Jiowa, Tyˈo̱o̱tsˈom na neiⁿnco tsˈom, mañenquiaaⁿ jndye ñˈoom na ya, ndoˈ lˈue tsˈoom na chaˈtso nnˈaⁿ wˈaa nncˈomna na neiⁿnco nˈomna (1 Timoteo 1:11). Joˈ na tqueⁿ na ntunco nnˈaⁿ. Ndoˈ na ntuncona nnom jue nteijndeiinaˈ na neiⁿncooˈ nlaˈquiena ndana ndoˈ nntsˈaanaˈ na neiⁿnco nˈomna. Nnˈaⁿ ˈnaaⁿˈ Cristo macaⁿnaˈ na nlaˈcanda̱na na nleiljeii tsoomna nnom jue. Catseiˈnaⁿˈ Lucas 2:1, 4, 5.

Tyˈo̱o̱tsˈom lˈue tsˈoom na cwii yusˈa ndoˈ yuscu na jnda̱ tmaⁿˈco chaˈtso xjeⁿ tjoomˈ nncˈomna. Jiowa lˈue tsˈoom na tijoom nñeˈnquioˈnnˈaaⁿna ncˈiaana (Hebreos 13:4). Jndooˈ Jiowa na nntyuiiˈ ljeii ˈnaaⁿˈ tsˈaⁿ (Malaquías 2:16). Sa̱a̱ xeeⁿ na cwii joona cweˈ mˈaaⁿya ñˈeⁿ cwiicheⁿ tsˈaⁿ, quiajoˈ tsˈaⁿ na tjaaˈnaⁿ jnaaⁿˈ, wanaaⁿ na nntyuiiˈ ljeii ˈnaaⁿˈaⁿ ndoˈ nnda̱a̱ nncoconnaaⁿˈaⁿ. Catseiˈnaⁿˈ Mateo 19:3-6, 9.

Jiowa sˈaa yusˈa ndoˈ yuscu chaˈna wendyena nteijndeiina ncˈiaana (Génesis 2:18). Tsaⁿsˈa cwiluiiñê xqueⁿ wˈaa, joˈ chii jom nlˈueeⁿ na nlcwaˈna, liaana ndoˈ mˈmo̱o̱ⁿ nda̱a̱ nnˈaⁿ waⁿˈaⁿ cantyja ˈnaaⁿˈ Tyˈo̱o̱tsˈom. Mati macaⁿnaˈ na nntsˈaaⁿ cwii jndyaaˈ na nteijneiⁿ scoomˈm ee na wiˈ tsˈoom juu. Ndoˈ wendyena macaⁿnaˈ na nncˈomna na wiˈ nˈomna ndoˈ calaˈtˈmaaⁿˈdyena nciˈaana. Ee na nnˈaⁿ jnaⁿndyena, macaⁿnaˈ na ñequiiˈcheⁿ na calaˈtˈmaⁿ nˈomna ncˈiaana, cha na nnda̱a̱ nncˈomna na neiⁿnco nˈomna. Catseiˈnaⁿˈ Efesios 4:31, 32; 5:22-25, 33, ndoˈ 1 Pedro 3:7.

Xeeⁿ na ntsˈaanaˈ tiaˈ, macaⁿnaˈ na wendye joona nlˈana jndyaaˈ na ntˈmo̱o̱ⁿna na wiˈ nˈomna ncˈiaana (1 Corintios 13:4, 5). Ñˈoom ˈndyoo Tyˈo̱o̱tsˈom ticatsonaˈ na nto̱ⁿˈndyena cweˈ jnaaⁿˈ cwii tiaˈchjoo. Catseiⁿnaⁿˈ 1 Corintios 7:10-13.

 

Jiowa lˈue tsˈoom na ndaˈyoˈ ncˈomna na neiⁿnco nˈomna. Joˈ na Tyˈo̱o̱tsˈom maˈmo̱o̱ⁿ nda̱a̱na chiuu waa na yati nntaˈndoˈna yocheⁿ na ndyuandyena. Mati lˈue tsˈoom na nndyena ñˈoomya na cwilue lotyena cha na ya nntaˈndoˈna (Colosenses 3:20). Ndoˈ caliuna na neiiⁿna, na nndiˈntjomna nnom jom ndoˈ Jnaaⁿ. Catseiˈnaⁿˈ Eclesiastés 11:9–12:1; Mateo 19:13-15, ndoˈ 21:15, 16.

ˈO na mˈaⁿ ndaˈyoˈ macaⁿnaˈ na calˈaˈyoˈ jndyaaˈ na nlˈueˈyoˈ nantquie, liaana ndoˈ yuu na nncˈomna (1 Timoteo 5:8). Sa̱a̱ nchii cweˈ joˈ, mati macaⁿnaˈ na nntˈmo̱o̱ⁿˈyoˈ nda̱a̱na na nncˈomna na wiˈ nˈomna Tyˈo̱o̱tsˈom (Efesios 6:4). Xeeⁿ na ˈo mˈaaⁿ na wiˈ nˈomˈyoˈ Tyˈo̱o̱tsˈom, majoˈti nlˈa ndaˈyoˈ. Xeeⁿ na nntˈmo̱o̱ⁿˈyoˈ nda̱a̱ ndaˈyoˈ ñˈoom ˈndyoo Tyˈo̱o̱tsˈom nntsˈaanaˈ na ya ñomtiuu ˈnaaⁿna. Catseiˈnaⁿˈ Deuteronomio 6:4-7 ndoˈ Proverbios 22:6.

Jeeⁿ tˈmaⁿ nteijndeiinaˈ ntseindaˈ xeeⁿ na nntsuˈ nda̱a̱na ˈnaⁿ na ya cwilˈana. Sa̱a̱ mati macaⁿnaˈ ñequiaˈ ñˈoomya nda̱a̱na ndoˈ nlcoˈxcweˈ joona yuu na tiya cwilˈana chana tilˈana cwii ˈnaⁿ na nlcoˈwiˈ joona (Proverbios 22:15). Ndoˈ naquiiˈ chaˈtso nmeiⁿˈ, caˈmo̱ⁿˈ nda̱a̱na ñequio na wiˈ tsˈomˈ. Catseiˈnaⁿˈ Colosenses 3:21.

Nnˈaⁿ na cwitjeiˈyuuˈndye cantyja ˈnaaⁿˈ Jiowa jndye nom jnda̱ ñetjeiiˈna cwentaa nnˈaⁿ na mˈaⁿ nda ndoˈ yocanchˈu. Chaˈtso joonaˈ ljuiˈnaˈ naquiiˈ Biblia. Catseiˈnaⁿˈ Salmo 19:7, 11.