Xjeⁿ na cachjoondyo̱ cwanti neiⁿncooˈ ntjiya na ntyˈia chaˈtso ˈnaⁿ na niom nacjooˈ Tyuaa. Laˈñeⁿ tsjoomya, Jyväskylä, ñequio nnˈaⁿ wˈaya chaˈtso xjeⁿ ñesalacaandyô̱ naquiiˈ jnda̱a̱ yuu na niom nˈoom ntˈmaⁿ ndoˈ yuu na niom jnda ntˈmaⁿ. Ndoˈ mati neiⁿncooˈ ntyjiya na nncˈom jndye quiooˈ ntsma̱a̱ⁿˈa. ¡Quia na cachjoondyo̱ ñenquiiˈcheⁿ na ñeˈcandaya catsueˈ ndoˈ chmeiiⁿ na ntyˈiaaya! Ndoˈ xjeⁿ na tjowindo̱tya̱ tiya ntyji ñesˈaana quia na matyˈia na cwitjaaˈ nnˈaⁿ quiooˈ, joˈ na seijomndyo̱ ñequio cwii tmaaⁿˈ nnˈaⁿ na cwitañoomˈndye quiooˈ, ndoˈ joˈ tjajnaⁿˈa ntˈomcheⁿ nnˈaⁿ na cwilaˈtiuu chaˈxjeⁿ ja.

Tjomndyô̱ cha na ntaaⁿyâ nda̱a̱ naⁿmaⁿnˈiaaⁿ na calˈana lejii na ntaˈñoomˈ quiooˈ. Ñetquiaayâ ñˈoom cantyja ˈnaaⁿˈ tsˈiaaⁿ na cwilˈaayâ ndoˈ ñelaˈwendyô̱ nacjoo tiaⁿnda na cwinda̱a̱ ntjaaⁿ quiooˈ ndoˈ nacjoo lˈaa nasei na cwiwilˈueeˈndye quiooˈ. Na cwimanda̱ lˈaayâ cwii tmaaⁿˈ na nnda̱a̱ ncwañoomˈ chaˈtsondye quiooˈ. Cantyja ˈnaaⁿˈ chiuu waa na ñelˈaayâ ñesˈaanaˈ tiaˈ ñequio naⁿmaⁿnˈiaaⁿ. Jndye ndiiˈ ñetueeˈna ja wˈaancjo.

Mati ñentyˈia ntˈomcheⁿ ˈnaⁿ tiya na tyoluii ñequio nnˈaⁿ, joˈ na ñequio chaˈwaa naquiiˈ tsˈo̱o̱ⁿ seijomndyo̱ ñequio cwii tmaaⁿˈ Amnistía Internacional y Greenpeace. Mati ñeteijndeiya nnˈaⁿ na ntyˈiaandye ndoˈ nnˈaⁿ na tjaˈnaⁿ nantquie na nlcwaˈ.

Sa̱a̱, jnda̱nquia tquiaya cwenta na tixocanda̱a̱ ntseiyo̱o̱ndyo̱ tsjoomnancue. Jndye ˈnaⁿ na ñelˈaaya tjeiˈyanaˈ, sa̱a̱ ntˈomcheⁿ nawiˈ hasta tjawitˈmaⁿtinaˈ. Ntyˈiaayâ na meiiⁿ na tˈmaⁿti jndyaaˈ na cwilˈaayâ maxjeⁿ tiˈcanda̱a̱ nquintyjo̱o̱yâ ˈnaⁿ na jâ lˈue nˈo̱o̱ⁿyâ. Sˈaanaˈ ntyjiya na meiⁿchjoo tilˈuendyo̱.

Jeeⁿ tˈmaⁿ seiliooˈndyo̱ ee na tiˈcanda̱a̱ ntseijndyoondyo̱ tsjoomnancue, joˈ na jnaⁿnaˈ na seitiuuya cantyja ˈnaaⁿˈ Tyˈo̱o̱tsˈom ndoˈ cantyja ˈnaaⁿˈ Biblia. Meiⁿ na ñeseiˈnaⁿ ñequio nnˈaⁿ na cwitjeiiˈyuuˈndye cantyja ˈnaaⁿˈ Jiowa ndoˈ ya ntyji na mateijndeiinaˈ ja, tiaⁿmpoˈñeeⁿ tiqueeⁿˈ tsˈo̱o̱ⁿya na ntseichuiiˈndyo̱ chiuu waa na wando̱ˈa. Sa̱a̱ najeˈ xuiiˈ ñomtiuu ˈnaⁿya.

Jlˈua̱ya Biblia ˈnaⁿ ndoˈ to̱ˈa na seiˈnaⁿ juunaˈ. Teijndeiinaˈ ja chaˈxjeⁿ seitye na ntyjo yuu na wiˈ. Seiˈnaⁿ naquiiˈ juunaˈ ñˈoom cantyja ˈnaaⁿˈ chiuu waa nntsˈaa tsˈaⁿ cwenta quiooˈ. Chaˈxjeⁿ ñˈoom na matso Proverbios 12:10: «Tsˈaⁿ na machˈee ljoˈ na matyˈiomyanaˈ wiˈtsˈom quiooˈtsmeiⁿˈeⁿ». Mati seiˈno̱o̱ⁿˈa na nchii Tyˈo̱o̱tsˈom chuu jnaⁿ na niom ndiaˈ nnom tsjoomnancue. Xeⁿ nchii ee na jndyendyeti nnˈaⁿ na mˈaⁿ tsjoomnancue tiñeˈcalˈana chaˈxjeⁿ na matso Jiowa naquiiˈ Biblia. Jeeⁿ tjaweeˈ tsˈo̱o̱ⁿya na ljeiiya cwanti wiˈ tsˈom Tyˈo̱o̱tsˈom jaa (Salmo 103:8-14).

Tiaⁿmpoˈñeeⁿ ljeiya cwii cupón ˈnaaⁿˈ libro ¿Qué enseña realmente la Biblia? joˈ na seito̱ˈanaˈ cha na njñoomna cwii libro na mˈaaⁿya. Tiyocheⁿ, we nnˈaⁿ na cwitjeiˈyuuˈndye tquiena wˈaaya ndoˈ ljuena na ntˈmo̱o̱ⁿna no̱o̱ⁿya cantyja ˈnaaⁿˈ Biblia. Meiñoomˈ tsjo̱o̱ nda̱a̱na na ya. Mati to̱ˈa na maca jomta ˈnaaⁿna naquiiˈ wˈaa yuu na cwitjomndyena. Cheⁿndyo cheⁿ ñˈoom na matseiˈnaⁿ cantyja ˈnaaⁿˈ Biblia tyjeenaˈ xjeⁿ naquiiˈ tsˈo̱o̱ⁿ.

Biblia teijndeiinaˈ ja na ˈndiiya jndye ˈnaⁿ tia na ñesˈaaya, ˈdiiya na maˈmaaⁿ jnoom ndoˈ ˈndiiya na maˈua; Seiljuˈndyo̱ ndoˈ seichuiiˈndyo chiuu wa matseina̱ⁿ, mati to̱ˈa na matseitˈmaaⁿndyo̱ naⁿmaⁿnˈiaaⁿ (Romanos 13:1). Mati seichiuuˈndyo̱ nomtiuu ˈnaⁿya cantyja ˈnaaⁿˈ chaˈtso ˈnaⁿ na cwilˈa nnˈaⁿ na ticjaweeˈtsˈom Tyˈo̱o̱tsˈom.

ˈNaⁿ na jndeiiˈtinaˈ sˈaanaˈ ntyjii na nˈdii, joˈ na ˈndiiya na matseintyjaaˈ tsˈo̱o̱ⁿya na tmaaⁿˈ yuu na ñeñˈa̱ⁿjndya̱a̱ ntseijndaaˈ chaˈtsoñˈeeⁿ. Jndye tiaⁿmpo tjacaanaˈ cha na jnda̱a̱ seichuiiˈñˈeⁿndyo̱ ñomtiuu ˈnaⁿya. Quia na seitiuuya na nˈdiiya joona sˈaanaˈ ntyjiiya chaˈxjeⁿ na mˈaaⁿya nacjoona. Sa̱a̱ jnda̱nquia seiˈno̱ⁿˈa na macanda̱ Nˈiaaⁿˈnaaⁿˈ Tyˈo̱o̱tsˈom nnda̱a̱ ntseiyo̱o̱ˈ chaˈtso ˈnaⁿ na tiya na cwiluii nnom tsjoomnancue, joˈ na sˈa jndyaaˈ na teijndeii Nˈiaaⁿwaa ndoˈ seina̱a̱ⁿya cantyja ˈnaaⁿˈ juunaˈ nnda̱a̱ ntˈomcheⁿ nnˈaⁿ (Mateo 6:33).

Quia na ñeseijomndyo̱ ñequio nnˈaⁿ na ñeˈlaˈyo̱o̱ndye tsjoomnancue, ñeseitiuuya na mˈaⁿ we tmaaⁿˈ nnˈaⁿ: nnˈaⁿ na yannˈaⁿndye ndoˈ nnˈaⁿ na tiannˈaⁿndye, ndoˈ meiⁿchjoo tinquiaaya na nncjo̱ nacjoo nnˈaⁿ na cwilˈa ˈnaⁿ na tiya. Najeˈ ee na matseiˈnaⁿya Biblia ˈndiiya na jndo̱ya nnˈaⁿ ndoˈ matsˈaa cwii jndyaaˈ na nncˈo̱o̱ⁿya na wiˈ tsˈo̱o̱ⁿya chaˈtsondye nnˈaⁿ (Mateo 5:44). Najeˈ maˈmo̱o̱ⁿ na wiˈ tsˈo̱o̱ⁿya nnˈaⁿ quia na matseina̱ⁿ nda̱a̱na chaˈtso ˈnaⁿ na ya na nntsˈaa Nˈiaaⁿ ˈnaaⁿˈ Tyˈo̱o̱tsˈom cwentaana. Jeeⁿ neiⁿnco tsˈo̱o̱ⁿya na mantyˈia na tsˈiaaⁿwaa mateijndeiinaˈ na tjoomˈ ndoˈ ya mˈaⁿ nnˈaⁿ ndoˈ mañenquiaanaˈ cwii ˈnaⁿ na mayuuˈcheⁿ na nnda̱a̱ ntyjaaˈ nˈomna.

Na nljei na Jiowa nnda̱a̱ ntseiyo̱o̱ˈñe chaˈtso ˈnaⁿ, mañenquiaanaˈ na ya ntyji naquiiˈ tsˈo̱o̱ⁿya. Mantyjiijnda̱a̱ˈndyo̱ na Tyˈo̱o̱tsˈom na sˈaa chaˈtsoti ˈnaⁿ na niom, xocaˈndii na nnˈaⁿ ndoˈ quiooˈ ntyˈiaa nawiˈ na macanda̱ ndoˈ xocaˈndii na ncwiˈndaaˈñˈeeⁿ nnom Tyuaawaa. Ndoˈ tajndye xuee, Nˈiaaⁿ ˈnaaⁿˈ Tyˈo̱o̱tsˈom nntseiyo̱o̱naˈ chaˈtso ˈnaⁿ na nnˈaⁿ jnda̱ jlaˈndaaˈna (Isaías 11:1-9). Najeˈ jeeⁿ neiⁿnco tsˈo̱o̱ⁿ, nchii cweˈ ee na taˈjnaⁿˈa ñˈoom na mayuuˈ na maˈmo̱ⁿ Biblia xeⁿ nchii, ee na mateijndeiiya ntˈomcheⁿ nnˈaⁿ na nlayuˈtyeⁿna ñˈoomwaa. ˈNdiiya na ñeˈtseijndyoondyo̱ tsjoomnancue.