Ñˈoom na ya cantyja ˈnaaⁿˈ na nntando̱o̱ˈa na macanda̱ nnom Tyuaa, ndiiˈnaˈ naquiiˈ Biblia (Salmo 37:29). Biblia tseixmaaⁿnaˈ 66 libro ndoˈ Tyˈo̱o̱tsˈom tjeiiˈñe 40 naⁿnom na jlaˈljeii juunaˈ. Moisés seiljeiⁿ ˈom libro najndyee wjaa 3.500 ndyu ndoˈ wjaa chaˈna 1.900 ndyu na apóstol Juan seiljeiⁿ libro na cwii manda̱. Ñˈoom na tooˈ naquiiˈ Biblia jnaⁿnaˈ na mˈaaⁿ Tyˈo̱o̱tsˈom. Jom teilˈueeˈñê espíritu santo na ñetsoom nda̱a̱na ñˈoom na jlaˈljeiina (2 Samuel 23:2). Joˈ chii, jlaˈljeiina ñomtiuu ˈnaaⁿˈ Tyˈo̱o̱tsˈom, nchii ñomtiuu ˈnaaⁿna. Ncˈe joˈ, Biblia cwiluiinaˈ ñˈoom ˈndyoo Jiowa. Catseiˈnaⁿˈ 2 Timoteo 3:16 ndoˈ 2 Pedro 1:20, 21.

Cantyˈiaˈ video ¿ˈÑeeⁿ juu ñomtiuu ˈnaaⁿˈ teiljeii naquiiˈ Biblia?

Biblia jnaⁿnaˈ na mˈaaⁿ Tyˈo̱o̱tsˈom. Ndoˈ nquiujndaaˈndyo̱ na luaaˈ, ee chaˈtso xjeⁿ matseicanda̱a̱ˈñˈeⁿnaˈ ñˈoom na matsoom na nntsˈaaⁿ, cwii ˈnaⁿ na xocanda̱ nntsˈaa na cweˈ tsˈaⁿ (Josué 23:14). Manda̱ nquii Tyˈo̱o̱tsˈom na chaˈtso nnda̱a̱ nntsˈaa, nnda̱a̱ nntsˈaaⁿ na luaaˈ. Catseiˈnaⁿˈ Isaías 42:9 ndoˈ 46:10.

Xeeⁿ na mˈaaⁿ Tyˈo̱o̱tsˈom jnaⁿnaˈ, xotseijomnaˈ ñequio meiⁿcwii cwiicheⁿ libro. Meiⁿ meiⁿyomcheⁿ nnˈaⁿ jnda̱ mawaa Biblia ˈnaaⁿna ndoˈ siaⁿtocheⁿ nnom ñˈoom na jnda̱ teiljeiinaˈ. Meiⁿ na jnda̱ teiyo teiljeiinaˈ, nnˈaⁿ na jndye cwilaˈnaaⁿ cwiliuuna na mayuuˈ ñˈoom na matsonaˈ. Mati, naⁿnom na jlaˈljeiinaˈ ñecwii ñomtiuu jlaˈljeiina. * Naquiiˈ cwii cwii nntsquii tsom ˈnaaⁿnaˈ cwiwitquiooˈya na wiˈ tsˈom Tyˈo̱o̱tsˈom jaa ndoˈ xjeⁿ jeˈcheⁿ ndicwaaⁿ waa najndeiinaˈ na ntseichuiiˈnaˈ chiuu waa na wandoˈ tsˈaⁿ. Joo ˈnaⁿmeiiⁿ cwilˈa, na meiⁿyomcheⁿ nnˈaⁿ cwilaˈyuuˈna na Biblia cwiluiinaˈ ñˈoom ˈndyoo Tyˈo̱o̱tsˈom. Catseiˈnaⁿˈ 1 Tesalonicenses 2:13.

Cantyˈiaˈ video ¿Chiuu tsˈiaaⁿˈ na nnda̱a̱ nlaˈyuuˈa na mayuuˈ ñˈoom na matso Biblia?

Biblia matseineiiⁿnaˈ cwii ñˈoom na mañequia na tˈmaⁿ nˈo̱o̱ⁿya. Matseineiiⁿnaˈ ñomtiuu ˈnaaⁿˈ Tyˈo̱o̱tsˈom cwentaa nnˈaⁿ. Matsonaˈ chiuu waa sˈaanaˈ na tsuu, na jeeⁿ neiⁿncooˈ ñetˈom nnˈaⁿ naquiiˈ ntjom Edén ndoˈ chiuu waa nncwixconndaˈnaˈ. Catseiˈnaⁿˈ Apocalipsis 21:4, 5.

Naquiiˈ Biblia tooˈ ljeii ndoˈ ñˈoomya, na cwitˈmo̱o̱ⁿnaˈ chiuu waa na ncˈo̱o̱ⁿya na yati. Mati matsonaˈ chiuu sˈaa Jiowa ñequio nnˈaⁿ tiempo teiyo, luaaˈ maˈmo̱o̱ⁿnaˈ naya na tseixmaⁿ Tyˈo̱o̱tsˈom. Ncˈe joˈ, Biblia mateijndeiinaˈ jaa na nntaˈjnaaⁿya Tyˈo̱o̱tsˈom ndoˈ chiuu nncˈo̱o̱ⁿ na jeeⁿ ya ñˈoom jaa ñˈeⁿñê. Catseiˈnaⁿˈ Salmo 19:7, 11; Santiago 2:23, ndoˈ 4:8.

Cha na nnˈaⁿ calaˈno̱ⁿˈna ljoˈ maˈmo̱ⁿ ljeii na teiyo teiljeii, Jesús seijndaaˈñeyaaⁿ joonaˈ nda̱a̱na. Mati naquiiˈ tsomwaa tooˈ versículo na nnteijdeiinaˈ na nlaˈno̱o̱ⁿˈa ñˈoom na maˈmo̱ⁿ Biblia. Catseiˈnaⁿˈ Lucas 24:27, 45.

Nquiuyaayâ na nncjaaweeˈ tsˈomˈ na nljeiˈtiˈ cantyja ˈnaaⁿˈ ñˈoom na ya na mañequia Tyˈo̱o̱tsˈom nda̱a̱ya. Sa̱a̱ jndye nnˈaⁿ tiñeˈcandyena juunaˈ, ntˈomcheⁿ cwilaˈwjee na ntseineiⁿ tsˈaⁿ ñˈoommeiiⁿ nda̱a̱na. Sa̱a̱ tindiˈ ñˈoom na cwilueena. Chaˈxjeⁿ matso Biblia, nnˈaⁿ na nlaˈno̱ⁿˈ cantyja ˈnaaⁿˈ Tyˈo̱o̱tsˈom nnda̱a̱ nntaˈndoˈna na macanda̱. Catseiˈnaⁿˈ Juan 17:3.