INU NKWEEN̄ 22

Ike Owa Ke Obokọt Ikisa Ilook Ata Etip?

FIT

Ike okikween̄ atikọ okup me Baibul, omokọt ikikeek ibe, ‘Ìgbe ibe otutuuk ene enọ atikọ yi!’ Ire ikeya, igbe ibe otutuuk ene enọ etip yi! Ire, omokọt ikikaan̄ ukpook ofolek ikpakpa inu okikween̄ inyi ebi ene. Kè eji enekpa-nu ubọk obokọt itim igak ukpook yi mè ubọk obokisa me ubelejit ikikpa ata etip okup me Baibul.

1. Ike owa ke obosa ikikpa inu okikween̄ inyi ebi oriọọn̄be isi?

Ebi udun̄ Jisọs ebe: “Eji kpebekọt itele itutumu inu eji esabe chieen̄ kiji imun̄, mè isa si utọn̄ kiji inọ.” (Ikwaan̄ 4:20) Ema mima atikọ Baibul ire lek ema ekiweek ikpakpa inyi otutuuk ene. Ire ikeya ke ikup owu me lek ni? Ire ikeya, kisa me ulibi kikpa inu okikween̄ nyi ebi ototun̄ ukan̄ kwun̄ mè ebi unene kwun̄ me irek geelek.—Fuk Ebi Kọlọsi 4:6.

Usini oniin̄ obokọt isa ibene

Osikigọọk ogwu uwu kwun̄ ikpa usem, omokọt ibene ikpa atikọ Baibul sa me itutumu ibe: “Ikaan̄ inu nkween̄be nde keyi okitop emi me lek.”
Fuk mè iyaka ire kpa ere Baibul okitap ene efuuk me owot nyi ogwu unene kwun̄ okifiak orukan̄ mè iyaka ire okakaan̄ sasaak.
Tumu inu okween̄be me nkween̄mkpọ Baibul kwun̄ mè iyaka ire nkween̄mkpọ ntitiin̄ nyi ebi melek kwun̄ ekisi ikwaan̄, ebi idodo owu ubọk ota nde kwun̄ ojebe.
Jeen̄ ebi unene kwun̄ mkpọ ofolek jw.org.
Gwen ebi ofifi ene ibe egọọk owu ekup me nkween̄mkpọ Baibul kwun̄ mè iyaka ire jeen̄ ema ubọk ebekọt ido nkween̄mkpọ Baibul me jw.org.

2. Keke orọ igbebe ibe oto me isi igọgọọk ntitiin̄ ikilook ata etip?

Ebi udun̄ kè Jisọs kpekpa ata etip inyi ebi ema eriọọn̄be isi gaalek. Jisọs “iria ema isibi ene iba iba, ibe edasi eje esi ama geelek mè ere geelek” esi elook ata etip. (Luk 10:1) Ubọk eneen̄be ikpakpa ata etip yi inyi owuwa ene irek ibe enọ ikọ Awaji. Ikekigbaan̄ ilook ata etip inyi ebi udun̄ kè Jisọs atalek unwọọn̄. (Luk 10:17) Ire omokọt ito me isi igọgọọk ntitiin̄ ikilook ata etip ni?

KWEEN̄ GBAALEK

Kween̄ ubọk obokọt itim igak ukpook mè ikaan̄ unwọọn̄ ekikaan̄ inan̄a me lek ilolook ata etip.

3. Jioba mokup melek kwun̄

Usini ebi ikiweek ilolook ata etip mekọt ikikaan̄ ukpook ofolek ubọk ebi ene eberọ eru me lek kiban̄ mè etip kiban̄.

Ire okekitet ukpook ikpakpa inu okikween̄ ni? Keke orọ ofọọkbe ikeya?

Fit FIDIO yi, mè igbaan̄ ikpa idodo yi ogọgọọk.

FIDIO: Mbeek Jioba Ibe Inyi Emi Unye-Ejit (4:05)

Ike owa ke bọn ute ebi ijija chi esa itim igak ukpook ema ekaan̄be?

Fuk Asaya 41:10, mè igbaan̄ ikpa idodo yi:

Mgbọ geelek osikaan̄ ukpook ilolook ata etip, ike owa ke uriaak obosa itap ubọk inyi owu?

Ire oriọọn̄ ni?

Owuwa Ebi Ata-Ikọ Jioba miwuuk lek ikikeek ibe ke ema kpekọt ilook ata etip. Kubọk inu njeen̄, Sergey ikiwuuk lek imun̄ lek kan̄ kubọk ogwu ikakupge me lek inu geege, igọgọọk ebi ene ikpa usem si ikiyọyọt me lek kan̄. Ire, mgbọ ibenebe ikikween̄ Baibul, itumu ibe: “Ikerere ibe ke nkaan̄ ukpook, mbene ikikpa inu nkikween̄ inyi ebi ofifi ene. Ike emi chieen̄ ibe ke ikekikpa inu ofolek Baibul irọ ibe nkaan̄ unye-ejit. Irọ si ibe nchieek nnye me lek ayaya inu nkikween̄.”

4. Kijeen̄ Ebi Ene Ulibi

Osibolook ata etip inyi ebi ene, ikare inu obotumu gaalek ke obokikeek mkpọ ofolek, ire, kikeek si ubọk obosa itumu. Fuk Timọti Eyi Òso Iba 2:24 mè Pita Eyi Adasi 3:15, mè igbaan̄ ikpa idodo chi:

Ike owa ke obotap agba ere Baibul chi me ikwaan̄ osikigọọk ebi ene ikpa Baibul?
Ire usini ebi uwu kwun̄ mè iyaka ire ebi unene kwun̄ kpechieek me lek inu okikpa inyi ema, keke ke obokọt irọ? Keke kpogbe ibe orọ?
Keke orọ igbebe ibe okosa me iriọọn̄-inu okodo idodo kpan̄asi itutumu inyi ema inu ema ebechieek me lek?

5. Ilolook ata etip ikinyi ene unwọọn̄

Jioba onyi Jisọs ikwaan̄ ilolook ata etip. Ike owa ke Jisọs omun̄ ikwaan̄ yi ni? Fuk Jọn 4:34, mè igbaan̄ ikpa idodo chi:

Irerie ata inorie ikinyi eji ugwem mè ikirọ ibe eji ekebele ejit. Keke orọ Jisọs osabe irọrọ nkeek Awaji—kubọk ilolook ata etip—itọt me lek ikekirie inorie?
Kpasi unwọọn̄ ke okeek ibe ke ene obokaan̄ ire ikilook ata etip?

Mkpọ echi obotap ubọk inyi owu

Me nkween̄mkpọ etete nde, kween̄ ubọk obosa ibene ukpatu melek ene.
Do ogwu okigọọk ikween̄ mkpọ ubọk obosa igọọk ikirọ mkpọ me nkween̄mkpọ etete nde. Mkpọ irọrọ chi motap ubọk inyi owu okọt oneen̄ lek ojaan̄ inyi okokpa inu okikween̄ onyi ebi ofifi ife.
Sa idodo okup me agan̄ “Usini Ene Ekibe” mè “Ire Ene Ido Ibe” me emen ikpa keyi sa neen̄ ubọk obosa ifọọk otu idodo ebi ene ekido mè echi ekisa ijit ata etip.

IRE ENE IDO IBE: “Ifiin̄ o, ugwem ikukup inyi owu?