LEISIOM 03
¿Aa nnda̱a̱ nlaˈyuuˈa ˈnaⁿ na matso Biblia?
Naquiiˈ Biblia tooˈ jndye ñˈoom naya ndoˈ ˈnaⁿ na maqueⁿtyeⁿ Tyˈo̱o̱tsˈom na nntsˈaaⁿ. Manndyo ˈu ñecaljeiˈ ˈnaⁿ na maˈmo̱ⁿnaˈ. Sa̱a̱ manndyo mati niom ntˈom ñˈoom na tileitseiˈno̱ⁿˈ. ¿Aa nnda̱a̱ nlaˈyuuˈa ˈnaⁿ na matso cwii libro na jeeⁿ teiyo teiljeii? ¿Aa ndyaaˈ nlayuuˈa ñˈoom na matso Biblia na nnda̱a̱ ncˈo̱o̱ⁿ na yati najeˈ ndoˈ xuee na quiandyo? Meiⁿyomcheⁿ nnˈaⁿ cwilaˈyuuˈna na nnda̱a̱. Lˈue nˈo̱o̱ⁿyâ na nncuˈ nljeiˈ chiuu tsˈiaaⁿˈ na luaaˈ cwilatiuuna.
1. ¿Aa mayuuˈcheⁿ na tuii ˈnaⁿ na matso Biblia?
Biblia chuunaˈ «ñˈoom na mayuuˈ» ndoˈ jeeⁿ xcwe teiljeiinaˈ (Eclesiastés 12:10). Matseineiⁿnaˈ cantyja ˈnaaⁿˈ ˈnaⁿ na mayuuˈcheⁿ na tuii ndoˈ cantyja ˈnaaⁿ nnˈaⁿ na mayuuˈcheⁿ na ñetˈom (Catseiˈnaⁿˈ Lucas 1:3 ndoˈ 3:1, 2). Nnˈaⁿ na cwilaˈnaaⁿ chiuu waa ñetˈom nnˈaⁿ teiyo jnda̱ ljiuuna ncuee nnˈaⁿ, ncuee njoom ndoˈ ˈnaⁿ na teinom chaˈxjeⁿ na matso Biblia.
2. ¿Chiuu tsˈiaaⁿˈ na cwilaˈyuuˈa ˈnaⁿ na matso Biblia meiiⁿ na teiyo teiljeiinaˈ?
Chaˈwaa na ndyocaa ndyu Biblia tyuaaˈcheⁿ matsonaˈ ˈnaⁿ na tileilaˈno̱ⁿˈ nnˈaⁿ. Chaˈcwijom, matseineiⁿnaˈ cantyja ˈnaaⁿˈ ciencia. Ndoˈ quia na teiljeii Biblia, jndye ñomtiuu tyolaˈcho nnˈaⁿ. Sa̱a̱ najeˈ, nnˈaⁿ na jndye cwilaˈnaaⁿ cwiliuuna na jeeⁿ xcwe ñˈoom na matso Biblia. Ñˈoom na chuunaˈ tijom cachuiiˈnaˈ ee cwiluiinaˈ «ñˈoom na mayuuˈ ndoˈ majoˈndyo» (Salmo 111:8).
3. ¿Chiuu tsˈiaaⁿˈ na cwilaˈyuuˈa ˈnaⁿ na matso Biblia cantyja ˈnaaⁿˈ xuee na quiandyo?
Biblia chuunaˈ Profecías a na cwilaˈcandii «ljoˈ na quia nntsˈaanaˈ» (Isaías 46:10). Tyuaaˈcheⁿ tsonaˈ ˈnaⁿ na ntsˈaanaˈ, siaⁿntocheⁿ ndyu cwitjo̱o̱cheⁿ na nluiinaˈ. Mati ñetsoñˈeeⁿnaˈ cantyja ˈnaaⁿˈ ˈnaⁿ na cwiluii nnom tsjoomnancue najeˈ. Naquiiˈ leisiomwaa ntyˈiaaya wendyee profecías ˈnaaⁿˈ Biblia, ndoˈ chiuu waa seicanda̱a̱ˈñˈeeⁿnaˈ joonaˈ.
CALAˈNAAᴺYAAYA ÑˈOOMWAA
Cantyˈiaaya na jeeⁿ xcwe ˈnaⁿ na cwiliu nnˈaⁿ na jndye cwilaˈnaaⁿ ñequio ˈnaⁿ na matso Biblia ndoˈ calaˈnaaⁿyaaya wendyee profecías ˈnaaⁿˈ Biblia.
4. Ciencia maˈmo̱ⁿnaˈ na mayuuˈ ñˈoom na matso Biblia
Teiyocheⁿ, jndye nnˈaⁿ ñelaˈtiuuna na Tyuaa ljonaˈ nacjooˈ ˈnaⁿ. Cantyˈiaaˈyoˈ VIDEO.
Queⁿˈ cwenta ˈnaⁿ na teiljeii naquiiˈ libro Job jnda̱ wjaa chaˈna 3.500 ndyu. Calaˈnaaⁿˈyoˈ Job 26:7 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Chiuu tsˈiaaⁿˈ na tjaweeˈtsˈomˈ na ljeiˈ na Tyuaa cweˈ wantyjanaˈ nnom jndye?
Quia wjaacheⁿ 200 ndyu na nnˈaⁿ jlaˈno̱ⁿˈna chiuu waa machˈeenaˈ ndaaluaˈ. Sa̱a̱ queⁿˈ cwenta ˈnaⁿ na tso Biblia jnda̱ wjaa ndyeemeiⁿ waljooˈ ˈomsiaⁿnto ndyu. Calaˈnaaⁿˈyoˈ Job 36:27, 28 ndoˈ calaneiⁿˈyoˈ cantyja ˈnaaⁿˈ ñˈoommeiiⁿ:
-
¿Cwaaⁿ ˈnaⁿ tjaweeˈti tsˈomˈ cantyja ˈnaaⁿˈ yuu manaⁿ ndaaluaˈ?
-
¿Aa cwiteijndeii textomeiiⁿ ˈu na ntseiyuˈtiˈ ˈnaⁿ na matso Biblia?
5. Biblia tyuaaˈcheⁿ seicandiinaˈ ˈnaⁿ na nnluii
Calaˈnaaⁿˈyoˈ Isaías 44:27-45:2 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Ljoˈ ˈnaⁿcheⁿ tso Biblia 200 ndyu cwitjo̱o̱cheⁿ na nntsuu tsjoom Babilonia?
Nnˈaⁿ na cwilaˈnaaⁿ cantyja ˈnaaⁿˈ chiuu waa ñetˈom nnˈaⁿ teiyo, cwiluena na chu 539 cwitjo̱o̱cheⁿ na ncwjeeˈ Cristo, Ciro tsˈaⁿ na matsa̱ˈntjom ndyuaa Persia ndoˈ sondaro ˈnaaⁿˈaⁿ tquiena tsjoom Babilonia. Najndyee, jlaˈntquieeˈndyena jndaa na mawañoomˈñe tsjoomˈñeeⁿ. Joˈ na tijndyaaˈ tyˈequieˈna ee na ljo wanaaⁿ ndyueelˈa, ndoˈ luaaˈ jnaⁿnaˈ na jlaˈcatsuuna tsjoom Babilonia. Jnda̱ teinom 2.500 ndyu na luaaˈ tuii, ndoˈ Babilonia mana ljonaˈ chaˈxjeⁿ na ndyueˈ tcaaⁿ. Jeˈ jeˈ cantyˈiaˈ ˈnaⁿ na jnda̱ tso Biblia.
Calaˈnaaⁿˈyoˈ Isaías 13:19, 20 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Chiuu waa seicanda̱a̱ˈñenaˈ profecíawaa?
Luaa waa Babilonia najeˈ, ndyuaa Irak
6. Biblia jnda̱ ñetsonaˈ ˈnaⁿ na cwintyˈiaaya najeˈ
Biblia matsonaˈ na mˈaaⁿya «xuee na macanda̱» (2 Timoteo 3:1). Cantyˈiaˈ ˈnaⁿ na jnda̱ ñetsonaˈ cantyja ˈnaaⁿˈ tiaⁿmpomeiiⁿ.
Calaˈnaaⁿˈyoˈ Mateo 24:6, 7 ndoˈ calaneiⁿˈyoˈ cantyja ˈnaaⁿˈ ñˈoomwaa:
-
¿Ljoˈ ˈnaⁿ tso Biblia na ncwinom ncuee na macanda̱?
Calaˈnaaⁿˈyoˈ 2 Timoteo 3:1-5 ndoˈ calaneiⁿˈyoˈ cantyja ˈnaaⁿ ñˈoommeiiⁿ:
-
Chaˈxjeⁿ tso Biblia, ¿chiuu nˈom nnˈaⁿ na ncˈom ncuee na macanda̱?
-
¿Cwaaⁿ ˈnaaⁿmeiiⁿ na matso textowaa na mantyˈiaˈtiˈ na cwilˈa nnˈaⁿ?
ˈNAᴺ NA CWILUEE WENDYEE NNˈAᴺ: «ˈNaⁿ na matso Biblia cweˈ cwentonaˈ».
-
¿Cwaaⁿ ˈnaaⁿ cwilˈa na tyeⁿti matseiyuˈ ˈnaⁿ na matso Biblia?
ÑˈOOM NA CAJNDATI
Ciencia, historia ndoˈ profecías cwitˈmo̱o̱ⁿnaˈ na nnda̱a̱ nlayuuˈtya̱a̱ⁿya ˈnaⁿ na matso Biblia.
¿Aa macjaañjoomˈ tsˈomˈ?
-
¿Aa mayuuˈcheⁿ na tuii ˈnaⁿ na matso Biblia, oo aa cweˈ cwentonaˈ?
-
¿Chiuu waa maˈmo̱ⁿ ciencia na mayuuˈ ñˈoom na matso Biblia?
-
¿Aa matseiyuˈ na Biblia tyuaaˈcheⁿ matsonaˈ ˈnaⁿ na ntsˈaanaˈ xuee na quiandyo? ¿Chiuu tsˈiaaⁿˈ na luaaˈ matseitiuuˈ?
CALˈUEˈTIˈ
Chaˈxjeⁿ na cwilue nnˈaⁿ na jndye cwilaˈnaaⁿ, ¿aa mayuuˈcheⁿ ˈnaⁿ na matso Biblia?
«¿Aa matseijomnaˈ ˈnaⁿ na maˈmo̱ⁿ ciencia ñequio ˈnaⁿ na matso Biblia?» (Ñˈoom na ndiiˈ naquiiˈ jw.org)
¿Cwaaⁿ ˈnaaⁿ cwitˈmo̱o̱ⁿ na mˈaaⁿya ncuee na macanda̱?
«Yom profecías ˈnaaⁿˈ Biblia na jeˈ matseicanda̱a̱ˈnaˈ» (La Atalaya, 1 chiˈ mayo chu 2011)
Caljeiˈ chiuu waa seicanda̱a̱ˈñenaˈ ˈnaⁿ na tso Biblia cantyja ˈnaaⁿˈ Grecia.
Na «macwjiˈyuuˈñeñˈeⁿnaˈ ñˈoom na tquia profeta» machˈeenaˈ na tyeⁿti cwilaˈyuuˈa (5:22)
Cantyˈiaˈ chiuu waa profecías ˈnaaⁿˈ Biblia teijndeiinaˈ na seichuiiˈ cwii tsˈaⁿ ñomtiuu ˈnaaⁿˈ cantyja ˈnaaⁿˈ Biblia.
«Najndyee tiñetseiyuˈa na mˈaaⁿ Tyˈo̱o̱tsˈom» (La Atalaya, núm. 5 2017)
a Profecías cwiluiinaˈ ñˈoom na matseicandii Tyˈo̱o̱tsˈom cantyja ˈnaaⁿˈ xuee na quiandyo.
