Naquiiˈ chaˈtso lanˈom mˈaⁿ nnˈaⁿ na mayuuˈcheⁿ na ñelaˈtˈmaaⁿˈndye Tyˈo̱o̱tsˈom. Ndoˈ jeeⁿ ya nquiuya na ñjom tsˈom Tyˈo̱o̱tsˈom joona ndoˈ cajnda ntyjeeⁿ joona. Sa̱a̱, jeeⁿ jndye ˈnaⁿ tia jnda̱ ñelˈa lanˈom ndoˈ ndicwaⁿ cwilˈanaˈ (2 Corintios 4:3, 4; 11:13-15). Naquiiˈ noticias cwindya̱a̱ya na nnˈaⁿ lanˈom cwilaˈjomndyena naquiiˈ ndiaˈ ndoˈ ñequio nnˈaⁿ na cwajndii cwilaˈcwje ntˈomcheⁿ ndoˈ nnˈaⁿ na cwilˈajndeiˈ na nncˈomna ñequio yonchˈu. ¡Cwanti matseiˈndaaˈnaˈ nquiu nnˈaⁿ na cwiˈoo lanˈomˈñeeⁿ na cwilaˈtˈmaaⁿˈndye Tyˈo̱o̱tsˈom! Catseiˈnaⁿˈ Mateo 24:3-5, 11, 12.

Yocheⁿ na watsˈom na mayuuˈ matseitˈmaaⁿˈñenaˈ Jiowa, watsˈom na cantu machˈeenaˈ na ticueeˈ tsˈomnaˈ jom. Juunaˈ maˈmo̱o̱ⁿnaˈ cantu cantyja ˈnaaⁿˈ Tyˈo̱o̱tsˈom ndoˈ cantyja ˈnaaⁿ lˈoo, ndoˈ ntˈomcheⁿ ˈnaⁿ na ticatooˈ naquiiˈ Biblia. Sa̱a̱ Jiowa lˈue tsˈoom na nnˈaⁿ caliuna ñˈoom na mayuuˈ cantyja ˈnaaⁿˈaⁿ. Catseiˈnaⁿˈ Ezequiel 18:4 ndoˈ 1 Timoteo 2:3-5.

Nnˈaⁿ lanˈom tixonquioˈnnˈaⁿna Tyˈo̱o̱tsˈom na cwiluena na wiˈ nˈomna jom, sa̱a̱ na mayuuˈ wiˈ nˈomna tsjoomnancue ˈnaaⁿˈ Tsaⁿjndii (Santiago 4:4). Biblia matseicajndyunaˈ tmaaⁿˈ lanˈom cantu «Tsjoom tˈmaⁿ Babilonia». Tsjoom Babilonia na ñetua teiyo joˈ jnaⁿnaˈ xˈee watsˈom cantu jnda̱ na teinom ndaaluaˈntyˈa ncuee na tyomˈaaⁿ Noé. Tajndye xuee, ñejomto nntseitsuu Tyˈo̱o̱tsˈom lanˈom na cwinquioˈnnˈaⁿ ndoˈ cwitaˈwiˈ nnˈaⁿ. Catseiˈnaⁿˈ Apocalipsis 17:1, 2, 5, 16, 17 ndoˈ 18:8.

Sa̱a̱ Jiowa ñjom tsˈoom nnˈaⁿ na ya nnˈaⁿndye na mˈaⁿ naquiiˈ lanˈom cantu na niom nnom tsjoomnancue ndoˈ matseitjoom joona. ¿Chiuu waa machˈeeⁿ? Maˈmo̱o̱ⁿ nda̱a̱na ñˈoom na mayuuˈ. Catseiˈnaⁿˈ Miqueas 4:2, 5.

Jiowa ñjom tsˈoom nnˈaⁿ na cajnda nquiu ñˈoom na mayuuˈ ndoˈ ñeˈcalˈa ˈnaⁿ na ya. Joˈ na matsoom na caluiˈna naquiiˈ watsˈom cantu. Xeeⁿ na mayuuˈcheⁿ wiˈ nˈomna Tyˈo̱o̱tsˈom, quia joˈ nlaˈjndyoondyena chaˈxjeⁿ na jom cjaaweeˈ tsˈoom. Catseiˈnaⁿˈ Apocalipsis 18:4.

Jnda̱ na tueˈ Jesús, jndye nnˈaⁿ na ya nnˈaⁿndye, ñequio na xcweeˈ nˈomna toˈñoomna ñˈoom na tyoñeˈquia apóstoles. Jiowa tˈmo̱o̱ⁿ nda̱a̱na chiuu waa nncˈomna na neiⁿnco nˈomna ndoˈ yati nntaˈndoˈna, mati chiuu tsˈiaaⁿˈ na mˈaⁿna ndoˈ ˈnaⁿ na nnda̱a̱ ntyjaˈ nˈomna. Chaˈxjeⁿ na jlˈana, mati jaa catoˈño̱o̱ⁿya ñˈoomˈ Tyˈo̱o̱tsˈom ndoˈ najndyeeti candiˈntjo̱o̱ⁿya nnom Jiowa. Catseiˈnaⁿˈ 1 Tesalonicenses 1:8, 9 ndoˈ 2:13.

Jiowa ñequio na xcweeˈ tsˈoom macoñoom nnˈaⁿ na cwiluiiˈ watsˈom cantu ndoˈ cwinquioˈquieˈna naquiiˈ watsˈom na mayuuˈ. Chaˈtsondyena cwiljoya ñˈoom joona ñequio Jiowa, ndoˈ wiˈ nˈomna ncˈiaana ndoˈ nnda̱a̱ nntaˈndoˈna na macanda̱. ˈU, ¿aa neiⁿncooˈ ntyjiˈ na nncoñomˈ nayameiiⁿ? Catseiˈnaⁿˈ Marcos 10:29, 30 ndoˈ 2 Corintios 6:17, 18.

Quiana Jiowa nntseityuiiˈ watsˈom cantu, nntsˈaanaˈ na neiⁿnco nˈom nnˈaⁿ. Watsˈom cantu tajom cwii ñenquiuˈnnˈaⁿnaˈ ndoˈ nto̱ⁿˈnaˈ nnˈaⁿ. Chaˈtso nnˈaⁿ nlaˈtˈmaaⁿˈndyena ñenquii Tyˈo̱o̱tsˈom na mayuuˈcheⁿ. ¿Aa tiyuuˈ na jeeⁿ ya ñˈoomwaa? Catseiˈnaⁿˈ Apocalipsis 18:20, 21 ndoˈ 21:3, 4.