LEISIOM CHJOO 6
¿Ljoˈ ˈnaⁿ nntsˈaa Tyˈo̱o̱tsˈom cwentaa nnˈaⁿ na jnda̱ tja̱?
1. ¿Ljoˈ ˈnaⁿ tqueⁿtyeⁿ Tyˈo̱o̱tsˈom na nntsˈaaⁿ ñequio nnˈaⁿ na jnda̱ tja̱?
Quiana ñetˈom Jesús nnom Tyuaa, Lázaro tsˈaⁿ na ya ñˈoom jom, na tyomˈaaⁿ Betania, cwii tsjoom chjoo nndyooˈ Jerusalén, tueeⁿˈeⁿ. Quiana tyjeeˈ Jesús, jnda̱ ñequiee xuee na tueˈ Lázaro. Marta ndoˈ María ntyje tsˈoo, tyˈena ñequio Jesús yuu na waa tseiˈtsuaaⁿˈaⁿ ndoˈ cjee tjawijndye nnˈaⁿ. Catseitiuuˈ, ¡cwanti neiiⁿ Marta ndoˈ María quiana ntyˈiaana na Jesús seicwandoˈxcoom Lázaro! Catseiˈnaⁿˈ Juan 11:21-24, 38-44.
Marta mantyjeeⁿ na Jiowa jnda̱ tqueⁿtyeⁿ na nntseicwandoˈxcoom nnˈaⁿ na jnda̱ tja̱, cha na nncˈomnndaˈna nnom Tyuaa. Luaaˈ cwii ñˈoom na ya, na ndiiˈ naquiiˈ Biblia. Catseiˈnaⁿˈ Job 14:14, 15.
2. ¿Ljoˈ ˈnaⁿ ntjom tsˈaⁿ quiana nncueeⁿˈeⁿ?
Tyˈo̱o̱tsˈom tsoom nnom Adán: «Ñequio tsˈo tuiindyuˈ ndoˈ matsˈo nntseicwaqueⁿnndaˈnaˈ ˈu» (GÉNESIS 3:19)
Ñequio «tsˈo» tuiindyo̱ (Génesis 2:7; 3:19). Joˈ na nnˈaⁿ seiˈtsˈo jaa ndoˈ tjaˈnaⁿ laˈxmaaⁿya cwii añmaaⁿ na nluiiˈ quiana nnwja̱a̱ya. Quiana nncueˈ ntqueeⁿ xqueⁿ tsˈaⁿ, cwintycwii na matseitioom. Joˈ chii lˈoo tjaˈnaⁿ ljoˈ cwicaliuna ndoˈ meiⁿchjoo tyooquiinaˈ joona. Ncˈe joˈ, quiana tandoˈxco Lázaro ticatsoom na tjaaⁿ tsjo̱ˈluee. Catseiˈnaⁿˈ Salmo 146:4 ndoˈ Eclesiastés 9:5, 6, 10.
¿Aa matseico Tyˈo̱o̱tsˈom nnˈaⁿ na jnda̱ tja̱ naquiiˈ bˈio? Tjaˈnaⁿ. Ee chaˈxjeⁿ na jnda̱ ntyˈiaaya, nnˈaⁿ na jnda̱ tja̱ meiⁿcwii tacaliuna. Joˈ chii, ñˈoom na cwico nnˈaⁿ naquiiˈ bˈio cweˈ cantunaˈ, macaanaˈ nacjooˈ Tyˈo̱o̱tsˈom Jiowa, ndoˈ tˈmaⁿ matseiˈndaaˈnaˈ ntyjeeⁿ na luaaˈ cwiluee nnˈaⁿ ee jom meiⁿchjoo tyootsa̱ˈntjom na luaaˈ nluii. Catseiˈnaⁿˈ Jeremías 7:31.
Cantyˈiaˈ video ¿Ljoˈ ˈnaⁿ ntjom tsˈaⁿ quiana nncueeⁿˈeⁿ?
3. ¿Aa nnda̱a̱ nlana̱a̱ⁿ ñequio lˈoo?
Lˈoo xocanda̱a̱ nlaˈneiⁿna ndoˈ xocanda̱a̱ nndyena (Salmo 115:17). Sa̱a̱, mˈaⁿ ntˈom angele na wiˈndye na nnda̱a̱ nlaˈneiⁿ ñequio nnˈaⁿ ndoˈ cwintsˈo̱o̱ndyena jndyee nnˈaⁿ na jnda̱ tja̱ cha na nñeˈnquio̱ˈnnˈaaⁿna nnˈaⁿ (2 Pedro 2:4). Ncˈe joˈ, Jiowa tiñeˈcantyˈiaaⁿˈaⁿ na nlˈaa tsˈiaaⁿ na nlana̱a̱ⁿ ñequio lˈoo. Catseiˈnaⁿˈ Deuteronomio 18:10, 11.
4. ¿ˈÑeeⁿ joo nntaˈndoˈnndaˈ?
Meiⁿyomcheⁿ nnˈaⁿ na jnda̱ tja̱ nntaˈndoˈnndaˈ nnom Tyuaawaa. Mati nnˈaⁿ na ñelˈa ˈnaⁿ na ticatyˈiomyanaˈ sa̱a̱ tîcataˈjnaaⁿˈna Tyˈo̱o̱tsˈom, nlcwinndaˈna. Catseiˈnaⁿˈ Lucas 23:43 ndoˈ Hechos 24:15.
Nnˈaⁿ na nlcwinndaˈ nlaˈnaaⁿna ñˈoom na mayuuˈ cantyja ˈnaaⁿˈ Tyˈo̱o̱tsˈom, nlaˈyuˈna ñequio Jesús ndoˈ nlaˈcanda̱na (Apocalipsis 20:11-13). Xeeⁿ na nlˈana na luaaˈ, nncˈomna na neiⁿnco nˈomna nnom Tyuaa na macanda̱. Catseiˈnaⁿˈ Juan 5:28, 29.
5. ¿Ljoˈ ˈnaⁿ maˈmo̱o̱ⁿnaˈ cantyja ˈnaaⁿˈ Jiowa na nntseilcwinnaaⁿˈaⁿ lˈoo?
Na nlcwinndaˈ lˈoo luaˈ cwii nnom na maˈmo̱o̱ⁿ Jiowa na wiˈ tsˈoom jaa meiⁿ na tilaˈxmaaⁿya nayaˈñeeⁿ. Quialˈuaaˈ na jñom Tyˈo̱o̱tsˈom Jnaaⁿ na jndyocueˈ cwentaaya, joˈ na nnda̱a̱ nntyˈiaaya nayawaa. Ndoˈ ˈu jeˈ, ¿ˈñeeⁿ juu ñeˈcantyˈiaˈnndaˈ? Catseiˈnaⁿˈ Juan 3:16 ndoˈ Romanos 6:23.
