LEISIOM 01
¿Chiuu waa nnda̱a̱ nteijndeii Biblia ˈu?
Jaa jndye ˈnaⁿ cwitaˈxˈeendyo̱ cantyja ˈnaaⁿˈ na wandoˈ tsˈaⁿ, nawiˈ, na cwiwje nnˈaⁿ ndoˈ cantyja ˈnaaⁿˈ xuee na quiandyo. Mati mˈaaⁿˈ nˈo̱o̱ⁿya cantyja ˈnaaⁿˈ ˈnaⁿ na cwiwino̱o̱ⁿya ticwii xuee, chaˈna chiuu nliuuya tsjo̱ˈñjeeⁿ oo chiuu waa ncˈo̱o̱ⁿya na ya ñequio nnˈaⁿ wˈaaya. Jndye nnˈaⁿ jnda̱ ljiuuna na Biblia mawˈo̱naˈ ñˈoommeiiⁿ, mati mañenquiaanaˈ ñˈoomya cantyja ˈnaaⁿˈ chiuu waa na ntaˈndo̱o̱ˈa ticwii xuee. ¿Aa wajnaⁿˈ cwii tsˈaⁿ na ntyjiˈ na Biblia nnda̱a̱ nteijndeiinaˈ jom?
1. ¿Cwaaⁿ wendyee ñˈoom mawˈo̱ Biblia?
Biblia mawˈo̱naˈ ñˈoom na jeeⁿ cajnda, chaˈxjeⁿ: ¿chiuu waa jnaⁿnaˈ na mˈaⁿ nnˈaⁿ?, ¿chiuu tsˈiaaⁿˈ na mˈaaⁿya ljoo?, ¿chiuu tsˈiaaⁿˈ na nnˈaⁿ na yannˈaⁿndye cwiwinomna nawiˈ?, ¿ljoˈ ˈnaⁿ ntjom tsˈaⁿ quia na ncueeⁿˈeⁿ?, xeⁿ na chaˈtso nnˈaⁿ ñecˈomna na ya, ¿chiuu tsˈiaaⁿˈ na niom ndiaˈ? ndoˈ ¿ljoˈ ˈnaⁿ ntjom Tyuaawaa xuee na quiandyo? Biblia nnda̱a̱ ncˈo̱naˈ chaˈtso ñˈoommeiiⁿ, ndoˈ meiⁿyomcheⁿ nnˈaⁿ jeeⁿ ya nquiuna na jnda̱ jlaˈno̱ⁿˈna ñˈoommeiiⁿ.
2. ¿Chiuu waa mateijndeii Biblia na ncˈo̱o̱ⁿ na neiⁿnco nˈo̱o̱ⁿya ticwii xuee?
Biblia mañenquiaanaˈ ñˈoomya nda̱a̱ya. Maˈmo̱ⁿnaˈ nda̱a̱ya chiuu ncˈo̱o̱ⁿ na mayuuˈcheⁿ na neiⁿnco nˈo̱o̱ⁿya ñequio nnˈaⁿ wˈaaya. Mati matsonaˈ chiuu waa nlˈaaya cwintyja na jndye mˈaaⁿˈ nˈo̱o̱ⁿya, ndoˈ na neiⁿnco nˈo̱o̱ⁿya na nlˈaa tsˈiaaⁿ ˈnaaⁿya. Naquiiˈ na nntsalaˈnaaⁿya tsomwaa ˈu nljeiˈ ljoˈ ˈnaⁿ matso Biblia cantyja ˈnaaⁿˈ ñˈoommeiiⁿ ndoˈ ntˈomcheⁿ ˈnaⁿ. Nquiuuyâ na ntseiˈno̱ⁿˈ na «chaˈwaa ñˈoomˈ Tyˈo̱o̱tsˈom [chaˈtso ñˈoom na matso Biblia], [...] jeeⁿ lˈuenaˈ» (2 Timoteo 3:16).
Tsomwaa nteijndeiinaˈ ˈu na ntseiˈno̱ⁿˈ Biblia. Ncˈe joˈ lˈue nˈo̱o̱ⁿyâ na catseiˈnaⁿˈ chaˈtso texto na tooˈ naquiiˈ leisiom ˈnaaⁿˈnaˈ ndoˈ cantyˈiaˈ aa majoˈndyo cwiluenaˈ chaˈxjeⁿ na matseiˈnaⁿˈ naquiiˈ tsomwaa.
CALAˈNAAᴺYAAYA ÑˈOOMWAA
Cantyˈiaaya chiuu waa Biblia jnda̱ teijndeiinaˈ wendyee nnˈaⁿ, ljoˈ ˈnaⁿ ya nlˈaaya cha na neiⁿnco nˈo̱o̱ⁿya na nlaˈnaaⁿya Biblia ndoˈ chiuu tsˈiaaⁿˈ na jeeⁿ ya na cwiicheⁿ tsˈaⁿ nteijndeii jaa cha na nlaˈno̱o̱ⁿˈa juunaˈ.
3. Biblia wjañˈoomnaˈ jaa nato na ya
Biblia matseijomnaˈ chaˈxjeⁿ cwii chomtsioo na jeeⁿ ya matseixuee nato na cwitsaaya, nnda̱a̱ nteijndeiinaˈ jaa na ya ñomtiuu ntˈua̱a̱ya ndoˈ na nliuuya ljoˈ ˈnaⁿ nntsˈaanaˈ xuee na quiandyo.
Calaˈnaaⁿˈyoˈ Salmo 119:105 ndoˈ calaneiⁿˈyoˈ ñˈoommeiiⁿ:
-
¿Ljoˈ ˈnaⁿ matseitiuu tsˈaⁿ na seiljeii Salmowaa cantyja ˈnaaⁿˈ Biblia?
-
¿Ljoˈ ˈnaⁿ matseitiuuˈ ˈu cantyja ˈnaaⁿˈ Biblia?
4. Biblia mawˈo̱naˈ ñˈoom na cwitaxˈeendyo̱
Cwii yuscu ljeii na Biblia mawˈo̱naˈ ñˈoom na jeeⁿ jndye ndyu ñetaxˈeeñê. Cantyˈiaaˈyoˈ VIDEO ndoˈ calaneiⁿˈyoˈ cantyja ˈnaaⁿ ñˈoommeiiⁿ:
-
¿Cwaaⁿ wendyee ñˈoom na ñetaxˈeeñe yuscu na ljuiˈ naquiiˈ video?
-
¿Chiuu waa teijndeiinaˈ yuscumˈaⁿˈ quia na seiˈnaaⁿˈaⁿ Biblia?
Biblia maˈmo̱ⁿnaˈ na jeeⁿ ya na ntaˈxˈeendyo̱. Calaˈnaaⁿˈyoˈ Mateo 7:7 ndoˈ calaneiⁿˈyoˈ cantyja ˈnaaⁿˈ ñˈoommeiiⁿ:
-
¿Aa matseitiuuˈ na Biblia nnda̱a̱ ncˈo̱naˈ wendyee ñˈoom na ˈu mawaxˈeendyuˈ? ¿Chaˈna cwaaⁿ ñˈoom na mawaxˈeendyuˈ?
5. Ncjaweeˈtsˈomˈ na ntseiˈnaⁿˈ Biblia
Jndye nnˈaⁿ neiⁿnco nˈomna na nlaˈnaaⁿna Biblia ndoˈ mateijndeiinaˈ joona. Cantyˈiaaˈyoˈ VIDEO ndoˈ calaneiⁿˈyoˈ cantyja ˈnaaⁿ ñˈoommeiiⁿ:
-
¿Ljoˈ ˈnaⁿ cwilatiuu yondyua na ljuiˈ naquiiˈ video cantyja ˈnaaⁿˈ na nlaˈnaaⁿna?
-
Meiiⁿ na tineiiⁿna na nlaˈnaaⁿna, ¿chiuu tsˈiaaⁿˈ macjaweeˈ nˈomna na nlaˈnaaⁿna Biblia?
Naquiiˈ Biblia tooˈ ñˈoom na cwiñenquianaˈ na tˈmaⁿ nˈo̱o̱ⁿya ndoˈ ˈnaⁿ na cwicantyjaaˈ nˈo̱o̱ⁿya. Calaˈnaaⁿˈyoˈ Romanos 15:4 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Aa ñecaljeiˈtiˈ ñˈoom na cwiñenquia na tˈmaⁿ nˈo̱o̱ⁿya ndoˈ ˈnaⁿ na nnda̱a̱ ntyjaaˈ nˈo̱o̱ⁿya na tooˈ naquiiˈ Biblia?
6. Yati ntseiˈno̱ⁿˈ Biblia xeⁿ na cwiicheⁿ tsˈaⁿ nteijndeii ˈu
Jndye nnˈaⁿ ñenquieena cwilaˈnaaⁿna Biblia, sa̱a̱ yati ntseiˈno̱ⁿˈ juunaˈ xeⁿ na nteijndeii cwiicheⁿ tsˈaⁿ ˈu. Calaˈnaaⁿˈyoˈ Hechos 8:26-31 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Ljoˈ ˈnaⁿ macaⁿnaˈ cha na ya nlaˈno̱o̱ⁿˈa Biblia? (Cantyˈiaaˈyoˈ versículos 30 ndoˈ 31).
Tsˈaⁿ Etiopía tcaⁿnaˈ na cwiicheⁿ tsˈaⁿ nteijndeii jom, joˈ na ya seiˈno̱o̱ⁿˈo̱ⁿ ñˈoom ˈndyoo Tyˈo̱o̱tsˈom. Mati najeˈ, jndye nnˈaⁿ yati cwilaˈno̱ⁿˈna Biblia quia na mateijndeii cwiicheⁿ tsˈaⁿ joona.
ˈNAᴺ NA CWILUE WENDYEE NNˈAᴺ: «Cweˈ matseitsuˈ tiaⁿmpo na matseiˈnaⁿˈ Biblia».
-
Ndoˈ ˈu, ¿ljoˈ ˈnaⁿ matseitiuuˈ? ¿Chiuu tsˈiaaⁿˈ na luaaˈ matseitiuuˈ?
ÑˈOOM NA CAJNDATI
Biblia mañenquiaanaˈ ñˈoom naya nda̱a̱ya, mawˈo̱naˈ ñˈoom na jeeⁿ cajnda, mañenquiaanaˈ na tˈmaⁿ nˈo̱o̱ⁿya ndoˈ matsonaˈ ˈnaⁿ na nnda̱a̱ ntyjaaˈ nˈo̱o̱ⁿya xuee na quiandyo.
¿Aa macjaañjoomˈ tsˈomˈ?
-
¿Cwaaⁿ ñˈoom naya na mañenquiaa Biblia nda̱a̱ya?
-
¿Cwaaⁿ ñˈoom na jeeⁿ cajnda na mawˈo̱ Biblia?
-
Ndoˈ ˈu jeˈ, ¿ljoˈ ñˈoom ñeˈcaljeiˈ naquiiˈ Biblia?
CALˈUEˈTIˈ
Ljoo nljeiˈ chiuu tsˈiaaⁿˈ na ñˈoom naya na mañenquiaa Biblia jeeⁿ lˈuenaˈ xuee jeˈ.
«Tijom cantycwii na jndeii Biblia» (La Atalaya, núm. 1 2018)
Cantyˈiaˈ chiuu waa Biblia teijndeiinaˈ cwii tsˈaⁿ na xjeⁿ cachjooñe tiya ntyjeeⁿ ñesˈaanaˈ.
Ljoo nljeiˈ ñˈoom naya na mañenquiaa Biblia cha na nnda̱a̱ ncˈomˈ na neiⁿnco tsˈomˈ ñequio nnˈaⁿ waˈ.
Cantyˈiaˈ chiuu waa na Biblia matseijndaaˈñenaˈ cwii ñˈoom na tixcwe na cwileiñˈom nnˈaⁿ cantyja ˈnaaⁿˈ ˈñeeⁿ juu na mayuuˈcheⁿ na matsa̱ˈntjom tsjoomnancue.
¿Chiuu tsˈiaaⁿˈ na nlaˈnaaⁿ Biblia? (video na canda̱a̱ˈ) (3:14)
