LEISIOM CHJOO 10
¿Chiuu waa nljeiˈ cwaaⁿ watsˈom na mayuuˈcheⁿ?
1. ¿Aa waa cwii watsˈom na maˈmo̱ⁿ ñˈoom na mayuuˈ?
«Calˈaˈyoˈ cwenta ñequio profeta na tiyuuˈ ñˈoom na cwiñeˈquia.»(MATEO 7:15)
Jesús ndoˈ nnˈaⁿ na jlaˈjomndye ñˈeⁿñê jlaˈxmaⁿna ñeˈcwii watsˈom na mayuuˈ, na seijoomˈñê chaˈxjeⁿ cwii nato cantuu na wjañˈoomnaˈ tsˈaⁿ na nncwanoomˈm ndoˈ tijndye nnˈaⁿ cwiliuu juunaˈ (Mateo 7:14). Tyˈo̱o̱tsˈom cweˈ tomti cjaweeˈ tsˈoom na nlatˈmaaⁿˈndyo̱ jom chaˈxjeⁿ na matso ñˈoomˈm na mayuuˈ. Ndoˈ nnˈaⁿ na luaaˈ cwilaˈtˈmaaⁿˈndye ñecwii nnom ñˈoom na tyeⁿ cwilaˈyuˈna. Catseiˈnaⁿˈ Juan 4:23, 24; 14:6, ndoˈ Efesios 4:4, 5.
Cantyˈiaˈ video¿Aa chaˈtso lanˈom macjaweeˈ tsˈom Tyˈo̱o̱tsˈom?
2. ¿Ljoˈ ˈnaⁿ jnda̱ tso Jesús cantyja ˈnaaⁿ profeta na tiyuuˈ?
«Cwiluena na taˈjnaaⁿˈna Tyˈo̱o̱tsˈom, sa̱a̱ ljoˈ na cwilˈana, cwitˈmo̱o̱ⁿna na tiyuuˈ na ljoˈ.» (TITO 1:16)
Jesús jnda̱ tsoom na nncˈom profeta na tiyuuˈ ñˈoom ñeˈnquia ndoˈ nntˈmo̱o̱ⁿna ñˈomtiuu na nntseiˈndaaˈnaˈ ntˈom nnˈaⁿ ˈnaaⁿˈ Cristo. Nluena na joona cwileiñˈomna ñˈoom na mayuuˈ, ndoˈ watsˈom ˈnaaⁿˈna juunaˈ na mayuuˈcheⁿ, sa̱a̱ cweˈ cwinquioˈnnˈaⁿna. Sa̱a̱, ˈu nnda̱a̱ nljeiˈ cwaaⁿ watsˈom na mayuuˈ, ee ñequio ˈnaⁿ na cwilˈana nncwajnaⁿˈ aa mayuuˈcheⁿ na nnˈaⁿ ˈnaaⁿˈ Cristo joona. Catseiˈnaⁿˈ Mateo 7:13-23.
3. ¿Chiuu waa nljeiˈ cwaaⁿ watsˈom na mayuuˈcheⁿ?
Ntyˈiaaya ˈom ˈnaⁿ na macaⁿnaˈ na nntsˈaanaˈ:
-
Cajnda nquiuna Biblia chaˈxjeⁿ ñˈoom ˈndyoo Tyˈo̱o̱tsˈom. Cwilˈana cwii jndyaaˈ na chaˈtso xjeⁿ nlaˈcanda̱na ñˈoomˈ Tyˈo̱o̱tsˈom, nchii ñˈoom na cwilaˈjndaaˈndye cweˈ nnˈaⁿ (Mateo 15:7-9). Mati taˈndoˈna chaˈxjeⁿ na cwitˈmo̱o̱ⁿna. Catseiˈnaⁿˈ Juan 17:17 ndoˈ 2 Timoteo 3:16, 17.
-
Cajnda nquiuna xueeˈ Tyˈo̱o̱tsˈom, Jiowa. Jesús cajnda ntyjeeⁿ xueeˈ tsotyeeⁿ joˈ na tˈmo̱o̱ⁿnaˈ nda̱a̱ nnˈaⁿ. Seineiiⁿ cantyja ˈnaaⁿˈ Jiowa ndoˈ tsoom nda̱a̱ nnˈaⁿ na cataⁿna na catseitˈmaaⁿˈñenaˈ xueeˈ Tyˈo̱o̱tsˈom (Mateo 6:9). Yuu na ˈu mˈaⁿˈ, ¿cwaaⁿ watsˈom na maˈmo̱ⁿ xueeˈ Tyˈo̱o̱tsˈom? Catseiˈnaⁿˈ Juan 17:26 ndoˈ Romanos 10:13, 14.
-
Cwilaˈneiⁿna cantyja ˈnaaⁿˈ Nˈiaaⁿ ˈnaaⁿˈ Tyˈo̱o̱tsˈom. Tyˈo̱o̱tsˈom jñoom Jesús na jndyotseineiiⁿ cantyja ˈnaaⁿˈ Nˈiaaⁿ ˈnaaⁿˈ Tyˈo̱o̱tsˈom nnom Tyuaa, ee macanda̱ juunaˈ nnda̱a̱ nlcoˈyanaˈ tsjoomnancue. Jesús seineiiⁿ ñˈoommeiiⁿ xjeⁿ xuee na tueeⁿˈeⁿ (Lucas 4:43; 8:1; 23:42, 43). Mati tsoom na nnˈaⁿ na cwilaˈjomndye ñˈeⁿñê nlaˈneiiⁿna cantyja ˈnaaⁿˈ gobiernomwaa. Joˈ chii, xeeⁿ na nncwjeeˈ cwii tsˈaⁿ na matseineiiⁿ cantyja ˈnaaⁿˈ Nˈiaaⁿ ˈnaaⁿˈ Tyˈo̱o̱tsˈom waˈ, ¿cwaaⁿ watsˈom macaⁿ? Catseiˈnaⁿˈ Mateo 24:14.
-
Nnˈaⁿ na cwilaˈjomndye ñequio Jesús ticalajomndyena naquiiˈ ndmaaⁿˈ naⁿmaⁿnˈiaaⁿ ndoˈ ndiaˈ ˈnaaⁿna (Juan 17:16; 18:36). Tîcˈoontyjo̱na mayaaⁿ nnˈaⁿ ndoˈ meiⁿ natia na cwilˈa nnˈaⁿ tsjoomnancuewaa. Catseiˈnaⁿˈ Santiago 4:4.
-
Cwiwitquiooˈya na wiˈ nˈomna ncˈiaana. Ñˈoom ˈndyoo Tyˈo̱o̱tsˈom jnda̱ tˈmo̱o̱ⁿnaˈ nda̱a̱na na nlˈana na cajnda nquiuna nnˈaⁿ chaˈtso nnom tsjaaⁿ. Jndye nlanˈom na cwinquioˈnnˈaⁿ cwilaˈjomndye naquiiˈ ndiaˈ, sa̱a̱ nnˈaⁿ na mayuuˈcheⁿ na cwilaˈjomndye ñequio Cristo tjaˈnaⁿ (Miqueas 4:1-3). Ee na wiˈ nˈomna nnˈaⁿ, joˈ na cwiwilˈueeˈndyena tiaⁿmpo ndoˈ sˈom ˈnaaⁿna na cwiteijndeiina nnˈaⁿ ndoˈ cwiñeˈnquiana na tˈmaⁿ nˈomna. Catseiˈnaⁿˈ Juan 13:34, 35 ndoˈ 1 Juan 4:20.
4. ¿Cwaaⁿ watsˈom na mayuuˈcheⁿ?
¿Cwaaⁿ watsˈom na machˈee cwii jndyaaˈ na ntseinda̱ ñˈoom ˈndyoo Tyˈo̱o̱tsˈom, canjda ntyjii xueeˈ Tyˈo̱o̱tsˈom ndoˈ maˈmo̱o̱ⁿnaˈ na macanda̱ Nˈiaaⁿ ˈnaaⁿˈ Tyˈo̱o̱tsˈom nnda̱a̱ nlcoˈyanaˈ tsjoomnancue? ¿Macanda̱ cwaaⁿ watsˈom na mayuuˈcheⁿ na wiˈ nˈomna ncˈiaana ndoˈ ticalajomndyena naquiiˈ ndiaˈ? ˈU, ¿chiuu waa mantyˈiaˈ? Catseiˈnaⁿˈ 1 Juan 3:10-12.
