«Chaˈtso ljeii ˈnaaⁿˈ Tyˈo̱o̱tsˈom teiljeiinaˈ jndye ñˈoomˈ nqueⁿ.» (2 Timoteo 3:16, Ñʼoom na Tqueⁿ Tyʼo̱o̱tsʼom Cantyja ʼnaaⁿʼ Jesucristo.)

Nnliuuya ñˈoom na jeeⁿ cajnda na cwitaˈxˈeendyo̱ cantyja ˈnaaⁿˈ na wandoˈ tsˈaⁿ (Proverbios 2:1-5).

Nncˈo̱o̱ⁿtˈmaaⁿˈndyo̱ nˈo̱o̱ⁿya na ncjuˈnaˈ jaa nato naya ticwii xuee na tsamˈaaⁿya (Salmo 119:105).

Nnda̱a̱ nntyjaaˈ nˈo̱o̱ⁿya na yati nncˈo̱o̱ⁿ xuee na quiandyo (Romanos 15:4).

Waa, nlˈuuya wendyenaˈ:

• Tijomjnda nljeiʼ na mʼaaⁿnaʼ nacjooʼ nquiinaʼ. Chaˈna wenˈaaⁿ naⁿnom jlaˈljeii Biblia naquiiˈ cwii meiⁿ waljooˈ yom siaⁿnto chu. Meiiⁿ na jndyeendye joona tjaaˈnaⁿ taˈjnaaⁿna ncˈiaana, Biblia tjaaˈnaⁿ cˈoomnaˈ nacjooˈnaˈ ndoˈ ñecwii nnom ñˈoom na xcweti na matseineiⁿnaˈ.

• Nnʼaⁿ na jlaʼljeiinaʼ jluena ñʼoom na mayuuʼ. Nnˈaⁿ na cwilaˈljeii ˈnaⁿ na cwiluii ticwiluena quiana cwitsuu tsjoomna. Sa̱a̱ nnˈaⁿ na jlaˈljeii Biblia ticatyˈiuuna ˈnaⁿ na tiya jlˈana ndoˈ na sˈaa tsjoomna (2 Crónicas 36:15, 16; Salmo 51:1-4).

• Chaʼtso xjeⁿ matseicanda̱a̱ʼnaʼ ñʼoom na jlue profetas. Chaˈna we siaⁿnto chu cwitjo̱o̱cheⁿ Biblia tsonaˈ na tsjoom Babilonia nntsuunaˈ (Isaías 13:17-22). Ndoˈ nchii cweˈ tomti tsonaˈ chiuu waa nntsuunaˈ, hasta tsonaˈ xueeˈ tsˈaⁿ na nntseityuiiˈnaˈ (Isaías 45:1-3).

  Jndyee ntˈomcheⁿ ñˈoom na jlaˈljeii profetas mati seicanda̱a̱ˈñˈeⁿnaˈ joonaˈ. ¿Aa tiyuuˈ na maxjeⁿ luaaˈ macaⁿnaˈ na nntsˈaa ñˈoom ˈndyoo Tyˈo̱o̱tsˈom? (2 Pedro 1:21.)