Adán ndoʼ Eva tʼoom ndana ndoʼ cjee tjawijndyee nnʼaⁿ nacjooʼ Tyuaa. Xjeⁿ ʼñeⁿ, ntʼomcheⁿ ángeles jlaʼquieʼ nʼomna nnom Tyʼo̱o̱tsʼom chaʼxjeⁿ na sʼaa Satanás.

Joona jnaⁿna cañoomʼluee ndoʼ jlaʼcwaqueⁿdyena nnʼaⁿ seiʼtsʼo ncʼe ñecatoʼncona ñequio yolcu. Nda joona na tʼoom jeeⁿcheⁿ wiʼndyena ndoʼ jnda̱a̱tina nchiiti ntʼomcheⁿ nnʼaⁿ.

Chaʼwaa nnom Tyuaa ñetʼoom nnʼaⁿ wiʼndye, Biblia matsonaʼ na «teijndye nawiʼ na cwilʼa nnʼaⁿ nnom tyuaa» ndoʼ chaʼtso xjeⁿ tyolaʼtiuu nnʼaⁿ na nnlʼana nawiʼ.

Noé tuiiñe cwii tsʼaⁿ na yatsʼaⁿñê. Jiowa tso nnoom na nseicatsuu nnʼaⁿ na wiʼndye ñequio ndaatioo jndye oo ndaaluaʼntyʼa.

Tsoom nnoom na catsʼaaⁿ cwii caja lcaaʼ tʼmaⁿ na nnda̱a̱ ljo nnom ndaa: joʼ wʼaandaa ʼnaaⁿʼ Noé. Naquiiʼ juunaʼ macaⁿnaʼ ncwjañe nnʼaⁿ waⁿʼaⁿ ndoʼ chaʼtso nnom quiooʼ.

Noé seicandii ntʼomcheⁿ nnʼaⁿ na nndyo cwii ndaaluaʼntyʼa sa̱a̱ joona tîcandyena. Meindyee nnʼaⁿ cweʼ teincona jom, ndoʼ ntʼomcheⁿ jeeⁿcheⁿ lawje.

Quia na jnda̱ sʼaa Noé wʼaandaa, tjaañê quiooʼ naquiiʼ juunaʼ.