Jioba ire Awaji ogwu okidọmọ inu ijaan̄. (Ebi Kọrint Eyi Adasi 14:33) Eya orọ, igbe ibe ebi eyi kan̄ ekerọ mkpọ me onineen̄. Ike owa ke ekisa idọmọ inu me ntitiin̄ ebi eyi Karais? Ike owa ke eji ebesa irọ ibe inu ikije ijaan me ntitiin̄?

1. Ekene ore ogwu ibot ntitiin̄?

‘Karais ore ogwu ibot ntitiin̄ Awaji.’ (Ebi Efesọs 5:23) Inan̄a me emen inyọn̄, ikikpọ chieen̄ me lek ikwaan̄ ebi eyi Jioba ekisi me otutuuk linyọn̄ yi. Jisọs igobo “usun̄ . . . òrọriọọn̄ inu, mè igbe utoon̄-ejit”—orere, sọntiik urum ebi ugane ntitiin̄ ekigwen si Akpalek Okikpọ Ntitiin̄. (Fuk Matiyu 24:45-47.) Kubọk ebi otuchieen̄ mè ebi ugane ntitiin̄ ikup me Jeruselem me adasi ukot erọbe, Akpalek Okikpọ Ntitiin̄ okinyi ntitiin̄ me otutuuk linyọn̄ yi ntọ-ubọk. (Ikwaan̄ 15:2) Ire, ikare ife chi ere ebi ibot ntitiin̄ kiji. Ema ekifuk Baibul inyi ema ekọt eriọọn̄ inu Jioba oweekbe me ubọk kiban̄ mè ikigọọk ntọ-ubọk Jisọs.

2. Keke ore ikwaan̄ ebi ugane ntitiin̄?

Ebi ugane ntitiin̄ ire ebirieen̄ ebi eyi Karais imimin isoon̄ mè igbe utoon̄-ejit me owuwa acha. Ema ekijeen̄ mkpọ inan̄a me Baibul mè ikitap ubọk inyi ebi usun̄ Jioba sa mè ikekitap ema efuuk me owot. Kpekikpe ema ikpoko me lek ikwaan̄ ema ekisi. Kpan̄asi ikeya, ema ekirọ ‘inan̄a me otutuuk ejit kiban̄ mè ulọk isisi ikwaan̄ Awaji, ikare isasa iweek oruru.’ (Pita Eyi Adasi 5:1, 2) Ebi ugane ntitiin̄ mikaan̄ ebi ikitap ubọk inyi ema. Ike mgbọ okije, bọn ute chi mekọt imin isoon̄ ikakana ebi ugane ntitiin̄ si.

Akpalek Okikpọ Ntitiin̄ ikigobo usini ebi ugane ntitiin̄ isa irọ ebi sekut. Ema ekisi esese esese ntitiin̄ isi inyi bọn ute ntọ-ubọk mè ikitap ema efuuk me owot. Ebi sekut ekigobo ebi ugane ntitiin̄ mè ebi ikitap ubọk inyi ema igọọk me lek ntọ-ubọk okup me emen Baibul.—Timọti Eyi Adasi 3:1-10, 12; Taitọs 1:5-9.

3. Keke ore ikwaan̄ kiji ge ge?

Otutuuk ene me emen ntitiin̄ ‘ebekitọtọn̄ erieen̄ kè Jioba’ sa me ikekigọọk irọ mkpọ me ntitiin̄, kubọk ikekifọọk ikọ me nkween̄mkpọ mè ikekilook ata etip igọọk me lek irek kiban̄.—Fuk Okwa Itọn̄ 148:12, 13.

 KWEEN̄ GBAALEK

4. Jisọs ire ogwu ibot okinyi utelelek

Jisọs ikinyi eji ogwen osisibi esese. Fuk Matiyu 11:28-30, mè igbaan̄ ikpa idodo yi:

• Ike owa ke Jisọs oweek ibe eji ekemun̄ mkpulu kan̄?

5. Ebi ugane ntitiin̄ ekijeen̄ inu inan̄a me lek akpat ukot kiban̄

1. Ebi ugane ntitiin̄ mikimun̄ ibe ke mgbaan̄je kiban̄ mè eyi ebi ototun̄ ukan̄ kiban̄ melek Awaji inye

2. Ebi ugane ntitiin̄ ekikpọ chieen̄ me lek otutuuk ene me ntitiin̄

3.   Ebi ugane ntitiin̄ ekilook ata etip mgbọ geelek

4. Ebi ugane ntitiin̄ ire ebi ijejeen̄. Ema si ekitap ubọk igọọk ituku ere mè irọ ofifi ofifi ikwaan̄

6. Eji mekọt ikigọọk ntọ-ubọk ebi ugane ntitiin̄

Baibul ikpa inu ge orọrọ ikupbe ufiak ibe eji ekegọọk ntọ-ubọk ebi ugane ntitiin̄. Fuk Ebi Iburu 13:17, mè igbaan̄ ikpa idodo chi:

• Ire igbe ibe eji ekesiki ibot enyi ebi ugane ntitiin̄ ike Baibul obe mè eji erọ ni? Keke orọ ofọọkbe ikeya?

Fuk Luk 16:10, mè igbaan̄ ikpa idodo yi:

• Keke orọ ikupbe ufiak ibe eji ekegọọk ntọ-ubọk ebi ugane ntitiin̄ ikerere me lek asabọn inu?

 ME MGBIDIM

Jisọs ore ogwu ibot ntitiin̄ Awaji. Eji ekisa me unwọọn̄ igọọk ntọ-ubọk ebi ugane ntitiin̄ ekinyi bak me lek ema ekigọọk akpat ukot Jisọs sa me ikekinyi eji isiki-efuuk mè ikijeen̄ eji mkpọ inan̄a me lek akpat ukot kiban̄.

Idodo

• Ekene ore ogwu ibot ntitiin̄?

• Ike owa ke ebi ugane ntitiin̄ ekisa itap ubọk inyi ebi ene me ntitiin̄?

• Kpasi ikwaan̄ ke ebi usun̄ Jioba ge ge ekaan̄?