LEISIOM CHJOO 5
¿Ljoˈ ˈnaⁿ lˈue tsˈom Tyˈo̱o̱tsˈom na nluii nnom Tyuaa?
1. ¿Chiuu tsˈiaaⁿˈ na sˈaa Tyˈo̱o̱tsˈom Tyuaa?
Jiowa sˈaaⁿ Tyuaa cha na nncˈom nnˈaⁿ. Quiana Tyˈo̱o̱tsˈom sˈaaⁿ Adán ndoˈ Eva, tîcatsˈaaⁿ na nncˈomna tsjo̱ˈluee. Ee jnda̱ sˈaaⁿ angele na nncˈom joˈ joˈ (Job 38:4, 7). Jiowa tquiaaⁿ na Adán nncˈom naquiiˈ cwii ntjom na jeeⁿ neiⁿncooˈ na jndyu Edén (Génesis 2:15-17). Mati, tqueeⁿ na Adán ñequio ntseinaaⁿ nncˈomna na neiⁿnco nˈomna nacjooˈ Tyuaa na macanda̱. Catseiˈnaⁿˈ Salmo 37:29 ndoˈ 115:16.
Ntjom Edén na neiⁿncooˈ, chjoowiˈ ntyjaaˈ Tyuaa ñetuaanaˈ. Adán ndoˈ Eva nncˈom jndye ndana ndoˈ cheⁿndyo cheⁿ nlˈana na neiⁿncooˈ chaˈwaa Tyuaa (Génesis 1:28). Nnom Tyuaa nncˈom nnˈaⁿ na macanda̱ ndoˈ tijoom nntsuunaˈ. Catseiˈnaⁿˈ Salmo 104:5.
Cantyˈiaˈ video ¿Chiuu tsˈiaaⁿˈ na sˈaa Tyˈo̱o̱tsˈom Tyuaa?
2. ¿Ljoˈ tsˈiaaⁿˈ na tsuu na neiⁿncooˈ Tyuaa?
Adán ndoˈ Eva jlaˈquieˈ nˈomna nnom Tyˈo̱o̱tsˈom, joˈ na tjeiiⁿˈeⁿ joona naquiiˈ ntjom Edén. Luaaˈ sˈaanaˈ na tsuu ntjomˈñeeⁿ ndoˈ meiⁿcwii tsˈaⁿ tileicanda̱a̱ nntsˈaanndaˈnaˈ. Ndoˈ Biblia matsonaˈ na Tyˈo̱o̱tsˈom ˈñeeⁿ Tyuaa luee nnˈaⁿ na wiˈndye (Job 9:24). Catseiˈnaⁿˈ Génesis 3:23, 24.
Quiajoˈ, ¿aa ñeˈcatsonaˈ na Jiowa taxotseicanda̱a̱ˈñe ñomtiuu ˈnaaⁿˈaⁿ cwentaa nnˈaⁿ? Tjaˈnaⁿ, ee jom tijoom nntsˈaaⁿ cwii ˈnaⁿ na xocwjiˈyanaˈ (Isaías 45:18). Tajndye xuee cwitjo̱o̱ na Tyˈo̱o̱tsˈom nntsˈaaⁿ na nnˈaⁿ nncˈoomnndaˈnaˈ chaˈxjeⁿ najndyeecheⁿ. Catseiˈnaⁿˈ Salmo 37:11, 34.
3. ¿Chiuu waa nntsˈaanndaˈnaˈ na neiⁿncooˈ Tyuaa?
Jesús na cwiluiiñê tsaⁿmaⁿtsˈiaaⁿ naquiiˈ Nˈiaaⁿ ˈnaaⁿˈ Tyˈo̱o̱tsˈom, nntsˈaannaaⁿˈaⁿ na neiⁿncooˈ Tyuaa. Naquiiˈ tiaˈ ˈnaaⁿˈ Tyˈo̱o̱tsˈom na jndyu Armagedón, Jesús ñequio angele nlaˈtsuuna chaˈtso nnˈaⁿ na mˈaⁿ nacjooˈ Tyˈo̱o̱tsˈom. Ndoˈ nntseityeeⁿ Tsaⁿjndii cwii meiⁿ ndyu. Nnˈaⁿ ˈnaaⁿˈ Tyˈo̱o̱tsˈom nluiˈnˈmaaⁿdyena quiana nntsuu, ee Jesús nncwañoomˈm ndoˈ nntsˈaaⁿ cwenta joona, ndoˈ nntaˈndoˈna nacjooˈ Tyuaa na neiⁿncooˈ na macanda̱. Catseiˈnaⁿˈ Apocalipsis 20:1-3 ndoˈ 21:3, 4.
4. ¿Cwaaⁿ nntycwii nawiˈ nnom tsjoomnancue?
¿Cwaaⁿ nntseicatsuu Tyˈo̱o̱tsˈom nawiˈ? Jesús tsoom cwaaⁿ «ˈnaaⁿ» na nntˈmo̱o̱ⁿ na jnda̱ ndyowindyooˈ na nntsuu. Natia na cwilˈa nnˈaⁿ najeˈ, na tˈmaⁿ matseiˈndaaˈnaˈ na tando̱o̱ˈa cwitˈmo̱o̱ⁿnaˈ na «manntsuu tsjoomnancue». Catseiˈnaⁿˈ Mateo 24:3, 7-14, 21, 22.
Naquiiˈ cwii meiⁿ ndyu na Jesús nntsa̱ˈntjoom nnom Tyuaa xjeⁿ tsjo̱ˈluee, nntsˈaaⁿ na nncjaandyue ˈnaⁿ na cwilˈa na cwintyˈiaa nawiˈ (Isaías 9:6, 7; 11:9). Ndoˈ wandyo̱ˈ na cwiluiiñe Rey, mati nntsˈaaⁿ Tyee na tjacantyja na tˈmaⁿ cwiluiiñe, chaˈna nntseinoomˈm jnaaⁿ nnˈaⁿ na wiˈ nˈom Tyˈo̱o̱tsˈom. Joˈ chii Tyˈo̱o̱tsˈom nncwilˈueeˈñe Jesús na nntsˈaaⁿ na nntycwii na cwileiwii nnˈaⁿ, na cwiquiendyena ndoˈ na cwiwjena. Catseiˈnaⁿˈ Isaías 25:8 ndoˈ 33:24.
5. ¿ˈÑeeⁿ nncˈom nnom Tyuaa quiana nntsˈaanaˈ na neiⁿncooˈnaˈ?
Wˈaa yuu na cwilaˈnaaⁿ nnˈaⁿ cantyja ˈnaaⁿˈ Jiowa ncwajnaⁿˈ nnˈaⁿ na ñeˈcalˈa ˈnaⁿ na ya
Nnˈaⁿ na cwilˈa ˈnaⁿ na lˈue tsˈom Tyˈo̱o̱tsˈom nncˈomna nnom Tyuaa na neiⁿncooˈ (1 Juan 2:17). Jesús tsoom nda̱a̱ nnˈaⁿ na cwilaˈjomndye ñˈeⁿñê na calˈueena nnˈaⁿ na ñeˈcalˈa ˈnaⁿ na ya, ndoˈ catˈmo̱o̱ⁿna nda̱a̱na cha na nncjaaweeˈ ntyjii Tyˈo̱o̱tsˈom cantyja ˈnaaⁿna. Jeˈ Jiowa maˈmo̱o̱ⁿ nda̱a̱ meiⁿyomcheⁿ nnˈaⁿ chana nnda̱a̱ nntaˈndoˈna nnom Tyuaa na neiⁿncooˈ (Sofonías 2:3). Nnˈaⁿ na cwiˈoo jomta wˈaa yuu na cwilaˈnaaⁿ nnˈaⁿ cantyja ˈnaaⁿˈ Jiowa, cwilaˈnaaⁿna chiuu waa nncˈomna na wiˈ nˈomna lcuuna, sˈaana ndoˈ ndana ndoˈ nntoˈñoomna ˈnaⁿ na ya na matso Biblia. Catseiˈnaⁿˈ Miqueas 4:1-4.
