁿ na tyeⁿ cwilaˈyuˈ ñequio Jesús ndoˈ cwilaˈcanda̱na ñˈoom na matsa̱ˈntjom, nncˈomna na neiⁿnco nˈomna, quiana nntsˈaanaˈ na neiⁿncooˈ nnom Tyuaa. Catseiˈnaⁿˈ Salmo 37:9-11.