Ñˈoom na jnda̱ seiˈnaⁿˈ cantyja ˈnaaⁿˈ Biblia naquiiˈ tsomwaa, sˈaanaˈ na tjawitˈmaⁿ na wiˈ tsˈomˈ Jiowa. Sa̱a̱, macaⁿnaˈ na nncjaawitˈmaⁿti na wiˈ tsˈomˈ jom (1 Pedro 2:2). Xeeⁿ na nntseiˈnaⁿˈti Biblia, nljooˈndyuˈtyeⁿˈ nndyooˈ ñequio Jiowa ndoˈ quia joˈ nnda̱a̱ nquiˈntyjo̱ˈ na nncwandoˈ na macanda̱. Catseiˈnaⁿˈ Juan 17:3 ndoˈ Judas 21.

Xeeⁿ na ticaˈndiiˈ na matseiˈnaⁿˈ cantyja ˈnaaⁿˈ Tyˈo̱o̱tsˈom, tyeⁿti nntseiyuˈ ndoˈ nnda̱a̱ nntsaˈ ˈnaⁿ na nncjaaweeˈ tsˈoom (Hebreos 11:1, 6). Na tyeⁿ matseiyuˈ nntsˈaanaˈ na nlcweˈ tsˈomˈ ndoˈ nntseichuiiˈnaˈ chiuu waa mˈaⁿˈ, cha na yati nncwandoˈ. Catseiˈnaⁿˈ Hechos 3:19.

Mandyo ñecatseineiⁿˈ nda̱a̱ ntˈomcheⁿ, ˈnaⁿ na jnda̱ mantyjiˈ, ee chaˈtsondyo̱ ñeˈcalˈuujndya̱a̱ya cwii ñˈoom xco. Xeeⁿ na ticaˈndiiˈ na matseiˈnaⁿˈ Biblia, nljeiˈ chiuu ncwilueeˈndyuˈ juunaˈ na nntseineiⁿˈ cantyja ˈnaaⁿˈ Jiowa ndoˈ ñˈoom na ya cwentaa nnˈaⁿ. Catseiˈnaⁿˈ Romanos 10:13-15.

Nnda̱a̱ nto̱ˈ na nntseineiⁿˈ ñˈoommeiiⁿ nda̱a̱ nnˈaⁿ waˈ ndoˈ nnˈaⁿ na ya ñˈoom ˈu. Sa̱a̱ catseineiⁿˈ ñequio na yatsˈaⁿndyuˈ. Catseineiⁿˈ nda̱a̱na cantyja ˈnaaⁿˈ ˈnaⁿ na ya na maqueⁿtyeⁿ Tyˈo̱o̱tsˈom na ntsˈaaⁿ, nchii ˈnaⁿ na tiya na cwilaˈyuˈna. Cjaañjoomˈ tsˈomˈ na tˈmaⁿti nnteijndeii ˈnaⁿ na nntsaˈ nchiiti ˈnaⁿ na nntsuˈ. Catseiˈnaⁿˈ 2 Timoteo 2:24, 25.

Na nntseiˈnaⁿˈ Biblia yati nncˈomˈ jo nnom Tyˈo̱o̱tsˈom ndoˈ nntseicandyooˈñenaˈ ˈu ñequio Jiowa. Ndoˈ xuee na quiandyo nnda̱a̱ nnquiˈntyjo̱ˈ na nntsˈaanaˈ ˈu jnda Tyˈo̱o̱tsˈom. Catseiˈnaⁿˈ 2 Corintios 6:18.

Nchii nˈndiiˈ na matseiˈnaⁿˈ ñˈoom ˈndyoo Tyˈo̱o̱tsˈom (Hebreos 5:13, 14). Catsuˈ nnom cwii tsˈaⁿ na macwjiˈyuuˈñe cantyja ˈnaaⁿˈ Jiowa na caˈmo̱o̱ⁿ njomˈ ñˈoomˈ Tyˈo̱o̱tsˈom ñequio libro ¿Qué nos enseña la Biblia? Yocheⁿ na jndyeti ñˈoomˈ Tyˈo̱o̱tsˈom nncwajnaⁿˈ, neiⁿncoti tsˈomˈ nntsˈaanaˈ. Catseiˈnaⁿˈ Salmo 1:1-3 ndoˈ 73:27, 28.

Cjaañjoomˈ tsˈomˈ na ñˈoom na ya na teiljeii naquiiˈ Biblia jnaⁿnaˈ na mˈaaⁿ Jiowa, Tyˈo̱o̱tsˈom na neiⁿnco tsˈom, ndoˈ nnda̱a̱ nntseicandyooˈndyuˈ ñequio jom xeeⁿ na nntseijomndyuˈ ñequio nnˈaⁿ na tyeⁿ cwindyeˈntjom nnoom (Hebreos 10:24, 25). Xeeⁿ na tiˈndiiˈ na macheˈ jndyaaˈ na nntsaˈ ˈnaⁿ na lˈue tsˈom Jiowa, nnquiˈntyjo̱ˈ na nncwandoˈ na mayuuˈcheⁿ na ya: na nncwandoˈ na macanda̱. Na nntseicandyooˈndyuˈ ñequio Tyˈo̱o̱tsˈom joˈ ˈnaⁿ na yati na nntsaˈ. Catseiˈnaⁿˈ 1 Timoteo 1:11 ndoˈ 6:19.