Tyˈo̱o̱tsˈom seitjoom cwii tmaaⁿˈ ntseindacantyjo Abraham ndoˈ tquiaaⁿ ljeii nda̱a̱na. Seicajñoom joona tsjoom Israel, ñelaxmaⁿna watsˈom na mayuuˈ ndoˈ toˈñoomna na nlaˈljeiina ñˈoom ˈndyoo Tyˈo̱o̱tsˈom (Salmo 147:19, 20). Cantyja ˈnaaⁿ joona, nnda̱a̱ nteijdeiinaˈ nnˈaⁿ chaˈtso nnom ndyuaa. Catseiˈnaⁿˈ Génesis 22:18.

Quiiˈntaaⁿ chaˈtso njoom, Tyˈo̱o̱tsˈom tjeiiˈñe tsjoom Israel cha na ntjeiˈyuuˈndyena cantyja ˈnaaⁿˈaⁿ. ˈNaⁿ na teinomna tˈmo̱o̱ⁿnaˈ na quiana jlaˈcanda̱na ljeii ˈnaaⁿˈ Tyˈo̱o̱tsˈom ya ñetˈomna (Deuteronomio 4:6). Cantyja ˈnaaⁿ nnˈaⁿ israelitas ntˈomcheⁿ nnˈaⁿ nnda̱a̱ nliuuna ˈñeeⁿ cwiluiiñe Tyˈo̱o̱tsˈom na mayuuˈcheⁿ. Catseiˈnaⁿˈ Isaías 43:10, 12.

Quiana tsjoom Israel seiquieˈ tsˈomnaˈ nnom Tyˈo̱o̱tsˈom, ˈñeeⁿ joona ndoˈ tjeiiˈñe cwiicheⁿ tmaaⁿˈ nnˈaⁿ ˈnaaⁿˈ Cristo (Mateo 21:43; 23:37, 38). Joˈ chii najeˈ tachii nnˈaⁿ israelitas cwindyeˈntjom nnom Jiowa, xeeⁿ nchii nnˈaⁿ ˈnaaⁿˈ Cristo na mayuuˈcheⁿ joˈ nnˈaⁿ na cwitjeiˈyuuˈndye cantyja ˈnaaⁿˈ Jiowa. Catseiˈnaⁿˈ Hechos 15:14, 17.

Tjoomˈ jñom Jesús nnˈaⁿ na cwilajomndye ñˈeⁿñê, na nlaˈneiⁿna ñˈoomˈ Tyˈo̱o̱tsˈom ndoˈ catˈmo̱o̱ⁿna nda̱a̱ nnˈaⁿ chaˈwaa nnom Tyuaa, cha na nlaˈjomndyena ñequioñê (Mateo 10:7, 11; 24:14; 28:19, 20). Jeˈ na mˈaaⁿya ncuee na macanda̱, cwiluii tsˈiaaⁿ waa chaˈxjeⁿ na meiⁿjom tyoontyˈiaaya. Najeˈ, Jiowa matseitjoom meiⁿyomcheⁿ nnˈaⁿ na chaˈtso ndyuaa cha na nlaˈjomndyena ñequio watsˈom na mayuuˈcheⁿ (Apocalipsis 7:9, 10). Ee na tjoomˈ mˈaⁿ nnˈaⁿ na mayuuˈcheⁿ na nnˈaⁿ ˈnaaⁿˈ Cristo ya cwiteiˈjndeiina ndoˈ cwiñeˈnquiana na tˈmaⁿ nˈom ncˈiaana. Mati, chaˈtsondyena mañejuuti ñˈoom cantyja ˈnaaⁿˈ Biblia cwindyena naquiiˈ jomta ˈnaaⁿna. Catseiˈnaⁿˈ Hebreos 10:24, 25.

Quiiˈntaaⁿ ndyu 1870 ndoˈ 1880 cwii tmaaⁿˈ chjoo nnˈaⁿ na cwilaˈnaaⁿ Biblia, ljiuna ñˈoom na mayuuˈ na matseineiⁿnaˈ na jndye tiaⁿmpo wantyˈiuuˈ ñetuaa. Nquiuna na Jesús tjeiiˈñe cwii tmaaⁿˈ nnˈaⁿ na cwilajomndye ñˈeⁿñê na nlaˈneiⁿ ñˈoom ˈndyoo Tyˈo̱o̱tsˈom, joˈ chii to̱ˈna na jlaˈjndaaˈndyena na nlaˈneiⁿna ñˈoom cantyja ˈnaaⁿˈ Nˈiaaⁿ ˈnaaⁿˈ Tyˈo̱o̱tsˈom chaˈwaa nnom Tsjoomnancue. Chu 1931 tˈueena ñˈomtiuu na njndyuuna nnˈaⁿ na cwitjeiˈyuuˈndye cantyja ˈnaaⁿˈ Jiowa. Catseiˈnaⁿˈ Hechos 1:8; 2:1, 4, 11, ndoˈ 5:42.

Tiaⁿmpo na tyomˈaⁿ apóstoles ˈnaaⁿˈ Jesús, ndmaaⁿˈ nnˈaⁿ ˈnaaⁿˈ Cristo na tyomˈaⁿ jndye ndyuaa, ñeteijndeiinaˈ joona na tyomˈaaⁿ cwii tmaaⁿˈ naⁿnom, na ñentyˈiaana Jesús chaˈxjeⁿ xqueⁿ tmaaⁿˈ nnˈaⁿ ˈnaaⁿˈ Tyˈo̱o̱tsˈom na ñelaˈjndaaˈndye tsˈiaaⁿ cwentaa ndmaaⁿˈ (Hechos 16:4, 5). Maluaaˈ jeˈ, nnˈaⁿ na cwitjeiˈyuuˈndye cantyja ˈnaaⁿˈ Jiowa mˈaaⁿ cwii tmaaⁿˈ naⁿnom ˈnaaⁿˈ Cristo na tyeⁿti cwilaˈyuˈ, na cwilaˈjndaaˈndye tsˈiaaⁿ na cwiluii naquiiˈ lˈaa Betel na niom wendyee ndyuaa. Naquiiˈ lˈaameiiⁿ cwileiteincooˈ ñˈoom, cwiluiiˈ nom na cwilaˈneiⁿ ñˈoomˈ Tyˈo̱o̱tsˈom ndoˈ cwitˈoomˈnaˈ teinom 900 nnom ñˈoom. Tmaaⁿˈ naⁿnommˈaaⁿ na tyeⁿti cwilaˈyuˈ, ñequiiˈcheⁿ Biblia cwiwilˈueeˈndyena na cwitˈmo̱o̱ⁿna ndoˈ cwiñenquiana na tˈmaⁿ nˈom mandyooˈ 120.000 ndmaaⁿˈ nnˈaⁿ ˈnaaⁿˈ Tyˈo̱o̱tsˈom, yuu na mati mˈaⁿ naⁿnom na ˈoojndyee na ñequio na wiˈ nˈomna, cwijndooˈna nnˈaⁿ na cwiluiindye canmaⁿ ntsmeiⁿˈ Tyˈo̱o̱tsˈom. Catseiˈnaⁿˈ 1 Pedro 5:2, 3.

Nnˈaⁿ na cwitjeiˈyuuˈndye cantyja ˈnaaⁿˈ Jiowa tjoomˈ cwilaˈneiⁿna ñˈoom na ya ˈnaaⁿˈ Biblia, ndoˈ cwitˈmo̱o̱ⁿna nda̱a̱ nnˈaⁿ cha na nlaˈjomndyena ñequio Jesús. Chaˈxjeⁿ na ñelˈa apóstoles, nnˈaⁿ na cwitjeiˈyuuˈndye cantyja ˈnaaⁿˈ Jiowa cwilaˈneiⁿna ñˈoomˈ Tyˈo̱o̱tsˈom wˈaa ndoˈ wˈaa (Hechos 20:20). Mati cwilaˈnaaⁿna ñequio nnˈaⁿ na cajnda nquiu ñˈoom na mayuuˈ. Sa̱a̱ nchii cweˈ tomti nnˈaⁿ watsˈom joona, mati cwiluiindyena chaˈxjeⁿ nnˈaⁿ na ñecwii wˈaa, mˈaⁿ ntyjeena na wiˈ nˈomna ndoˈ cwii tsotyena na mandoˈ joona (2 Tesalonicenses 1:3). Nnˈaⁿmˈaⁿ na cwilˈa jndyaaˈ na nlˈa ˈnaⁿ na cjaweeˈ tsˈom Tyˈo̱o̱tsˈom, ndoˈ cwiteiˈjndeiina ntˈomcheⁿ nnˈaⁿ, joˈ nnˈaⁿ wˈaa na neiⁿncoti nˈom na mˈaⁿ nnom tsjoomnancue. Catseiˈnaⁿˈ Salmo 33:12 ndoˈ Hechos 20:35.