Awaji ikigwen ebi geelek ibe etaba lek eriaak me lek kan̄ me uriaak. (Okwa Itọn̄ 65:2) Ire, ọmọ ikakigban̄ miya ire ibọkọ uriaak geelek itap. Kubọk inu njeen̄, Awaji ikpobonọ ida uriaak ogwu enerieen̄ okitutuku nwa kan̄. (Pita Eyi Adasi 3:7) Isọkọ me lek si, mgbọ ebi Ijeren ekpitet lek inye ikirọ ijọ inu, Awaji ijit inọnọ ida uriaak kiban̄. Me atikọ, uriaak ire irek ilile isa inyi eji. Ire ogwu orọrọ ijo inu omimin igwu ikom, Awaji monọ ida uriaak kan̄ si.—Fuk Asaya 1:15; 55:7.

Ikpọ fidio Does God Listen to All Prayers?

Uriaak ire okpọkọ ge me lek ntọbọ ebum kiji, eya orọ, eji mekiriaak uriaak inyi Ogwu Ororom eji gaalek, Jioba. (Matiyu 4:10; 6:9) Isọkọ me lek si, eyi irebe ibe ke eji kpeso, eji ebekiriaak uriaak itibi me erieen̄ kè Jisọs bak lek ikwube mije ijo kiji. (Jọn 14:6) Jioba ikaweek ibe eji ekeriaak uriaak echi eji ekween̄be mè itet ikaan̄ me ibot miya ire, echi egebe itap me ikpa. Iweek ibe eji ekeriaak uriaak enan̄a me ejit kiji enyi ọmọ.—Fuk Matiyu 6:7; Ebi Filipai 4:6, 7.

Ogwu Ororom eji ikekinọ uriaak echi ekiriaak me emen ejit. (Samien Eyi Adasi 1:12, 13) Iweek ibe eji ekeriaak uriaak mgbọ geelek, kubọk me owelegwe mè ikakwun̄, mgbọ eberie inorie, mè mgbọ eji esikimun̄ ufialek.—Fuk Okwa Itọn̄ 55:22; Matiyu 15:36.

Ikafet ijujuuk lek iriaak me lek Awaji mije ibe ke eji ekiluk me eden̄ ebi inanan ichechieek me lek Awaji mè ikisa use kan̄ obe ke esuuk mokup me inyọn̄ ijọn̄ yi isa irọ mkpọ  ochak. (Timọti Eyi Òso Iba 3:1, 4; Pita Eyi Òso Iba 3:3, 13) Eya orọ, ikup ufiak ibe eji ekegọọk ebi me lek kiji ekupbe me ichechieek egbaan̄ etitiin̄, inyi eji ekenama ge ge enye.—Fuk Ebi Iburu 10:24, 25.

Ikekigọọk ebi imama Awaji igbaan̄ ije motap ubọk iro inyi eji ejuuk lek eriaak me lek Awaji. Chinichini Ebi Ata-Ikọ Jioba ikinyi eji ata irek ebekọt isa imun̄ ebi ikaan̄ ichechieek mè ikween mkpọ inan̄a me lek ichechieek kiban̄.—Fuk Ebi Rom 1:11, 12.

Omokọt ijuuk lek iriaak me lek Jioba sa me ikekigwu nkeek ikom me lek inu okween̄be me emen Usem kan̄. Kikeek inu obokọt ikween̄ inan̄a me lek ikwaan̄ kan̄, nteme kan̄ mè use echi ichieekbe. Ikekiriaak uriaak mè ikigwu nkeek ikom me lek inu chi morọ inyi eji ekenwọọn̄ ima mè iriọọn̄-inu Awaji okaan̄be.—Fuk Josuwa 1:8; Okwa Itọn̄ 1:1-3.

Omokọt ijuuk lek iriaak me lek Awaji gaalek, ire otoon̄ ejit me lek kan̄, mè ire okaan̄ ichechieek si. Ire, ichechieek ibet lek inu oluk ugwem, eyi ebekikpukpo. Obokup inye ikikpukpo ichechieek kwun̄ sa me ikekigwu nkeek ikom me lek inu echi ochieekbe me lek.—Fuk Matiyu 4:4; Ebi Iburu 11:1, 6.

Jioba ikekikpọ chieen̄ me lek ebi imama ọmọ. Mokọt ibem ema me lek inu geelek oborọ me ema enan̄a me ichechieek mè echep ikpọchieen̄ kiban̄ iluluk ugwem ikakaan̄ge itata. (Okwa Itọn̄ 91:1, 2, 7-10) Itaba eji ubọk me utọn̄ ibe ejit mbet lek iluk ugwem obokọt isa eji unan me lek mè irọ ibe eji ekayaka ikibele ejit. Jioba okijeen̄ eji otu oniin̄ iluk ugwem onwọnwọn ichit.—Fuk Okwa Itọn̄ 73:27, 28; Jemis 4:4, 8.