LEISIOM CHJOO 7
¿Ljoˈ ˈnaⁿ luaaˈ Nˈiaaⁿ ˈnaaⁿˈ Tyˈo̱o̱tsˈom
1. ¿Ljoˈ ˈnaⁿ luaaˈ Nˈiaaⁿ ˈnaaⁿˈ Tyˈo̱o̱tsˈom?
¿Chiuu tsˈiaaⁿˈ na nnda̱a̱ nnlˈuuya na Jesús cwiluiiñe tsaⁿmaⁿtsˈiaaⁿ na yati? (MARCOS 1:40-42)
Luaaˈ cwii gobiernom na mˈaaⁿ tsjo̱ˈluee na tajndye xuee nntseityuiiˈñˈeⁿ chaˈtso naⁿmaⁿnˈiaaⁿ na mˈaⁿ ndoˈ nntsˈaaⁿ na caluii ˈnaⁿ na lˈue tsˈom Tyˈo̱o̱tsˈom nnom Tyuaa ndoˈ tsjo̱ˈluee. Nˈiaaⁿ ˈnaaⁿˈ Tyˈo̱o̱tsˈom, gobiernom na nnˈaⁿ tjo̱o̱ndyena, nntsˈaanaˈ na tjoomˈ nncˈom chaˈtsondye nnˈaⁿ nnom Tyuaa. ¿Aa tiyuuˈ na neiⁿncooˈ ñˈoom na ya meiiⁿ? Catseiˈnaⁿˈ Daniel 2:44; Mateo 6:9, 10, ndoˈ 24:14.
Jiowa Tyˈo̱o̱tsˈom sˈaaⁿ na Jnaaⁿ Jesucristo, nluiiñê tsaⁿmaⁿtsˈiaaⁿ na nntsa̱ˈntjom naquiiˈ Nˈiaaⁿ ˈnaaⁿˈaⁿ. Catseiˈnaⁿˈ Apocalipsis 11:15.
Cantyˈiaˈ video ¿Ljoˈ ˈnaⁿ luaaˈ Nˈiaaⁿ ˈnaaⁿˈ Tyˈo̱o̱tsˈom?
2. ¿Chiuu tsˈiaaⁿˈ na Jesús cwiluiiñe tsaⁿmaⁿtsˈiaaⁿ na yati?
Jesús jnda Tyˈo̱o̱tsˈom cwiluiiñe tsaⁿmaⁿtsˈiaaⁿ na yati ee yatsˈaⁿñê ndoˈ chaˈtso xjeⁿ machˈeeⁿ ˈnaⁿ na xcwe (Mateo 11:28-30). Mati waa najneiⁿ ndoˈ ncwilˈueeˈñê juunaˈ na nnteijneiⁿ nnˈaⁿ quiana nntsa̱ˈntjoom nnom Tyuaa xjeⁿ tsjo̱ˈluee. Jnda̱ na tandoˈxcoom, tjacwacatyeeⁿ ntyjaaˈ tsˈo̱ Tyˈo̱o̱tsˈom ntyjaya na meiⁿnomˈm na nncoñoom nˈiaaⁿ (Hebreos 10:12, 13). Ndoˈ nda̱nquia tquiaa Tyˈo̱otsˈom na nntsa̱ˈntjoom. Catseiˈnaⁿˈ Daniel 7:13, 14.
3. ¿Cwanti nnˈaⁿ nntsa̱ˈntjom ñequio Jesús?
Biblia matsonaˈ na Tyˈo̱o̱tsˈom tjeiiˈñê cwii tmaaⁿˈ chjoo nnˈaⁿ na nntsa̱ˈntjom ñequio Jesús (Apocalipsis 5:10). Quiana ñetˈoom Jesús nnom Tyuaa tjeiiˈñê 12 apóstoles. Joona najndyee na tjeiiˈñê Jesús na nntsa̱ˈntjomna xjeⁿ tsjo̱ˈluee. Ndoˈ xjeⁿ jeˈcheⁿ, Jiowa ndicwaⁿ macwjiiˈñê naⁿnom ndoˈ yolcu na nñˈeeⁿ naquiiˈ tmaaⁿˈwaa. Chaˈxjeⁿ Jesús, nncˈoowana tsjo̱ˈluee, xjeⁿ jnda̱ nlcwinndaˈna. Catseiˈnaⁿˈ Juan 14:1-3 ndoˈ 1 Corintios 15:42-44.
¿Cwanti nnˈaⁿ nncˈoo tsjo̱ˈluee? Biblia matsonaˈ na tijndye nnˈaⁿ, Jesús seicajndyu joona tmaaⁿˈ chjoo (Lucas 12:32). 144.000 na chaˈtsondye nnˈaⁿ na nntsa̱ˈntjom ñequio Jesús nnom Tyuaa xjeⁿ tsjo̱ˈluee. Catseiˈnaⁿˈ Apocalipsis 14:1.
4. ¿Ljoˈ ˈnaⁿ sˈaa Jesús quiana jnaⁿnaˈ na matsa̱ˈntjoom?
Chu 1914 jnaⁿnaˈ na matsa̱ˈntjom Jesús, ndoˈ ˈnaⁿ najndyee na sˈaaⁿ, tjeiiⁿˈeⁿ Tsaⁿjndii ndoˈ angele tia tsjo̱ˈluee ndoˈ seiquiaⁿ joona nnom Tyuaa. * Jeeⁿ tˈmaⁿ seiwˈii Tsaⁿjndii, joˈ na jndye nawiˈ machˈeeⁿ nnom tsjoomnancue (Apocalipsis 12:7-10, 12). Ncˈe joˈ, cwajndiiti wjaachˈeenaˈ na mˈaⁿ nnˈaⁿ. Ndiaˈ, na jndeii cwitsˈeii, ntycu ndoˈ jndoˈ, nmeiiⁿ ˈnaaⁿ na cwitˈmo̱o̱ⁿ na tajndye xuee ndoˈ Nˈiaaⁿ ˈnaaⁿˈ Tyˈo̱o̱tsˈom nntsa̱ˈntjomnaˈ chaˈwaa nnom Tyuaa. Catseiˈnaⁿˈ Lucas 21:7, 10, 11, 31.
5. ¿Ljoˈ ˈnaⁿ machˈee Nˈiaaⁿ ˈnaaⁿˈ Tyˈo̱o̱tsˈom najeˈ ndoˈ xuee na quiandyo?
Na cwileineiⁿ ñˈoomˈ Tyˈo̱o̱tsˈom chaˈwaa nnom tsjoomnancue, luaaˈ matseitjom Nˈiaaⁿ ˈnaaⁿˈaⁿ «cwii tmaaⁿˈ tˈmaⁿ nnˈaⁿ» na chaˈtso ndyuaa. Meiⁿyomcheⁿ naⁿnom ndoˈ yolcu na yannˈaⁿndye cwiñeˈquiandye na matsa̱ˈntjom Jesús joona. Chaˈtso naⁿmˈaaⁿˈ nluiˈnˈmaaⁿndyena quiana Nˈiaaⁿ ˈnaaⁿˈ Tyˈo̱o̱tsˈom nntseicatsuunaˈ nnˈaⁿ na wiˈndye. Joˈchii, xeeⁿ na ñeˈtoño̱o̱ⁿya naya na nndyoñˈoom Nˈiaaⁿ ˈnaaⁿˈ Tyˈo̱o̱tsˈom, macaⁿnaˈ na nlˈaaya ˈnaⁿ na matso Jesús. Catseiˈnaⁿˈ Apocalipsis 7:9, 14, 16, 17.
Naquiiˈ cwii meiⁿ ndyu, Nˈiaaⁿ ˈnaaⁿˈ Tyˈo̱o̱tsˈom nntsˈaanaˈ ˈnaⁿ na lˈue tsˈom Jiowa cwentaa nnˈaⁿ xjeⁿ najndyeecheⁿ, ndoˈ nntsˈaanaˈ na neiⁿncooˈ nnom Tyuaa. Na cwii manda̱, Jesús nñequiaaⁿ lˈo̱ tsotyeeⁿ nˈiaaⁿ na ñeseixmaaⁿ (1 Corintios 15:24-26). ¿Aa ñeˈcatseineiⁿˈ nnom cwiicheⁿ tsˈaⁿ ˈnaⁿ na nntsˈaa Nˈiaaⁿ waa? Catseiˈnaⁿˈ Salmo 37:10, 11, 29.
^ párr. 6 Xeeⁿ na ñeˈcaljeiˈtiˈ ˈnaⁿ na matso Biblia cantyja ˈnaaⁿˈ chu 1914, cantyˈiaˈ nota 22 naquiiˈ ntsquii tsom 217 xjeⁿ 220 ˈnaaⁿˈ libro ¿Qué nos enseña la Biblia?
