INU NKWEEN̄ 21
Ike Owa Ke Ekisa Ilook Ata Etip?
Sọnja mgbọ, Jioba mosa Ama Ubọọn̄ kan̄ isan̄a otutuuk ufialek kiji. Etip yi inwọn enenen, ire mkpọ ogbegbe ibe otutuuk ene enọ. Jisọs iweek ibe ebi udun̄ kan̄ elook otutuuk ene etip yi! (Matiyu 28:19, 20) Ike owa ke Ebi Ata-Ikọ Jioba ekirọ inu Jisọs onyibe ida ibe erọ?
1. Ike owa ke inu okup me ikpa Matiyu 24:14 okisa irọ iso me chereyi?
Jisọs itumu ibe: “Mêdasi ilook ata etip eyi mkpulu Awaji yi ikana otutuuk linyọn̄.” (Matiyu 24:14) Ebi Ata-Ikọ Jioba ekisa me unwọọn̄ irọ ikwaan̄ okukup ufiak yi. Eji ekilook ata etip me mkpọ oraraka obop ida usem ge me otutuuk linyọn̄ yi! Ikpele ikwaan̄ yi ire eyi ebeneen̄ ijaan̄ mè itap efuuk ikisi. Eji kpebekọt irọ ikwaan̄ yi ire Jioba ikatap ubọk inyi eji.
2. Kpasi efuuk ke eji ekitap isasa ikpa ata etip inyi ebi ene?
Eji ekilook etip yi me ere geelek eji emun̄be ene. Kubọk ebi eyi Karais me adasi ukot, eji ekilook etip ‘inan̄a me uwu ire uwu.’ (Ikwaan̄ 5:42) Sa me ikeyi, eji ekikpa ata etip inyi efie efie ebi ene me acha geelek. Eyi irebe ibe ke ebi ene kpekikup me uwu mgbọ geelek, eji ekilook ata etip si me ere owuwa ene ekupbe. Eji ekisa irek geelek ikikpa mkpọ ofolek Jioba mè nkeek kan̄ inyi ebi ene.
3. Ikwaan̄ ilolook ata etip ikup inyi ekene?
Otutuuk ata ebi eyi Karais mikaan̄ akpan ikwaan̄ ilolook ebi ene ata etip. Eji kpekisa ikwaan̄ kiji yi ifit ifit. Eji ekilook ata etip igọọk me lek ubọk irek kiji ge ge ochieekbe inyi eji, mije eji miriọọn̄ ibe ke mokọt inyan̄a ugwem ebi ene. (Fuk Timọti Eyi Adasi 4:16.) Kpekikpe eji ikpoko me lek ikwaan̄ yi, Baibul ibe: ‘Enyi ebọkọ me ikike, inyi si me ikike.’ (Matiyu 10:7, 8) Ikare otutuuk ene ekibọkọ etip kiji itap. Ire, eji ekukup inye ikikpa ata etip bak lek ire okpọkọ ge me lek ntọbọ-ebum kiji, ikirọ si inyi Jioba ibele ejit.
KWEEN̄ GBAALEK
Kween̄ gbaalek efuuk Ebi Ata-Ikọ Jioba ekitap isasa ikpa ata etip me otutuuk linyọn̄ yi mè ubọk Jioba okisa itap ubọk inyi ema.
Ilolook ata etip ikana otutuuk linyọn̄ yi: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Eji ekitap efuuk inyi eji ekọt ere lek otutuuk ene
Ebi Ata-Ikọ Jioba ekitap efuuk enenen isasa ikpa ata etip inyi ebi ene me ere geelek. Fit FIDIO yi, mè igbaan̄ ikpa idodo ogọgọọk.
-
Keke ke oma me lek efuuk Ebi Ata-Ikọ ekitap isasa ikilook ata etip?
Fuk Matiyu 22:39 mè Ebi Rom 10:13-15, mè igbaan̄ ikpa idodo chi:
-
Ike owa ke ikwaan̄ ilolook ata etip okijeen̄ ibe ke eji mima ebi mbuuruk kiji?
-
Ike owa ke Jioba okimun̄ ebi ikikpa ata etip?—Kpọ agba eyi 15.
5. Eji melek Awaji ekigbaan̄ isi ikwaan̄
Owuwa mfufuk omaan̄ echi okijeen̄ ibe ke ire Jioba okibieen̄ ikwaan̄ kiji inye. Kubọk inu njeen̄, me ido New Zealand, gwun̄ ute enerieen̄ ge ekigwen Paul ichichini ogwu enenwaan̄ ge me ikarek ge mgbọ ikebilook ata etip inan̄a me uwu ire uwu. Me ewelegwe usen ya, ogwu enenwaan̄ ya ibeek uriaak, mè igwen erieen̄ Awaji, Jioba me emen uriaak kan̄, mè ibeek ibe mè Awaji iria ene ge ibe inu me lek kan̄. Paul ibe: “Mbubak mgbọ ita iraraka, nnunu me isotu uwu kan̄.”
Fuk Ebi Kọrint Eyi Adasi 3:9, mè igbaan̄ ikpa idodo yi:
-
Ike owa ke mbet lek inu yi orọrọ me New Zealand okijeen̄ ibe ke ire Jioba okibieen̄ ikwaan̄ kiji inye?
Fuk Ikwaan̄ 1:8, mè igbaan̄ ikpa idodo yi:
-
Keke orọ eji eweekbe ntap-ubọk Jioba me ikwaan̄ ilolook ata etip?
Ire oriọọn̄ ni?
Me nde geelek, me nkween̄mkpọ etete nde kiji, eji ekibọkọ kpokpo okitap ubọk inyi eji ekọt ekelook ata etip. Ire owuuk lek isi nkween̄mkpọ yi, ike owa ke omun̄ kpokpo ekinyi me ere ya?
6. Eji ekilook ata etip ike Awaji onyibe ida ibe eji ekerọ
Me adasi ukot, ebi ochicha misa ikpukput ebi udun̄ Jisọs ibe ekayaka ikikpa ata etip. Ebi eyi Karais me adasi ukot mitap efuuk “ikitumu ikọ me ibot ata etip” me uwu ikọ. (Ebi Filipai 1:7) Inu yaage si ke Ebi Ata-Ikọ Jioba ekirọ me chereyi. a
Fuk Ikwaan̄ 5:27-42, mè igbaan̄ ikpa idodo yi:
-
Keke orọ eji kpetele ikekilook ata etip? —Kpọ agba eyi 29, 38, mè 39.
IRE ENE IDO IBE: “Keke orọ Ebi Ata-Ikọ Jioba ekikpa ikọ Awaji inan̄a me uwu ire uwu?”
-
Keke ke obofọọk?
ME MGBIDIM
Jisọs ibe mè ebi udun̄ kan̄ elook ata etip me ido geelek. Jioba okitap ubọk inyi ebi eyi kan̄ ekọt ekerọ ikwaan̄ yi.
Idodo
-
Ike owa ke ekisa ilook ata etip me otutuuk linyọn̄ yi?
-
Ike owa ke ikwaan̄ ilolook ata etip okijeen̄ ibe ke eji mima ebi mbuuruk kiji?
-
Me nkeek kwun̄, ire ikwaan̄ ilolook ata etip mokọt ikinyi eji ubelejit ni? Keke orọ ofọọkbe ikeya?
WEEK
Kpọ-nu ubọk Ebi Ata-Ikọ Jioba ekilook ata etip me ama ile.
Ilolook Ata Etip Osibi Esese me Ere Ene Ewabe Me Paris (5:11)
Keke ke Ebi Ata-Ikọ Jioba erọ isasa itap ubọk inyi ebi ililibi ekot bak lek ufialek?
Ebi Ililibi Bak Lek Ufialek—Ubọk Ekijeen̄ Ema Mkpọ Ofolek Awaji (5:59)
Gban̄ ubọk ene ge okpabe ike isasa ugwem kan̄ inyi ilolook ata etip osabe inyi ọmọ ubelejit.
Kween̄ mkpọ ofolek usini ikọ efieekbe inwọn eji me uwu ikọ, echi orọrọ ibe ilolook ata etip ifet.
“Kingdom Preachers Take Their Case to Court” (God’s Kingdom Rules!, chapter 13)
a Ire Awaji onyi eji ida ibe eji ekelook ata etip. Eya orọ, Ebi Ata-Ikọ Jioba kpekibọkọ unye isasa ikpa ata etip me ubọk ebilene geege.
