«¡Jeeⁿ neiⁿnco nˈom nnˈaⁿ na cwindye ñˈoom ˈndyoo Tyˈo̱o̱tsˈom ndoˈ cwilaˈcanda̱na juunaˈ!» (Lucas 11:28, Traducción del Nuevo Mundo.)

Nncˈo̱o̱ⁿ na mayuuˈcheⁿ na wiˈ nˈo̱o̱ⁿya nnˈaaⁿya (Efesios 5:28, 29).

Nncˈo̱o̱ⁿ na jnda nquiuuya nnˈaaⁿya (Efesios 5:33).

Nncˈo̱o̱ⁿ na tˈmaaⁿˈ nˈo̱o̱ⁿya nnˈaaⁿya (Marcos 10:6-9).

Waa, nlˈuuya wendyenaˈ:

• Tyˈo̱o̱tsˈom sˈaaⁿ nnˈaⁿ wˈaa. Biblia matsonaˈ na Tyˈo̱o̱tsˈom seijndaaˈñê chiuu waa nncˈom nnˈaⁿ wˈaa (Génesis 2:18-24). Ñequio cwiicheⁿ ñˈoom, nnˈaⁿ wˈaa mˈaⁿna ee Jehová sˈaaⁿ joona. ¿Chiuu tsˈiaaⁿˈ na jeeⁿ cajnda na nlaˈno̱o̱ⁿˈa ñˈoom waa?

  Catseitiuuˈ, xeⁿ na ˈu macwaˈ cwii nantyquie na caˈnaⁿ ndoˈ ñecaljeiˈ chiuu waa tuiinaˈ, ¿ˈñeeⁿ nnom nncwuaxeˈ? Aa tiyuuˈ, nnom tsˈaⁿ na sˈaanaˈ.

  Maluaaˈ, xeⁿ na ñecaljeiˈ ˈniiⁿ ˈnaⁿ macaⁿnaˈ cha na nnda̱a̱ nncˈom nnˈaⁿ waˈ na neiⁿnco nˈomna, yati na nncwaxeˈ nnom Jehová, ee na jom sˈaaⁿ nnˈaⁿ wˈaa najndyee.

• Tyˈo̱o̱tsˈom mˈaaⁿˈ tsˈoom jaa. ˈU ndoˈ nnˈaⁿ waˈ jeeⁿ ya xeⁿ na nlˈueeˈyoˈ naquiiˈ Biblia consejo ˈnaaⁿˈ Jehová, ee «jom mˈaaⁿˈ tsˈoom ˈo» (1 Pedro 5:6, 7). Jehová macaaⁿˈ tsˈoom ˈnaⁿ na yati cwentaa jaa. Ndoˈ consejo ˈnaaⁿˈaⁿ chaˈtso xjeⁿ yanaˈ (Proverbios 3:5, 6; Isaías 48:17, 18).