OKPỌKỌ 5
Me Mgbọ Mun̄-Ile Usen Kè Nuwa—Ebi Owa Egban̄ Utọn̄? Ebi Owa Kpegban̄ Utọn̄?
Ogbogbo ebi iluk me mgbọ ukọt kè Nuwa ekirọ ijo inu. Ibebene 6:5
Adam me Îfu mikaan̄ nsabọn. Sa me ikeya ebilene enenibene iwa me inyọn̄-ijọn̄ yi. Ike mgbọ ojebe, usini melek ebi osat ikwaan̄ migọọk Setan mè ikpaka otu Awaji.
Ebi osat-ikwaan̄ enan̄a mè emen inyon̄ inu me isi îjọn̄ mè inwene lek kiban̄ ikana ebirieen̄, me iteen̄ ebibaan̄ isa irọ nwa kiban̄. Ebibaan̄ cha mimaan̄ bọọn̄ ebi esibi esese mè ikaan̄ unye, mè ire ebi afa.
Ebi ikirọ ijo inu eneniwa ichit inyọn̄ isi ijọn̄. Baibul ibe: “Inu ikpak ebilene îwa enenen me linyọn̄, mè imun̄ si ibe ke otutuuk ekiket ejit kiban̄ mgbọ geelek ire gaalek ijo ijo.”
Nuwa igban̄ utọn̄ melek Awaji me inama ikpele uji. Ibebene 6:13, 14, 18, 19, 22
Nuwa ire ata ene. Jioba itumu inyi Nuwa ibe ke ọmọ mosa mun̄-ile ifiat ebi ijo.
Awaji itumu si inyi Nuwa ibe inama ikpele uji, me isa itap ebi ototun̄ ukan̄ kan̄ mè mbet anam geelek.
Nuwa itaba ebi ene ubọk me utọn̄ ofolek mun̄ ile ya obonu, ire, ema kpegban̄. Usini kiban̄ michak Nuwa; usini ene si micha ọmọ.
Mgbọ inamabe uji ile ya isana, Nuwa ititen̄e esese anam geelek itap me emen uji ya.
