INU NKWEEN̄ 34

Ike Owa Eji Ebesa Ikijeen̄ Ibe ke Eji Mima Jioba?

FIT

Ire oma Awaji mgbọ keyi igak mgbọ obenebe ikikween̄ Baibul ni? Ire omoma ikekirọ ibe mgbaan̄je kwun̄ melek kan̄ ikinye ni? Ire ikeya, riọọn̄ ibe ke ike Jioba okimun̄ ibe ke ima okaan̄be me lek kan̄ okimin, ikeya si ke ibokima owu mè ikikpọ owu chieen̄ me lek. Ike owa ke obosa ikijeen̄ Awaji ibe ke oma ọmọ?

1. Ike owa ke eji ebekisa ijeen̄ Jioba ibe ke eji mima ọmọ?

Eji ekijeen̄ ima kiji me lek Jioba sa me ikekisiki ibot inyi ọmọ. (Fuk Jọn Eyi Adasi 5:3.) Awaji ikakitet ene geege me ubọk unye ibe isiki ibot inyi ọmọ. Kpan̄asi ikeya, inyi eji ge ge irek isasa igobo mè ire eji mesiki ibot inyi ọmọ sa ire eji kpebesiki ibot. Mije keke ni? Jioba iweek ibe eji ekesa “otutuuk ejit” kiji esiki ibot enyi ọmọ. (Ebi Rom 6:17) Eyi isibi ibe ke Awaji iweek ibe okosiki ibot onyi ọmọ bak lek omabe ọmọ, ikare bak lek etetbe owu me unye ubọk. Okpọkọ 3 mè 4 me ikpa yi motap ubọk irọ inyi okọt okojeen̄ ima me lek Jioba sa me ikekirọ inu obokibele ọmọ ejit mè ikekijit inu ichabe.

2. Keke orọ ikiyọt eji me lek usini mgbọ ijejeen̄ ibe ke eji mima Jioba?

“Ufialek ogwu ata irọrọ ikekiwa enenen.” (Okwa Itọn̄ 34:19) Otutuuk kiji ekirurumun̄ me lek ekasoge kiji. Eji si mekọt ikichichini uyọt mkpọ, nnaan̄, mè esese esese ufialek. Mgbọ geelek eji ekije itibi ufialek, mokọt iyọt eji me lek irọrọ mkpọ Jioba oweekbe me ubọk kiji, mije, irọrọ inu olọlọ ikikukup mfufet. Ire, osikup inye ikirọ mkpọ Jioba oweekbe, okijeen̄ ọmọ ibe ke owu oma ọmọ igak inu geelek. Okijeen̄ si ibe ke okigbe utoon̄-ejit inyi ọmọ. Ọmọ si mogbe utoon̄-ejit inyi owu. Ikpobotele owu.—Fuk Okwa Itọn̄ 4:3.

KWEEN̄ GBAALEK

Kween̄ inu orọrọ nsiki-ibot kwun̄ okupbe ufiak inyi Jioba, mè kween̄ si mkpọ obokọt itap ubọk inyi owu okup onye okogbe utoon̄-ejit onyi ọmọ.

3. Ikọ eyi ogbagbaan̄ owu me lek

Igọọk me lek inu okup me ikpa Jobu, Setan itumu ikọ ikeme otutuuk ebi ikiweek itọtọbọ ebum inyi Jioba, ikare Jobu gaalek. Fuk Jobu 1:1, 6–2:10, mè igbaan̄ ikpa idodo chi:

Igọọk me lek inu Setan otumube, keke orọ Jobu osikibe ibot inyi Jioba?—Kpọ Jobu 1:9-11.
Keke ke Setan otumu ofolek otutuuk ebilene, ikerere owu si?—Kpọ Jobu 2:4.

Fuk Jobu 27:5b, mè igbaan̄ ikpa idodo yi:

Ike owa ke Jobu osa ijeen̄ ibe ke ọmọ ichubọk ima Jioba?

Jobu ijeen̄ ibe ke ọmọ ima Jioba sa me igbegbe utoon̄-ejit inyi Awaji

Eji ekijeen̄ ibe ke eji mima Jioba sa me ikukup inye ikigbe utoon̄-ejit inyi ọmọ

4. Kirọ inyi Jioba ikibele ejit

Fuk Urọk 27:11, mè igbaan̄ ikpa idodo chi:

Ike owa ke ikikup me lek Jioba osikirọ inu otatat mè ikisiki ibot inyi ọmọ? Keke orọ ofọọkbe ikeya?

5. Omokọt igbe utoon̄-ejit inyi Jioba

Ima eji ekaan̄be me lek Jioba okibieen̄ eji ibe eji eketumu mkpọ ofolek kan̄ enyi ebi ofifi ife. Igbegbe utoon̄-ejit kiji okibieen̄ eji ibe ekerọ ikeya ikerere me mgbọ ikafetge. Fit FIDIO yi, mè igbaan̄ ikpa idodo chi ogọgọọk.

FIDIO: Kikpa Ichechieek Kwun̄ Sibi Ikerere Me Isi Ukeme (5:09)

Ire ikekiyọt owu me lek itutumu mkpọ ofolek Jioba inyi ebi ene ni?
Me emen fidio yi, keke otap ubọk inyi Grayson ibe itim igak ukpook?

Ikifet igbegbe utoon̄-ejit inyi Jioba mè ire eji ikima mkpọ echi imabe mè ikicha mkpọ echi ichabe. Fuk Okwa Itọn̄ 97:10, mè igbaan̄ ikpa idodo chi:

Igọọk me lek mkpọ okween̄be, keke ore usini inu echi Jioba omabe? Keke ore usini inu echi ichabe?
Ike owa ke obokọt ikween̄ imama ata inu mè ichacha ijo inu?

6. Isisiki ibot inyi Jioba ikirọ eji oruru

Isisiki ibot inyi Jioba onwọn ichit. Fuk Asaya 48:17, 18, mè igbaan̄ ikpa idodo chi:

Ire eji mekọt ikaan̄ utoon̄-ejit ibe ke Jioba iriọọn̄ mkpọ onwọnwọn ichit mgbọ geelek inyi eji ni? Keke orọ ofọọkbe ikeya?
Ike owa ke ikwekween̄ Baibul mè mkpọ ofolek ata Awaji, Jioba osa irọ owu oruru?

USINI ENE EKIBE: “Inu nkirọ ikagbaan̄ me lek Awaji.”