LEISIOM CHJOO 8
¿Chiuu tsˈiaaⁿˈ na maˈndii Tyˈo̱o̱tsˈom na cwintyˈiaaya nawiˈ ndoˈ natia?
1. ¿Chiuu waa jnaⁿnaˈ na waa natia?
Tiaⁿmpo na Tyˈo̱o̱tsˈom ˈñeeⁿ na nnˈaⁿ catsa̱ˈntjomndye cheⁿquieena jnda̱ teitquiooˈ na xocanda̱a nnquindyo̱o̱na nawiˈ
Quiana Tsaⁿjndii tsoom cantu najndyee jnaⁿnaˈ na waa natia. Jom ñetuiiñe cwii angel na canda̱a̱ˈya na ya, sa̱a̱ ticaljooˈ «ñˈoom na mayuuˈ naquiiˈ tsˈoom» (Juan 8:44). Cheⁿdyo̱ cheⁿ tjatseiqueeⁿ tsˈoom na jom cwitˈmaaⁿˈñe, cwii ˈnaⁿ na manda̱ Tyˈo̱o̱tsˈom tseixmaⁿ. Ñequio cwii cantu seijndo̱ˈ Tsaⁿjndii tsˈom Eva, na catsˈaaⁿ ˈnaⁿ na jom lˈue tsˈoom ndoˈ nchii ˈnaⁿ na tso Tyˈo̱o̱tsˈom. Adán mati seijomñê ñequio Eva na seiquieˈ tsˈoom. Luaaˈ jnaⁿnaˈ nawiˈ ndoˈ na cwiwje nnˈaⁿ. Catseiˈnaⁿˈ Génesis 3:1-6, 19.
Quiana Tsaⁿjndii seijndo̱ˈ tsˈom Eva, jnaⁿnaˈ na mˈaaⁿ nacjooˈ Tyˈo̱o̱tsˈom. Jiowa Tyˈo̱o̱tsˈom na mˈaaⁿ nandyeticheⁿ, manda̱ jom tseixmaⁿ na ntsa̱ˈtjom ndoˈ joˈ na ticjaaweeˈ tsˈom Tsaⁿjndii. Ncˈe na jndyeti nnˈaⁿ mˈaⁿ nacje ˈnaaⁿˈ Tsaⁿjndii ndoˈ tiñeˈnquiandyena na Tyˈo̱o̱tsˈom ntsa̱ˈntjoom joona, joˈ na Tsaⁿjndii cwiluiiñe «tsˈaⁿ na matsa̱ˈntjom nnom tsjoomnancuewaa». Catseiˈnaⁿˈ Juan 14:30 ndoˈ 1 Juan 5:19.
2. ¿Aa waa cwii ˈnaⁿ na tiya sˈaa Tyˈo̱o̱tsˈom?
Chaˈtso ˈnaⁿ na sˈaa Jiowa canda̱a̱ˈyanaˈ. Nnˈaⁿ najndyee ndoˈ angele nnda̱a̱ nlaˈncanda̱a̱ñˈeeⁿna ˈnaⁿ na lˈue tsˈom Tyˈo̱o̱tsˈom (Deuteronomio 32:4, 5). Jom tquiaaⁿ na nnda̱a̱ ntjeiiˈndyo̱ aa nlˈaa ˈnaⁿ na ya oo ˈnaⁿ tiya. Joˈ chii, nlˈaa ˈnaⁿ na lˈue tsˈom Tyˈo̱o̱tsˈom xeeⁿ na wiˈ nˈo̱o̱ⁿya jom. Catseiˈnaⁿˈ Santiago 1:13-15 ndoˈ 1 Juan 5:3.
3. ¿Chiuu tsˈiaaⁿˈ na maˈndii Tyˈo̱o̱tsˈom na waa nawiˈ?
Xjeⁿ ntjom Edén Jiowa tquiaaⁿ cwii tiaⁿmpo na nnˈaⁿ catsa̱ˈntjomndye cheⁿquieena. ¿Chiuu tsˈiaaⁿˈ? Chana mˈmo̱o̱ⁿ na meiⁿcwii gobiernom na ticˈoom nacje ˈnaaⁿˈaⁿ xocanda̱a̱ ntsa̱ˈntjom na ya (Eclesiastés 7:29; 8:9). Naquiiˈ 6.000 ndyu na mˈaⁿ nnˈaⁿ nnom tsjoomnancue, jnda̱ teitquiooˈya na naⁿmaⁿnˈiaaⁿ xocanda̱a̱ nnquindyo̱na ndiaˈ, ntycu, nnˈaⁿ na wiˈndye ndoˈ ˈnaⁿ na tixcwe cwiluii. Catseiˈnaⁿˈ Jeremías 10:23 ndoˈ Romanos 9:17.
Sa̱a̱ xeeⁿ na nñeˈquiandyo̱ na Tyˈo̱o̱tsˈom nntsa̱ˈntjom jaa, ya nncˈo̱o̱ⁿ (Isaías 48:17, 18). Tajndye xuee, ndoˈ ntseicatsuu Jiowa naⁿmaⁿnˈiaaⁿ. Cweˈ tomti nnˈaⁿ na nñeˈquiandye na nntsa̱ˈntjom Tyˈo̱o̱tsˈom nncˈom nnom Tyuaa (Isaías 11:9). Catseiˈnaⁿˈ Daniel 2:44.
Cantyˈiaˈ video¿Chiuu tsˈiaaⁿˈ na maˈndii Tyˈo̱o̱tsˈom na waa nawiˈ?
4. Cantyja na tˈmaⁿ tsˈom Tyˈo̱o̱tsˈom, ¿ljoˈ ˈnaⁿ nnda̱a̱ nlˈaaya?
Tsaⁿjndii tsoom na nnˈaⁿ cwindya̱ˈntjomna nnom Tyˈo̱o̱tsˈom cweˈ ee na waa ˈnaⁿ cwilaˈntyjaaˈ nˈomna. Cantyja na tˈmaⁿ tsˈom Tyˈo̱o̱tsˈom, joˈ na nnda̱a̱ ntˈmo̱o̱ⁿya ñequio chiuu waa na tando̱o̱ˈa na cantuñe Tsaⁿjndii ndoˈ na cwiñequiaandyo̱ na Tyˈo̱o̱tsˈom matsa̱ˈntjom jaa nchii nnˈaⁿ. Catseiˈnaⁿˈ Job 1:8-12 ndoˈ Proverbios 27:11.
5. ¿Chiuu waa nntˈmo̱o̱ⁿya na cwilaˈjomndyo̱ ñequio Tyˈo̱o̱tsˈom?
Ñequio ˈnaⁿ na nlˈaa ntˈmo̱o̱ⁿya aa lˈue no̱o̱ⁿya na Tyˈo̱o̱tsˈom ntsa̱ˈntjom jaa
Najndyee, macaⁿnaˈ na nliuuya chiuu waa lˈue tsˈom Tyˈo̱o̱tsˈom na nlaˈtˈmaaⁿˈndyo̱ jom ndoˈ nntando̱o̱ˈa chaˈxjeⁿ matso Biblia (Juan 4:23). Mati, xeeⁿ na nlˈaa chaˈxjeⁿ Jesús, na tîcatseijomñê ñequio ndmaaⁿˈ naⁿmaⁿnˈiaaⁿ meiⁿ naquiiˈ ndiaˈ, cwitˈmo̱o̱ⁿya na ticˈo̱o̱ⁿ nacje ˈnaaⁿˈ Tsaⁿjndii. Catseiˈnaⁿˈ Juan 17:14.
Tsaⁿjndii cwiwilˈueeˈñê najneiⁿ chana nnˈaⁿ calˈana natia ndoˈ ˈnaⁿ na tsˈiaaⁿ. Quiana cwiˈndya̱a̱ya ˈnaⁿmeiiⁿ, nnˈaaⁿya ndoˈ nnˈaⁿ na ya ñˈoom jaa cweˈ nlaˈjnaaⁿna jaa (1 Pedro 4:3, 4). Xeeⁿ na luaaˈ nntsˈaanaˈ, calaˈjomndyo̱ ñequio nnˈaⁿ na wiˈ nˈom Tyˈo̱o̱tsˈom ndoˈ calaˈcanda̱a̱ˈndyo̱ ljeii ˈnaaⁿˈaⁿ. Ndoˈ luaaˈ ntˈmo̱o̱ⁿya na cantu tso Tsaⁿjndii na meiⁿncwii tsˈaⁿ xocatsˈaa ˈnaⁿ na lˈue tsˈom Tyˈo̱o̱tsˈom quiana mawinoom nawiˈ. Catseiˈnaⁿˈ 1 Corintios 6:9, 10 ndoˈ 15:33.
Nquiujndaaˈndyo̱ na nntseicatsuu Tyˈo̱o̱tsˈom nawiˈ ndoˈ natia ee na wiˈ tsˈom jaa. Ndoˈ nnˈaⁿ na tyeⁿ cwilaˈyuˈ ñequio Tyˈo̱o̱tsˈom nntaˈndoˈna nnom Tyuaa na macanda̱. Catseiˈnaⁿˈ Juan 3:16.
